Meu na kune vakacegu vakacava ni sa mai takali e dua au lomana?

Na mate sa tiki bibi ni yavu ni veivakabulai. Ni gadrevi meda na vakataka na Tamada Vakalomalagi, sa dodonu meda sotava na mate ka ciqoma na yago sa uasivi sara ni da tucaketale. Ni da sa kila vakavinaka ni mate sa tiki tiko ni ituvatuva nei Tamada Vakalomalagi, ka sa mai qaqa o Jisu Karisito vei mate ena Nona Veisorovaki, eda na ciqoma na yalonuinui kei na vakacegu ni sa takali e dua eda lomana.

Mo vakarautaki iko vakayalo

O sa kunea tiko vakacava na inuinui kei ira tale eso o kila ni ra takali na nomuni daulomani? Na ivolanikalou se ivakavuvuli cava e sa bau veivukei?

Eso na cauravou e sa sotava oti na mate ni dua na nodra daulomani. O ira kece era na sotava ena dua na siga. Na cava o na vinakata mera kila me na vukei ira?

Vulica ena yalomasumasu na ivolanikalou kei na ivurevure eso oqo. Na veivakauqeti cava e yaco vei iko ni ko vulica?

Mosaia 16:7–8 (Na Tucaketale i Jisu Karisito e kauta laivi na batigaga ni mate)

Mosaia 18:8–10; V&V 81:5 (Sa dodonu meda vakacegui ira era gadreva na vakacegu)

Alama 11:42–45 (Eda na taukena tale na yagoda mai na Tucaketale ni iVakabula)

Alama 28:12; V&V 42:45–46 (Eda lolositaki ira na sa mate, ia e kamikamica na mate vei ira sa mate vua na Turaga)

Alama 40:11–14 (Ena bula tikoga na yaloda ni da sa mate)

V&V 137:5–10 (O Josefa Simici a raici Alvin na tacina, ira na gonelalai, kei na so tale ena matanitu vakasilesitieli)

V&V 138 (Veika e raica o Peresitedi Joseph F. Smith ena vuravura ni yalo)

Thomas S. Monson, “Mrs. Patton—Tomani na iTalanoa,” Ensign se Liaona, Nove. 2007, 21–24; raica talega na vidio “Until We Meet Again”

Shayne M. Bowen, “Niu sa Bula, Dou na Bula Talega,” Ensign se Liaona, Nove. 2012

Vidio: “We’re Still a Family,” “He Will Give You Help”

Veivakavulici ena ivakarau ni iVakabula

A taroga na iVakabula na taro eso ka vakavuna vei ira tale eso mera vakasamataka ka vakila vakatitobu. O na sureti ira vakacava na cauravou mera vakasamataka ka vakasaqara na veivakauqeti? Ko na vukei ira vakacava mera na yalodei ni wasea na nanuma eso vakataki ira?

Raica mera veiliutaki na cauravou

Raica e dua na ivakaraitaki ni ituvatuva ni soqoni ni kuoramu.

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Raica eso tale na vakasama ni vuli kei na veivakavulici.

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

• Na veika cava era sa kerei na cauravou mera cakava me ivakaraitaki ni veika era sa vulica? Sureti ira mera wasea ni ra cakava na veika era sa vulica, sa vakayaco-ka kina ena nodra bula kei nabula ni nodra matavuvale.

• Wasea na veika o a sotava, se mai vua e dua tale, ena kena kunei na vakacegu ni mai takali e dua o a lomana.Sureti ira na cauravou mera wasea na veika era sa sotava oti.

Vulica vata

Raica eso tale na vakasama ni vuli kei na veivakavulici .

Na itaviqaravi yadua e ra ena vukei ira na lewe ni kuoramu mera vulica baleta na bula ni oti na mate. Salamuria na veivakauqeti ni Yalotabu, digitaka e dua se sivia ka na ganita na nomu kuoramu:

• Vakaraitaka na vidio “He Will Give You Help,” ka sureti ira na cauravou mera wasea na veika era vakauqeti kina. Ni saravi oti na vidio, veivosakitaka na iwalewale e rawa ni duidui kina na vuravura kevaka era kila taucoko na tamata na ka a raica rawa na cauravou ena vidio.

• Wasea na italanoa baleti Mrs. Patton mai na vosa nei Peresitedi Thomas S. Monson “Mrs. Patton—Tomani na iTalanoa,” se vakaraitaka na vidio “Until We Meet Again.” Tarogi ira na cauravou se ra na sauma vakacava na taro a taroga o Mrs. Patton kivei Thomas Monson lailai. Mera wilika vakuoramu na Mosaia 18:8–10 kei na Vunau kei na Veiyalayalati 81:5. Veivosakitaka na itavi e tiko vei ira na lewe ni matabete mera dau veivakacegui, veivukei, vakakina na itavi vakamatabete tale eso kivei ira na matavuvale sa takali na nodra daulomani. Sa rawa mo sureta e dua na lewe ni matabisopi me mai vakaitavi ena veivosaki oqo.

• Sureta e veimama na kuoramu me wilika na italanoa baleti Sisita Ramirez ena vosa nei Elder Shayne M. Bowen “Niu sa Bula, Dou na Bula Talega,” ka sureta na veimama kadua me wilika na italanoa kei Tyson na luvei Elder Bowen tagane. Kerei ira mera wasea na veika era sa vulica baleta na iwalewale ni kune vakacegu ena gauna e takali kina e dua era lomana kei na sala mera vakacegui kina eso tale. Sureti ira na cauravou mera wasea e dua na ka era a sotakaya ena nona takali e dua ka ra lomana. E vukei ira vakacava mera kunea na vakacegu na nodra kila na Veisorovaki kei na yavu ni veivakabulai? Ke rawa, wasea e dua na ka o sa sotava oti.

• Wasea na kalasi ki na rua na ilawalawa. Me wilika e dua na ilawalawa na Vunau kei na Veiyalayalati 137:5–10 kei na ilawalawa kadua me wilika na Vunau kei na Veiyalayalati 138:57–58. Sureti ira na cauravou mera veivosakitaka ena nodra dui ilawalawa na ka e vakatavulica na ivolanikalou eso oqo me baleta na ka e yaco ni da sa mate oti. Oti me qai veivosakitaki vakuoramu na iwalewale e rawa ni veivuke kina na kilaka oqo kivua e dua ka sa takali e dua e dau lomana. E semati vakacava na kilaka oqo ki na noda itavi ni caka ivola ni kawa kei na cakacaka ni valetabu?

Kerei ira na cauravou mera wasea na veika era sa vulica nikua. Era sa kila deivaki li na iwalewale mera kune vakacegu kina ni takali e dua era dau lomana? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Na taro e dau volai tu ena vavaloaloa ni bera ni dau tekivu na lesoni e dau vukei ira na vuli tiko mera vakasamataka kina na lesoni ni bera ni tekivu na kalasi” (Veituberi, Me iLutua ni Noda Bula [1999], 114).

Veisureti mera bulataka

Raica tale eso na vakasama ni vuli kei na veivakavulici.

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa me liutaka na kena veivosakitaki na cava e rawa ni ra cakava na lewe ni kuoramu mera laki qarava kina e dua se qai takali walega e dua na nona daulomani.Era tiko beka eso na vada se so tale ena tabanalevu se itikotiko raraba e rawa ni ra vukei?