Na Yavu ni Veivakabulai
“Raica, oqo na noqu cakacaka kei na noqu lagilagi—meu vakavuna na tawa mate rawa kei na bula tawamudu ni tamata.” (Mosese 1:39).
Sa ka bibi sara na kena kilai vakavinaka na yavu ni veivakabulai meda vakavukui kina vakayalo. Na veika kece e vulica e dua na cauravou baleta na kosipeli—kei na veika sa vulica baleta na bula oqo—e dodonu me umani tiko ena cakacaka ni yavu ni veivakabulai me rawa kina vua me kila vakayalo na veika e bibi tawamudu kei na kena e sega. Ni sa kila vakavinaka vakaidina e dua na cauravou na yavu ni veivakabulai, sa na bula voli ena inaki sa cecere sara. Sa na raica na nona veivakatovolei kei na veika dredre me madigi ni nona tubu. Ena yavutaka o koya na nona digidigi ena veika tawamudu ka segai ena veika e marautaki ena gauna lekaleka walega. Sa na rawa vua me kune marau kei na reki.
Me tiki ni soqoni ni kuoramu ena Sigatabu na iTavi Vua na Kalou, e rawa ni o navuca mo vakatavulica na ituvatuva ni iTavi Vua na Kalou e ra ena tabana oqo.
iTuvatuva mo Digidigi mai kina ena Vula Oqo:
Muavata
Navuca na sala o rawa ni tuva kina eso na itaviqaravi ka salavata kei na veika era sa vulica tiko na itabagone. Na mataveilawa ni iTaviqaravi ni iTabagone sa vakarautaki tu me vukei iko. E vuqa vei ira na itaviqaravi vakavuli ena idusidusi oqo era rawa talega ni na veivuke vinaka sara ena veitaviqaravi ni Muavata. Cakacaka vata kei iratou na mataveiliutaki ni kuoramu mo digitaka ka tuvana na veitaviqaravi matau e na vaqaqacotaka vinaka na veika era vulica na cauravou ena Sigatabu.
iTavi Vua na Kalou
Na veiwase oqo mai na ivola iTavi Vua na Kalou era semati ki na veilesoni ena tabana oqo:
“iTavi ni Matabete,” tabana e 23, 46–47, 70–71
“Sureti Ira Na Tamata Kecega Me Ra Lako Mai Vei Karisito, tabana e 28–29, 52–53, 76–77