Na cava na vu ni noda lolo?

Na lolo sa ikoya na noda bolea meda kua ni kana se gunu ena vica na gauna ni kana. Nilako vata na lolo kei na masumasu ena yalodina e rawa me vukea nomu vakavakarautaki iko kei ira tale eso ena kena ciqomi na veivakalougatataki ni Kalou. E okati tale ga ena lolo na soli ni isolisoli ni lolo me vukei ira era gadreva tu na veivuke. Sa rawa mera kerei na lewe ni Matabete i Eroni mera vukei bisopi ena kena vakasokomuni mai na isolisoli ni lolo.

Mo vakarautaki iko vakayalo

Na cava eso na vuna o lolo kina, ka cava so e yaco ena nomu lolo? Na cava mo cakava me vakaibalebale kina vakalevu na lolo?

Na cava na vuna e bibi kina vei ira na cauravou me ra kila vinaka na ivakavuvuli ni lolo? Na cava na ivakatatao levu duadua era sotava tiko na cauravou mera marautaka na taucoko ni veivakalougatataki ni lolo?

Na ivolanikalou kei na ivurevure cava eso ena vukei ira na cauravou mera kila vakavinaka kina na lolo kei na kena veivakalougatataki ena yaco mai?

Esiteri 4:10–17; Maciu 4:1–11; V&V 59:12–14 (Na lolo sa ikoya na ivurevure ni vaqaqacotaki vakayalo)

Aisea 58:3–12; Maciu 6:16–18 (Na Turaga e vakamacalataka na ivalavala dodonu ni lolo, ka okati kina na isolisoli ni lolo)

Maciu 17:14–21 (E kaya o Jisu vei iratou na Nona tisaipeli ni lolo kei na masumasu e solia na kaukauwa levu me ia na veivakabulai)

Mosaia 27:18–24; Alama 6:6 (Na lolo e rawa me vukea nodra vakalougatataki eso tale)

Alama 5:45–46; 17:1–3, 9; Ilamani 3:35 (Na lolo e vukea na vaqaqacotaki ni ivakadinadina)

Henry B. Eyring, “‘Sa Sega Li ni Vakaoqo na Lolo kau sa Vinakata?’” Ensign se Liaona, Me 2015, 22–25

L. Tom Perry, “Na Cava o Vakasaqara?” Ensign se Liaona, Me 2005, 84--87

Dean M. Davies, “Na Lawa ni Lolo: Dua na iTavi ni Nodra Qaravi na Dravudravua kei na Vakaloloma,” Ensign se Liaona, Nove. 2014, 53-55

“Lolo kei na iSolisoli ni Lolo,” Tudei Ena Vakabauta (2004), 57–60

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Sureti ira na cauravou mera wasea e dua na ivolanikalou era se nanuma tiko mai na soqoni ni kuoramu ena macawa sa oti.
Sureti ira na cauravou me ra raitayaloyalotaka me dua na itokani ni dua tale na vakabauta e via kila se cava na ibalebale ni lolo kei na vuna era cakava kina. Era na vakamacalataka vakacava na ivakavuvuli ni lolo kivei ira nodra itokani? Me veivosakitaki na kedrau duidui na lolo kei na via kana.

