Na cava e gadrevi kina e dua na veivakalesui mai?

A tauyavutaka o Jisu Karisito, ena Nona a veiqaravi voli vakayago, na Nona Lotu vakakina na lewa ni matabete. E a liutaki mai vei ira na parofita kei na iapositolo ka ra vakavulica na ivunau dina ka ciqoma na ivakatakila ka sa volai tu me ivolanikalou. Ena nodra sa mate na iapositolo, sa kau tani mai vuravura na lewa ni matabete, sa mudu na ivakatakila, kei na ivunau yaga era sa yali se vakacalai. Mai vua na Parofita o Josefa Simici, a tauyavutaka kina o Jisu Karisito na Lotu sa vakalesuimai.

Mo vakarautaki iko vakayalo

Na cava e yaco ena Vukitani o sa bau raica e vuravura? E sa vakalougatataki iko vakacava na Veivakalesui Mai ni kosipeli?

Na veika cava era gadreva na cauravou me ra kila baleta na Vukitani kei na Veivakalesui Mai? E rawa vakacava me vukei ira na nodra kila na Vukitani kei na Veivakalesui Mai?

Vulica ena yalomasumasu na veiivolanikalou kei na ivurevure oqo. Na cava o vakila me na vukei ira na cauravou me ra kila na vuna e gadrevi kina na veivakalesui mai?

Efeso 4:11–14; Yavu ni Vakabauta 1:6 (Na Lotu nikua e tu na kena ivakarau vata ga a taurivaki tu ena Lotu ena gauna ni iVakabula)

Aisea 29:13–14; Emosi 8:11–12; 2 Cesalonaika 2:3; 1 Nifai 13:24–29 (A yali na Lotu mai na vukitani)

V&V 1:17–23, 30 (O Jisu Karisito a vakalesuya mai Nona Lotu mai vei Josefa Simici)

Josefa Simici—Ai Tukutuku 1:6–20 (iMatai ni Raivotu i Josefa Simici)

D. Todd Christofferson, “Na Vu ni Lotu,” Ensign se Liaona, Nove. 2015, 108–11

Robert D. Hales, “Vakavakarau me baleta na Veivakalesui Mai kei na iKarua ni Lako Mai: ‘Au na Taqomaki Iko Tikoga,’” Ensign se Liaona, Nove. 2005, 88–92

“Vukitani,” Tudei Ena Vakabauta (2004), 199–200

“Veivakalesuimai ni Kosipeli,” Tudei Ena Vakabauta, 137–141

Vunautaka na Noqu Kosipeli (2004), 37–41, 49

Vidio: “Vakasaqarai na Dina”

Veivakavulici ena ivakarau ni Turaga

A vakayagataka na ivolanikalou me veivakavulici ka vakadinadinataka na Nona ilesilesi. A vakavulici ira na tamata me ra vakanananutaka vakataki ira na ivolanikalou ka me ra vakayagataka me ra kunea kina na isau ni nodra vakatataro. E rawa mo vukei ira vakacava na cauravou me ra vakayagataka na ivolanikalou me isau ni nodra taro?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo, se vakasamataka ga na nomu vakai iko, mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Kerea e dua na cauravou me wasea eso na ka a vulica ena macawa sa oti ena kena vakayarayarataki koya vakacava mai vale, e koronivuli, se vata kei ira nona itokani.
Vakayagataka e dua na ivakaraitaki mo vakavulici ira kina na cauravou na kena gadrevi na Veivakalesui Mai (me vaka eso na ka e sa kavoro ka sega ni rawa me vakavinakataki ia e dodonu me vakaisosomitaki). Na ivakaraitaki cava tale e rawa me ra vakasamataka na cauravou me ra vakayagataka ena nodra vakavulici eso tale me baleta na gadrevi ni Veivakalesui Mai?

