iTavi Vua na Kalou

E rawa vakacava meu sureti ira na tamata kecega me ra lako mai veiKarisito?

Ena siga a tuvalaki kina na vakalesui mai ni Lotu, a solia na itavi vei ira na vakaitutu ena Matabete i Eroni me ra sureti ira na tamata kece ga me ra lako mai vei Karisito na Turaga (raica na V&V 20:59). Ena nodra sa vakayacora na itavi oqo na vakaitutu ena Matabete i Eroni, era sa kauta mai na veivakalougatataki ni kosipeli vakalesui mai kivei ira na luvei Tamada Vakalomalagi. Era sa vakaukauwataka tale ga na nodra dui ivakadinadina ka vakavakarautaki ira ena dua na veiqaravi ni daukaulotu ena bula taucoko.

Mo vakarautaki iko vakayalo

Na cava soti o sa sotava ena nomu sureti ira eso tale me ra vulica na kosipeli? Era vukei iko vakacava eso tale mo lako mai vei Karisito?

E vuqa na cauravou era sega tu ni kila ni o ira na vakaitutu ena Matabete i Eroni e tu na nodra itavi vakamatabete me ra sureti ira na tamata kecega me ra lako mai vei Karisito. Na cava e rawa mo cakava me vukei ira me ra kila ka vakayacora na itavi vakamareqeti oqo? Na cava e rawa me vakauqeti ira me ra wasea na kosipeli vata kei ira nodra itokani kei na matavuvale?

Vulica ena yalomasumasu na veiivolanikalou kei na ivurevure oqo. Na veivakurabui cava so o ciqoma ena nomu vuli tiko?

Vakayacora Noqu iTavi Vua na Kalou(2010), 14–15, 38–39, 62–63

1 Timoci 4:12 (Mo dua na ivakaraitaki ni vakabauta)

Alama 17:2–3 (O ira na luvena tagane o Mosaia era vakavakarautaki ira me ra wasea na kosipeli)

Moronai 10:32–33 (Veisureti nei Moronai mo lako mai vei Karisito)

V&V 4 (Vakaibalebaletaka ni vakarautaki keda meda qarava na Turaga)

V&V 20:46–59 (O ira na vakaitutu ena Matabete i Eroni e tiko nodra itavi me ra sureta na tamata kecega me ra lako mai vei Karisito)

V&V 42:6 (Vunautaka na kosipeli mai na kaukauwa ni Yalotabu)

M. Russell Ballard, “Taleva Lesu,” Ensign se Liaona, Me 2014

Richard G. Scott, “Au sa Solia Vei Kemudou e Dua na iVakarau,” Ensign se Liaona, Me 2014

“Na Cava na Noqu iNaki Vakadaukaulotu?” Vunautaka na Noqu Kosipeli (2004), 1–15

Vidio: “Inviting All to Come unto Christ”

4:30

Veivakavulici ena ivakarau ni iVakabula

Na i Vakabula a sureti ira eso tale me ra vakadinadinataka na dina era vulica me rawa ni tara na yalodra na Yalotabu. “Dou sa kaya se ko cei koi au?” A taroga o Koya. Ena gauna sa sauma mai kina o Pita, a vaqaqacotaki na nona ivakadinadina: “Oi kemuni na Karisito, na Luve ni Kalou bula’(Maciu 16:15–16). E rawa vakacava me vaqaqacotaka nodra ivakadinadina na cauravou ena kuoramu na wasei ni kosipeli?

Veisemati ni iTaviqaravi ni iTabagone

Tuva e dua na itaviqaravi ni Muavata ka na vukei ira na cauravou me ra vakayagataka na veika era vulica ena lesoni oqo.

Laiva me ra veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo, se vakasamataka ga na nomu vakai iko, mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Kerei ira na cauravou me ra wasea eso na ka era nanuma mai na veivosaki ena macawa sa oti. Na cava na vuna e guilecavi dredre kina oqo vei ira?
Sureti ira na cauravou me ra vakasaqara na Vunau kei na Veiyalayalati 20:59 ka vakasaqara na itavi ni matabete e tukuni koto kina. Sureta e vica na cauravou me ra wasea na veika era sotava nodra wasea tiko na kosipeli vata kei na dua na lewe ni matavuvale, itokani sa luluqa tu, se itokani ni dua tale na vakabauta vakalotu. Na cava a qai yaco?

Vulica vata

Na inaki ni lesoni oqo oya me vukei ira yadua na cauravou me ra tuvatuvaka ka vakayacora nodra itavi ni matabete ena wasei ni kosipeli vakalesuimai i Jisu Karisito vata kei na dua tale. Solia na gauna vei ira na cauravou ena gauna ni soqoni ni kuoramu me ra vola na ituvatuva eso ena nodra iTavi Vua na Kalou Vakauqeti ira me ra wasea vakai ira nodra ituvatuva, kei na veisoqoni ni kuoramu e se bera mai, sureti ira me ra wasea na veika era sotava ena nodra sureti ira eso tale me ra lako mai vei Karisito.

