Na cava na vuna eda vakaroti kina meda vakatabuya na Siga ni Vakacecegu?

Na Turaga sa solia mai na Siga ni Vakacecegu me yaga vei keda ka sa vakaroti keda medavakatabuya. Ni da rokova na Siga ni Vakacecegu eda na toro voleka sara yani vua na Turaga kei na noda matavuvale.Ena solia vei keda e dua na rai tawamudu kei na veivaqaqacotaki vakayalo. Na Siga ni Vakacecegu e vakatara tale ga vei keda meda vakacegu mai na noda cakacaka vakayago ka qarava na Turaga.

Mo vakarautaki iko vakayalo

Na veivakalougatataki cava o marautaka baleta na nomu taqomaka ka vakatabuya na Siga ni Vakacecegu? O kila vakacava se cava e ganita, kei na cava e sega ni ganita na Siga ni Vakacecegu?

Na cava na vuna e bibi kina vei ira na cauravou me ra kila na vuna e dua tiko kina noda Siga ni Vakacecegu? O na vakavotuya vakacava vei ira na gagadre me rokovi na Siga ni Vakacecegu? E rawa vakacava mo vukei ira na cauravou ena nodra vakatulewataka se itaviqaravi cava e veiganiti kei na Siga ni Vakacecegu?

Vulica ena masumasu na ivolanikalou kei na ivurevure oqo, ka digitaka eso ena ganiti ira vinaka na cauravou me vakavulici ira baleta na Siga ni Vakacecegu.

Nai Vakatekivu 2:2 (iVakatekivu ni Siga ni Vakacecegu)

Na Lako Yani 20:8–11 (Vakatabuya na Siga ni Vakacecegu)

Marika 2:27 (E buli na Siga ni Vakacecegu ena vuku ni tamata)

V&V 59:9–13 (Na kena rokovi na Siga ni Vakacecegu e vukea noda sega ni tauvi duka ena veika vakavuravura)

Henry B. Eyring, “Vakavinavinaka ena Siga ni Vakacecegu,” Ensign se Liaona, Nove. 2016, 99–102

Russell M. Nelson, “Me Ka e Rekitaki na Siga ni Vakacecegu,” Ensign se Liaona, Me 2015, 129–32

Kevin S. Hamilton, “Tautauri Matua Tikoga,” Ensign se Liaona, Nove. 2013

“Siga ni Vakacecegu,” Tudei Ena Vakabauta (2004), 117–18

“Vakarokorokotaki Ni Siga Tabu,” Me iSakisaki ni iTabagone (2011), 32–33

Vidio: “He Learned Compassion in His Youth” “Upon My Holy Day—Honoring the Sabbath,” “Upon My Holy Day—Rest and Renewal”

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Vakaraitaka vei ira na cauravou e dua na iyaloyalo se iyaya mai na lesoni ni macawa sa oti, ka sureti ira mera vakamacalataka na kena veiwekanitaki ki na veika era vulica mai kina.
Tarogi ira na cauravou se sa dua beka a kerei ira mera cakava e dua na ka ena Sigatabu e sega ni vakatarai ena Siga ni Vakacecegu. Era a vakamacalataka beka vakacava vei nodra itokani na vuna eda vakatabuya kina na Siga ni Vakacecegu? Waseaki na kuoramu na parakaravu e tiko ena itekivu ni ituvatuva oqo me baleta na vakatututale eso me vakamacalataki kina vei ira na tamata na bibi ni Siga ni Vakacecegu.

Vulica vata

Na veitaviqaravi e ra ena vukei ira na cauravou me ra kila na inaki ni Siga ni Vakacecegu. Mai na veivakauqeti ni Yalotabu, digitaka e dua se sivia ka na ganita vinaka duadua na nomu kalasi:

