Meu vulica vakacava meu dau vosota?

Na vosota sa ikoya na yalo ni vosota na vakaberabera, na leqa, na veisaqasaqa se na rarawa ka na sega na cudru yalo ca se yalolailai. Ena rawa ni da tosoya na vosota ena vaqarai ni loma ni Kalou ka ciqoma na Nona vakatulewa, ena kena vakararavitaki ni o Koya ena vakavotukanataka na Nona yalayala vei keda.Ni da sa vulica meda vosota ena veika lalai, eda sa vakarautaki keda tiko meda na sotava na dredre lelevu ena yalovosota.

Mo vakarautaki iko vakayalo

Na cava soti o sa sotava ka vakavulici iko mo yalovosota (wili kina na veika dredre lelevu kei na kena e lalai)? Na cava soti sa vukei iko mo vakatorocaketaka na vosota? Sa vakalougatataki iko vakacava na dau vosota?

Na cava soti era dau sotava na cauravou ena bula oqo ka na vakavuna mera dau yalototolo? Na cava e dodonu mera kila na cauravou baleta na ivakarau ni vosota? Ena vukei ira vakacava ena nodra veisiga ni mataka?

Wilika ena yalomasumasu na veiivolanikalou kei na ivurevure oqo. Na cava o vakila ni uqeti iko mo wasea vata kei ira na cauravou?

Jope 1; 19:25–26 (Na ivakaraitaki i Jope)

Same 37:7–9; Luke 21:19; Iperiu 10:35–36; Mosaia 23:21–22; Alama 26:27; V&V 24:8 (Veivakalougatataki e lako mai vei ira era vosota)

Roma 5:3; Jemesa 1:3 (Veivakatovolei ena vaqaqacotaka na vosota)

Dieter F. Uchtdorf, “Tomana ena Yalomalua,” Ensign se Liaona, Me 2010, 56–59; raica talega na vidio “Continue in Patience”

2:42

Robert C. Oaks, “Na Kaukauwa ni Yalomalua,” Ensign se Liaona, Nove. 2006, 15–17

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira yadua na cauravou mera vola ena vava ni volavola e dua na iyatuvosa me vakaraitaka na ka e a sa vulica ena macawa sa oti.
Vola na ulutaga ni lesoni ena vava ni volavola, qai wilika na imatai ni parakaravu ena itekivu ni lesoni. Sureti ira na cauravou mera wasea na veika era sotava ena nodra bula era na gadreva kina na vosota(me vakataka na vuli, vakamau, se cakacaka). Vakaraitaka e levu na ka me vakaraitaka na veigauna ena nomu bula ena nomu vakatakarakarataka na vosota( me kena ivakaraitaki, e dua na sitivikiti ni vuli,dua na mama ni vakamau, se dua na itokaniyaca ni kaulotu). Tukuna vei ira mera tukuna mai se ra veiwekani vakacava na veika oqo kei na vosota, qai wasea na veika o a sa sotava oti mai.

Vulica vata

Na itaviqaravi yadua e ra ena vukei ira na lewe ni kuoramu me ra kila vakavinaka kina na ivakavuvuli ni vosota. Muria na veivakauqeti ni Yalotabu ena nomu digitaka e dua se sivia ka na ganita vinaka na nomu kuoramu:

