Na cava a yaco ena bula taumada?

Ni bera ni da mai sucu, eda a bula vata tu mai kei na Tamada Vakalomalagi vaka-Luvena vakayalo. Ena Matabose Vakalomalagi, a vakaraitaka vei keda na Tamada na Nona yavu ni veivakabulai, ka digitaki o Jisu Karisito me noda iVakabula. A segata sara o Setani me moica na ituvatuva oya, me kauta tani na noda galala, ka ra biu tani mai kina o koya kei ira na nona ilawalawa. Eda a ciqoma na yavu nei Tamada ka digitaka meda muri Jisu Karisito.

Mo vakarautaki iko vakayalo

Vakasamataka mada na digidigi o sa vakayacora ena bula oqo. Na veivakayarayarataki cava ni nomu kila na bula taumada e a vakavotukanataki ena digidigi oqori? Ena rawa ni vukea vakacava na nomu icavacava tawamudu na digidigi o cakava?

Na digidigi cava era sa cakava tiko na cauravou ena gauna oqo ka na vakalougatataka na nodra bula ena veigauna tawamudu? Na digidigi cava ena vakacacana na nodra icavacava tawamudu?

Vulica ena masumasu na ivolanikalou kei na ivurevure oqo. Na cava o sa vakauqeti kina mo na wasea ki na kuoramu?

Jeremaia 1:5; Alama 13:3 (Ni bera ni tekivu na vuravura era sa kacivi ka digitaki oti tu mai na lewe ni matabete)

Ai Vakatakila 12:9–11; Mosese 4:1–4 (A saga o Setani me vakarusa na galala ni tamata ka cemuri tani kina)

Eparama 3:22–26 (Na noda digidigi mai na bula taumada a rawa kina meda gole mai ki vuravura)

“Yavu ni Veivakabulai,” Tudei ena Vakabauta (2004), 209–211

Vidio: “Yavu ni Veivakabulai”

10:35

Veivakavulici ena ivakarau ni Turaga

E wasea na iVakabula vei iratou na Nona tisaipeli na italanoa rawarawa, vosa vakatautauvata, kei na ivakaraitaki ni veika a sotavi dina ka vakaibalebale vei iratou. Na lesoni oqo sa madigi vinaka vei iko mo wasea kina na ivakaraitaki eso ni digidigi o a cakava ka sa veisau kina na nomu bula. Na veika cava era sa sotava oti na cauravou ka rawa ni wasei?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Sureti ira na cauravou mera wasea e dua na ivolanikalou era se nanuma tiko mai na soqoni ni kuoramu ena macawa sa oti. Kerea mera tukuna na veika era sa vulica mai kina.
Kerei ira na cauravou mera vakasamataka ka wasea e dua na digidigi dodonu era sa cakava oti ka sa vakalougatataka na nodra bula na vakatulewa oya. Tarogi ira sara mera cavuta e dua na digidigi era a cakava ni bera ni ra sucu mai. Na cava sa yaco ki na nodra bula mai na digidigi oya?

Vulica vata

Na itaviqaravi yadua e ra ena vukei ira na lewe ni kuoramu mera vulica na veika e baleta na bula taumada. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Kerei ira yadua na cauravou mera wilika e dua vei ira oqo: Jeremaia 1:5; Alama 13:3; Eparama 3:22–23. Sureti ira na cauravou mera vakaraica na dina era sa vulica mai na ivolanikalou oqo me baleta na bula taumada. E veivakauqeti vakacava na dina baleta na bula taumada ki na noda raica na noda bula oqo?
Kerei ira na cauravou mera vola eso na bolebole era sotava tu na tamata ena gauna ni bula oqo. Sureti ira mera wilika na veika ni bula taumada ena Tudei ena Vakabauta (tabana e 210–211), ka mera raica na dina ena veivuke vei ira era sotava tiko na bolebole oqo. Sureti ira mera wasea na veika era sa raica. Kerei ira na cauravou mera vakasamataka mada e dua e rairai gadreva tu me kila na dina oqo, ka vakayaloqaqataki ira mera vakasamataka na sala mera wasea kina na nodra ivakadinadina ni yavu ni veivakabulai.
Kerei ira na cauravou mera wilika na Mosese 4:1–2 ka mera raica na veika mera vulica baleta na iVakabula kei Setani ena Matabose mai Lomalagi. Na cava eda vulica a qai yaco vei Setani mai na ka a cakava mai na tikina e 3–4? E tomani tiko kina vakacava na veisaqasaqa oqo nikua? Na cava na itavi ni iVakabula ena veisaqasaqa oqo? Na cava na noda itavi? Sureti ira na cauravou mera vakaraitaka na nodra nanuma baleta na iVakabula kei na Nona lomasoli me muria na ituvatuva nei Tamana.

Kerei ira na cauravou mera wasea na veika era sa vulica nikua. Era sa kila vakavinaka cake beka na bula taumada? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Qarauna vinaka sara mo kua ni taroga na taro ena vakavuna na veileti se na vakauqeta na kena veivosakitaki eso tale na ulutaga. Kua ni dau taroga na taro e vakavuna na vakatitiqa se na veivosakitaki ni ka e na sega ni rawa ni yaco. Nanuma tiko na nomu taro me kauti ira vata mai na lewenikalasi mera duavata ena vakabauta kei na loloma” ( Veituberi, Me iLutua Ni Noda Bula, [1999], 80).

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Sureti ira na lewe ni kuoramu mera wasea na nodra nanuma se veika era vakila ena gauna ni lesoni. Na cava era a vakauqeti mera cakava me na vakalougatataki kina na nodra matavuvale se kuoramu?
Wasea na nona ivakadinadina ena veika sa vakavulici.