Na cava na itavi nei Josefa Simici ena Veivakalesui Mai?

Ni mai cava e vica vata na senitiuri ni vukitani, a vakalesuya mai na Turaga na Nona Lotu kei na taucoko ni kosipeli mai vua na Parofita o Josefa Simici. A tekivu na Veivakalesui Mai oqo ena iMatai ni Raivotu i Josefa Simici, ka rau rairai mai kina na Tamada Vakalomalagi kei Jisu Karisito. Mai vua na Parofita o Josefa, a kau mai kina vua na Turaga na iVola i Momani kei na so tale na ivolanikalou, vakalesui mai ni lewa vaka matabete, kei na tauyavutaki ni Nona Lotu.

Mo vakarautaki iko vakayalo

E sa vakayarayarataki vakacava na nomu bula mai na bula kei na ilesilesi i Josefa Simici? O rawata vakacava na nomu ivakadinadina kei Josefa Simici?

E tiko beka vei ira na cauravou e dua na ivakadinadina ni Parofita o Josefa Simici? E rawa vakacava mo vukei ira me ra vakaqaqacotaka?

Ena nomu vulica ena masumasu na ivolanikalou kei na ivurevure eso oqo, na cava o vakila e veivakauqeti mo wasea vata kei ira na cauravou?

2 Nifai 3:3–25 (O ira na parofita ena gauna e liu era a raica taumada na veiqaravi nei Josefa Simici me parofita ka daurairai)

V&V 35:17-18 (A vakalesuya mai na Turaga, mai vua na Parofita o Josefa Simici, na taucoko ni kosipeli)

V&V 76:22–24 (iVakadinadina nei Josefa Simici me baleti Jisu Karisito)

V&V 135:3 (Mai vua na Parofita o Josefa Simici, a solia vei keda na Turaga na ikuri ni ivolanikalou)

Josefa Simici—Ai Tukutuku 1:11–25 (E rau a rairai vei Josefa Simici na Kalou na Tamada kei Jisu Karisito)

Craig C. Christensen, “Au na Vakatubura e Dua na Parofita Digitaki,” Ensign se Liaona, Nove. 2016, 27–30

Neil L. Andersen, “Na Vakabauta e Sega ni Ka Vakacalaka, ia Sa Ka ni Digidigi,” Ensign se Liaona, Nove. 2015, 65–68

Neil L. Andersen, “Josefa Simici,” Ensign se Liaona, Nove. 2014, 28–31

“Josefa Simici,” Tudei ena Vakabauta (2004), 49–50

Vidio: “Josefa Simici: Na Parofita ni Veivakalesui mai”

13:9

Raica me ra veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo, se vakasamataka ga na nomu vakaiiko, mo raicalesu kina na lesoni ni macawa sa oti ka vakatakila na lesoni ni macawa oqo:

Sureta e dua na cauravou me droinitaka e dua na iyaloyalo ena vava ni volavola ka vakatakilakilataka na veika a vulica na kuoramu ena macawa sa oti, ka me ra qai vakilakila eso tale na cauravou na ka e droinitaka.
Ni se vo toka e rua se tolu na macawa, ni bera na soqoni ni kuoramu, sureti ira na cauravou mera ciqoma na bolebole i Elder Neil L. Andersen: “Mo vakadinadinataka vakaiiko na Parofita o Josefa Simici. Na voqa ni domomu me vukea na vosa vakaparofita nei Moronai, o ya me vosa vinakataki na Parofita.” Vakayaloqaqataki ira na cauravou mera vakamuria na ivakasala nei Elder Andersen, o ya mera wasea na ivolanikalou ena iVola i Momani kivei ira na nodra itokani kei na matavuvale, “me vakadeitaki kina ni o Josefa e dua na iyaya ni cakacaka ena liga ni Kalou,” ka mera wilika na ivakadinadina ni Parofita. (Raica na “Josefa Simici,” Ensign se Liaona, Nove. 2014, 30.) Ni sa tekivu na soqoni ni kuoramu, kerea mera wasea na ivolanikalou era sa digitaka kei na vakasama eso ni ra wilika na ivakadinadina i Josefa Simici.