Sureti ira na cauravou me ra vakasaqara na ivolanikalou ka vakayagataki kina na malanivosa me vaka na “lako vei Karisito” se “dou lako mai vei au” (raica na Maciu 11:28; Moronai 10:32; V&V 20:59). Na cava na ibalebale ni “lako mai vei Karisito”? Na cava era vulica mai na veitikina oqo ka vakauqeti ira me ra sureta eso tale me ra lako vei Karisito? (Raica na iTavi Vua na Kalou,28.) Sureti ira na cauravou me ra cereka na iwase “Cakava” ni nodra ivola iTavi Vua na Kalou (tabana e 29, 55, se 77) ka cakava na ituvatuva ka sureta e dua me lako mai vei Karisito.
Wilika vata na Vunau kei na Veiyalayalati 20:53, ka vola eso na sala e rawa kina vei ira na dauveituberi vakavuvale me ra “dau vakaraici ira na lewe ni lotu, dau sikovi ira ka vaqaqacotaki ira tikoga.” E rawa vakacava ni ra vakatorocaketaki na cauravou ena itavi ni dauveituberi vakavuvale? Navuca mo sureta na peresitedi ni kuoramu ni italatala qase me vosa ki na kuoramu me baleta na iwalewale me ra na dauveituberi vakavuvale vinaka kina. (Raica na iTavi Vua na Kalou,52, 76.) Sureti ira na cauravou me ra cereka na iwase “Cakava” ni nodra ivola iTavi Vua na Kalou (tabana e 55 se 77) ka cakava na ituvatuva me yaco me dauveituberi vakavuvale vinaka cake.
Vakaraitaka e dua na iyaloyalo kei Amoni, ka kerea na kuoramu me umana vata na italanoa kei Amoni ena nona vakavulici ira tiko na Leimani (raica na Alama 17–19). Veidutaitaka vata na italanoa oqo kei na veika a sotava o Korianitoni (raica na Alama 39:1–11). E vakayarayarataka vakacava na noda sasaga ni vakatavulica na kosipeli vei ira na tani na noda ivakaraitaki? (Raica na iTavi Vua na Kalou,28.) Sureti ira na cauravou me ra cereka na tabana e 29 ena nodra ivola na iTavi Vua na Kalou ka cakava na ituvatuva me ra wasea na kosipeli mai na nodra ivakaraitaki vinaka.
Vola na veika oqo ena papa ni volavola: “Na soli ni veisureti ka sega ni talevi lesu sa vaka na _______.” Sureti ira na lewe ni kuoramu me ra vakasaqaqara ena vosa nei Elder M. Russell Ballard “Taleva Lesu,” ka vakaraica e dua na vosacavuti me vakacavari kina na iyatuvosa oqo. Na cava eso tale na ivakatautauvata e rawa ni ra vakasamataka na lewe ni kuoramu me vakacavari kina na iyatuvosa? Na cava tale e rawa ni ra raica ena vosa oqo ena vukei ira me ra kila na bibi ni kena dau talevi lesu na nodra veisureti vei ira eso me ra lako mai vei Karisito?
Vakaraitaka na vidio “Sureti Ira Kece Na Tamata Me Ra Lako Mai Vei Karisito,” ka sureti ira na lewe ni kuoramu me ra vakasaqara na ka era cakava ena vidio oqo na vakaitutu ena Matabete i Eroni me vukea na kena tubu na nodra kuoramu. Veivosakitaka na cava e rawa me ra cakava me tautauvata na veika era sotava ena nodra kuoramu. Solia vei ira yadua na lewe ni kuoramu e dua na tiki ni vosa nei Elder Richard G. Scott “Au sa Solia Vei Kemudou e Dua na iVakarau.” Kerei ira na lewe ni kuoramu me ra raica eso na ivakavuvuli se ivakasala mai na vosa ka na rawa ni vukei ira ena nodra sasaga me ra sureti ira mai eso me ra lako mai vei Karisito. Kerei ira mera wasea na veika era sa raica.

4:30

Kerei ira na cauravou mera wasea na veika era sa vulica nikua. Era kila deivaki tiko li na nodra itavi vakamatabete me ra sureti ira na tamata kecega me ra lako mai vei Karisito? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me Veivuke ena Veivakavulici

“Mo dau vakarorogo vinaka ki na nodra soli vakasama o ira na vuli. Na nomu ivakaraitaki ena vakauqeti ira me ra dau vakarorogo vakavinaka vei ira eso. Ke sega ni matata vei iko na nona vakasama e dua, mo taroga e dua na taro. O na rairai kaya vakaoqo, ‘Au sega ni kila. E rawa beka ni o vakamacalataka tale mai?’ se ‘E rawa beka ni o solia e dua na ivakaraitaki ni ka o nanuma tiko?’” (Na Veituberi, Me iLutua ni Noda Bula (1999), 73).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Sureti ira na cauravou me ra vola nodra ituvatuva ena iwase “Cakava” ni nodra ivola na iTavi Vua na Kalou (tabana e 29, 53, se 77).
Veitalanoataka vata kei ira ena kuoramu me baleta na kena rawa vakacava nodra vakauqeta e dua na lewenilotu sa luluqa tu me vakaitavi ena kuoramu ka lesu tale mai ki lotu.