Na cava na vuna e bibi kina na iMatai ni Raivotu?

E rau a rairai ki vua na Parofita o Josefa Simici, na Kalou na Tamana kei na Luvena, o Jisu Karisito, ena vulaitubutubu ni 1820. Na raivotu oqo, ka vakatakila na itekitekivu ni Veivakalesui Mai ni kosipeli, sa dua na ka bibi duadua e yaco me tekivu mai na Tucaketale mai na mate i Jisu Karisito. Na masu malumalumu nei Josefa Simici a muataki ki na vakalesui mai ni dina ni kosipeli, lewa ni matabete, kei na taqomaki ni cakacaka vakalotu. “E dua ga na ivakatakila oqo sa sauma kece sara na [taro] ni veika ni vuravura oqo me baleta na Kalou kei na kena ituvaki lagilagi. ... Sa kilai levu tu ni sa lesi ira na tamata ena vuku ni nona kauwaitaka na kawa tamata. Sa vakadeitaki kina na kena toso na cakacaka oqo. Era a vakamatatataki mai ena imatai ni raivotu lagilagi o ya kei na so tale na veidina lagilagi oqo ena” (Nodra iVakavuvuli Na Peresitedi Ni Lotu: David O. McKay [2003], 108).

Mo vakarautaki iko vakayalo

O ciqoma vakacava na ivakadinadina ni o Josefa Simici a raica na Kalou na Tamada kei na Luvena, o Jisu Karisito? E sa bau vakalougatataki vakacava na nomu bula ena vuku ni ivakadinadina oqo? Na cava e vakaibalebale kina vei iko na iMatai ni Raivotu?

E rawa vakacava me vakatitobutaka nodra ivakadinadina vakayadua na cauravou ena nomu kuoramu na vulici ni iMatai ni Raivotu? E rawa vakacava mo vukei ira na cauravou me ra kila na ibalebale ni ka cecere a yaco oqo?

Ena nomu vakavakarau, vulica ena masumasu na ivolanikalou oqo kei na ivurevure kei na so tale o digitaka. Na cava o vakila ni na vakaibalebale vakalevu duadua vei ira na cauravou o vakavulica?

Josefa Simici—Ai Tukutuku 1:11–19, 24–25

Dieter F. Uchtdorf, “Na Vua ni iMatai ni Raivotu,” Ensign se Liaona, Me 2005, 36–38

Vidio: “Na Veivakalesui Mai”, “Ask of God: Joseph Smith’s First Vision,” “Face to Face with President Eyring and Elder Holland: What do we learn about the nature of God from the First Vision?”

Veivakavulici ena ivakarau ni Turaga

Na i Vakabula e sureti ira na daumuri Koya me ra vakadinadinataka kivei ira eso tale na taucoko ni dina ni Nona ivakavuvuli. Ena nodra vakayacora, na Yalotabu e tara na lomadra. E rawa mo vakauqeti ira vakacava na cauravou me ra veiwaseitaka kina vakai ira na nodra ivakadinadina.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Solia e dua na gauna vei ira yadua na lewe ni kuoramu me cavuta e dua na ka e nanuma mai na lesoni ni macawa sa oti.
Vakuoramu, lagata na sere ni lotu “Matai ni Masu nei Josefa Simici” (Sere ni Lotu, naba 14). Sureti ira na cauravou me ra wasea na veika era vakila baleti Josefa Simici kei na veika a sotava nona raica ka vosa kivua na Kalou na Tamana kei Jisu Karisito.

Vulica vata

Na itaviqaravi yadua e koto e ra e rawa me vukea na lewe ni kuoramu me ra vulica me baleta na iMatai ni Raivotu i Josefa Simici. Muria na veidusimaki ni Yalotabu, digitaka e dua se sivia ka na ganita vakalevu duadua na nomu kuoramu:

Sureti ira na cauravou me ra vola eso na veivakalougatataki era sa ciqoma me baleta na iMatai ni Raivotu. Kerei ira me ra vakasaqara eso tale na veivakalougatataki ni iMatai ni Raivotu ena nodra wilika na iotioti ni 10 na parakaravu ni vosa nei Peresitedi Dieter F. Uchtdorf’ “Na Vua ni iMatai ni Raivotu.” Sureti ira me ra wasea na veika era kunea kei na veika era vakila me baleta na bibi ni iMatai ni Raivotu.
Vakuoramu, wilika na iMatai ni Raivotu i Josefa Simici ena Josefa Simici—Ai Tukutuku 1:7–20. Sureti ira na cauravou me ra vakasaqara na dina e rawa meda vulica mai na veika e sotava o Josefa (kena ivakaraitaki, na Tamana kei na Luvena e rau dina, e rau duidui yago; o Setani kei na nona kaukauwa e rau dina, ia na kaukauwa ni Kalou e sa cecere; na Kalou e rogoca ka sauma na masu; e sega ni mudu na ivakatakila). Sureta e dua na cauravou me vola na dina ena vavaloaloa. E duidui vakacava na dina oqo mai na nodra vakabauta eso tale na vakabauta vakalotu? E duidui vakacava na noda bula kevaka eda sega ni kila na veika oqo?
Sureti ira na cauravou me ra wilika ena vakadirorogo ka tugana na iMatai ni Raivotu i Josefa Simici kei na nona ivakadinadina ena Josefa Simici—Ai Tukutuku 1:11–19, 24–25 (se sarava na vidio “Na Veivakalesui Mai”). Kerei ira me ra vakasamataka baleta na vuna e yaga kina na iMatai ni Raivotu ena itukutuku kei vuravura. Na cava na vuna e bibi kina vei keda vakayadua? Wasea nomu ivakadinadina me baleta na bibi ni iMatai ni Raivotu, ka sureti ira na cauravou me ra wasea nodra vakanananu kei na ivakadinadina.
Sureti ira na cauravou me ra railesuva na itukutuku vakaivolanikalou me baleta na Kalou na Tamada kei Jisu Karisito ena nodrau vakaraitaki Rau kivei ira na kai vuravura (me vaka na Maciu 3:13–17; Cakacaka 7:54–60; 3 Nifai 11:3–10). E rawa tale ga mo vakaraitaka na iyaloyalo ni veika a yaco oqo (raica na Gospel Art Book,35, 63, kei na 82). Kerei ira me ra vakalekalekataka na itukutuku yadua. Qai sureti ira me ra wilika Josefa Simici Ai Tukutuku 1:17 (raica na Gospel Art Book,90). E tautauvata vakacava na iMatai ni Raivotu i Josefa Simici kei na so tale na ivakaraitaki oqo? E tautauvata vakacava? Sureti ira na cauravou me ra wasea na vuna e bibi kina vei ira na iMatai ni Raivotu.

Kerei ira na cauravou mera wasea na veika era sa vulica nikua. Era sa kila vakavinaka cake beka na iMatai ni Raivotu i Josefa Simici? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Tarogi ira na lewe ni nomu kalasi ena ka era na kaya, ke tiko e dua e via kila na veika era sa vulica oti mai ena lesoni” (Veituberi, Me iLutua Ni Noda Bula [1999], 115).

Veisureti me caka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na veika e vakila me baleta na bibi ni iMatai ni Raivotu.
Sureti ira na lewe ni kuoramu me ra wasea vata kei na dua na itokani se lewe ni matavuvale na veika era vulica nikua.