Meu vukei ira vakacava na tani?

Sa vakaraitaka o Jisu Karisito na ivakaraitaki totoka sara ni nodra dau qaravi na tani. Ni tu vei keda na matabete, sa noda itavi meda qaravi ira na tani. E rawa ni da qaravi ira na tani me vaka e a cakava na iVakabula ena levu sara na kena sala, wili kina na qaravi ni cakacaka vakalotu, wasei ni kosipeli vei ira na tani, kei na qaravi ni ivakaraitaki ni yalovinaka lalai ka rawarawa ena veisiga.

Mo vakarautaki iko vakayalo

Vakananuma na ka o sotava ena nomu a vukea e duatani tale. Na cava e qai yaco ena nomu veiqaravi? Na cava o rawa ni wasea ena ka o a sotava ka na rawa ni ra vulica kina na cauravou na bibi ni noda dau veiqaravi.

Na gauna cava o sa raici ira kina na cauravou ni ra qaravi ira tiko na tani? Na cava era sa sotava oti na cauravou ka na rawa ni ra veiwaseitaka? Na cava e ka bibi kina meda vulica na veiqaravi Vakarisito?

Ena nomu vulica na ivolanikalou kei na ivurevure tale eso baleta na veiqaravi, vaqara na veika ena veivakauqeti vei ira na cauravou mera na lako yani ka veiqaravi Vakarisito.

Maciu 25:31–46; Mosaia 2:17 (Ni da veiqaravi vei ira na tani eda sa qarava tiko na Kalou)

Joni 13:34–35 (Meda lomani ira na tani me vaka sa lomani keda na iVakabula)

Jemesa 1:27 (Na lotu savasava sa ikoya na nodra raici na luveniyali kei na yada)

1 Nifai 2:16–18; 3:1–7, 28–31; 4:1–2; 17:7–19, 50–51; 18:1–4 (iValavala i Nifai kei Leimani kei Lemueli ena nodratou dau lesi ki na dua na itavi)

Mosaia 18:8–10 (Meda sa yalodina ena noda vakacegui ira era gadreva na vakacegu)

Qarava Vinaka na Noqu iTavi Vua na Kalou(2010), 26, 50, 74

Henry B. Eyring, “Vauca na Nodra Mavoa,” Ensign se Liaona, Nove. 2013

“Veiqaravi,” Me iSakisaki ni iTabagone (2011), 32–33

Vidio: “Rescuing Those in Need,” “Dayton’s Legs,” “If We Forget Ourselves” “Ena Gauna ni Nomuni Veiqaravi—Cauravou”

5:2

3:2

3:43

3:2

Veivakavulici ena ivakarau ni iVakabula

Ena Nona gauna ni veiqaravi e vuravura, a lako voli ko Jisu ka veiqaravi ka veivuke voli vei ira era tu wavoliti Koya. O ira na tisaipeli dina i Karisito era dau vakayacora vakakina. E vakavuvulitaka na iVakabula, “A ka oqo era na kila kina na tamata kecega ni dou sa noqu tisaipeli, kevaka dou sa veilomani” (Joni 13:35). Ni ko vakavulici ira tiko na cauravou, vaqara na sala mo na sureti ira kina mera wasea na nodra sa qaravi ira na tani kei na cava e vakauqeti ira mera laki veiqaravi.

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira mera wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Vola ena vava ni volavola na ulutaga ni lesoni ena macawa sa oti, ka tukuna vei ira na cauravou mera vola totolo e dua na ka era sa vulica mai kina kei na ka era a laki bulataka mai na lesoni.
Sureti ira na cauravou mera wasea na ka era sa sotava oti ni ra veiqaravi tiko vei ira na tani (kevaka e rawa mera wasea ena kuoramu se yadudua na itaviqaravi era sa vakacavara me tiki ni nodra iTavi Vua na Kalou). E tarai ira vakacava ni ra veiqaravi tiko ena itavi oqo? E tarai ira vakacava na tani?
Kerei ira na cauravou me ra wasea na veika eso era kila me baleti ira na tamata era a vueti ena dua na gauna dredre vakayago. E dau vakaivei na nodra nanuma na tamata me baleti koya a vueti ira? Sarava na vidio “Rescuing Those in Need,” ka sureti ira na cauravou me ra veivosakitaka na veika era vulica mai vei Peresitedi Monson me baleta na veiqaravi vei ira na tani me vaka a vakayacora na iVakabula.

5:2

Vulica vata

Na inaki ni lesoni oqo me vukei ira yadudua na cauravou mera kila na nodra vakacokotaka na nodra itavi ni qaravi ira na tani. Me tiki ni lesoni oqo, mera navunavuci na lewe ni kuoramu ena nodra iTavi Vua na Kalou me vakacokotaki kina na nona itavi. Ni bera na soqoni ni matabete, sureti ira na cauravou me ra kauta mai na nodra ivola ni iTavi Vua na Kalou ki lotu. Ena veisoqoni ni kuoramu mai muri, sureti ira mera mai wasea na veika era sa sotava tiko ena nodra qarava na nodra ituvatuva.

