iTavi Vua na Kalou

Meu vukei ira vakacava na tani me ra ciqoma na veivakalougatataki ni Veisorovaki ni iVakabula?

Ni ra vakavakarau ka qarava na sakaramede na Matabete i Eroni, era sa vukei ira tiko na lewe ni Lotu ena nodra vakavouya na kaukauwa veivakasavasavataki ni Veisorovaki ki na nodra bula.

Mo vakarautaki iko vakayalo

Na cava o bau vakila ni ko sa vakarautaka, qarava, se vakaivotavota ena sakaramede? Na cava e bibi kina vei iko na sakaramede?

Era raica tu vakacava na cauravou na cakacaka tabu vakalotu ni sakaramede? Na cava e rawa ni ra cakava me ra vakavakarau vinaka kina ni qarava na sakaramede? Na cava o na vinakata mera kila deivaki me baleta na nodra itavi? Na sala cava soti e rawa ni ra veivuke kina na lewe ni Matabete vaka-Eroni kivei ira tale eso mera ciqoma na veivakalougatataki ni Veisorovaki?

Na ivolanikalou kei na vosa cava e rawa ni vukei ira na cauravou mera kila deivaki na nodra itavi ena nodra vukei na tani me ra ciqoma na veivakalougatataki ni Veisorovaki?

Luke 22:19–20; 3 Nifai 18:1–11 (A vakatekivuna o Jisu Karisito na sakaramede)

V&V 20:76–79 (Era dau qarava na lewe ni Matabete vaka-Eroni na sakaramede)

V&V 38:42 (Me ra sa bula kilikili na lewe ni matabete ni qarava na cakacaka tabu vakalotu)

Opetaia 1:21 (Me da sa ivakabula ena Ulunivanua o Saioni).

Boyd K. Packer, “Na Veisorovaki,” Ensign se Liaona, Nove. 2012

“Sakaramede,” Tudei ena Vakabauta (2004), 110–12

“Yaco me iVakabula ena Ulunivanua ko Saioni,” Nodra iVakavuvuli na Peresitedi ni Lotu: Josefa Simici (2011), 541–52

Vidio: “The Magnificent Priesthood,” “Sanctify Yourselves”

2:56

4:38

Veivakavulici ena ivakarau ni iVakabula

Ena veigauna kece, sa dau ivakaraitaki ka dauvakasala vei iratou na Nona tisaipeli na iVakabula. A vakavulica vei ira mera masu ena Nona masu vata kei ira. A vakavulici ira me ra dauloloma ka dauveiqaravi ena Nona lomani ira ka qaravi ira. E rawa vakacava ni o ivakaraitaki ni ivakavuvuli o vakavulica tiko?

Raica me ra veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakaiiko mo raicalesu kina na lesoni ni macawa sa oti ka vakamacalataka na lesoni ni macawa oqo:

Kerei ira na cauravou me ra wasea e dua na ka era bau nanuma mai na lesoni ena macawa sa oti. Na cava beka era lomatarotarotaka tiko? Era sa bulataka tiko vakacava na veika era sa vulica?
Sureti ira na lewe ni kuoramu me ra vola ena papa na nodra isau ni taro “Meu vukei ira vakacava na tani me ra ciqoma na veivakalougatataki ni Veisorovaki?”

Vulica vata

Na inaki ni lesoni oqo me vukei ira na cauravou yadua me ra kila deivaki na ivakarau ni nodra vukei na tani me ra ciqoma na veivakalougatataki ni Veisorovaki ena nodra qarava vakadodonu na nodra itavi vakamatabete. Me tiki ni lesoni oqo, sa dodonu vei ira na lewe ni kuoramu me ra tuvalaka ena nodra ivola ni iTavi Vua na Kalou me ra dau qarava na veicakacaka vakalotu ni matabete ena vakarokoroko. Ni bera na soqoni ni matabete, sureti ira na cauravou me ra kauta mai na nodra ivola ni iTavi Vua na Kalou ki lotu. Ena veisoqoni ni kuoramu mai muri, sureti ira me ra mai wasea na veika era sa sotava tiko ena nodra qarava na nodra ituvatuva.