Sureti ira yadua na cauravou me ra vasaqara na nona vosa o Peresitedi Henry B. Eyring “Vakavinavinaka ena Siga ni Vakacecegu” ka toqa e vica na ka e tukuna o Peresitedi Eyring e rawa ni da vakavinavinakataka ena Siga ni Vakacegu. Me ra veidutaitaka vata na cauravou na ka era sa toqa rawa ka ra wasea na vei ka era kunea. Me ra wilika vata na veisureti nei Peresitedi Eyring ena nona mua ni nona vosa, ka bolei ira na lewe ni kuoramu me ra cakacaka taka.
Wasea na vosa “Me Ka e Rekitaki na Siga ni Vakacecegu” ki na tolu se va na iwasewase lalai. Sureti ira na cauravou me ra wilika na iwasewase, ena ilawalawa lalai se tamata yadua. Na cava eso na vakasama era raica rawa ena ivakarau me rekitaki kina na Siga ni Vakacecegu? Era na vakadeitaka rawa vakacava na cauravou ni na vakatubura na reki kei na marau na nodra itovo ena Siga ni Vakacecegu?
Wasei ira na cauravou mera veisasa. Sureta e dua na cauravou mai na veiisa yadua me wilika na V&V 59:9–15 ka vola na veika eda kerei meda cakava ena Siga ni Vakacecegu. Kerei ira eso tale na cauravou me ra vakasaqara ena tikina e 16–19 baleta na veivakalougatataki yalataki ena noda taqomaka ka vakatabuya na Siga ni Vakacecegu. Kerei ira me ra veiwaseitaka vakai ira na veika era kunea ka veivosakitaka na vuna e sa rui bibi kina na kena rokovi na Siga ni Vakacecegu. Sureta na kuoramu me ra veivosakitaka na vuna e solia kina vei keda na Turaga na Siga ni Vakacecegu. Kerei ira vakayadua na cauravou me ra vakasamataka eso na ka e rawa ni ra cakava me vakadeitaka na inaki ni Turaga me baleta na Siga ni Vakacecegu ena nona bula vakai koya.
Tarogi ira na cauravou me ra vakadeitaka vakacava kevaka e dua na itaviqaravi e ganita na Siga ni Vakacecegu. Sureti ira mera raica na Vunau kei na Veiyalayalati 59:9–13 vakakina ena Me iSakisaki ni iTabagone ( draunipepa 30–31) na ivakavuvuli eso ena rawa ni vukei ira, ka kerei ira mera vola ena vava ni volavola na veika era sa kunea. Sureti ira na cauravou me ra vakasamataka na nodra itaviqaravi ni Sigatabu ka vakadeitaka vakaiira kevaka e salavata kei na ivakavuvuli oqo. Vakayaloqaqataki ira na cauravou mera lalawataka vakaidina me caka e dua na veisau era nanuma ni sa gadrevi sara me vakayacori ena Siga ni Vakacecegu.
Vakaraitaka se wasea na italanoa me baleta na tamai Elder Kevin S. Hamilton ena imatai ni rua na parakaravu ni nona vosa “Tautauri Matua Tikoga.” Na cava era vulica na cauravou me baleta na bibi ni kena rokovi na Siga ni Vakacecegu mai na italanoa oqo? Solia vei ira na cauravou na ilavelave eso ni parakaravu mai na vosa nei Elder Hamilton ka tekivu ena malanivosa “E tiko vei keda yadua e vuqa na digidigi meda cakava.” Kerei ira mera wilika na parakaravu ka cakacaka vata vakaveisa me caka e dua na lisi ni “vinaka,” “vinaka cake,” ka “vinaka sara” ena itaviqaravi ni Siga ni Vakacecegu. Sureti ira mera wasea ena kalasi na nodra nanuma.
Ni ko wilika na “Siga ni Vakacecegu” ena Tudei ena Vakabauta, kerei ira na cauravou mera vakarogoca na ivakaraitaki ni itaviqaravi dodonu ena Sigatabu. E duidui vakacava na vakasama vakavuravura ni itaviqaravi ena Siga Tabu mai na kena e gadreva vei keda na Turaga meda cakava? Kerei ira mera vakasamataka na kena rawa ni veivagolei se veimuataki tani na itaviqaravi eso mai na yalo ni Siga ni Vakacecegu. Era na kila vakacava ni veika era sa cakava tiko era sa vakatabuya tiko na Siga ni Vakacecegu se sega? Na gauna cava beka era sa vakila kina ni veika era sa cakava tiko sa veidonui tiko kei na Siga ni Vakacecegu?

Kerei ira na cauravou mera wasea na veika era sa vulica nikua. Era kila tiko beka na inaki ni Siga ni Vakacecegu? Na cava era sa bau vakila se vakanananu kina? E tiko beka eso tale na nodra vakatataro? Ena yaga beka me na tauri vakalevu na gauna ena ulutaga oqo?

Me Veivuke ena Veivakavulici

“Ni o sa veivakavulici tiko mai na ivolanikalou, e dau yaga sara vakalevu vei ira na vuli tiko me ra raica se vakarogoca vakatabakidua e dua na ka” (Veituberi, Me iLutua Ni Noda Bula [1999], 63).

Veisureti me caka

Me na vakacavara na soqoni na cauravou ka veiliutaki tiko. Sa rawa vua me:

Wasea na nona ivakadinadina baleta na bibi ni nona vakatabuya na Siga ni Vakacecegu ka vakamacalataka na kena sa toro cake na nona bula ni sa cakava.
Sureti ira na lewe ni kuoramu mera vaqaqacotaka na nodra matavuvale kei ira era tiko voliti ira ena nodra ivakaraitaki vinaka ni vakatabuya na Siga ni Vakacecegu.