Wasea na veitiki ni ivolanikalou oqo vei ira na cauravou: Maciu 25:31–46; Joni 13:34–35; Mosaia 2:17; Jemesa 1:27; kei na Mosaia 18:8–10. Kerei ira mera vaqara ka vola na ka era sa vulica baleta na qaravi ira na tani mai na veikina oqo (raica na iTavi Vua na Kalou, 26). Ni ra sa wasea oti na ka era sa raica mai na veitiki ni ivola, kerei ira mera wasea na veika era sa sotava ena nodra bula ka ra sa vakalougatataki kina ena nodra qaravi ira na tani.
Sureti ira na lewe ni kuoramu mera wilika na veitiki ni ivolanikalou ka qai veidutaitaka na bula nei Nifai kei rau o Leimani kei Lemueli ena nodratou dau ciqoma na ilesilesi: 1 Nifai 2:16–18; 3:1–7, 28–31; 4:1–2; 17:7–19, 50–51; 18:1–4 (vakasamataka mo kerei ira mera vola na nodra isaunitaro ena vava ni volavola). Tarogi ira se vakacava na nodra vakasama ena gauna e soli kina vei ira e dua na itavi mera laki qarava baleta e duatani tale. Sureti ira na cauravou mera vola ena vanua vakarautaki ena tabana e 50 ena ivola ni iTavi Vua na Kalou eso na itomo ni vosa ena nodra vuli ka rawa ni vakamacalataka na ivakarau ni nodra vakasama ena gauna e soli kina vei ira e dua na itavi ni matabete mera na laki qarava.
Vakaraitaka e dua se ruarua na vidio ka sa vakatututaki ena ituvatuva, ka qai kerei ira na cauravou mera vaqara na veivakalougatataki ka na lako mai ni da qaravi ira na tani, wili kina na lewe ni kuoramu. Mera vaqara na lewe ni kuoramu ena nodra ivola ni iTavi Vua na Kalou ka vakaraica kina na sala cava e rawa ni ra qaravi ira kina na tani ena nodra itutu vaka Matabete i Eroni (raica na tabana e 23 [dikoni], 47 [ivakavuvuli], se 71 [bete]). Kerei ira na cauravou mera vakasamataka na sala e rawa ni ra veivakaukauwataki kina ena kuoramu ena nodra qaravi ira na tani.
Vakaraitaka e dua na iyaloyalo kei Henry B. Eyring ni se cauravou. Wilika na veika a sotava o Peresitedi Eyring ni se bete voli ka veisiko vei ira na lewenilotu kei na nona bisopi. Na cava e rawa ni ra vulica na cauravou me baleta na veiqaravi ena vukudra na tani mai na veika a sotava o Peresitedi Eyring? Eso tale beka na veika vata oqori e rawa ni ra wasea mai na nodra bula?

Ni sa oti na nodra qarava na cauravou e dua se sivia na itaviqaravi ka koto mai cake mera qai cakava na kena oqo:

Sureti ira na lewe ni kuoramu mera raica na iwase na “Qaravi ira na Tani” ena nodra ivola iTavi Vua na Kalou (tabana e 26–27 [dikoni], 50–51 [ivakavuvuli], se 74–75 [bete]). Sureti ira na lewe ni kuoramu mera vola e dua na nodra ituvatuva ni qaravi ira na tani. Me kena ivakaraitaki, e rawa ni nodra ituvatuva mera muria na ivakasala nei Elder M. Russell Ballard, mera dau masu ena veisiga mera na sotava na madigi ni veiqaravi vei ira na tani (raica na “Meda Gumatuataka na Noda iTavi,” Ensign se Liaona, Nove. 2012, 29–31). Qai sureta na peresitedi ni kuoramu me liutaka e dua na veivosaki se cava e rawa ni cakava na kuoramu me ra vukei kina na tani, ka kerei ira na cauravou mera vola na vakatutu oqori ena nodra ivola.

iTuvatuva Eso ni iTavi Vua na Kalou

Solia na gauna vei ira na cauravou ni cava na soqoni ni kuoramu mera caka ituvatuva ena nodra ivola iTavi Vua na Kalou se ivakavakadewa online ni iTavi Vua na Kalou. Na ituvatuva oqo era ka ni tamata yadua, ia e rawa ni ra veivukei na lewe ni kuoramu ena kena vakavurei na vakasama me baleta na nodra ituvatuva.

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona laki qarava e dua ka me qai sureti ira na cauravou mera vakacavara na nodra vakatutu ni veiqaravi.
Vakamacalataka ni ra na sureti na lewe ni kuoramu mera na wasea na veika era nanamaki tiko kina ena macawa ka tarava ni ra na lako yani ka veiqaravi.