Vola ena vava ni volavola na ulutaga “Vosota” kei na “Yalototolo.” Solia e yadua vei ira na cauravou na tiki ni ivolanikalou baleta na vosota ka volai tu ena ituvatuva vakarautaki. Sureti ira na cauravou mera tucake yadua ka wilika na tiki ni ivolanikalou ka vakamacalataka na ka e vakavulica, ka qai vola ena vava ni volavola na veivakalougatataki ni vosota se na revurevu ni yalototolo. Na ikuri ni veivakalougatataki cava kei na kena revurevu ena rawa ni ra tomana kina na nodra lisi? Sureti ira na cauravou mera vola ena dua na tikinipepa e dua na ka ena gadrevi kina na vosota (vakauqeti ira mera na tomana na veika lalai e dau yaco ena veisiga ka sega walega na veika lelevu ka wili kina na veidredre lelevu). Mera na qai veisau tikinipepa kei na so tale na cauravou qai vola e dua na kena isau ka na vakaraitaka na vosota, oti sa qai vakaraitaka vei ira na kuoramu na ka era a sa vola mai.
Wasea na italanoa ni yalomalua ni dua na tama mai vei Elder Robert C. Oaks “Na Kaukauwa ni Yalomalua,” qai sureti ira na cauravou mera wasea e so na italanoa e tiko vei ira baleta na vosota. Solia yadua vei ira na cauravou e dua na wase lailai ni vosa ko nanuma ni na veivuke. Sureti koya me wilika qai vakalekalekataka vei ira na kuoramu. Na cava era sa vulica mai na vosa oqo ka sa vakauqeti ira mera vakararavi vua na Turaga kei na nona vakatulewa? Na cava so na vuni noda dau yalototolo? Eda na valuta rawa vakacava na ka oqo?
Vakaraitaka vei ira na cauravou e levu na posita ni Momanadi mai na New Era se Liaona. Wasea na kuoramu kina veiwasewase lalai ka qai sureti ira mera bulia ga na nodra posita Momanadi ena ulutaga ni vosota. Rawa ni ra tekivu ena nodra raica e dua na tiki ni ivolanikalou baleta na vosota(me vaka e volai tu ena ituvatuva) qai vakasamataka e dua na kena sala me droinitaki kina ena dua na posita. Kerei ira mera wasea na posita kei ira na lewe ni kuoramu ka vakamacalataka na ibalebale ni vosota vei ira. (Me tiki ni veitalanoa, ko na rairai gadreva mo wasea kei na kuoramu na ivakamacala ni vosota.)
Vakaraitaka na vidio “Continue in Patience,” ka sureti ira na cauravou mera veitalanaotaka na ka era sa vulica mai na vakatovotovo ni marshmellow. Na cava so e dau yaco ka ra dauyalototolo kina na cauravou? Sureti ira na cauravou mera wilika e dua na iwase mai na vosa nei Peresitedi Dieter F. Uchtdorf “Tomana ena Yalomalua,” qai kerei koya me vakalekalekataka ga vei ira na lewe ni kuoramu na veika sa vulica mai na tikina sa wilika oti. Ena vukei ira vakacava na cauravou nai vakasala nei Peresitedi Uchtdorf mera na vosota kina vakalevu?

2:42
Sureti ira na lewe ni kuoramu mera talanoataka tale na italanoa kei Jope (raica na Jope 1). Na cava era nanuma na cauravou ni vakavuna na nona rawa ni sa sotava o Jope na veivakatovolei ena vosota? E vukei koya vakacava na nona vakabauta na iVakabula (raica na Jope 19:25–26)? Sureti ira na lewe ni kuoramu mera vakatututaka mai na ka e rawa ni ra cakava mera valuta kina na yalototolo—ena gauna ni leqa lelevu me vaka e a sotava o Jope kei na veika lalai eda sotava tu ena veisiga.
Wilika vata ena kuoramu na i ka 9 ni parakaravu me yacova na i ka 17 ena vosa nei Elder Robert D. Hales’ “Waraka na Turaga: Me Yaco Ga Na Nomuni Lewa,” ni vaqarai na isaunitaro “Na cava na ibalebale ni waraka na Turaga?” Me ikuri ni vakasama, sureti ira na cauravou mera raica na tiki ni ivolanikalou e a kaya o Elder Hales ka wasea na veika era nanuma ni vakavulica tiko na tikina oqo baleta na vosota. Era na vakayagataka vakacava na cauravou na vosa nei Elder Hales se na tiki ni ivolanikalou oqo, kevaka me dua vei ira sa vaka me lailai mai na nona vakabauta?

Kerei ira na cauravou mera wasea na veika era sa vulica nikua. Era sa kila deivaki li na bibi ni vosota? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Me Veivuke ena Veivakavulici

“O rawa ni vakaraitaka ni o vakarorogo tiko ena nomu vakaraitaka na nomu taleitaka tiko. Mo raici koya e vosa tiko ka kakua ni raica e dua tale na ka ena loma ni rumu, se na ivurevure ni lesoni o vakayagataka tiko. E rawa tale ga ni o vakauqeti koya e vosa tiko me vakaotia na nona vakasama, se na ka e tukuna tiko ka mo kakua ni takosova na nona vosa. E rawa tale ga ni o tovolea mo kakua ni siova yani na veivosaki tale eso mo solia kina na nomu vakasama se na nomu lewa” (Veituberi, Me iLutua Ni Noda Bula [1999], 76).

Veisureti me caka

Me na vakacavara na soqoni na cauravou ka veiliutaki tiko. Sa rawa vua me:

Wasea na ka e vakila baleta na yalovosota ka sureti ira na lewe ni kuoramu mera vakaraitaka vakalevu na yalomalua vei ira na nodra matavuvale ena macawa sa roro mai.
Sureti ira na lewe ni kuoramu mera vakaraitaka e dua na tiki ni ivolanikalou se dua na vosacavuti baleta na vosota (se na i iVakatakila ni Momanadi ka ra sa bulia rawa) ena dua na vanuame rawa ni vakananumi ira ena yalomalua.