E Na’o Tusiga Faaeletonika: Talavou Matutua
Mauaina o le Maufetuunai Faalelagona ia Keriso i Taimi o O’u Luitau Faaumiumi o le Soifua Maloloina
E nofo le tusitala i Chile.
Ina ua maua a’u i se ma’i e lē mafai ona fo’ia, sa ou liliu atu ia Keriso mo le filemu.
Sa ou papatiso a o ou talavou, ma sa ou fiafia i le talalelei a Iesu Keriso. Ae peitai, i le aluga o taimi, sa ou lagonaina le faaitiitia o le uunaiga e ola i le talalelei aua e leai se tasi o lo’u aiga na avea ma tagata o le ekalesia ma sa faigata ona ou taulimaina na o a’u ou mausa faaleagaga.
Sa ou iloaina lava e moni le Ekalesia, ae ou te lei manao e tuuina atu lo’u loto atoa i ai, aua o se matuā tuuto lena mea. Na oo ina lē tutusa lo’u auai i le lotu. Ona amata lea ona ou faamuamuaina lo’u olaga faaagafesootai nai lo le ola ai i le talalelei, ma na iu lava ina ou le toe ola i poloaiga. Sa ou ta’uamiotonuina a’u amioga i le faapea atu e lelei le faia o soo se mea ou te manao ai, pau lava le mea ia ou taumafai e avea ma se tagata lelei.
Ae o lena faaiuga na ou matuā tigaina ai lava.
Ina ua mavae se taimi umi o ola i fafo atu o le Ekalesia, sa ou maua i le ma’i o le vairasi o le puipuiga ua faaletonu [immunodeficiency] (HIV). O lenei tulaga e faaumiumi, e agaigai i luma, ma e leai se vaifofō. Sa ou faavauvau.
Sa ou fai atu foi fesili lava ia e tasi ou te mautinoa o le toatele o i tatou e fesiligia pe a feagai ma ni suesuega faigata po o isi luitau faaumiumi: E faapefea ona ou toe olioli i le olaga? E mafai faapefea ona ou maua se faamoemoe mo soo se mea?
O le tali?
Iesu Keriso.
Tuuina o Lo’u Loto Atoa i le Talalelei
I lena taimi o le pogisa, ina ua ou maua le faapogai o lo’u ma’i ma aioi atu mo se toomaga, sa ou lagonaina e pei ua silafia atoatoa e le Tama Faalelagi ma Iesu Keriso o’u lagona. Na ofoina mai e le Agaga ia te a’u le faamaninoga lea na fesoasoani ia te a’u e toe mafaufau ai i a’u faaiuga.
Sa ou iloaina e tatau ona ou toe valaaulia le Faaola i lo’u olaga pe afai o le a ou maua le filemu tumau. O lea, sa ou faia ai se taimi faatulagaina ma lo’u epikopo ma le peresitene o le siteki e amata ai le faagasologa o le salamo.
A o ou galulue faatasi ma nei taitai matagofie, sa ou lagonaina lo laua alofa ma le lagolago, ma sa toe ulufale mai ai le mana gafatia o Iesu Keriso i lo’u olaga. Sa fesoasoani o’u taitai ia te a’u e fai ni sini. Sa amata ona ou alualu i luma i le ala o le feagaiga. Sa ou tuuina lo’u loto atoa i le talalelei mo le taimi muamua i lo’u olaga, ma sa mafai ona ou vaaia le eseesega ia te a’u lava ia pe a ou faamuamuaina la’u sootaga ma le Tama Faalelagi ma le Faaola.
Sa aoao mai talu ai nei Sister Amy A. Wright, Fesoasoani Muamua i le Au Peresitene Aoao o le Peraimeri, e uiga i le auala e mafai ai e le Faaola ona fesoasoani ia i tatou ia maua le faamoemoe ma le olioli e ui lava i o tatou tulaga faigata:
“O Iesu Keriso o le ‘faamoemoe i lou iuga.’ E leai sa tatou mea o i ai, pe le’i faia, e le au i ai Lana taulaga e le i’u ma e faavavau. O Ia o le mafuaaga e le mafai ai lava ona i’u la tatou tala. …
“O le ola faavavau o le olioli e faavavau. O le olioli i lenei olaga, i le taimi nei—e le ona o luitau o o tatou taimi ae ona o le fesoasoani a le Alii e aoao mai ai ma i’u ai ina faatoilalo i latou—ma le olioli e le mafuatiaina i le olaga a sau.