Vulica vata

Na itaviqaravi e koto e ra e rawa ni vukea na lewe ni kuoramu mera kila na itavi nei Josefa Simici ena Veivakalesui Mai. Muria na veidusimaki ni Yalotabu, digitaka e dua se sivia ka na ganita vakalevu duadua na nomu kuoramu:

Sureti ira na cauravou me ra wilika na vosa nei Elder Craig C. Christensen “Au na Vakatubura e Dua na Parofita Digitaki,” ka vakasaqara na veivakalougataki e tu vei keda me baleta na Parofita o Josefa Simici. Kerei ira me ra vola na ka era kunea ena vavanivolavola. Na veivakalougataki cava tale era na rawa ni vakasamataka tale mai o ira na cauravou me baleti Josefa Simici? Navuca mo wasea na nomu a rawata vakacava na nomu ivakadinadina me baleti Josefa Simici ka sa vakalougatataka vacava na nomu bula na Vakalesuimai ni kosipeli.
Kerei ira na lewe ni kuoramu mera vakanananutaka mada ni taroga vakaoqo e dua na itokani mai na dua tale na lotu, “Na cava na vuna e bibi kina o Josefa Simici ena nomuni Lotu?” Sureti ira mera raica eso na isau ni taro oqo ena vidio “Josefa Simici : Na Parofita ni Veivakalesui Mai.” Sa rawa talega mo wilika na wase “Taro ena Yalodina” mai na vosa nei Elder Neil L. Andersen “Na Vakabauta e Sega ni Ka Vakacalaka, ia Sa ka ni Digidigi” me vukea nodra vulica na sala ni nodra rawa ni sauma lesu ni vakacacani mai o Josefa Simici.

13:9
Sureti ira na lewe ni kuoramu mera vola na veika sa solia mai na Turaga mai vei Josefa Simici. Me baleta na vakasama mera kuria ki na nodra lisi, kerea mera wilika na Vunau kei na Veiyalayalati 135:3 kei na tabana 89–90 ena Tudei ena Vakabauta. E duidui vakacava na noda bula ena vuku ni cakacaka a cakava na Turaga mai vei Josefa Simici?
Sureti ira na cauravou mera wilika na Josefa Simici—Ai Tukutuku 1:7–20, ni vakasaqara na dina o Josefa Simici ka vulica mai na iMatai ni Raivotu. Na cava a vulica o Josefa me baleta na Tamada Vakalomalagi kei Jisu Karisito? me baleti koya? me baleta na vu ni ca? Cava na vuna e bibi kina meda kila deivaki na dina oqo nikua?
Vakaraitaka na vidio “Josefa Simici : Na Parofita ni Veivakalesui Mai”, ka kerei ira na cauravou mera wasea eso na ka era sa vulica se vakananuma me baleta na Parofita o Josefa Simici. Vakasamataka na kena semati vakacava na rawati ni nomu ivakadinadina ni o Josefa Simici a dua na parofita.

13:9

Kerei ira na cauravou mera wasea na veika era sa vulica nikua. Era sa kila deivaki li na itavi nei Josefa Simici ena Veivakalesui Mai ni kosipeli? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Na taro e dau volai tu ena vava loaloa ni bera ni dau tekivu na lesoni e dau vukei ira na vuli tiko mera vakasamataka kina na lesoni ni bera ni tekivu na kalasi” (Veituberi, Me iLutua ni Bula, 113).

Veisureti me ra bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na veika e vakila me baleta na vuna e bibi kina ena nona bula o Josefa Simici ka sureti ira eso tale na lewe ni kuoramu mera cakava vakakina.
Veivosakitaka vata kei na kuoramu na nodra itavi vakamatabete ena nodra vakavulici eso tale me baleta na veiqaravi nei Josefa Simici.