Na cava beka na yavu ni veivakabulai?

Sa vakarautaka tu na Tamada Vakalomalagi e dua na ituvatuva me rawa ni da vakataki Koya. Na ituvatuva oqo e oka kina na Veibuli, na Lutu, na Veisorovaki i Jisu Karisito, kei na lawa taucoko, cakacakatabu vakalotu, kei na vunau ni kosipeli. Ena ituvatuva oqo eda na rawa ni uasivi sara ena vuku ni Veisorovaki, rawata na taucoko ni reki, ka bula tawamudu vata kei na Kalou.

Mo vakarautaki iko vakayalo

Sa vakauqeta vakacava na nomu digidigi na kila-ka e tiko vei iko me baleta na ituvatuva ni Tamada Vakalomalagi kei na lalawa-ka ni bula? Na gacagaca cava ni yavu ni veivakabulai o gadreva mo kila vakalevu cake?

Era na vukei vakacava na lewe ni kuoramu me ra vakayacora vakavinaka cake na nodra itavi vakamatabete mai na nodra kila vakavinaka na yavu ni veivakabulai?

Wilika ena yalomasumasu na veiivolanikalou kei na ivurevure oqo. Na cava ena vukei ira na cauravou me ra kila vakavinaka kina na yavu ni veivakabulai?

1 Korinica 15:20–22 (Era na mate na tamata kecega)

Iperiu 12:9 (Na Kalou e Tama ni yaloda)

Ai Vakatakila 20:12–13; 2 Nifai 9:10–11; Alama 5:15–21 (Era na tucake tale na tamata kecega ka tu e mata ni Kalou me ra lewai)

2 Nifai 2:22–25 (Na lutu nei Atama e kauta mai na bula vakayago)

Alama 34:32–33 (Na bula oqo sa gauna ni veivutuni)

Alama 40:11–14 (Na ituvaki ni tamata ni sa mate)

V&V 76:30–113 (iVakamacala ni matanitu lagilagi)

Weatherford T. Clayton, “Na iTuvatuva Lagilagi nei Tamada,” Ensign se Liaona, Me 2017, 26–29

Thomas S. Monson, “Na Sala Vinaka Sara ni Bula Marau,” Ensign se Liaona, Nove. 2016, 80–81

“Yavu ni Veivakabulai,” Tudei ena Vakabauta (2004), 209–211

Vidio: “Men’s Hearts Shall Fail Them”; “The Plan of Salvation”

Veivakavulici ena ivakarau ni Turaga

A taroga na iVakabula na taro eso ka vakavuna me ra vakasama kina vakatitobu o ira a vakavulica tiko. A kauwai dina sara o Koya ki na nodra isaunitaro. O na vakayagataka vakacava na taro eso mo vukea me ra vakasama titobu kina na cauravou me baleta na dina ni kosipeli?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Sureti ira na cauravou mera vola e dua na vosa se malanivosa era nanuma rawa mai na lesoni ni macawa sa oti ka wasea na vosa se malanivosa oqo ki na kuoramu.
Kauta mai e tolu na iyaloyalo se iyaya me vakatakarakarataka na Veibuli, na Lutu, kei na Veisorovaki (me vakataka na qele me Veibuli, dua na apolo me Lutu, kei na bilo ni sakaramede me Veisorovaki). Kerei ira na cauravou mera wasea na veika era kila baleta na ka a yaco kei na vuna era bibi kina.

Vulica vata

Na itaviqaravi yadua e ra ena vukei ira na lewe ni kuoramu mera vulica na yavu ni veivakabulai. Mai na veivakauqeti ni Yalotabu, digitaka e dua se sivia ka na ganita na nomu kalasi:

