Na cava na vuna e bibi kina meda vakavinavinaka?

E vinakata na Turaga me tiko vei iko na yalo ni dauvakavinavinaka ena veika kece o vakayacora ka kaya. Ni da sa vakavinavinaka, eda na qai marau cake vakalevu ka yalovakacegu ena noda bula. Eda na kidava na veikauwaitaki kei na veivakalougatataki ni Turaga.

Mo vakarautaki iko vakayalo

Na cava eso na ka o dau vakavinavinakataka vakalevu? Sa vakalevutaka beka vakacava na nomu mamarau na nomu dau vakavinavinaka?

Na cava e rawa ni ra cakava na cauravou mera vakatorocaketaka na nodra dau vakavinavinaka? Ena vakalougatataki ira vakacava ena bula sa bera mai na nodra dau vakavinavinakataka na veika sa yaco tiko oqo vei ira?

Vulica ena masumasu na veiivolanikalou kei na veiivurevure oqo. Na cava o vakila ena vukei ira na cauravou mera vakatorocaketaka na nodra dau vakavinavinaka?

Luke 17:11–19 (Vakabula o Jisu e tini na vukavuka qai dua ga e lesu mai me vakavinavinaka Vua)

Mosaia 2:20–24 (Na Tui o Penijamini e vakavulica ni dodonu meda qarava ka vakavinavinaka vua na Turaga)

V&V 59:7, 15–21 (Meda vakavinavinakataka na ka kecega)

Henry B. Eyring, “Vakavinavinaka ena Siga ni Vakacecegu,” Ensign se Liaona, Nove. 2016, 99–102

Dieter F. Uchtdorf, “Vakavinavinaka ena iTuvaki Kecega,” Ensign se Liaona, Me 2014

Russell M. Nelson, “Me Vakavinavinakataki ga na Kalou,” Ensign se Liaona, Me 2012, 77–79; raica talega na vidio “Give Thanks”

“Vakavinavinaka,” Me iSakisaki ni iTabagone (2011), 18

“Noqu Kalou Au Kurabui ka Galu,” Sere ni Lotu, naba 44; “Wilika Nomu Kalougata,” Sere ni Lotu, naba 144

Veivakavulici ena ivakarau ni iVakabula

Na iVakabula a sureti ira eso mera cakacaka ena vakabauta ka bulataka na dina a vakavulica o Koya. A kunea na madigi baleti ira mera vuli mai na kaukauwa ni veika era sotava. Na cava e rawa ni o cakava mo vukei ira kina na cauravou mera raica na kaukauwa ni vakavinavinaka ena nodra bula?

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerea e dua na cauravou me droinitaka ena vava ni volavola e dua na ka e a vulica ena macawa sa oti.
Solia e yadua na matanivola vei ira na cauravou, ka solia vei ira e dua na miniti mera vola na veivakalougatataki era nanuma ka tekivu ena matanivola o solia vei ira. Na cava eda dau guilecava kina na veivakalougatataki lalai e dau solia vei keda na Turaga? Kerei ira na lewe ni kuoramu mera wilika na Vunau kei na Veiyalayalati 46:32 se 59:21. Eda na vakaraitaka vakacava na noda vakavinavinakataka na “veivakalougatataki cava ga eda sa vakalougatataki kina”?

Vulica vata

Na itaviqaravi yadua e ra ena vukei ira na lewe ni kuoramu me ra kila vakavinaka kina na ivakavuvuli ni bula galala. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

Vola na taro ena vava ni volavola: “Na cava sa rui bibi kina me da dau vakavinavinaka?” Na cava au rawa ni cakava vakauasivi ena Siga ni Vakacecegu, meu dau vakavinavinaka kina vakalevu? Sureta na cauravou yadua me digia e dua na taro ka vaqara na kena isau mai na vosa nei Peresitedi Henry B. Eyring “Vakavinavinaka ena Siga ni Vakacecegu.” Ni ra sa oti, me ra qai wasea na veika era sa raica, ka sureti ira me ra cakava e dua na ituvatuva me ra cakacakataka kina e dua na vakatutu nei Peresitedi Eyring.
Sureti ira na cauravou mera wilika na Luke 17:11–19 ka wasea na vuna era nanuma ni sega ni ra laki vakavinavinaka vua na iVakabula e ciwa vei ira na tini na vukavuka. Na cava so na ka e tarovi keda mai na noda vakaraitaka na vakavinavinaka? Sureti ira na cauravou mera vakasamataka e dua na veivakalougatataki era sa ciqoma ka se bera ni ra laki vakavinavinakataka. Na cava e ka bibi kina meda dau vakaraitaka na noda vakavinavinaka? Na cava era na cakava mera vakaraitaka na nodra vakavinavinaka?
Talanoataka se wilika na italanoa ni ika mai vei Elder Russell M. Nelson “Vakavinavinakataki ga na Kalou.” Tarogi ira na cauravou kevaka mera sa vukea e so na tani (me vakataki koya na ivakatawa e talanoataki tiko ena italanoa oqo) ka ra sega ni vakavinavinakataki. Wasewasea na vo ni vosa ena kena iwase yadua ka qai solia vei ira na cauravou mera wilika. Kerei ira na cauravou mera vola e dua na ka era sa vulica baleta na vakavinavinaka kei na dua na tiki ni ivolanikalou ka veiwekani kaya (Vakatututaka ni rawa mera na rai kina iDusidusi Vakaiulutaga). Solia vei ira na cauravou na gauna mera wasea na ka era sa vola ka tukuna talega na gauna era vakila kina ni vakavinavinakataki na Kalou ena nona loloma.
Lesia vei ira yadua na lewe ni kuoramu me ra vulica e dua na iwasewase ni vosa nei Peresitedi Dieter F. Uchtdorf “Vakavinavinaka ena iTuvaki Kecega,” kakua ni solia vei ira na ulutaga ni nodra iwasewase. Kerei ira me ra dui vola ga na nodra ulutaga—na malanivosa se iyatuvosa era nanuma ni umani kina na veika era sa vulica. Sureti ira me ra wasea na nodra ulutaga kei na cava tale era vulica mai na ivakasala nei Peresitedi Uchtdorf me baleta na vakavinavinaka. Na cava e rawa ni ra cakava me ra tara cake kina na ivakarau ni vakavinavinaka e vakamacalataka o Peresitedi Uchtdorf?
Dou wili ivolanikalou ka lagata vakuoramu na sere ni vakavinavinaka me vaka e lisitaki tu ena ituvatuva oqo. Sureti ira na cauravou mera vaqara na itomo ni vosa ka tukuna tiko na ka mera vakavinavinakataka. Sureti ira mera wasea na itomo ni vosa ka ra sa digitaka, na vuna era digitaka kina ka vakaraitaka na nodra vakavinavinakataka.

Kerei ira na cauravou mera wasea na veika era sa vulica nikua. Era sa kila deivaki li na bibi ni vakavinavinaka? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Me wasea na ka e vakavinavinakataka ka sureti koya me vakavinavinakataka na Tamada Vakalomalagi ena dua na ka e se bera vakadua ni bau cavuta ena nona dau masu Vua.
Vakauqeti ira na cauravou mera vola e vica na ka era dau vakavinavinakataka ena veisiga.