iTavi Vua na Kalou

Meu na vaqaqacotaka vakacava na noqu matavuvale?

“Ena qai kune na marau ena bula vakamatavuvale ni sa yavutaki ena ivakavuvuli ni Turaga o Jisu Karisito. Ni sa yavu ka ivakadei ni bula … vakamatavuvale e tudei na ivakavuvuli ni vakabauta, masumasu, veivutuni, veivosovosoti, veidokai, veilomani, yalololoma, cakacaka, kei na golevi ni itavi qaravi vivinaka” (“Na Matavuvale:Ai Vakaro ki Vuravura Raraba,” Ensign se Liaona, Nove. 2010, 129). Ni da vukei ira na noda itubutubu ena rawati ni inaki oqo, eda na rawa ni vukea na noda matavuvale me taukena na bula marau e vinakata vei keda na Tamada Vakalomalagi.

Mo vakarautaki iko vakayalo

Na cava eso na ka o sa bau sotakaya vata kei na nomu matavuvale ka a vakavu marau kivei iko? Na veivakalougatataki cava beka o sa raica ena nomu matavuvale ni o sa muria tiko na ivakavuvuli ni iVakabula?

Na cava o bau kila tu me baleta na bula vakamatavuvale ni veicauravou o vakatavulica tiko? E rawa vakacava ni o vukei ira na cauravou mera kila deivaki ni na bula mamarau cake na matavuvale ni ra saga mera muria na ivakavuvuli ni iVakabula.

Ena yalomasumasu wilika na veiivolanikalou kei na ivurevure oqo. Na cava o nanuma ena vukei ira na cauravou me vaqaqacotaka na nodra matavuvale?

1 Nifai 8:12 (A vinakata o Liai me ratou kania na nona matavuvale na vuanikau ni kau ni bula)

1 Nifai 16:14–32 (E vaqaqacotaka o Nifai na nona matavuvale)

2 Nifai 25:26 (Eda vakatavulici ira na luveda me baleti Karisito)

Qarava Vinaka na Noqu iTavi Vua na Kalou (2010), 27, 51, 75, 82

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129

Dieter F. Uchtdorf, “Veivakacaucautaki Vei Ira Era Veivakabulai,” Ensign se Liaona, Me 2016, 77–80

Bonnie L. Oscarson, “Ira na Dautaqomaka na iVakaro ni Matavuvale,” Ensign se Liaona, Me 2015, 14-17

M. Russell Ballard, “Na Veitamani: E Dua na iSema Vakasakiti,” Ensign se Liaona, Nove. 2009, 47–50; raica talega na vidio “Fathers and Sons”

5:42

Vidio: “Two Brothers Apart,” “Through Small Things”

6:12

NaN:NaN

Raica me ra veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sota kaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Sureta e dua na lewe ni mataveiliutaki ni kuoramu ni se bera na kalasi me digitaka e dua na sere ni lotu ka semati ki na lesoni ni macawa sa oti. Me qai wilika o koya na veitikina mai na sere ni lotu ka wasea vata kei ira na lewe ni kuoramu na iwalewale e semati kina na sere ni lotu oqo ki na lesoni ni macawa sa oti.
Kerea e dua na lewe ni kuoramu me vakaraitaka e dua na iyaloyalo ni matavuvale mai na ivolanikalou ka wasea na iwalewale ka vakavu marau se rarawa ki na matavuvale mai na veika era a vakayacora na veilewe ni matavuvale (na matavuvale me veivosakitaki e rawa ni oka kina na nei Liai, Jekope, Atama, se so tale).

Vulica vata

Na inaki ni lesoni oqo me na vakayaloqaqataki ira yadua na cauravou mera vakayacora na nodra itavi vakamatabete ena vaqaqacotaki ni nodra matavuvale. Me tiki ni lesoni oqo, mera na tuvaka na lewe ni kuoramu ena nodra ivola iTavi Vua na Kalou me qaravi na lewe ni matavuvale se tekivu cakacakataka na nodra sasagataka ena “Matavuvale kei na iTokani.” Ni bera na soqoni ni matabete, sureti ira na cauravou me ra kauta mai na nodra ivola ni iTavi Vua na Kalou ki lotu. Ena veisoqoni ni kuoramu mai muri, sureti ira mera mai wasea na veika era sa sotava tiko ena nodra qarava na nodra ituvatuva.

