Na cava na vuna e bibi kina o Jisu Karisito ena noqu bula?

A digitaki ko Jisu Karisito me Noda iVakabula. Na Nona Veisorovaki sa rawa kina na noda vakaturicaketale ka veivutuni ka vosoti me rawa ni da lesu take ki na iserau ni Tamada Vakalomalagi. Me ikuri ni noda vakabulai mai na noda ivalavala ca, e solia talega vei keda na iVakabula na vakacegu kei na kaukauwa ena gauna ni veivakatovolei. E tu-va o Koya na taucoko ni ivakaraitaki vei keda, kei na Nona ivakavuvuli era sa yavudei ni marau ena bula oqo kei na bula tawamudu ena vuravura sa bera mai.

Mo vakarautaki iko vakayalo

Cava na vuna e bibi kina vei iko o Jisu Karisito? E sa vakayarayarataka vakacava na nomu bula o Koya?

Cava na vuna e bibi kina vei ira na cauravou mera kila na itavi i Jisu Karisito? O na vukei ira vakacava mera kunea na Nona bibi ena nodra bula?

Wilika ena yalomasumasu na veivolanikalou kei na ivurevure oqo. Na cava e rawa ni vukea nomu vakavulica na kila kei na vuna e bibi kina vei ira na cauravou o Jisu Karisito?

Maciu 10:1 (O Jisu Karisito e solia vei ira na Nona iApositolo na kaukauwa vakamatabete)

Joni 6:38 (O Jisu Karisito a lako mai me kitaka na lewa nei Tamana)

Joni 8:12; 3 Nifai 11:11 (O Jisu Karisito na rarama kei na vu-ni-bula kei vuravura)

Joni 14:6 (O Jisu Karisito na sala, kei na vu-ni-dina, kei na vu-ni-bula)

2 Nifai 2:3–9; 9:5–12 (O Liai kei Jekope e rau vakadinadinataka na Veisorovaki i Jisu Karisito)

3 Nifai 27:14–16 (O Jisu Karisito e vakabulai keda mai na noda ivalavala ca kei na mate ena Nona Veisorovaki)

3 Nifai 27:27 (O Jisu Karisito sa noda ivakaraitaki)

“Se Bula Na Karisito: Nodra iVakadinadina na Kuoramu Le Tinikarua” Ensign, Apr. 2000, 2–3 (raica tale ga Tudei Ena Vakabauta, 87–89; se iTavi Vua na Kalou, 106)

David A. Bednar, “Kevaka Dou sa Kilai Au,” Ensign se Liaona, Nove. 2016, 102–5

José A. Teixeira, “Vakasaqara Na Turaga,” Ensign se Liaona, Me 2015, 96–98

Jeffrey R. Holland, “Na iMatai ni iVakaro Cecere,” Ensign se Liaona, Nove. 2012

Vidio: “Reclaimed”, “#Aleluya—E Dua na iTukutuku ni Siganimate me baleti Jisu Karisito”

Veivakavulici ena ivakarau ni Turaga

Na iVakabula a sureti ira eso mera cakacaka ena vakabauta ka bulataka na dina a vakavulica o Koya. A kunea na madigi me baleti ira ka mera vuli mai na kaukauwa ni veika era sotava. Na cava o rawa ni cakava mo vukei ira kina na cauravou mera raica na bibi ni kena caka me tiki bibi ni nodra bula o Jisu Karisito?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka vakaraitaka na lesoni ni macawa oqo:

Vola e dua se sivia na taro ena papa ni volavola me vukei ira na cauravou mera railesuva na veika era a vulica ena macawa sa oti.
Sureti ira na cauravou mera raici “Jisu Karisito” ena iDusidusi ki na iVolanikalou ka railesuva na kena volai ni oti na ulutaga. Tarogi ira mera vakasaqara na vosa kei na malanivosa e vakamacalataka na itavi kei na ilesilesi i Karisito. Na cava era vulica baleti Jisu Karisito mai na kena railesuvi na kena ka volai oqo? Na cava era vakila me baleti Koya ni oti na railesuvi ni veika e sa cakava vei keda o Koya?

Vulica vata

Na itaviqaravi yadua e koto e ra ena vukea na lewe ni kuoramu mera kila na vuna e bibi kina ena nodra bula o Jisu Karisito. Muria na veivakauqeti ni Yalotabu, digitaka e dua se sivia ka na ganita vakavinaka sara na nomu kuoramu:

