Ena vukei au vakacava na veivakalougatataki vakapeteriaki?

Na veivakalougatataki vakapeteriaki sai koya na ivakatakila kivei keda yadua me baleta na noda bula. Ena vukei keda meda na kila na veika eda na rawata kei na veivakalougatataki eda na rawa ni ciqoma kevaka eda sa yalodina tiko. Ena rawa me umani tiko kina na yalayala eso, veivakasalataki, se veivakaroti me dusimaka na noda bula. Ena vukei keda talega meda kila ni sa kilai keda na Tamada Vakalomalagi ka kauwaitaki keda tiko vakayadua.

Mo vakarautaki iko vakayalo

Kevaka o sa ciqoma na nomu veivakalougatataki vakapeteriaki, e sa dusimaka vakacava na nomu bula? E sa vukei iko vakacava ena gauna ni veivakatovolei? E sa vakauqeti iko vakacava?

Ena sala cava sa rawa ni dua kina na idusidusi na veivakalougatataki vakapeteriaki ki na nodra bula na cauravou o vakavulica? Na cava e bibi kina vei ira mera kila na nodra kawa ena mataqali i Isireli? O na vukei ira vakacava mera vakavakarau mera ciqoma na nodra veivakalougatataki vakapeteriaki?

Ni ko vakavakarau, vulica ena masumasu na ivolanikalou kei na ivurevure oqo. Na cava o raica ni na veivuke vakalevu vei ira na cauravou o vakavulica tiko?

Alama 16:16–17; 3 Nifai 17:2–3 (E dodonu meda vakarautaka tiko na yaloda meda ciqoma na ivakasala mai vua na Turaga)

3 Nifai 20:25–27 (Na mataqali i Isireli e vakalougatataka na matavuvale kei vuravura)

V&V 82:10; 130:20–21 (Na veivakalougatataki e lavaki ki na na talairawarawa)

Henry B. Eyring, “Vukei Ira Mera Dau Ta iCake,” Ensign se Liaona, Nove. 2012, 60–67

Boyd K. Packer, “Vakasala Vei Ira na iTabagone,” Ensign se Liaona, Nove. 2011, 16–19

Carlos A. Godoy, “Sa Tiko na iTuvatuva ni Turaga Baleti Keda!” Ensign se Liaona, Nove. 2014, 96--98

“ Veivakalougatataki Vakapeteriaki,” Tudei ena Vakabauta (2004), 185–86

Vidio: “Face to Face with President Eyring and Elder Holland: How can I get comfort from my patriarchal blessing?”

Veivakavulici ena ivakarau ni iVakabula

Na iVakabula e kilai ira tiko na cauravou ena nomu kuoramu, ka kila na ituvaki era na rawa ni yacova. Sa tu Vua na nodra cakacaka yadua mera cakava, ka gadreva o Koya me vukei ira mera vakayacora rawa na cakacaka o ya. O na vakavulici ira vakacava na cauravou me ra kila ni sa lomani ira tiko na iVakabula ni ko vakamacalataka tiko na veivakalougatataki vakapeteriaki?

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo, se vakasamataka ga na nomu vakai iko, mo raicalesu kina na lesoni ni macawa sa oti ka vakatakila na lesoni ni macawa oqo:

Vakaraitaka e dua na iyaya se iyaloyalo me vakavotui kina vei ira na cauravou na lesoni ni macawa sa oti. Na veika cava era sa sotava ni ra vakayacora na veika era sa vulica? Kerei ira ke tiko eso tale na nodra taro se ivakamacala me baleta na iulutaga ni lesoni o ya.
Vola ena vava ni volavola, “Ena vukei au vakacava na veivakalougatataki vakapeteriaki?” Kerei ira na cauravou mera vakatura mai na isau ni taro oqo. Mo raicalesu na taro oqo ena gauna taucoko ni lesoni. Me tiki ni nomuni veivosaki, vakasamataka mo wasea na italanoa nei Elder Carlos A. Godoy me baleta na kena vukei koya na nona veivakalougatataki vakapeteriaki me vakatauca eso na lewa bibi ena nona bula (raica na “Sa Tiko na iTuvatuva ni Turaga Baleti Keda!” Ensign se Liaona, Nove. 2014, 96--98

Vulica vata

Na itaviqaravi yadua e ra ena vukei ira na lewe ni kuoramu mera vulica na veika e baleta na veivakalougatataki vakapeteriaki. Mai na veivakauqeti ni Yalotabu, digitaka e dua se sivia ka na ganita na nomu kalasi:

Sureta e dua se rua na cauravou me rau wasea na veika rau a sotava ni rau ciqoma na veivakalougatataki vakapeteriaki (se wasea na veika o a sotava). E sa vukei ira vakacava na veivakalougatataki vakapeteriaki? (Vakavotuya ki na kuoramu ni sa ka tabu na usutu ni itukutuku ni veivakalougatataki vakapeteriaki ka me kakua ni wasei). Kotiva vakalalai e dua na ilavelave ni vosa “Veika e Baleta na Veivakalougatataki Vakapeteriaki” me dua ki na taro yadua kei na kena isau. Sureta e dua na lewe ni kuoramu me digitaka e dua na tiki ni vosa oqori ka wasea na kena taro kei na kena isau ki na kuoramu. Na cava tale eso na nodra vakatataro na cauravou?
Ena veivakadonui nei bisopi, sureti peteriaki ni iteki me mai vosa ki na kuoramu baleta na veivakalougatataki vakapeteriaki. Vakauqeti ira na cauravou mera taro mai. Me kena ikuri, sa rawa mo vakaraitaka na vidio oqo “Face to Face with President Eyring and Elder Holland: How can I get comfort from my patriarchal blessing?”
Sureti ira na cauravou mera vola na taro eso me baleta na veivakalougatataki vakapeteriaki. Mera vakaraica na kuoramu na kena isau ena Tudei ena Vakabauta,draunipepa 185–186 .
Me wilika vata na kuoramu na ivakamacala nei Peresitedi Boyd K. Packer me baleta na nona veivakalougatataki vakapeteriaki ena “Vakasala Vei Ira na iTabagone” se italanoa nei Peresitedi Henry B. Eyring me baleta na nona ciqoma na veivakalougatataki ena “Vukei Ira Mera Dau Ta iCake.” Kerei ira na cauravou mera raica na sala ena vukei ira kina na veivakalougatataki vakapeteriaki ka wasea na veika era sa raica rawa.
Sureti ira na cauravou mera wilika na ivolanikalou sa vakaturi tiko ena ituvatuva oqo ka wasea na veika era vakila sa vakavulica vei ira na ivolanikalou me baleta na veivakalougatataki vakapeteriaki.

Kerei ira na cauravou mera wasea na veika era sa vulica nikua. Era sa kila vakavinaka cake beka na veivakalougatataki vakapeteriaki? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Veisureti me caka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Sureti ira na lewe ni kuoramu era se bera ni ciqoma na nodra veivakalougatataki ni peteriaki mera vakayacora na veika dodonu mera vakavakarau kina.
Sureti ira na lewe ni kuoramu era sa ciqoma na nodra veivakalougatataki ni peteriaki mera vulica tiko ena veigauna.