Kerea e dua vei ira na cauravou me vakarautaki koya mai me wasea na italanoa ena vosa nei Peresitedi Thomas S. Monson “Na Sala Vinaka Sara ni Bula Marau.” Era na sauma vakacava na lewe ni kuoramu na taro eso oqo baleta na yavu ni veivakabulai kevaka era veivosaki tiko kei na dua na itokani mai na dua tale na vakabauta: Eda lako mai vei? Na cava eda mai cakava eke? Eda na lako kivei ni sa cava na bula oqo? Sureti ira me ra vakayagataka na vosa nei Elder Weatherford T. Clayton “Na iTuvatuva Lagilagi nei Tamada” kei na ivolanikalou me ra vakarautaka kina na isau ni dua vei ira na taro. Na cava e bibi kina meda na kila tiko na isau ni veitaro oqo?
Sureta e dua na lewe ni kuoramu me vakavulica e dua na tiki ni lesoni oqo. Sa rawa vua me cakava oqo me tiki ni nona ituvatuva ni iTavi Vua na Kalou me vulica ka vakavulica na yavu ni veivakabulai (raica na “Kila na iVunau” tabana e 18, 42, se 66).
Ni se vo toka e vica na siga, kerea e vica na lewe ni kuoramu mera na vakavakarau ki na veivakavulici ena kuoramu me baleta na gacagaca ni yavu ni veivakabulai (me vakataka na bula taumada, bula vakayago oqo, vuravura ni yalo, kei na so tale) ena nodra vakayagataka na Vunautaka na Noqu Kosipeli se Tudei ena Vakabauta. Droinitaka ena papa ni volavola na ivakaraitaki ni yavu ni veivakabulai (me vakataka, nomu raica na Vunautaka na Noqu Kosipeli, 54), ka sureti ira yadua na cauravou mera vakavulica na nodra dui ulutaga era lesi kina. Tarogi ira na cauravou na duidui cava sa yaco ena nodra bula ena nodra sa kila na yavu ni veivakabulai.
Lesia yadua na cauravou ki na dua se sivia na tiki ni ivolanikalou ena ituvatuva oqo. Kerei koya me wilika na nona itukutuku me vakadeitaki kina na tiki ni yavu cava ni veivakabulai e vakavulica tiko na tukutuku oya. Sureti koya me wasea na veika sa vulica mai na nona itukutuku. Na cava e vakayarayarataka na ituvaki ni noda dikevi keda mai na noda kila na yavu ni veivakabulai? eso tale? na vuravura e wavoliti keda?
Me wilika vata na kuoramu, na Alama 12:30 kei na Alama 42:13–15. Sureti ira na cauravou mera raica na malanivosa era vakayagataki me vakamacalataka na yavu ni veivakabulai. Na cava era vakavulica na malanivosa oqo baleta na ituvatuva? Vakaraitaka na vidio “Men’s Hearts Shall Fail Them,”; ka kerei ira na cauravou mera raica na kena a vakalougatataki Elder Russell M. Nelson na nona kila na yavu ni veivakabulai. Sureti ira na cauravou mera wasea na sala eso sa vakalougatataki ira kina na kila oqo.
Raica mera yadua na lewe ni kuoramu taucoko na ilavelave ni Tudei ena Vakabauta, ka solia yadua vei ira e dua na naba mai na 1 ki na 3. Kerei ira sa soli vei ira na naba 1 mera vulica na veika era rawata rawa mai na Tudei ena Vakabauta me baleta na bula taumada ( tabana e 210–211); ka kerei ira era naba 2 mera vulica na bula e vuravura ( tabana e 211); ka kerei ira era naba 3 mera vulica na bula ni oti na mate ( tabana e 211). Raica mera cakacaka vakailawalawa ena nodra dui naba mera vakarautaka kina e dua na ivakaleka ni veika era sa vulica ka mera mai vakaraitaka ki na vo ni kuoramu. Sureti ira na cauravou mera raitayalotaka se cava ena yaco ki na nodra bula ke ra sega ni kila na yavu ni veivakabulai.

Kerei ira na cauravou mera wasea na veika era sa vulica nikua. Era sa kila vakavinaka cake beka na yavu ni veivakabulai? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Na nomu vakavakarau vakayalo ena yaga sara vakalevu ena kena vukei na veivakavulici. Ena gauna o sa vakavakarau tiko kina vakayalo, o sa kauta tale tikoga mai na yalo ni sautu, na loloma kei na veidokai. Era na kila o ira o vakavulica na dei ni nodra vakasamataka vakatitobu se na veivosakitaki ni veika e yaga tawamudu” Veituberi, Me iLutua ni Noda Bula[1999],93).

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Liutaka na kena veivosakitaki ni kena kilai vakavinaka na yavu ni veivakabulai ena vakauqeti keda meda lewe ni matabete vinaka cake.
Kerei ira na lewe ni kuoramu mera wasea na nodra vakavinavinaka me baleta na yavu ni veivakabulai.