Na cava e rui bibi kina meda yalodina?

Na ibalebale ni yalodina o ya na nomu digitaka mo kakua ni lasu, butako, lawaki, se naki ca ena sala cava ga. Ni da dau yalodina, eda sa vaqaqacotaka tiko noda ivakarau ni bula ka na vakatara vei keda meda yaga vakalevu cake vua na Kalou kei ira na tamata. Eda sa vakalougatataki ena vakacegu ni vakasama kei na veivakabauti-vakaikeda ka sa na vakabauti keda na Turaga kei ira tale eso.

Mo vakarautaki iko vakayalo

Na cava o nanuma ni kena ibalebale meda yalodina ena veika kece sara? Na cava na vuna o vakila kina ni sa rui bibi meda yalodina? E tarai iko vakacava se dua tale o kila na nodra vakatulewa yalodina se veivakaisini o ira tale eso?

Na veivakatovolei ni yalodina cava soti era sotava tiko na cauravou ena nodra bula? Mo vukei ira vakacava me ra kila ni veivakalougatataki e lako mai ena yalodina ena veituvaki kece sara? E rawa vakacava mo vukei ira me ra yaloqaqa mera digidigi ena yalodina?

Vulica ena masumasu na ivolanikalou kei na ivurevure oqo, ka digitaka na kena e ganiti ira vinaka na cauravou me vakavulica vei ira na yalodina.

Same 101:7; Na Vosa Vakaibalebale 12:22; 2 Koronica 4:2; Efeso 4:29; Alama 27:27; Yavu ni Vakabauta 1:13 (Meda yalodina ka yalododonu ena veika kece ga)

Cakacaka 5:1–10 (E sega ni rawa ni da lasu kivua na Turaga)

2 Nifai 9:34; Alama 12:1-5 (Na veivakaisini sa ikoya na ivalavala ca ka sa rui bibi na ka ena yaco kina)

Josefa Simici—Ai Tukutuku 1:21–25 (Veika e sotava o Josefa ena nona yalodina e matadra na veivakacacani)

Thomas Monson, “Na Vakavakarau ena Kauta Mai na Veivakalougatataki,” Ensign se Liaona, Me 2010, 64–67

Robert C. Gay, “ Cava ena Solia na Tamata me iSau ni Yalona?” Ensign se Liaona, Nove. 2012, 34–36

Richard C. Edgley, “Tolu na iTauwelu kei na Niusipepa 25-na Sede,”Ensign se Liaona, Nove. 2006, 72–74

“ Yalodina ka Yalododonu, ” Me iSakisaki ni iTabagone (2011), 31

“Yalodina,” Tudei Ena Vakabauta (2004), 205

Vidio: “Honesty: You Better Believe It”

Veivakavulici ena ivakarau ni iVakabula

E veivakavulici na iVakabula ena ivakaraitaki. A vakavulica vei ira na masu ena Nona masu vata kei ira. A vakavulica vei ira mera dauloloma ka veiqaravi ena iwalewale a loloma ka veiqaravi kina. A vakavulica vei ira na sala me vakavulici kina na Nona kosipeli ena ivakarau a veivakavulici kina o Koya. Era na vaqaqacotaki na cauravou ni ra raica ni ko bula voli ena yalodina ena ka o vakavulica kei na ivakarau ni nomu bula.

Raica mera veiliutaki na cauravou

Raica e dua na ivakaraitaki ni ituvatuva ni soqoni ni kuoramu.

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Raica eso tale na vakasama ni vuli kei na veivakavulici.

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

• Sureti ira na cauravou mera wasea na veika era sotava e sema tiko ki na lesoni ni macawa sa oti.

• Me ra vola na cauravou ena dua na pepa (kua ni vola na yacadra) na veigauna eso era a temaki kina mera lawaki (sa rawa mera raica na ivakatagedegede era tiko ena Me iSakisaki ni iTabagone me baleta na vakasama eso). Soqona vata mai na nodra pepa ka wasea e vica na ituvaki oqori ki na kuoramu. Na cava era rawa ni cakava ena ituvaki vakaoqo? Na cava beka na revurevu ni yalodina tiko se lawaki?

Vulica vata

Raica eso tale na veivakasama ni vuli kei na veivakavulici.

