Na cava na inaki ni bula?

Eda sa mai vakayago ena bula oqo ka da vakatovolei me laurai kina keda sa talairawarawa tiko ki na ivakaro ni Kalou. Na veika eda sotava ena bula oqo sa baleta na noda vukei meda na vakataka kina na Tamada Vakalomalagi.

Mo vakarautaki iko vakayalo

Ko sa sotava vakaevei na marau ena bula oqo? Na veika cava o sa sotava oti sa vukea mo tubu kina vakayalo?

Na cava era sa cakava tiko na cauravou mera vakataka sara na Tamada Vakalomalagi?

Vulica ena masumasu na ivolanikalou kei na ivurevure oqo. Na cava o sa vakauqeti kina mo na wasea ki na kuoramu?

2 Nifai 2:25 (Eda a buli meda mai marau)

Alama 12:24; 34:32; 42:4 (Na bula oqo sa gauna meda vakatovolei kina ka vakavakarau ni veitata kei na Kalou)

3 Nifai 12:3–12 (E a cavuta na iVakabula e levu sara na ivakarau ni bula e vakalou)

3 Nifai 12:48 (E vinakata na Tamada Vakalomalagi meda vinaka sara me vakataki Koya)

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129

Carol F. McConkie, “Na Totoka ni Yalo Savasava,” Ensign se Liaona, Me 2017, 9–12

Thomas S. Monson, “Tuberi Vinaka ki Vale,” Ensign se Liaona, Nove. 2014, 67--69

Gary E. Stevenson, “Nomu Va na Miniti,” Ensign se Liaona, Me 2014

Yavu ni Veivakabulai,” Tudei ena Vakabauta (2004), 210–211

Veivakavulici ena ivakarau ni Turaga

A sureti ira Nona tisaipeli na iVakabula mera vakadinadinataka. Me ivakaraitaki, a tarogi iratou na Nona tisaipeli o Koya, “Ia dou sa kaya se ko cei koi au?” ( Maciu 16:15). Ni ko taroga na taro veivakauqeti vei ira na cauravou, sa rawa ki na nodra isau ni taro me madigi ni soli ivakadinadina.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Sureti ira na cauravou mera wasea na veika era sa vulica ena macawa sa oti. Na cava sa vakayacora na lesoni oqo ki na nodra bula? Na veisau cava era sa vakayacora ena vuku ni veika era sa vulica? Na veivakalougatataki cava era sotava ni ra sa vakayacora?
Vakaraitaka e dua na wa e buki toka e loma. Vakamacalataka ni ibuki oqo e rawa ni matataka na bula oqo, ni veika kece ena yasana ka dua ni ibuki e matataka tiko na bula taumada kei na veika kece ena yasana ka dua e matataka na bula sa roro tiko mai.E rawa me vakayagataki oqo me ivakaraitaki bula me raici tiko ena soqoni ni kuoramu.

Vulica vata

Na itaviqaravi yadua e ra ena vukei ira na lewe ni kuoramu mera vulica na inaki dina ni bula. Mai na veivakauqeti ni Yalotabu, digitaka e dua se sivia ka na ganita na nomu kuoramu:

Solia vei ira na cauravou yadua e dua na tikini pepa, ka qai sureti koya me wilika na ibalebale ni vosa na yalo savasava (holy). Sureti ira na cauravou me ra wilika na vosa nei Sister Carol F. McConkie “Na Totoka ni Yalo Savasava” ka qai tomana na nona ivakamacala ni veika e yalo savasava. Na cava me da cakava me da veikauwaitaki kina vakalevu cake? Sureti ira na cauravou me ra digia e dua vei ira na ibalebale ni yalo savasava era vola ka qai wasea ena rawa vakacava me ra saga tiko ga me ra rawa ni vakasavasavataki ena sala oqo.
Sureti ira na cauravou mera vakasaqara na ivolanikalou ena ituvatuva oqo ka wasea na veika era sa vulica me baleta na inaki ni bula oqo (e rawa talega mera vakasaqara na Tudei ena Vakabauta, tabana e 209–210). Na cava beka ena yaco ki na nodra digidigi ni ra sa kila tiko na inaki oqo?
Sureti ira na cauravou mera wilika na Veivakalougatataki ena 3 Nifai 12:3–12 ka raica na ivakarau e vinakata vei keda na Tamada Vakalomalagi meda vakatorocaketaka ena gauna ni noda bula oqo. Kerea mera vakasamataki ira na tamata ena ivolanikalou se ena nodra bula ka ra ivakaraitaki ni ivakavuvuli oqo. Ena vukei keda vakacava na ivakavuvuli ni iVakabula ena 3 Nifai 12 meda kila vakavinaka kina na noda inaki vaka luvena tagane na Kalou?
Solia ki na lewe yadua ni kuoramu e dua na ilavelave “Na Matavuvale: Ai Vakaro ki Vuravura Raraba” se na vosa nei Peresitedi Thomas Monson “Tuberi Vinaka ki Vale.” Kerei ira na lewe ni kuoramu ni ra sa wilika mera makataka na veivosa kei na malanivosa e vakavulica vei ira na nodra inaki ena bula oqo ni ra sa luvena tagane na Kalou. Sureti ira na cauravou mera wasea na vosa era sa makataka ka vakamacalataka na vuna e vakaibalebale kina vei ira.
Kerea na veimama ni kuoramu me ra wilika me baleti Noelle Pikus-Pace ena vosa nei Bisopi Gary E. Stevenson “Nomu Va na Miniti,” qai kerea na ikarua ni veimama me ra wilika me baleti Torah Bright ena vosa vata oya. Sureti ira mera wasea vakai ira na veika era sa vulica baleta na inaki ni bula mai na italanoa oqo. Solia vei ira na cauravou e vica na miniti me ra railesuva kina na vosa nei Bisopi Stevenson ka vakasamataka vakatitobu na veika era sa vakayacora tiko ena nodra “va na miniti”— na cava soti na cakacaka vakalotu e gadrevi kei na veika namaki eso ena nodra veisiga ni mataka, kei na cava era sa cakava tiko me ra vakarau kina? Sureta eso na cauravou me ra wasea na nodra nanuma.

Kerei ira na cauravou mera wasea na veika era sa vulica nikua. Era sa kila vinaka cake beka kina na inaki ni bula? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me veivuke ena veivakavulici

“Vakayagataka na veisotari ni mata me dreta na yalo ki na lesoni. Ena gauna o sa veivakavulici tiko kina, ka veisotari tiko na matamu kei ira na lewe ni kalasi, o sa vakabibitaki ira tiko o vakavulica, ka sega na iyaragi ni veivakavulici. Ni sa veisotari tiko na matamu ena nomu vakarogoca tiko na veika era vakatukuna se na nodra taro, ena vakadeitaka vei ira ni ko kauwaitaka tiko na veika era tukuna tiko mai” (Veituberi, Me iLutua ni Noda Bula [1999], 82).

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na nona ivakadinadina ni veika sa vakavulici.
Vakayaloqaqataki ira na lewe ni kuoramu mera cakacakataka na veivakauqeti era ciqoma ena soqoni ni kuoramu.