Na cava na vuna meu maroroya kina na yagoqu me vaka na valetabu?

A buli na yagoda me ucuya na Kalou. Era sa isolisoli mai vua na Tamada Vakalomalagi me rawa ni da mai bula vakayago ka yaco meda na vakataki Koya sara. Na kila oqo e vakauqeta na ivakarau meda maroroya kina na yagoda kei na noda nanuma baleta na Tamada Vakalomalagi vakakina oi keda. Ni da maroroya na yagoda me vaka na vale ni Kalou, eda na ciqoma na veivakalougatataki vakayago, vurevakasama, ka vakayalo.

Mo vakarautaki iko vakayalo

Na veivakalougatataki cava sa yaco vei iko ena nomu taqomaka na yagomu me vaka na vale ni Kalou? Sa tubu vakacava na nomu kila-ka me baleta na vakatabui ni yagomu mai na bula o sotava tiko vakakina na nomu vakaraica na nodra bula tale eso?

Na bolebole cava era sotava tiko na cauravou ena nodra sasagataka tiko mera taqomaka na yagodra ni sa isolisoli tabu mai vua na Kalou? E veisemati vakacava na nodra taqomaka tiko na yagodra ki na kaukauwa ni matabete?

Wilika ena yalomasumasu na veiivolanikalou kei na ivurevure oqo. Na cava e vakauqeti iko kina na Yalotabu mo wasea vei ira na cauravou?

Nai Vakatekivu 39:1–21; Taniela 1:3–21 (Rau vakaraitaka o Josefa kei Taniela ni rau doka na yagodrau)

1 Korinica 6:19–20; V&V 93:33–35 (Eda sa vale ni Kalou)

V&V 88:15–16 (Na yalo kei na yago sa loma ni tamata)

V&V 130:22; Mosese 6:9 (Eda sa buli meda ucuya na Kalou)

Vidio: “The Mormon Mustang,” “Chastity: What Are the Limits?”

7:43

NaN:NaN

Veivakavulici ena ivakarau ni Turaga

Na iVakabula a lomani ira e vakavulica. E kila o cei o ira kei cei e rawa ni ra vakataka. E raica na sala cecere eso mera tubu kina—na sala sa baleti ira sara ga. Ni ra sotava na dredre, a sega ni biuti ira tu ia a tomana tikoga me lomani ira ka qaravi ira. Na cava o rawa ni cakava mo lomana ka qaravi ira kina na cauravou me vaka e vakayacora na iVakabula?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Tokaruataka vei ira na cauravou na veika era sa vulica ena macawa sa oti. E tiko beka nodra vakatataro se raitayaloyalo ni veika era a veivosakitaka?
Vakaraitaka e dua na iyaloyalo ni valetabu, ka sureti ira na cauravou mera vola na vosa eso ni ra vakasamataka na valetabu.Na cava na veibasai ni veivosa oqori? Kerei ira na cauravou mera wasea na veika era sa kerei mera vakayacora mera qarava kina na yagodra me vaka na vale ni Kalou.

Vulica vata

Na itaviqaravi yadua e ra ena vukei ira na lewe ni kuoramu mera kila vakavinaka ni sa ka tabu na yagodra. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Lesia vei ira yadua na cauravou e dua na iwase ni ivolanikalou ena ituvatuva oqo. Sureti ira na cauravou mera vulica na itukutuku ka vakalekalekataka ena dua ga na yatuvosa na veika era sa vulica na vuna e ka tabu kina na yagodra. Kerei ira mera wasea na veika e rawa ni ra cakava mera tomana tiko kina na kena vakasavasavataki na yagodra kei na nodra vakasama.
Sureti ira yadua na cauravou mera wilika e dua na tikina mai na dua na vosa sa vakaturi tiko ena ituvatuva oqo. Mo qai solia e vica na miniti kivei ira na cauravou mera vakarautaka e dua na lesoni lekaleka me baleta na vakatabui ni yagoda. Vakayaloqaqataki ira mera vakayagataka e dua na malanivosa mai na vosa oya vata kei na veika era sa dui sotava oti kei na nodra ivakadinadina.
Mera wilika vakakuoramu na 1 Korinica 6:19–20 kei na V&V 93:33–35. Kerei ira na cauravou mera tuva vakaivola na veika e vakatauvatani kina na yagoda kei na vale ni Kalou. Sureti ira mera veivosakitaka na veibolebole era sotava tiko na itabagone ena kena taqomaki na yagodra me vaka na valetabu. Na cava mera cakava mera qaqa kina mai na bolebole oqo?
Wasea mera veisasa na kuoramu. Me dua vei rau ena isa me wilika na Nai Vakatekivu 39:1–21 ka me wilika o kena ikarua na Taniela 1:3–21 (me baleta na iyaloyalo ni italanoa oqo, raica na iVola ni iYaloyalo Vakosipeli,11, 23). Kerei ira mera raica na sala rau a vakaraitaka kina o Josefa kei Taniela ni rau rokova na yagodrau ka mera wasea sara vakai ira na veika era sa raica. Mera na vakamuria vakacava na nodrau ivakaraitaki o Josefa kei Taniela?
Sureti ira na cauravou mera raica na lewe ni ivola ena Me iSakisaki ni iTabagone ka raica na ivakatagedegede cava e baleta tiko na nodra taqomaka vakasavasava tiko na yagodra kei na nodra vakasama. Wasea vakailawalawa na kuoramu, ka mera vakasaqara na wase oqo ka mera raica kina na isau ni taro oqo “Na cava na vuna meu karona kina na yagoqu me vaka na valetabu?” Sureti ira mera wasea na cava e rawa ni ra cakava mera bulataka kina na ivakatagedegede oqo.
Vakaraitaka e dua vei ira na vidio e vakaturi tiko ena ituvatuva oqo. Sureti ira na cauravou mera raica ka veivosakitaka na ibalebale vakavosa e vakayagataki tiko ena vidio me vakamacalataka na bibi ni kena karoni tiko na savasava ni yagoda. Na cava e rawa ni ra veivakayaloqaqataki kina vakai ira mera bulataka na ivakatagedegede e vakavulici tiko ena vidio?
Kerei ira na cauravou mera vakayagataka na wase “iSulusulu kei na iRairai” ena Me iSakisaki ni iTabagone me isau ni taro vakaoqo “Na cava na ivakatagedegede ni Turaga me baleta tiko na bula savasava?” “Na cava e bibi kina me vakamuri na ivakatagedegede oqo?” ka “Na vakaraitaka vakacava na noda bula savasava na dokai ni vakatabui ni yagoda?”

Kerei ira na cauravou mera wasea na veika era sa vulica nikua. Era sa kila vakavinaka cake beka ni sa ka tabu na yagodra? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Tovolea mo kua ni vakavulica kece na veika e tukuni me baleta na iulutaga yadudua. Sa ra na kila tiko o ira na na lewe ni nomu kalasi eso na ka me baleta na iulutaga o na vakavulica vei ira. Nanuma tiko na lesoni oqo e sega ni gauna taudua ga era na vulica kina”(Veituberi, Me iLutua ni Noda Bula[1999], 121).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Me wasea na nona ivakadinadina me baleta na veivakalougatataki e dau yaco ni da taqomaka na yagoda ena vakarokoroko.
Tuvanaka vata kei ira na lewe ni kuoramu me vakacavari na wase “Na Bulabula ni Yago” wase ni iTavi Vua na Kalou (tabana e 31–34).