Cava na vuna eda sotava kina na dredre?

Sa tiki ni yavu ni Tamada Vakalomalagi na kena dau sotavi na dredre ena bula oqo. Ena so na gauna, e dau yaco mai na dredre ena vuku ni digidigi eda cakava se na nodra digidigi tale eso. E so tale na dredre sa tiki ni veika ga e dodonu meda sotava. Dina ni dredre, na veivakatovolei ena vukea noda tubu vakayalo kei na noda laki veiucui kei Jisu Karisito.

Mo vakarautaki iko vakayalo

Vakasamataka mada na veivakatovolei o sotava ena nomu bula. E vaqaqacotaki iko vakacava na iVakabula ena veigauna dredre oqori?

Eso na cauravou o vakavulica tiko era sa sotava oti mai na veivakatovolei dredre sara. Era na gadreva taucoko mera vakararavi ena loloma soliwale ni iVakabula me vukea na nodra sotava na veivakatovolei ena veigauna ni nodra bula.

Wilika ena masumasu na ivolanikalou kei na ivurevure oqo. Na veivakauqeti cava e yaco vei iko ni ko vulica?

2 Nifai 2:11 (E dodonu me tiko na veibasai ni ka kecega)

Mosaia 23:21 (Sa solia vei keda na Kalou na dredre me vakatovolea na noda vakabauta)

Ica 12:27 ( Sa solia vei keda na Kalou na malumalumu meda yalomalua kina)

V&V 101:1–9 (E yaco mai na dredre ena noda digidigi cala)

V&V 121:7–8; 122:4–9 (Eda na vakavukui ka vinaka cake mai na veivakatovolei eda sotava)

Yoon Hwan Choi, “Kakua ni Veiraiyaki, Rai Cake!” Ensign se Liaona, Me 2017, 90–92.

Dallin H. Oaks, “Veibasai ni Ka Kecega,” Ensign se Liaona, Me 2016, 114–17

Koichi Aoyagi, “Mo Yalodina Tiko, ” Ensign se Liaona, Nove. 2015, 126-28

Neil L. Andersen, “Covulaca Vakayalo,” Ensign se Liaona, Me 2014, 18–21; raica talega na vidio ni nona vosa “Covulaca Vakayalo”

2:25

“Dredre,” Tudei ena Vakabauta (2004), 13–15

Vidio: “God Will Lift Us Up,” “The Priesthood Can Strengthen Our Families in Trials,” “Rebuilding Lives”

4:59

1:25

1:34

Veivakavulici ena ivakarau ni iVakabula

A vakayagataka na ivolanikalou na iVakabula me vakatavulica ka vakadinadinataka na Nona ilesilesi. Na lesoni oqo era umani tu kina na ivolanikalou kaukauwa ka vakavulica na sala ena vaqaqacotaki keda kina na iVakabula ni da vakatovolei. Ni ra vulica ka veivosakitaka na cauravou na ivolanikalou oqo, ena vakadinadinataka na Yalo Tabu ni ra sa ka dina.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se eso na nomu vakasama ga vakai iko mo railesuva kina na lesoni ni macawa sa oti ka mo vakaraitaka na lesoni ni macawa oqo:

Kerei ira na cauravou mera vakasamataka ka vola e dua na ka era vulica ena macawa sa oti ka wasea ki na kuoramu. Vakayagataka oqo me itekivu ni kena vakamacalataki na lesoni ni macawa oqo.
Vaka kuoramu, raica vakamalua na vakamacala nei Elder Neil L. Andersen me baleta na vunikau a tubu voli ena vanua cagicagi (ena nona vosa na“Covulaca Vakayalo” se na vidio “Covulaca Vakayalo”). Na cava e vakatavulica vei ira na cauravou na veivakatauvatani oqo me baleta na veika dredre? Sureti ira me ra vakasaqara na vosa, ena raici ni vakasala era nanuma ni na vukei ira me ra vorata na covulaca vakayalo.