Sureta rawa e vica na lewe ni tabanalevu me ra lako mai ki na kalasi ka wasea e dua na ka a yaco ka vukea nodra yaco me ra kilai Jisu Karisito. Wasewasea vakailawalawa na kuoramu ka lesia na ilawalawa yadua me ra wilika e dua na italanoa ena vosa nei Elder David A. Bednar “Kevaka Dou sa Kilai Au.” Kerea na ilala yadua me ra raica na nodra iwasewase me baleta na isau ni veitaro oqo: Na cava na duidui ni noda kila na veika baleti Karisito kei na noda kilai Karisito? Na cava eda rawa ni cakava meda kilai Karisito dina sara? Na idusidusi cava e rawa ni o wasea vei ira nomu itokani era vinakata me ra vaqaqacotaka nodra veiwekani kei na iVakabula?
Sureti ira na lewe ni kuoramu me ra railesuva na vosa nei Elder José A. Teixeira “Vakasaqara na Turaga” ka vakasaqara na veivakalougatataki e yalataka o Elder Teixeira vei ira era vakasaqarai Jisu Karisito. Sureti ira me ra wasea na veika era kunea ena vosa kei na cava era sa dui cakava tiko me yaco kina me tiki bibi ni nodra bula e veisiga na iVakabula. Me tiki ni veivosaki oqo, e rawa talega mo ni railesuva vata na itovo ni bula rawarawa e vakatura tiko ena nona vosa o Elder Teixeira. Sureti ira na cauravou me ra vakotora na takete me ra vakayagataka e dua na vakatutu sa veivosakitaki ena kalasi me ra toro voleka yani kina vua na Karisito.
Sureta e dua na lewe ni kuoramu me vakavulica e dua na iwase ni lesoni oqo. E rawa ni cakava oqo me tiki ni nona ituvatuva ni nona iTavi Vua na Kalou ka vakavulica me baleta na Veisorovaki (raica na “Kila na iVunau,” tabana 18, 42, se 66).
Kerea eso na cauravou mera vakasaqara na 2 Nifai 2:3–9 mera raica na ka a cakava o Jisu Karisito vei keda, ka kerei ira eso tale mera vakasaqara na 2 Nifai 9:6–10 mera raica na cava ena kauta mai kevaka me a sega ni vakayacora o Koya na Nona veiqaravi. Ena duidui vakacava na vuravura? Wasea na nomu lomana na iVakabula, ka sureti ira na cauravou mera cakava vakakina.
Vakaraitaka na iyaloyalo ni nona vukei ira tale tiko eso na iVakabula (raica na Gospel Art Book, 36–60). Solia e vica na miniti vei ira na cauravou mera vakasamataka ka wasea na veigaunisala duidui e sa vukei ira kina na iVakabula, nodra matavuvale, kei na so tale era kila. Sureti ira mera wasea na veika era vakila me baleta na iVakabula. Kerei ira na cauravou mera wilika na iotioti ni va na parakaravu ni vosa nei Elder Jeffrey R. Holland “Na iMatai ni iVakaro Cecere” ena nodra vakasamataka na taro “Na cava au rawa ni cakava meu vakaraitaka kina na bibi i Jisu Karisito ki na noqu bula?” Sureti ira mera vola na nodra vakanananu, ka mera wasea na veika era vola, kevaka e vakaceguya na yalodra ni ra cakava.
Vakaraitaka na vidio “Reclaimed.” Na cava era vulica na cauravou mai na vidio me baleta na ka e rawa ni cakava o Jisu Karsito ena vukudra? E rawa vakacava mera vakayagataka na itukutuku ni vidio oqo mera vukei ira kina na tamata era sotava tiko na dredre ni veivosoti vakaiira se na nodra vakila ni sa sega ni rawa ni vukei ira na iVakabula? Na ivolanikalou cava era na wasea? (raica, me kena ivakaraitaki, Aisea 1:18; Alama 36:3, 27; Ica 12:27; V&V 58:42–43).
Vakaraitaka e dua na iyaloyalo ni iVakabula, ka vola ena vava ni volavola na taro oqo: “O cei o Jisu Karisito?” “Na cava e sa cakava o Koya vei keda?” “Eda kila vakacava ni bula tiko o Koya nikua?” Sureti ira na cauravou me ra vakasaqara na “The Living Christ: The Testimony of the Apostles” se na ivola ni sere mera kunea kina na isau ni veitaro oqo (raica na “Jisu Karisito—iVakabula” ena ituvatuva ni Ulutaga ena ivola ni sere). Kerei ira mera wasea na veika era sa raica. E ra-wa vakacava na nodra bula ni veisiga na nodra ivakadinadina me baleti Jisu Karisito? Sa rawa ni o vakaraitaka talega na vidio “#Hallelujah—An Easter Message about Jesus Christ.”

Kerei ira na cauravou mera wasea na veika era sa vulica nikua. Na cava era sa bau vakila se nanuma? Era sa kila li na vuna e bibi kina o Jisu Karisito ki na nodra bula? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me veivuke ena veivakavulici

“Mo dau qarauna tiko mo kua so ni dau vosa vakalevu se mo dau vakaraitaka vakalevu na nomu vakasama. Na ivakarau oqo e rawa ni vakavuna na nodra sega ni kauwaitaka na lewenikalasi na lesoni. Vakasamataka ni o veidusimaki tiko ena dua na ilakolako vakavuli ka o solia tiko ga e vica na ivakasala veiganiti mera tiko ena sala dodonu o ira o vakavulica tiko” (Veituberi, Me iLutua Ni Noda Bula [1999], 64).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona ivakadinadina me baleta na iVakabula.
Sureti ira na lewe ni kuoramu mera vakasamataka ni nodra ivakadinadina me baleta na iVakabula e rawa ni vakalougatataka e dua era kila tu ka vakauqeti ira mera wasea na nodra ivakadinadina.