Ena nona vosa “Veivakacaucautaki Vei Ira Era Veivakabulai,” A vakavulica o Peresitedi Dieter F. Uchtdorf na veika ni matavuvale: “Ena tautauvata beka na veika ena nona dra, ia eda sega ni tautauvata. E duidui na yaloda. … Sa rawa ni da digitaka me marautaki na duidui eso oqori.” Na ituvaki kei na kaukauwa duatani cava sa dui tu vei ira na cauravou yadua? Ena rawa vakacava kivei ira yadua na cauravou mera vakayagataka na nodra kaukauwa duatani me ra vakalougatataka kina na nodra matavuvale? Sa rawa vei ira na lewe ni kuoramu me ra vakasaqara vakailawalawa na veitikina eso mai na vosa, na veika e bibi vei ira ka wasea yani. Sa rawa mo sureta na lewe ni kuoramu mera sarava e dua na vidio ka vakaturi ena ituvatuva oqo ka vakaraica na veika era cakava na lewe ni matavuvale me vakavinakataka na nodra veimaliwai. Era na marautaka vakacava na cauravou na duidui e tiko ena nodra matavuvale? Na vakasama cava era rawa ni wasea me baleta na sala me ra vaqaqacotaka kina na nodra veimaliwai vakamatavuvale?
Ena vosa “Ira na Dautaqomaka na iVakaro ni Matavuvale,” e vakavulica kina o Bonnie L. Oscarson ni “oi keda kece—yalewa, tagane, itabagone, kei na gone, sega ni vakawati se vakawati—e rawa ni da cakacakataka me da dauqaravi vale. Meda cakava na ‘noda vale’ me vanua vakaivakarau, idrodro, me ka tabu, ka veitaqomaki” (Ensign se Liaona, Me 2015, 17). Me qai rawa kina vakacava vei Sista Oscarson me vakatura ni dodonu vei ira na lewe ni Lotu mera taqomaka ka vaqaqacotaka na nodra matavuvale? Na cava era rawa ni cakava ena gauna oqo na cauravou me vukea na kena vakaivakarau, ka tabu, ka veitaqomaki vakalevu cake na nodra vuvale?
Vakasamataka mo qai sureta eso na lewe ni kuoramu mera vakatavulica e dua na tiki ni lesoni oqo. Me kena ivakaraitaki, sa rawa ni ra wasea na cava e dau cakava na nodra matavuvale me vakavure marau, se rawa ni ra vakayagataka e dua na itaviqaravi e ra. Sa ra na rairai vakacavara eso na bete na itaviqaravi ni “Matavuvale” ena iTavi Vua na Kalou (draunipepa 79–81) ka rawa ni ra wasea na veika era sota kaya.
Sureti ira na cauravou mera vola eso na itatarabe ka tarova na nodra bula marau eso na matavuvale. Solia ki na cauravou yadua e dua na ilavelave ni “Na Matavuvale: Ai Vakaro ki Vuravura Raraba” (raica na iTavi Vua na Kalou, 107). Solia vei ira na lewe ni kuoramu e vica na miniti mera wilika kina na parakaravu vitu ka toqa na ivakavuvuli ka vakavurea na mamarau ena bula vakamatavuvale. Kerei ira yadua na cauravou mera wilika na 1 Nifai 16:14–32 ka wasea na veisala ratou a tutaka kina na matavuvale nei Liai na ivakavuvuli oqo. Kerei ira mera wasea na veika era a sotakaya ka sa vakatavulica vei ira na bibi ni ivakavuvuli oqo ena bula vakamatavuvale.
Sureti ira na cauravou mera wilika “ Matavuvale” ena Me iSakisaki ni iTabagone qai vakatakila ka wasea na cava e rawa ni ra cakava me vaqaqacotaki kina na nodra matavuvale. Sureti ira yadua na cauravou me dolava na nona ivola iTavi Vua na Kalou ki na iwase “qaravi ira na tani” (dikoni, 27; ivakavuvuli, 51; bete, 75) ka vola na cava e rawa ni cakava me vaqaqacotaka kina na nona matavuvale mai na nona qaravi ira (raica “Na noqu ituvatuva vakataki au meu veiqaravi”). Kerea e vica na cauravou mera wasea vata na kuoramu na nodra ituvatuva.

Kerei ira na cauravou mera wasea na veika era sa vulica nikua. Era sa kila deivaki li, vaka-taukeni matabete, na iwalewale e rawa ni ra vaqaqacotaka kina na nodra matavuvale? Na cava era sa bau vakila se vakanananu kina? E tiko beka eso tale na nodra vakatataro? Ena yaga beka me tauri vakalevu na gauna ena ulutaga oqo?

iTuvatuva Eso ni iTavi Vua na Kalou

Solia e dua na gauna ena mua ni soqoni ni kuoramu vei ira na cauravou mera tuvanaka ena nodra ivola ni iTavi Vua na Kalou. Na ituvatuva oqo era e ka ni tamata yadua, ia e rawa ni ra veivukei na lewe ni kuoramu ena kena vakavurei na vakasama me baleta na nodra ituvatuva.

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Sureti ira na cauravou mera vola ena nodra ivola ni iTavi Vua na Kalou na ka e rawa ni ra cakava me vaqaqacotaki kina na nodra veimaliwai kei na lewe ni nodra matavuvale (kevaka era sebera ni cakava vakakina; raica na draunipepa 82).
Sureta na lewe ni kuoramu mera wasea na iwalewale ni nodra vukea na nodra matavuvale me bula mamarau.
Wasea na nona ivakadinadina me baleta na bibi ni itavi ka tiko yadua vei ira na cauravou ena vukei ni nona matavuvale me bula marau.

Veisemati ni iTaviqaravi ni iTabagone

Tuva e dua na itaviqaravi ni Muavata ka na vukei ira na cauravou me ra vakayagataka na veika era vulica ena lesoni oqo.