O cei o au, ka'u na rawa ni vakataki cei?

Eda luvena tagane na Tamada Vakalomalagi, ka buli ena Kena ituvaki, ena gugumatua meda na vakataki Koya. Mai na ituvatuva vakalou, e tu vei keda na isolisoli mareqeti kei na taledi me na vukei keda ena qaravi taucoko ni noda itavi vakamatabete. Na noda kilai keda e vakainaki kina na noda bula ka vukea na noda vakatulewa dodonu.

Mo vakarautaki iko vakayalo

E vakayarayarataka vakacava nomu vakasama kei na nomu ivalavala ena nomu kila ni o iko na luvena tagane na Kalou? Na isolisoli kei na taledi cava so e sa solia vei iko na Kalou? E rawa vakacava ni o vakayagataka mo vakalougatataki ira kina na cauravou o vakavulica.

E rawa vakacava mo vukei ira na cauravou mera kila na nodra rawa ni rawata vakalou? E rawa vakacava ena kila oqo me vukea na dodonu ni nodra vakatulewa? Na isolisoli kei na taledi kilai tani cava so e tu vei ira na cauravou o vakavulici ira tiko? E rawa vakacava mo vakauqeti ira mera vakayagataka na isolisoli kei na taledi me vakalougatataki ira eso tale?

Vulica ena masumasu na ivolanikalou kei na ivurevure oqo. Na cava o vakila ni uqeti iko mo wasea vata kei ira na cauravou?

Same 82:6; Cakacaka 17:28–29; Iperiu 12:9; V&V 76:24 (Eda sa luve ni Kalou)

Maciu 25:14–30 (Vosa vakatautauvata ni taledi)

Luke 15:4–6, 11–32; Joni 3:16; V&V 18:10–15 (Sa ka talei na tamata kece ga)

Mosese 1:4–22 (E vulica o Mosese ni o koya na luve ni Kalou)

Donald L. Hallstrom, “Au Luve ni Kalou,” Ensign se Liaona, Me 2016, 26–28

Dale G. Renlund, “Era Tovolea Tikoga na Yalododonu Edaidai,” Ensign se Liaona, Me 2015, 56–58

Dieter F. Uchtdorf, “Va na iTutu,” Ensign se Liaona, Me 2013, 58–61

“Au Luve ni Kalou,” Sere Ni Lotu, naba 185

Vidio: “I Am a Son of God”; “Our True Identity”

Veivakavulici ena ivakarau ni iVakabula

E kilai ira a vakavulici ira na i Vakabula o Koya, ka kila o Koya se ra na vakataki cei. A kunea o Koya na sala kilai tani me vukei ira mera vuli ka tubu. Ni ra sotava na dredre, a sega ni biuti ira tu o Koya ia a tomana tikoga me lomani ira ka qaravi ira. Ena nomu vakavulici ira na cauravou, vakasamataka tiko se o cei o ira, vakakina se o cei ka rawa ni ra yaco me vaka, ka kunea na sala me vukei ira mera vakayacora na nodra rawa ni rawata vakalou.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Sureta e vica na cauravou mera wasea na ka bibi duadua era vulica ena lesoni ni macawa sa oti kei na kena vakayagataki vakacava ena nodra bula.
Vola na taro oqo ena papa ni volavola: “Na cava au kila me baleti Tamada Vakalomalagi?” “Na cava e vakavulica vei au me baleta o cei o au ka meu na vakataki cei?” “Ena tara vakacava noqu vakasama kei na noqu ivalavala na kila ka oqo?” Solia vei ira na cauravou na gauna mera vakasamataka na veitaro oqo, ka qai sureti ira mera lako mai ka vola nodra isaunitaro ena papa ni volavola.