Na itaviqaravi yadua e ra ena vukei ira na lewe ni kuoramu mera kila vakavinaka na vuna e bibi kina na yalodina. Mai na veivakauqeti ni Yalotabu ena nomu digitaka e dua se sivia ka na ganita vinaka na nomu kuoramu:

• Sureti ira na cauravou mera sarava na “Honesty: You Better Believe It” se wilika na italanoa ni voli tikite ni sara iyaloyalo ena vosa nei Elder Robert C. Gay “ Cava ena Solia na Tamata me iSau ni Yalona? Kerei ira me ra vola na sala e rawa kina me ra vakavakarau ena gauna oqo me ra vorata kina na veitemaki ni veidabui ni bera ni qai yaco dina mai. Sureti ira me ra wasea na nodra vakasama vei ira na vo ni kalasi.

• Me vaka e dua na kuoramu, wilika na “Yalododonu ka Yalodina” ena Me iSakisaki ni iTabagone. Kerei ira na cauravou me ra vakaraica na veivakalougatataki ni yalodina ka vola ena vava ni volavola. Na yalodina e tara vakacava na nodra rawa ni caka vinaka kivei ira na tani kei na Turaga? Na cava e bibi kina mera yalodina tiko ni ra sa lewe ni matabete, luvenatagane, tuakana, itokani, iliuliu, se dua na tamata cakacaka?

• Wilika na Josefa Simici—Ai Tukutuku 1:21–25 me wili vakuoramu, tarogi ira na cauravou se cava era sa vulica me baleta na yalodina mai na italanoa oqo. Era vakalougatataki vakacava baleta ni o Josefa a dina ki na veika a sotava kei na veika a kerea vei koya na Tamada Vakalomalagi kei Jisu Karisito? Na gauna cava e gadrevi kina vei ira na cauravou na nodra yalodina me ra yaloqaqa? Era vakalougatataki vakacava ena nodra yalodina?

• Droinitaka sobu mai e dua na laini ena lomadonu ni vava ni volavola. Vola ena dua na yasana, “Kevaka au yalodina…” kei na yasana ka dua vola, “Kevaka au dauveivakaisini…” Kerei ira na cauravou me ra vakasaqara na sala me taucoko kina na veiyatuvosa oqo ena nodra wilika na iwase ka kena ulutaga “Yalodina” ena Tudei Ena Vakabauta kei na italanoa me baleta na gonevuli dauveivakaisini ena vosa nei Peresitedi Thomas S. Monson Vakavakarau E Kauta Mai Na Veivakalougatataki.” Na vakanananu cava tale eso e rawa me ra kuria kina? Sureti ira na cauravou me ra wasea nodra raica vakacava na veika oqo ena nodra dui bula. Kerea na lewe ni koramu me ra wasea eso na sala era dau vakadonuya kina na nodra tawadodonu na tamata. Era vakamacalataka vakacava vei ira eso tale na vu ni nodra yalodina?

• Lesi ira na cauravou mera yadua na veitiki ni ivolanikalou mai na lesoni oqo. Kerei ira na cauravou me ra vola e dua ki na va na vosa ka matataka na ka e vakavulica na tikina me baleta na yalodina. Sureti ira me ra wasea na veika era sa vola ka qai vakamacalataka na veika era vakila ka sotava me baleta na yalodina.

Kerei ira na cauravou mera wasea na veika era sa vulica nikua. Era kila beka na bibi ni dau yalodina? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?

Me Veivuke ena Veivakavulici

“Ena rawa ni o vukei ira na nomu lewenikalasi me dei na nodra vakaitavi ena veivosaki vakalasi ke o sauma mai vakavinaka na nodra vakasama. Me kena ivakaraitaki oqo, o na vinakata beka mo na kaya, ‘Vinaka vakalevu na nomu isau ni taro. ‘E dua na rai vinaka o ya’ se … ‘Oqori e dua na ivakaraitaki vinaka’ se ‘Au vakavinavinakataka na veika kece o tukuna mai edaidai’” (Na Veituberi, Me iLutua ni Noda Bula, [1999],74).

Veisureti me caka

Raica eso tale na vakasama ni vuli kei na veivakavulici.

Me na vakacavara na soqoni na cauravou ka veiliutaki tiko. Sa rawa vua me:

• Wasea na nona ivakadinadina me baleta na veika sa vulica mai na lesoni nikua.

• Bolei ira na cauravou yadua mera yalodina tiko ena veika kecega.