Vulica vata

Na veitaviqaravi yadua e ra ena vukei ira na cauravou me ra kila na cava na ibalebale ni lolo. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Sureti ira na cauravou me ra wilika se sarava na vosa nei Peresitedi Henry B. Eyring “‘Sa Sega li ni Vakaoqo na Lolo kau sa Vinakata?’ vakailawalawa. Vakasamataka mo wasea vakaiwasewase lalai na vosa oqo. Ni ra wilika se sarava na iwasewase yadua, kerei ira me ra vaqara na isaunitaro vakaoqo, “Na cava na kena ibalebale me da lolo?” “Na cava na inaki ni lolo?” kei na “Na cava na veivakalougatataki ni lolo?” Sureti ira na cauravou me ra wasea na sala sa vakalougatataka kina na nodra bula na lolo kei na ka era na cakava me ra vakavinakataka cake kina nodra lolo.
Me vaka e dua na kuoramu, cakava e dua na ivola ni bolebole kilai vinaka e rawa ni ra sotava na cauravou. Sureti ira na cauravou me ra wilika na ivolanikalou e vakamacalataka na veivakalougatataki ni lolo, me vaka eso era sa volai tu ena ituvatuva oqo. Kerei ira me ra vola ena vava na veivakalougatataki ni lolo ena kena ivakarau dodonu. E rawa vakacava ena veivakalougatataki oqo me vukei ira na cauravou nodra vorata na veibolebole ni bula? Meu na vukei ira vakacava ena nodra itavi vaka lewe ni matabete? Vakadinadinataka na veivakalougatataki ni lolo, ka sureti ira na cauravou mera cakava vakakina.
Kerei ira na cauravou me ra vola e tolu na iyatu ena dua na draunipepa ka vola ena iyatu, “Na Cava e Dodonu Meda Cakava?” “Na Veika Cava Meda Kakua ni Cakava?” “Na Veivakalougatataki Cava sa Yalataka Tu na Kalou?” Sureti ira me ra vola na isaunitaro me baleta na lolo era kunea ena Aisea 58:3–12. (Kevaka e ganita, vakamacalataka ni isolisoli ni lolo ena dua na kena sala meda “soli [keda] madrai vua sa viakana,” ka sa ka marautaki vei ira na cauravou me ra sauma na isolisoli ni lolo.) Vakauqeti ira me ra wasea nodra isaunitaro kei na veivakalougatataki era sa ciqoma ena nodra lolo ena ivakarau ni lolo na Turaga.
Kevaka era na veivuke na cauravou ni nomudou tabanalevu vei bisopi ni kena vakasokomuni na isolisoli ni lolo (raica na iTavi Vua na Kalou 23), ka sa rawa vei peresitedi ni kuoramu me liutaka e dua na veivosaki me baleta na kena vakayacori na itavi oqo ena dua na ivakarau sa vinaka vua na Turaga. Kena ivakaraitaki, sa rawa vei peresitedi ni kuoramu me vakamacalataka na inaki ni isolisoli ni lolo, na mataqali ituvaki ni vakasama cava me tiko vei ira na lewe ni kuoramu ni ra vakaitavi tiko kina, kei na veivakalougatataki ni nodra qaravi na tamata. Me tiki ni veivosaki oqo, sa rawa mo raicalesu na ivakasala nei Bisopi Dean M. Davies vei ira na lewe ni Matabete i Eroni ena nona vosa “Na Lawa ni Lolo: Dua na iTavi ni Nodra Qaravi na Dravudravua kei na Vakaloloma” (raica na Ensign se Liaona, Nove. 2014, 55). Sureta e dua na lewe ni matabisopi me vakamacalataka ki na kuoramu na kena laki vakayagataki na isolisoli ni lolo mera vukei kina na dravudravua kei na vakaleqai. Sa rawa mo vakarautaki ira na lewe ni koramu mera laki vakavulica e dua na kalasi ni Lalai me baleta na itavi ni matabete ni kena vakasokomuni na isolisoli ni lolo.

Kerei ira na cauravou me ra wasea na veika era sa vulica nikua. Era kila deivaki beka na kena ibalebale me ra veivutuni? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me veivuke ena veivakavulici

“Ena yaco beka … ena so na gauna o na sega ni kila na isau ni dua na taro. Kevaka e yaco oqo, kaya ga ni o sega ni kila. O na vinakata beka mo kaya ni o na tovolea mo vaqara na kena isau. Se o na vinakata beka mo sureti ira na gonevuli me ra vaqara na kena isau, ena nomu solia vei ira na gauna ena dua tale na lesoni me ra tukuna kina na veika era sa vulica” (Veituberi, Me iLutua ni Bula [1999], 73).

Veisureti me caka

Me na vakacavara na soqoni na cauravou ka veiliutaki tiko. Sa rawa vua me:

Wasea na veika sa sotava ena gauna a lolo kina.
Sureti ira na lewe ni kuoramu mera vakayagataka na veika era sa vulica nikua ena gauna era na lolo tale kina.
Sureti ira na cauravou mera sauma na nodra isolisoli ni lolo.