Sureta e dua na lewe ni kuoramu me vakaraitaka e dua na iyaloyalo ni iVakabula ni qarava tiko na sakaramede (raica na iVola ni Cakacakaniliga Vakosipeli,54). Kerei koya me vakamacalataka na veika e yaco tiko, na cava e yaco tiko ena iyaloyalo, kei na iwalewale ni nodra matataki Jisu Karisito voli na lewe ni Matabete i Eroni ni ra qarava tiko nikua na sakaramede. Taroga na nodra nanuma na cauravou ni ra vakarautaka ka qarava tiko na sakaramede.
Sureti ira na cauravou me ra veisasa ka wilika na Vunau kei na Veiyalayalati 20:76–79, Luke 22:19–20, kei na 3 Nifai 18:1–11. Kerei ira me ra veivosakitaka se cava e matataki tiko ena madrai kei na wai ni sakaramede kei ocei era matataka tiko na matabete ni ra vakarautaka ka qarava na sakaramede (raica na iTavi Vua na Kalou,24). Sureti ira na cauravou me ra cega na iwasewase ni “Cakava” ena nodra ivola ni iTavi Vua na Kalou (tabana e 25, 49, se 73) ka tuvatuvaka mai na veika era sa veivosakitaka oti. Vakayaloqaqataki ira me ra taroga vei ira na nodra itubutubu se dua na iliuliu na taro eso oqo: Na cava na kena ibalebale vei iko na cakacaka tabu vakalotu ni sakaramede? Na cava au rawa ni cakava vakalewe ni Matabete i Eroni me vukei iko me vakaibalebale vakalevu cake kina na sakaramede? Ena dua na soqoni ni matabete mai muri, sureti ira na lewe ni kuoramu me ra wasea na isau ni taro eso oqo kei na veika tale eso era sotava ni ra cakava tiko na nodra ituvatuva.
Ni wilika vata vakuoramu na Vunau kei na Veiyalayalati 38:42 ka veivosakitaka na kena vakayagataki na tikina oqo vei ira era dau tara na “iyaya” ka tu kina na ivakatakarakara ni Veisorovaki (raica na iTavi Vua na Kalou,48). Vakaraitaka e dua vei ira na vidio ka vakaturi ena ituvatuva oqo, ka kerei ira na cauravou me ra vakaraica na vuna e gadrevi kina me ra savasava tu me rawa ni ra vakayagataka kina na matabete. Sureti ira me ra cega na iwasewase ni “Cakava” ena nodra ivola ni iTavi Vua na Kalou (tabana e 25, 49, se 73) ka tuvatuvaka mai na veika era sa vulica.
Sureti ira na cauravou me ra wilika na masu ni sakaramede, raica na veiyalayalati era tu ena masu, ka vakamacalataka na kedra ibalebale. Na vosa cava e lauti ira? (raica na iTavi Vua na Kalou,72). Na sala cava ena tarai ira kina na ivavakoso na revurevu ni nodra ivakarau kei na itovo o ira era qarava tiko na sakaramede? Sureti ira na cauravou me ra cega na iwasewase ni “Cakava” ena nodra ivola ni iTavi Vua na Kalou (tabana e 25, 49, se 73) ka tuvatuvaka mai na veika era sa vulica.
Wasea na iyaloyalo ni dua na tubumu e sa mate ka sega ni ciqoma na cakacaka tabu vakalotu ni valetabu, se sureti ira na cauravou mera kauta mai na iyaloyalo ni tubudra me vakaraitaki. Kerei ira na cauravou mera veivosakitaka na iwalewale e rawa ni ra vukei ira kina na sa mate ni vakayagataka na veivakalougatataki ni Veisorovaki. Mera qai vulica na cauravou na parakaravu ka tekivu ena “Era na yaco vakacava me ivakabula ena Ulunivanua ko Saioni?” mai na Wase 41 ni Nodra iVakavuvuli na Peresitedi ni Lotu: Josefa Simici (2011). Veivosakitaka na cava e kena ibalebale me dua e ivakabula ena Ulunivanua ko Saioni. Sureti ira na cauravou mera wasea e dua na ka era a sotakaya ni ra ivakabula voli ena Ulunivanua ko Saioni.
Kauta mai ki na soqoni ni matabete e dua na ka e matataka na rarama (me vaka na matanicina se dua na cinalivaliva). Sureti ira na cauravou me ra vakasamataka se cava e ibalebale me da rarama kina vei ira na tani ni o wasea vei ira na italanoa ena itekivu ni vosa nei Peresitedi Boyd K. Packer “Na Veisorovaki.” Kerei ira na cauravou me ra wasea na nodra vakasama me baleta na ivakarau e rawa ni da “rarama lailai” kina vua e dua e vakaleqai tu. Na sala cava eda vaka kina na rarama lailai ni da qarava tiko na noda itavi vakamatabete?

Kerei ira na cauravou me ra wasea na veika era sa vulica nikua. Era sa kila deivaki li na iwalewale vaka lewe ni matabete mera vukei ira kina na tani ni ciqoma na veivakalougatataki ni Veisorovaki? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ivunau oqo?

iTuvatuva Eso ni iTavi Vua na Kalou

Vakatara na gauna vei ira na cauravou ena isogo ni soqoni ni kuoramu mera caka ituvatuva ena nodra ivola iTavi Vua na Kalou se ivakavakadewa ena initaneti iTavi Vua na Kalou. Na ituvatuva oqo era ka ni tamata yadua, ia e rawa ni ra veivukei na lewe ni kuoramu ena kena vakavurei na vakasama me baleta na nodra ituvatuva.

Veisureti me ra bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na ituvatuva e sa vola ena nona ivola niiTavi Vua na Kalou kei na nona yalayala me qarava vakadodonu.
Veivosakitaka na sala e rawa ni ra laki qarava kina na sakaramede vei ira era sega ni rawa ni lako mai lotu o ira na lewe ni kuoramu (me vaka na veidusimaki nei bisopi).