Na cava e bibi kina na veika au digitaka?
Na Tamada Vakalomalagi sa solia oti mai na galala ni digidigi, na dodonu meda digitaka ka cakava ga na ka eda via cakava. Ni da sa galala meda digitaka ga na ka eda via cakava, ena sega ni rawa ni da digitaka na isau ni noda digidigi. Na digidigi dodonu ena veimuataki ki na marau tawayalani kei na bula tawamudu. Kevaka eda kerei Koya, na Tamada Vakalomalagi ena vukei keda ena noda digidigi vakavuku.
Mo vakarautaki iko vakayalo
Vakasamataka vakatitobu na vakatulewa bibi o sa cakava ena nomu bula. Na cava a yaco vei iko kei ira tale eso ena vakatulewa oqori? Na cava o sa bau vulica mai kina?
Ni ko masulaki ira yadua na cauravou, vakasamataka vakatitobu na vakatulewa e sa vakayacora tiko o koya. Na cava beka ena yaco vua nikua kei na veisiga ni mataka mai na vakatulewa oqori?
Vulica ena masumasu na ivolanikalou kei na ivurevure oqo. Na cava o nanuma ena vukei ira na cauravou mera kila vakavinaka na bibi ni vakatulewa vakavuku?
Josua 24:15 (Sa rawa meda digitaka meda qarava na Turaga)
Joni 14:15 (Na noda digidigi vinaka ena vakaraitaka na noda lomana na Tamada Vakalomalagi kei na noda gagadre meda talairawarawa Vua)
2 Nifai 2:16, 27; Ilamani 14:30–31 (Eda sa galala meda digidigi ka cakava na ka eda vinakata)
Moronai 7:14–15 (Sa soli vei keda meda vakatulewataka na ka vinaka mai na ka ca)
Gary B. Sabin, “Tu i Loma ka Tu Taucoko i Loma,” Ensign se Liaona, Me 2017, 52–55
Thomas S. Monson, “Digidigi,” Ensign se Liaona, Me 2016, 86
Dallin H. Oaks, “Na Vosa Vakatautauvata ni Daukakaburaki, ” Ensign se Liaona, Me 2015, 32-35
Randall L. Ridd, “Na iTabatamata Digitaki,” Ensign se Liaona, Me 2014, 56-58
“Galala ni Digidigi,” Tudei ena Vakabauta (2004), 19
“ Galala kei na Vakatulewa Vakataki Koya,” kei na “iVakatagi kei na Danisi,” Me iSakisaki ni iTabagone (2011), 2–3, 22-23
Vidio: “Stay within the Lines”; “No Regrets”; “Leave the Party” “Dangerous Tides”, “Going to Grandma’s”
Veivakavulici ena ivakarau ni iVakabula
E wasea na iVakabula vei ira na Nona tisaipeli na italanoa rawarawa, vosa vakatautauvata, kei na ivakaraitaki ni veika e sotavi dina ka vakaibalebale vei iratou. Na lesoni oqo sa madigi vinaka vei iko mo wasea kina na ivakaraitaki eso ni digidigi o a cakava ka sa veisau kina na nomu bula. Na veika cava era sa sotava oti na cauravou era rawa ni wasea?
Vidio: “Wasea na iTalanoa kei na iVakaraitaki”
Raica mera veiliutaki na cauravou
Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.
Tekivuna na gauna ni vuli-ka
Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:
-
Vakabira na vosa “Digidigi” ena mua ni dua na kau ka vakabira na “Veika sa Yaco” ena yasana kadua ka vakaraitaka ni noda digidigi yadua sa tiko na kena isau (eso na gauna e vinaka, ka ca ena so na gauna). Sureta e dua na cauravou me taura tu na kau ka vakamacalataka e dua na digidigi e rawa ni sotava. Sa rawa me vakamacalataka o cauravou na veika ena yaco mai na digidigi oya. Veivosakitaka na ka e dau yaco ki na noda bula, matavuvale, kei na veiqaravi ni matabete mai na noda digidigi.
Vulica vata
Na itaviqaravi yadua e ra ena vukei ira na lewe ni kuoramu me ra kila deivaki na ivakavuvuli ni galala ni digidigi. Muria na veivakauqeti ni Yalotabu, digitaka e dua se sivia ka na ganita na nomu kuoramu:
-
Na cava o nanuma ni kena ibalebale na “tu taucoko i loma”? Na cava o nanuma ni ibalebale ni “tucake i loma”? Sureti ira na cauravou me ra wilika na ivakaraitaki kei na italanoa e vakayagataka o Elder Gary B. Sabin me vakamacalataka na veimalani vosa oqori ena nona vosa “Tu i Loma ka Tu Taucoko i Loma.” Na cava eso na ka vakayalo era na cakava tu ga me rawa na tamata? Ena rawa vakacava meda digia me da “tu taucoko i loma” vakayalo? Ena ka marautaki me ra cakava na cauravou eso na ivola-kabi ka vakayagataka na malanivosa oqo “tu i loma” se “taucoko i loma” kei na ivakaraitaki e solia o Elder Sabin. Ena rawa talega ni ra vakacuru eso na nodra ivakaraitaki vakataki ira.