Vulica vata

Na itaviqaravi yadua ka koto oqori e ra ena vukea na lewe ni kuoramu mera kila na kedra ivakatakilakila kei na veika vakalou era rawa ni rawata. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Vakasamataka e dua na itaviqaravi rawarawa ka na vukei ira na cauravou me ra kila ni yaco me vaka na Kalou e gadrevi kina na vosota kei na sasaga tikoga. E dodonu me na qaravi ena itaviqaravi oqo na sasaga vakavuqa me rawa na qaqa. Me vaka beka oqo, e rawa ni ra tovolea vakavicavata na cauravou me ra viritaka e dua na ka ki na loma ni kavanibenu ni ra sega ni raica tiko. Na cava e vakavulica vei keda na itaviqaravi oqo me baleta na sasaga tikoga? E rawa vakacava ni da vakaveiwekanitaka na iwalewale oqo ki na noda yaco me vaka na Tamada Vakalomalagi? Sureti ira na cauravou yadua me ra vakaraica ka wasea na malanivosa eso mai na vosa nei Elder Dale G. Renlund “Era Tovolea Tikoga na Yalododonu Edaidai” ka vakamacalataka na veika era vulica mai na itaviqaravi.
Sureti ira na cauravou mera vakasaqara na Mosese 1:4–7 ka raica na cava a vulica o Mosese me baleti koya. Sureti ira mera vakasaqara na tikina e 12 mera raica kina na veika a vakayacora o Setani me veibasai kei na veika a vulica o Mosese. Wilika vata na tikina e 13– 22. Kerei ira na cauravou mera wasea na veika era vulica mai na italanoa me baleti ira, na Tamada Vakalomalagi kei na i Vakabula, kei na ivalavala ca. Na cava soti na itutu era sotava na cauravou ka na veivuke sara kina vakalevu na kila ka oqo. Vakasamataka me vakaraitaki na vidio “I Am a Son of God” me dua na tiki ni veivosaki oqo.
Kerei ira na cauravou mera vola eso na nodra itutu ena gauna oqo se sa taura oti ena nodra bula. Na cava era tukuna tiko na itutu oqo baleti ira? Sureti ira mera digitaka e dua se rua na itutu a bibi sara vakalevu vei ira. Wasea na kuoramu ki na va na ilawalawa, ka lesia ki na ilawalawa yadua me wilika e dua na itutu e tukuni tiko ena vosa nei Peresitedi Dieter F. Uchtdorf “Va na iTutu.” Sa rawa talega mera wilika na veitiki eso ni vosa nei Elder Donald L. Hallstrom “Au Luve ni Kalou.” Kerea na ilawalawa yadua me qai wasea ki na kuoramu na veika era sa vulica kei na nodra vakayagataka ena nodra bula. Me tiki ni itaviqaravi oqo, sa rawa mera lagata na cauravou “Au Luve ni Kalou” (Serenilotu, naba 185).
Sureti ira na lewe ni kuoramu mera sarava na vidio “Our True Identity” (se wilika eso na ivolanikalou oqo: 1 Joni 3:1–3; V&V 84:37–38; 88:107; 132:20) ka vola e dua na itukutuku nodra raica ni vakaibalebale vakalevu. Kerea mera wasea na veika era vola ka vakamacalataka na vuna era vola kina. Na cava era vulica mai na vidio se na veivolanikalou oqo me baleta se o cei o ira kei na kena rawa mera vakataki cei? E rawa vakacava kina kila ka oqo me tara na nodra digidigi? Me tiki ni veivosaki oqo, vakasamataka na wasei ni itukutuku mai vei Peresitedi Gordon B. Hinckley: “Na inaki ni kosipeli me liutaki keda ena ilakolako vaka kina ki cake ki na cecere ni ka e rawati, ia, ka qai yaco, ki na veika vakalou ” (“Don’t Drop the Ball,” Ensign, Nov. 1994, 48).

Kerei ira na cauravou me ra wasea na veika era sa vulica nikua. Na cava era sa bau vakila se nanuma? Era kila tiko li se o cei o ira kei na kena rawa mera vakataki cei? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea nona ivakadinadina ni da luvena na Kalou ka vakamacalataka na kena dusimaki vakacava na nona ivalavala mai na ivakadinadina oqo.
Sureti ira na cauravou mera vakasamataka e dua na sala mera na vakayagataka kina na nodra isolisoli kei na taledi mera vakalougatataki ira kina na luvena na Tamada Vakalomalagi.