Na cava eda kila me baleta na kedratou ituvaki na Lewe Tolu Vakalou?

Na Lewetolu Vakalou e okati kina na Kalou na Tamada Tawamudu, na iVakabula o Jisu Karisito, kei na Yalo Tabu. E dina ga ni ratou duidui tamata na Lewe Tolu Vakalou kei na nodratou dui itavi, sa duabau ga na Nodratou inaki. Sa uasivi sara na nodratou duabau ena kena vakayacori na yavu ni veivakabulai vakalou nei Tamada Vakalomalagi.

Mo vakarautaki iko vakayalo

Na nomu kila na Lewe Tolu Vakalou ena vukei iko vakacava mo kila o cei o iko? E duidui vakacava mai vei ira e so tale na vakabauta vakalotu na ka eda kila me baleti iratou na Lewe Tolu Vakalou?

Ena vukei ira vakacava na cauravou na nodra kila deivaki na kedratou ituvaki na Lewe Tolu Vakalou?

Wilika ena yalomasumasu na veivolanikalou kei na ivurevure oqo. Na cava o vakila ni ko uqeti mo wasea vata kei ira na cauravou?

Nai Vakatekivu 1:26–27 (Eda sa buli meda ucuya na Kalou)

Maciu 3:13–17 (Eratou vakatakilai yadua na Lewe Tolu Vakalou ena papitaiso nei Karisito)

Joni 17:21; V&V 20:28 (Na lewe ni Lewe Tolu Vakalou era sa duavata me duabau ga)

Cakacaka 7:55–56; Josefa Simici— Ai Tukutuku 1:14–17 (O Sitiveni kei Josefa Simici rau a raica na Tamada kei na Luvena ni rau duidui vakayago)

V&V 130:22–23 (Na Tamada kei na Luvena e rau vakayago; na Yalo Tabu e sega)

Na Yavu Ni Vakabauta 1:1 (Keimami vakabauta ni lewe tolu na Lewe Tolu Vakalou)

Dallin H. Oaks, “Na Lewetolu Vakalou kei na Yavu ni Veivakabulai,” Ensign se Liaona, Me 2017, 100–103

Boyd K. Packer, “Na iVakadinadina,” Ensign se Liaona, Me 2014

Robert D. Hales, “Na Bula Tawamudu- Meda Kila na Kalou, na Tamada Vakalomalagi, kei na Luvena, ko Jisu Karisito” Ensign se Liaona,Nove. 2014, 80-82

“Kalou na Tamada,” “Yalo Tabu,” “Jisu Karisito, ” Tudei Ena Vakabauta (2004), 50–52, 202–205, 46–48

Vidio: “The Restoration”; raica tale ga Doctrine and Covenants Visual Resources DVD

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Sureta e dua na lewe ni kuoramu me lako mai ki na soqoni ni kuoramu ka vakavakarau me vakayagataka e rua na miniti me railesuva kina na veika a vulica ena lesoni sa oti.
Sureti ira yadua na cauravou me vakaraitaka na nona vakavulica vakacava e dua ka sega ni lewenilotu me baleta na duidui ni Lewe Tolu Vakalou. Na ivolanikalou cava era na vakayagataka? Cava na vuna era vakila kina na kena bibi na kila-ka oqo?