2:25

Vulica vata

Na itaviqaravi yadua e ra ena vukei ira na lewe ni kuoramu mera vulica na inaki ni veika dredre. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Kauta mai e dua na sinucodo se iyaloyalo ni sinucodo kina kalasi. Na cava ena yaco kevaka e dua na isema e ramusu? Eda na rawa ni vakadeitaka vakacava ni o keda na isema kaukauwa ni noda vuvale tawamudu? Sureti ira na cauravou me ra vakaraica e a sauma vakacava o Elder Yoon Hwan Choi na taro oqo ena nona vosa “Kua ni Veiraiyaki, Rai Cake!” tekivu mai na parakaravu e tekivu ena, “O keda kece eda oka tu ena dua na maliwa ni dua na matavuvale tawamudu.” Eratou rai vakacava vei Karisito o Elder Choi kei na nona matavuvale ena talanoa e wasea o koya? Na cava eso na gauna, “e sega ni rawarawa na noda rai cake”? Na cava eso na vakaitutu ena iotioti ni parakaravu ni nona vosa o Elder Choi e rawa ni vukei keda “meda dau rai cake tu ga vei [Karisito]” ena gauna ni dredre?
Sureti ira na cauravou me ra wilika na italanoa e tiko ena vosa nei Elder Koichi “Mo Yalodina Tiko,” tekivu ena parakaravu e tukuna tiko kina na coqa ni motoka. Na cava e vakavulica na italanoa oqo vei ira na cauravou na vuna eda sotava kina na veivakatovolei ena bula oqo? Mo navuca me sureta rawa tiko e dua na cauravou me na mai wasea na gauna a tubu vakayalo se vaqaqacotaki kina o koya se dua tale na lewe ni nona matavuvale mai na dua na veivakatovolei. Sa rawa vei koya me talanoataka na nodratou itukutuku ni tuva kawa me vakavulica kina na ivakavuvuli oqo.
Kerea yadua na cauravou me vola e dua na veivakatovolei e sotava tiko se dua na lewe ni nona matavuvale. Sureti ira na cauravou mera vakasaqara na ivolanikalou ena ituvatuva oqo se so tale era kila me raici kina eso na ka e vakavulica na vuna eda sotava kina na dredre. Sureti ira me ra wasea na veika era sa raica. Ena vukei ira vakacava na ivolanikalou oqo mera qaqa mai na veivakatovolei era sa vola toka?
Mera wilika vata na imatai ni rua na parakaravu ni “Dredre” ena Tudei ena Vakabauta. Na cava na inaki ni veika dredre ena loma ni yavu nei Tamada Vakalomalagi? Lesi ira na lewe ni kuoramu yadua ki na dua vei iratou na vo ni tolu na iwase baleta na dredre ena Tudei ena Vakabauta, ka kerei ira na cauravou mera vakavakarau ni vakavulica na vo ni kuoramu mai na veika era sa vulica ena nodra dui wase. Vakayaloqaqataki ira mera wasea e dua na italanoa se veika era sa sotava oti ka sema tiko ki na veika era wilika.
Vola vakadodonu ki ra e dua na laini ena lomadonu ni vava ni volavola, ka vola e cake ena dua vei rau na kolomu na “Cava na vuna eda sotava tiko ga kina na veika dredre?” ka vola “Meda na vorata rawa vakacava na ibolebole eda sotava ena noda bula?” ena dela ni ikarua ni kolomu. Wasea vakatikina na vosa nei Elder Dallin H. Oaks “Veibasai ni Ka Kecega” solia ki na goneyalewa yadua e dua na tikina me na wilika. Kerei ira na cauravou me a vakaraica na isaunitaro ki na veitaro oqo ka vola na nodra isaunitaro ena vava ni volavola ena kolomu veiganiti. Na raiyawa cava era sa rawata na cauravou mai na rua na vosa oqo? E rawa ni o vakaraitaka e dua vei ira na vidio e vakaturi tiko ena idusidusi oqo me vukei ira na cauravou me ra kunea eso na ikuri ni saunitaro ki na taro ena papa.
Ena veivakadonui nei bisopi, sureti ira na tamadra na cauravou me ra wasea ki na kuoramu na gauna a vukei ira kina o Jisu Karisito mera qaqa ena nodra vakatovolei. Na cava era sa vulica mai na nodra sotava oti na dredre? Kerei ira na tama mera wasea na ivolanikalou eso me tiki ni veivosaki.

Kerei ira na cauravou mera wasea na veika era sa vulica nikua. Era sa kila vakavinaka beka na vuna eda sotava kina na dredre? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Tuvana vinaka na idabedabe ena loma ni nomu kalasi mo rawa ni raica vinaka na matadra na nomu leweni kalasi ka me ra raica talega mai na matamu” ( Veituberi, Me iLutua ni Noda Bula [1999], 82).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Liutaka na kena veivosakitaki na nodra rawa ni vakayacora na lewe ni kuoramu na nodra itavi ni matabete ena nodra vukei eso tale mai na veivakatovolei.E rawa ni ra vola na ituvatuva me vukei ira ka tiko ena iwase “Qaravi Ira na Tani” ena nodra ivola iTavi Vua na Kalou.
Wasea na nona ivakadinadina ena sala cava a vaqaqacotaki koya kina na iVakabula ena gauna niveivakatovolei.