Vulica vata

Na itaviqaravi yadua e koto e ra e rawa me vukei ira na lewe ni kuoramu me ra kila na vuna e gadrevi kina na Veivakalesui Mai ni kosipeli. Muria na veivakauqeti ni Yalotabu, ena nomu digitaka e dua se sivia ka na ganita vakalevu sara na nomu kalasi:

Sureti ira na cauravou mera vakasaqara ena vosa nei Elder D. Todd Christofferson “Na Vu ni Lotu,” na veivakararamataki ni Veisorovaki kei na ilesilesi ni Lotu ena siga edaidai. Sa rawa talega mo sureti ira rawa toka e vica na cauravou mera na mai wasea na vuna mera vakavinavinakataka kina na Lotu sa vakalesuimai. Ena veivakadonui nei bisopi, sa rawa talega mo sureta e dua se qai papitaiso oti ga ki na nomu kalasi me mai wasea na nona ivakadinadina baleta na Lotu kei na kosipeli vakalesuimai.
Sureta e dua na lewe ni kuoramu me vakavulica e dua na tiki ni lesoni oqo. E rawa vua me cakava oqo me tiki ni nona iTavi Vua na Kalou ka vakavulica na veika me baleta na Vukitani kei na Veivakalesui Mai (raica na “Kila Na iVunau,” tabana e 18, 42, se 66).
Vakaraitaka na vidio “Vakasaqarai na Dina,” ka ra vakatakila na cauravou na cava a vakasaqara tiko o Wilford Woodruff ena Lotu dina. Na cava na vuna e bibi kina me tu vei keda na veika oqo? E sa vakalougatataki ira vakacava na cauravou na vakalesui mai ni veika oqo? Sureti ira me ra wasea eso na ka e vakurabuitaki ira me baleta nona vakasaqara na dina o Wilford Woodruff.
Wasea vakaveimama na kuoramu, ka kerea e dua na iwasewase me vakavulica na kuoramu ena nona tauyavutaka vakacava Nona Lotu o Jisu Karisito kei na kena yali vakacava mai na Vukitani. Kerea na iwasewase tale ka dua me vakavulica na Veivakalesui Mai. Solia vei ira na gauna ni vakavakarau ena kena vakayagataki na Vunautaka Noqu Kosipeli (tabana e 37–41 kei na 49), Tudei Ena Vakabauta tabana e 199–200 kei na 137–41), kei na ivolanikalou e vakatututaki ena ituvatuva oqo. O na rairai vinakata mo qarava na ilesilesi oqo ena vica na siga ni bera na soqoni ni kuoramu.
Lesi ira vakayadua na cauravou me ra yadua na tiki ni ivolanikalou me baleta na Vukitani se na Veivakalesui Mai (me vaka era vakatututaki ena ituvatuva oqo). Kerei ira na cauravou me ra droinitaka e dua na iyaloyalo me matataka na veika era vulica mai na nodra ivolanikalou, ka me ra wasea vata kei na kuoramu. Me veivosakitaki vata vakuoramu na veivakalougatataki eda sa ciqoma ena vakalesui mai ni kosipeli.
Tukuna yadua vei ira na cauravou na yaca ni tamata a cavuti ena vosa nei Elder Robert D. Hales “Vakavakarau me baleta na Veivakalesui Mai kei na iKarua ni Lako Mai: ‘Au na Taqomaki iko Tikoga’” (me vakataki William Tyndale, Johannes Gutenberg, se o Martin Luther). Kerei ira na cauravou me ra wilika se sarava na vosa ka vakasaqara na cava a cakava na tamata o ya me vakavakarautaka kina na vuravura me baleta na Veivakalesui Mai. Sureti ira me ra wasea na veika era kunea.

Kerei ira na cauravou me ra wasea na veika era sa vulica nikua. Era kila tiko li na gadrevi ni kena Veivakalesui Mai na kosipeli? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ivunau oqo?

Me Veivuke ena Veivakavulici

“O rawa ni vakaraitaka ni o vakarorogo tiko ena nomu vakaraitaka na nomu taleitaka tiko. Mo raici koya e vosa tiko ka kakua ni raica e dua tale na ka ena loma ni rumu, se na ivurevure ni lesoni o vakayagataka tiko. E rawa tale ga ni o vakauqeti koya e vosa tiko me vakaotia na nona vakasama, se na ka e tukuna tiko ka mo kakua ni takosova na nona vosa. E rawa tale ga ni o tovolea mo kakua ni siova yani na veivosaki tale eso mo solia kina na nomu vakasama se na nomu lewa” (Veituberi, Me iLutua Ni Noda Bula [1999], 76).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Tukuna na vuna e yaga kina na Veivakalesui Mai kei na vuna e bibi kina vua.
Sureti ira tale eso na lewe ni kuoramu me ra wasea nodra vakanananu me baleta na veika era sa vulica.