Vulica vata

Na itaviqaravi yadua e ra ena vukei ira na lewe ni kuoramu mera kila deivaki na kedratou ituvaki na Lewe Tolu Vakalou. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Sureti ira na cauravou me ra vakasamataka na bolebole era sotava tiko na cauravou nikua. Na cava e rawa ni ra raica na cauravou ena iwasewase IV ena vosa nei Elder Dallin H. Oaks “Na Lewetolu Vakalou kei na Yavu ni Veivakabulai” e rawa li ni vukei ira ena ibolebole oqo? Me vukei ira me ra vulica eso tale na ka me baleti ira na lewe ni Lewetolu Vakalou, wasei ira na cauravou ena tolu na ilawalawa, ka solia ki na ilawalawa yadua na tiki ni pepa e tiko kina na ulutaga qo: “Na Kalou na Tamada” “Na Luvena,” kei na “Yalo Tabu.” Sureti ira yadu na ilawalawa me ra vakasaqara na iwasewase e veisemati ena vosa nei Elder Oaks ka vakasaqara na ivolanikalou a wasea o koya. Kerei ira na cauravou me ra vola na veika era vulica ena nodra ivola, ka me ra na qai wasea ki na kuoramu. Ena vukei keda vakacava na dina eda sa vulica me baleta na Lewetolu Vakalou, kei na veibolebole era raica rawa?
Sureta e dua na lewe ni kuoramu me vakavulica e dua na iwase ni lesoni oqo. E rawa me cakava oqo me tiki ni ituvatuva ni nona iTavi Vua na Kalou me vulica ka vakavulica me baleta na Lewe Tolu Vakalou (raica na “Kila na iVunau,” draunipepa 18, 42, se 66).
Vakarautaka e dua na lisi ni ivolanikalou vei ira na cauravou ena ituvatuva oqo. Sureti ira yadua na cauravou mera vakasaqara e dua vei ira na ivolanikalou oqo ka me tukuna na veika sa vulica mai kina baleta na Lewe Tolu Vakalou kei na nona ituvaki vakalou vakai koya. Kerei ira na cauravou mera wasea na veika era sa vulica nikua. Na kila oqo e tara vakacava na nodra digidigi ni veisiga yadua? Vakayaloqaqataki ira mera maroroya e dua na lisi ni veitikina oqo ena nodra ivolanikalou me rawa ni ra vakayagataka ena nodra vakavulica eso me baleta na Lewe Tolu Vakalou.
Solia ki na cauravou yadua e dua na pepa e tiko kina na taro oqo: O na vakamacalataka vakacava na nodrau veimaliwai na iVakabula kei Tamana? Ena ituvaki cava rau sa duabau ga kina na Tamana kei na Luvena? Na cava-so na itavi ni Yalo Tabu? Sureti ira mera vakasamataka vakatitobu na taro oqo ni ra sarava, rogoca, se wilika na vosa nei Elder Robert D. Hales “ Na Bula Tawamudu - Meda kila na Tamada Vakalomalagi kei na Luvena, o Jisu Karisito .” Solia vei ira na gauna mera vola na nodra isau ni taro, ka sureti ira mera wasea na veika era sa vola.
Wasea vakatolu na kuoramu, ka lesia ki na iwasewase yadua me ra vulica me baleta e dua na Lewe Tolu Vakalou ena nodra wilika na veika e baleti Koya ena Tudei ena Vakabauta (raica na tabana 50–52, 202–205, kei na 46–49) se ena vosa nei Peresitedi Boyd K. Packer “Na iVakadinadina.” Solia ki na veiwasewase na gauna ni vakavakarau veirauti me vakavulici vei ira na vo ni kuoramu na kena ivakarau kei na itavi na Lewe Tolu Vakalou. Vakatara na iwasewase yadua me vakavulica na vo ni kuoramu.
Wasea vakalalai e dua vei ira na vosa ni koniferedi raraba e vakaturi ena ituvatuva oqo. Solia e dua na tikina kivei ira yadua na lewe ni kuoramu (se ki na iwasewase, vakatau ena levu ni kuoramu). Vola ena papa ni volavola “Na cava eda kila me baleta na Lewe Tolu Vakalou?” Sureti ira na cauravou me ra vakayagataka na vosa era kunea ka qai wasea na nodra isaunitaro. Cava na vuna e bibi kina me kilai na kedratou ituvaki dina ni Lewe Tolu Vakalou? (raica na Joni 17:3).

Kerei ira na cauravou mera wasea na veika era sa vulica nikua. Na cava era sa bau vakila se vakanananu kina? Era sa kila deivaki li na ituvaki ni Lewe Tolu Vakalou? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Me Veivuke ena Veivakavulici

E rawa mo vakayagataka na itaviqaravi ni vuli ena iwase oqo me vakadeitaka na veika era sa kila oti tu na cauravou me baleta na ivunau kei na veika era se gadreva tiko mera vulica. Mo tu vakarau mo moica na ituvatuva ni nomu lesoni me ganita na nodra gagadre ke vinakati vakakina.

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea nona ivakadinadina ena lewe ni Lewe Tolu Vakalou kei na nona vakavinavinakataka na dina me baleti Iratou ka a vakalesui mai vei Josefa Simici.
Sureti ira na lewe ni kuoramu mera wasea vata kei na dua tale na dina era sa vulica ena soqoni ni kuoramu nikua.