iTavi Vua na Kalou

Na cava na noqu itavi ki na kena vakayacori na ituvatuva nei Tamada Vakalomalagi?

A kaya na Tamada Vakalomalagi ni Nona cakacaka kei na lagilagi oya “me ra tucake tale mai na mate na tamata kecega ka rawata na bula tawamudu” (Mosese 1:39). Ni da sa taukena na matabete, eda na qarava na ituvatuva nei Tamada Vakalomalagi ena noda bula kilikili tiko ka cakava na noda itavi ni matabete. Na itavi oqo era oka kina na vakayacori ni cakacakatabu vakalotu, qaravi ira na tamata, ka sureti ira na tamata kecega mera lako mai vei Karisito.

Mo vakarautaki iko vakayalo

Vakasamataka mada na veika o sa sotava oti mai na nomu vakayacora vakadodonu na nomu itavi vakamatabete. Sa bau vakavotukana vakacava na nomu sasaga? O sa vukea vakacava na Tamada Vakalomalagi ena vakacavari ni Nona yavu?

Na gauna cava o a raici ira kina na cauravou ni ra vakalougatataka kina eso tale ena nodra veiqaravi vakamatabete?

Ni ko vulica na ivurevure oqo, vakatudaliga ki na Yalo Tabu. Vakasamataka vakatitobu na veika era rawa ni vulica na cauravou mera vukea kina na Kalou ni ra vakayacora na nodra itavi.

Mosese 1:39 (Na cakacaka kei na lagilagi ni Kalou oya mera bula vakalou na luvena)

V&V 20:46–60, 75–79; 84:111; 107:68 (iTavi ni Matabete i Eroni)

V&V 38:42 (E dodonu mera savasava ka bula kilikili o ira na lewe ni matabete)

Vidio: “Inviting All to Come unto Christ”

4:30

Vidio: “Fulfilling Your Duty to God”

4:56

Qarava Vinaka Noda iTavi Vua na Kalou, 23 (itavi ni dikoni), 46–47 (itavi ni ivakavuvuli), 70–71 (itavi ni bete)

“iTukutuku Kivei Ira na iTabagone Mai na Mataveiliutaki Taumada,” Me iSakisaki ni iTabagone, ii–iii

Veivakavulici ena ivakarau ni Turaga

A masulaki iratou nona tisaipeli na iVakabula ka qaravi iratou tikoga. E vakaraica na madigi me tiko kina vata kei iratou ka vakaraitaka na Nona lomani iratou. Ena vuqa na nomu madigi eso mo veiqaravi kina ena matabete vata kei na dua na lewe ni Matabete i Eroni vakaitokani. Ena gauna vakaoqo, wasea na veika o sa cakava tiko e sa vukea na kena vakayacori na yavu ni veivakabulai nei Tamada Vakalomalagi.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Sureti ira na itabagone mera wilika na “iTukutuku Kivei Ira na iTabagone mai na Mataveiliutaki Taumada” ka vakasaqara na ivakasala mai na Mataveiliutaki Taumada e rawa ni vukei ira mera vakayacora rawa na nodra ilesilesi ena ituvatuva nei Tamada Vakalomalagi. E veitokoni vakacava na itavi ni matabete ena ilesilesi oqo?
Vakaraitaka e dua na iyaloyalo kei Joni na Dauveipapitaiso (raica na iVola ni iYaloyalo Vakosipeli, 35), ka taroga na veika a cakava me vakarautaka kina na salatu ni iVakabula (raica na Maciu 3). Tarogi ira na lewe ni kuoramu se ra sa vakarautaka tiko vakacava na salatu ni nona lesu mai na iVakabula ena gauna era cakava kina na nodra itavi ni matabete.

Vulica vata

Na itaviqaravi yadua e ra ena vukei ira na lewe ni kuoramu mera kila vakavinaka ni nodra cakava tiko na nodra itavi vakamatabete ena vukea na Tamada Vakalomalagi me vakayacora na Nona ituvatuva. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Sureti ira yadua na cauravou mera vakasaqara na wase “iTavi ni Matabete” ena ivola iTavi Vua na Kalou (tabana e 23, 46–47, se 70–71) ka lainitaka na vosa kei na malanivosa e cakacakataki. Kerei ira na cauravou mera vakamacalataka na kena veivuke na itavi yadua ki na ituvatuva nei Tamada Vakalomalagi. Era sa vakalougatataki vakacava na cauravou mai na nodra veiqaravi vakamatabete eso tale? Na ivakaraitaki cava era sa raica ena nodra vakalougatataki eso mai na veiqaravi vakamatabete?
Me raica na kuoramu na Vunau kei na Veiyalayalati 20:46–60. Sureti ira na cauravou mera wasea na veika era sa sotava oti ni ra vakayacora vakadodonu na nodra itavi ena nodra sureti na tamata mera lako mai vei Karisito—oka kina na matavuvale kei na itokani. Era sa vukea tiko vakacava na kena vakayacori vakadodonu na ituvatuva ni Kalou? Sureti ira mera vakatakarakarataka na veigauna e rawa ni sotava na madigi mera wasea na kosipeli. Me vakataka: “Ena tarogi iko o nomu itokani na vuna o sega kina ni qito polo ena Sigatabu se gunu kofi se ti.” Era na sauma vakacava na taro nei nodra itokani ke sa nodra lalawa tiko mera wasea na kosipeli? Sureti ira mera raica na tabana 29, 51, se 73 ena nodra ivola iTavi Vua na Kalou ka tuvanaka ena yavu ni veika era sa vulica.
Vakaraitaka e dua se koya ruarua na vidio e vakaturi tiko ena ituvatuva oqo. Kerei ira na cauravou mera vakatakila na itavi cava ni matabete era vakaraitaki tiko ena vidio ka na veivuke vakacava na itavi vakamatabete oqo me vakayacori kina na yavu ni Kalou (na ivakaleka ni itavi vakamatabete, raica na iTavi Vua na Kalou tabana e 23, 46–47, se 70–71). Na veika cava era sa sotava oti ni ra vakayacora vakadodonu na veitavi oqo? Na cava e bibi kina meda kila vakavinaka ni na vukea na yavu ni Kalou na kena vakayacori vakadodonu na noda itavi? Na cava ena vakayarayarataka na kila-ka oqo me vakavurea na nodra vakayacora vakadodonu na itavi?

Kerei ira na cauravou mera wasea na veika era sa vulica nikua. Era sa kila vakavinaka cake beka na nodra itavi ena kena vakayacori na yavu nei Tamada Vakalomalagi? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

iTuvatuva ni iTavi Vua na Kalou

Solia e dua na gauna ni vakarau cava na soqoni ni kuoramu mera tuva-ka kina na cauravou ena nodra ivola ni iTavi Vua na Kalou.

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na ivakaraitaki sa raica o koya era sa vakayacora tiko na lewe ni kuoramu mera vukea na vakayacori ni ituvatuva ni Kalou mai na nodra veiqaravi vakamatabete.
Vakasalataki ira vata na lewe ni kuoramu ena veika e rawa ni ra cakava vaka-kuoramu me vinaka cake kina na nodra itavi vakamatabete.