O lenei upumoni o le olioli ua faaalia i lo’u olaga a o faaauau pea ona ou taulai atu ia te Ia ma, toe pipiimau i le ai uamea—o le afioga a le Atua—i aso taitasi (tagai i le 1 Nifae 15:23–24).
Mauaina o le Maufetuunai Faalelagona i Taimi Faigata
A o faaauau pea ona ou maua le mafanafana ma taulimaina lo’u ma’i, sa faasino atu a’u e lo’u epikopo i le kosi o le ola tutoatasi a le Ekalesia “Mauaina o le Malosi i le Alii: Maufetuunai Faalelagona.”
Ou te talitonu o lenei kosi o se vaega ua tuuina mai e le Atua, musuia, ma e faavavega. Sa ou aoaoina le auala e suia ai lenei ma’i, lea na foliga mai ai ua faanoanoa le olaga, i se aafiaga e aoao ai. O lenei kosi na aoaoina ai a’u i le auala e atiina ae ai le faatuatua loloto i le Faaola, aoao mamanu o mafaufauga lelei, pulea le atuatuvale ma le popole, ma iu ai ina agai i luma i lo’u olaga ma le faamoemoe.
E oo lava i mea faapenei, o nisi aso e faigata ma faavaivai. O le popole ma le faanoanoa o nisi taimi e o faatasi ma na taimi e matuai faigata lava. Ae o le mulimuli i le fautuaga a le perofeta ua fesoasoani ia te a’u e saili ai lo’u ala i nei taimi faigata.
Na faamalamalama mai e Peresitene Russell M. Nelson le taua o le “mafaufau faaselesitila” pe a feagai ma luitau faigata, ma faapea mai: “Mafaufau i le tali a le Alii ia Iosefa Samita ina ua ia aioi atu mo se toomaga i le Falepuipui o Liperate. Sa aoao atu e le Alii le Perofeta e faapea, o faiga lē alofa o ia o le a ia maua ai le aafiaga po o le poto masani ma o le a avea ma ona lelei [tagai i le Mataupu Faavae ma Feagaiga122:7]. “Afai e te talitalia lelei,” sa folafola atu e le Alii, ‘o le a faaeaina oe e le Atua i lugā’ [Mataupu Faavae ma Feagaiga 121:8]. Sa aoao atu e le Alii ia Iosefa e mafaufau faaselesitila ma ia vaai faalemafaufau i se taui e faavavau nai lo le taulai atu i faigata ogaoga o le aso.”
O lea la, i le mulimuli ai i le fautuaga a Peresitene Nelson, o le mea lenei ou te faia e fesoasoani ai i lo’u soifua maloloina faalemafaufau—ou te taulai atu i mea lelei. Ou te faia le mea sili ou te mafaia e tausia ai lo’u soifua maloloina faalemafaufau e ala i punaoa faaleagaga ma faaletino. Ou te vaai i le ata atoa—o le vaaiga e faavavau. Ou te manatua ma tausia a’u feagaiga.
O le mea sili lava, ou te vaavaai atu i lo’u Faaola, o Iesu Keriso, mo le faamoemoe ma le malosi.
Afai e te tauivi ma se luitau faaumiumi, pe e mafua mai i faaiuga ua tuanai, faaiuga a isi, po o le mea moni lava tatou te ola i se lalolagi le atoatoa, ia manatua folafolaga o le filemu, malologa, ma le olioli lea ua ofoina mai e lo tatou Tama Faalelagi ma Iesu Keriso ia i tatou a o tatou liliu atu ia i Laua.
Ou te faafetai i le Tama Faalelagi i aso uma mo le fesoasoani mai ia te a’u ia sili atu ona ou le maluelue i o’u tauiviga faaumiumi o le soifua maloloina. Ou te lei mafaufauina lava o le a ou tuuina atu le faafetai mo se luitau faapenei, ae ou te faafetai ona o lenei tauiviga na fesoasoani ia te a’u e iloa ai lo’u manaomia tele o lo’u Faaola i lo’u olaga. Ou te lagonaina le faateleina o le ogatasi o lo’u loto ma Lona loto i aso uma.