Aisea tatou te manaomia ai le Tusi a Mamona?

O le Tusi a Mamona na tusia mo o tatou aso. E molimau ia Iesu Keriso, o loo i ai le atoaga o Lana talalelei, ma ua toefuatai mai ai upumoni na leiloloa ona o le Liliuese. Na aoao mai Iosefa Samita e faapea, o le Tusi a Mamona “o le maa’au’au foi lea o la tatou tapuaiga, e sili foi ona latalata atili atu o le tagata i le Atua i lona ola ai i ona mataupu, nai lo se isi lava tusi (faatomuaga i le Tusi a Mamona).

Saunia oe lava ia faaleagaga

Mafaufau i aafiaga sa e oo i ai i le suesueina o le Tusi a Mamona. Aisea e taua ai ia te oe le Tusi a Mamona?

O faapefea ona uunaia e le Tusi a Mamona olaga o alii talavou? O a ni mea e mafai ona fai e alii talavou e faamalolosia ai a latou molimau i le Tusi a Mamona? E mafai faapefea ona fesoasoani le Tusi a Mamona ia i latou e faailoa ai luitau o ona po nei?

Ia suesue ma le agaga tatalo ia mau ma punaoa nei. E mafai faapefea ona e fesoasoani i alii talavou ia lagona le mana o le Tusi a Mamona?

1 Nifae 13:40; 2 Nifae 3:12 (O le Tusi a Mamona ua toefuatai mai ai upumoni ma faafememea’i ai mataupu sese)

2 Nifae 25:23, 26; 33:10–11 (Ua molimau mai tusitala o le Tusi a Mamona ia Iesu Keriso)

2 Nifae 29:7–11 (O le Tusi a Mamona ua faailoa mai ai e fetalai mai le Atua i Lana fanau i le tele o atunuu)

MF&F 20:8–16; 42:12 (O le Tusi a Mamona o loo i ai le atoatoaga o le talalelei a Iesu Keriso)

Tusi a Mamona itulau autu ma le faatomuaga

Thomas S. Monson, “O Le Mana o le Tusi a Mamona,” Ensign po o le Liahona, Me 2017, 86–87

Gary E. Stevenson, “Vaai i le Tusi, Vaai i le Alii,” Ensign po o le Liahona, Nov. 2016, 44–47

LeGrand R. Curtis Jr., “E I Ai Le Mana i le Tusi,” Ensign po o le Liahona, Nov. 2016, 68–71

Kevin W. Pearson, “Tumau i le Laau,” Ensign po o le Liahona, Me 2015, 114–16

Vitio: “Faatomuaga i le Tusi a Mamona”

2:43

Aoao atu i le ala a le Faaola

Sa valaaulia e le Faaola isi e galulue i le faatuatua e aoao upumoni o le talalelei. Sa Ia aoao mai i tatou, “Ina ole atu ia, ona outou maua ai lea” (Ioane 16:24). E mafai faapefea ona e uunaia alii talavou ia mulimuli i lenei mamanu a o latou saili ia maua pe faamalolosia a latou molimau i le Tusi a Mamona? (tagai Moronae 10:3–5).

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

O se korama, ia fausia pe tusi se ata o se maaauau faaofuofu (tagai i le saunoaga a Elder Gary E. Stevenson “Vaai i le Tusi, Vaai i le Alii”). Fai atu i alii talavou e sue ni mafuaaga i le saunoaga a Elder Stevenson i le aisea ua avea ai le Tusi a Mamona ma maaauau o la tatou tapuaiga.
Ia valaaulia ni isi o alii talavou e faasoa atu mea na sili ona uunaia ai i latou mai le lesona o le vaiaso ua te’a.

Aoao faatasi

O gaoioiga taitasi o loo i lalo e mafai ona fesoasoani i tagata o le korama ia malamalama i le taua o le Tusi a Mamona. I le mulimuli ai i le musumusuga a le Agaga, filifili se [gaoioiga] se tasi pe sili atu o le a sili atu ona aoga mo lau korama:

Valaaulia uso o le korama e faaigoa ni mea e fatuina le mana, e pei o maa, afi, pe’ape’a, ma masini sola uila. Valaaulia alii talavou e fai se lisi o auala e aumaia ai e le Tusi a Mamona le mana i o tatou olaga. Fai atu i alii talavou e suesue le lauga a Peresitene Thomas S. Monson “O Le Mana o le Tusi a Mamona,” ma tagai mo ni malamalamaaga e mafai ona latou faaopoopo atu i a latou lisi. Tuu atu se taimi i uso o le korama e mafaufau loloto ai pe o le a faapefea ona latou faaaofia ai le lu’i a Peresitene Monson i le faitauina o le Tusi a Mamona i aso taitasi: Fai atu ia i latou e faasoa mai ni o latou manatu. E ono mafai foi ona e mafaufau e valaaulia alii talavou e susue a latou tusi o le Faataunuuina o Lo’u Tiute i le Atua i le itulau 29, 53, po o le 77, lea e mafai ona latou tusia ai le igoa o se tasi e mafai ona latou valaauliaina e faitau le Tusi a Mamona.
Valaaulia sui o le korama e saili i le saunoaga a Elder LeGrand R. Curtis Jr. “E I Ai Le Mana i le Tusi” po o le saunoaga a Elder Kevin W. Pearson “Tumau i le Laau,” ma vaavaai mo ni malamalamaaga e uiga i le Tusi a Mamona ma pe aisea e taua tele ai. E mafai ona e valaauliaina alii talavou e faasoa mai nisi o upusii mai lauga po o ni mau e fiafia i ai i le Tusi a Mamona. E mafai foi ona e uunaia i latou e tusi i lalo ma faasoa mai a latou molimau e uiga i le Tusi a Mamona.
Fai atu i alii talavou taitoatasi e faitau se mau se tasi o loo lisiina i lenei otootoga po o le itulau autu o le Tusi a Mamona, ma vaavaai mo tali i le fesili, Aisea tatou te manaomia ai le Tusi a Mamona? Fai atu i alii talavou e tusi a latou tali i luga o le laupapa. Fai atu ia i latou e filifili se tasi o tali o i luga o le laupapa latou te mananao e aoao atili e uiga i ai ma faasoa atu mea na latou filifilia.
Fai atu i alii talavou taitoatasi e sue se mau i le Tusi a Mamona e taua ia te ia pe sa i ai se uunaiga i lona olaga. Vaevae le korama i vaega laiti taitoalua pe taitoatolu, ma fai atu i alii talavou taitoatasi e faasoa atu lana mau filifilia, pe aisea ua taua ai ia te ia, ma soo se aafiaga sa ia maua i lena fuaitau. Valaaulia ni nai alii talavou e faasoa atu i le korama atoa. O a ni mea ua aoao mai e nei aafiaga ia i tatou e uiga i le taua o le Tusi a Mamona?
Faaali le vitio “Faatomuaga o le Tusi a Mamona,” ma fai atu i tagata o le korama e tusi i lalo tali i le fesili “Aisea tatou te manaomia ai le Tusi a Mamona?” a o latou matamata. Tuu atu latou te faasoa mai mea latou te tusia. Mata e ese faapefea o latou olaga pe a na fai latou te lei mauaina le Tusi a Mamona?

2:43

Fai atu i alii talavou e faasoa atu mea sa latou aoaoina nei. Pe ua latou malamalama i le mafuaaga e taua ai le Tusi a Mamona? O a ni o latou lagona po o manatu o i ai? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Afai e faitau leotele se tagata e toatasi, e tatau ona e uunaia ia isi ina ia mulimuli ia latou tusitusiga paia. Ia valaaulia i latou e faalogo ma vaavaai mo mataupu faavae po o ni manatu patino. Ia tuu atu se taimi mo i latou e sue ai fuaiupu taitasi a o le’i faitauina. Afai o se fuaiupu o loo aofia ai ni upu po o ni fuaitau faigata pe le masani ai foi, ia faamalamalama nei fuaiupu a o le’i faitauina. Afai e i ai se tasi o le vasega e faigata ona faitau, fesili mo nisi e ofo mai nai lo le faitau feauaua’i” (O Le Aoao Atu, E Leai Se Isi Valaauga E Sili Ai [1999], 58).

Valaaulia e faatino

O le alii talavou o loo taitai e faaiuina le fonotaga. E mafai ona ia:

Ia tofi ni nai alii talavou e faasoa atu a latou molimau pe aisea tatou te manaomia ai le Tusi a Mamona ma faamatala pe na faapefea ona latou iloa e moni.
Tufa atu kopi faafaifeautalai o le Tusi a Mamona, pe afai e mafai, ma valaaulia tagata taitoatasi o le korama e tusi lana molimau i le pito i luma ma tuu atu le tusi i se tasi.