-
Sureta e dua na lewe ni kuoramu me vakavulica e dua na tiki ni lesoni oqo. Sa rawa me cakava oqo me tiki ni nona ituvatuva ni iTavi Vua na Kalou me vulica ka vakavulica na galala ni digidigi (raica na “Kila na Vunau,” tabana 18, 42, se 66).
-
Sureti ira yadua na cauravou me ra wilika lo na “ Galala kei na Vakatulewa Vakataki Koya”ena Me iSakisaki ni iTabagone ka wasea na veika era sa vakauqeti kina. Sa rawa vei ira na lewe ni kuoramu mera digitaka e dua tale na ivakatagedegede ena ivola ka wasea eso na digidigi era sa cakava me baleta na ivakatagedegede oya kei na veivakalougatataki e tadu mai ena vuku ni nodra digidigi ya. Me vakataka, nodra rawa ni wilika na “iVakatagi kei na Danisi” ena Me iSakisaki ni iTabagone ka veivosakitaka na veivakalougatataki era sa ciqoma mai na nodra muria na ivakasala mera drotani mai na sere kei na danisi e vakatani.
-
Solia ki na cauravou yadua eso na tiki ni vosa nei Elder Dallin H. Oaks “Na Vosa Vakatautauvata ni Daukakaburaki ” se na vosa nei Peresitedi Thomas S. Monson “Digidigi.” Sureti ira na cauravou me ra wilika vakaiira ka wasea na raiyawa era vakauqeti kina. E rawa ni ra cakava oqo vakailawalawa se kuoramu taucoko. Na cava era sa vulica baleta na isau ni noda vakadinata kei na cakacaka? Sureti ira me ra veivosakitaka na iwalewale e rawa ni vukei ira kina na ivakasala era vulica mera digidigi vakavinaka cake kina.
-
Sureta na cauravou yadua mera raica na nona ivakaraitaki ni digidigi e dua tale mai na ivolanikalou (me ivakaraitaki, sa rawa mera veidutaitaka vata na nodratou digidigi o Nifai kei Leimani kei Lemueli ena 1 Nifai 3:1–8 kei na veivanua eso ena 1 Nifai). Na cava na revurevu ni digidigi oya? E tarai ira vakacava tale eso na digidigi o ya?
-
Vakaraitaka e dua na vidio e vakaturi tiko ena ituvatuva oqo. Sureti ira na lewe ni kuoramu me ra raica na isau ni digidigi era a cakava na cauravou ka vakaraitaki tiko ena vidio. Kerei ira mera wasea na veika era sa raica. Sureti ira mera wasea na veika era sotava ena nodra cakava e dua na digidigi ka dede na tatara tu ni kena revurevu. Sureti ira na cauravou yadua me ra wilika e dua na ivolanikalou mai na ituvatuva oqo ka me wasea na kena rawa ni vukei koya me digidigi dodonu ena veisiga ni mataka.
Kerei ira na cauravou me ra wasea na veika era sa vulica nikua. Era sa kila deivaki li na ivunau ni galala ni digidigi? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?
Me veivuke ena veivakavulici
“Mo kua soti ni lomaleqa ke balavu na gauna era na taura na nomu lewenivuli ni oti nomu tarogi ira. Tovolea mo kua ni dau sauma ga vakataki iko na nomu taro; solia vei ira na nomu lewe ni kalasi na gauna mera vakasamataka mai na isau ni nomu taro. Io, ena gauna era dau vagagalu kina, eso na gauna e rawa ni kena ivakaraitaki ni ra sega ni taura vinaka na taro, ka na gadrevi mo na vukica na kena itautau me matata.” (Veituberi, Me iLutua ni Noda Bula [1999], 79).
Veisureti me caka
Me na tinia na soqoni na cauravou ka veiliutaki tiko. Sa rawa vua me:
-
Wasea na ivakaraitaki ni digidigi vinaka a vakayacora ka me vakamacalataka na kena vakayaco-ka na digidigi oya ki na nona bula kei na nodra bula eso, oka kina na nona matavuvale. Sa rawa me sureti ira na vo ni lewe ni kuoramu mera wasea talega.
-
Sureti ira na lewe ni kuoramu mera vakadikeva vakai ira na digidigi era sa cakava tiko ka sa vakayaco-ka tiko me rawa ni ra lewe ni matabete yalodina. Sa rawa me vakayaloqaqataki ira mera tuvanaka na sala mera torocake tikoga kina.