Na cava e bibi kina na vakarorogo kivei ka vakamuri ira na parofita bula ?

Eda sa tokoni ira na lewe ni Mataveiliutaki Taumada kei na Kuoramu ni iApositolo Le Tinikarua ni ra sa parofita, daurairai, ka daunivakatakila. Na nodra ivakavuvuli sa tukuna tiko na lewa ni Turaga. Era solia vei keda na ivakasala, veivakaroti, kei na veidusimaki mai vua na Turaga me baleta na noda gauna oqo. Eda sa vakalougatataki ena veitaqomaki, vakacegu, ka vakaukauwataki vakayalo ni da vakarorogo ka vakamuria na nodra ivakasala.

Mo vakarautaki iko vakayalo

Na ivakasala cava era sa solia na parofita bula ko sa vakayacora tiko ena nomu bula? O sa vakalougatataki vakacava ena nomu muria na ivakasala o ya?

Na cava e bibi kina vei ira na cauravou ena nomu kuoramu me tiko na nodra ivakadinadina baleti ira na parofita bula? O na vukei ira vakacava mera raica ni sa dua dina na madigi cecere me dusimaki ira tiko na parofita bula ena gauna oqo?

Vulica ena masumasu na ivolanikalou kei na ivurevure oqo. Na cava soti o sa vakauqeti kina mo wasea vei ira na cauravou?

Emosi 3:7; V&V 1:4, 37–38; Mosese 6:26–38 (E vosa tiko vei keda na Turaga mai vei ira na Nona parofita)

V&V 21:1, 4–7 (Sa yalataka tu na Turaga na veivakalougatataki cecere kivei ira era muria na parofita.

Ronald A. Rasband, “Tu Vata kei Ira na iLiuliu ni Lotu,” Ensign se Liaona, Me 2016, 46–49

David A. Bednar, “Kacivi me ra Tukuna Yani na Yacaqu,” Ensign se Liaona, Nove. 2015, 128-131

M. Russell Ballard,“Tikoga ena Loma ni Boto ka Tautauri Toka!” Ensign se Liaona, Nove. 2014, 89--92.

Carol F. McConkie, “Bula Me Vaka na Nodra Vosa na Parofita,” Ensign se Liaona, Nove. 2014, 77–79

Vidio: “Watchmen on the Tower”

Veivakavulici ena ivakarau ni iVakabula

E dau taro na iVakabula vei ira e dau vakavulica ka solia na madigi mera taroga na nodra taro. Na taro cava o rawa ni taroga ena vukei ira na cauravou mera vakasamataka ka vakananumi ira vakatitobu kina na parofita bula? Ko na vakaraitaka vakacava ni o kauwai ki na nodra isau ni taro?

Veisemati ni iTaviqaravi ni iTabagone

iVakatakilakila

Tuva e dua na itaviqaravi ni Muavata ka na vukei ira na cauravou me ra vakayagataka na veika era vulica ena lesoni oqo.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Digitaka e dua na vosa bibi mai na lesoni ni macawa sa oti, ka sureta e dua na lewe ni kuoramu me droinitaka e dua na kena iyaloyalo mera na qai vakilakila na vosa o ya na lewe ni kuoramu. Kerea ki na kuoramu me vakamacalataka na vuna e bibi kina na vosa o ya ena lesoni ni macawa sa oti.
Vakaraitaka na kedratou iyaloyalo na Mataveiliutaki Taumada kei na Kuoramu ni iApositolo Le Tinikarua (me vakataka na kena ena ilavelave ni Ensign se Liaona ni koniferedi). Cavuta na nomu ivakadinadina ni o ira kece na turaga oqo era sa parofita, daurairai, ka daunivakatakila. Na itukutuku cava era nanuma tiko na cauravou ni ra rogoca mai vua e dua na lewe ni Mataveiliutaki Taumada se Kuoramu ni Le Tinikarua?

Vulica vata

Na itaviqaravi yadua e ra ena vukei ira na lewe ni kuoramu mera kila vakavinaka na bibi ni nodra vakamuri ira na parofita bula. Muria na veivakauqeti ni Yalotabu, digitaka e dua se sivia ka na ganita na nomu kuoramu:

Lesia ki na cauravou yadua e dua vei ira na ivolanikalou e vakaturi tiko ena ituvatuva oqo ka kerei koya me vakasaqara na vuna eda gadreva kina e dua na parofita kei na veivakalougatataki e yaco mai ni ra vakamuria na parofita. Sureti koya me wasea na nona nanuma.
Wilika na iwase ni vosa nei Elder Ballard ka vakatauvatana kina na parofita bula vua e dua na dauveidusimaki ni vakaciriciri ena bilibili, ka tuva na sala eso e tautauvata kina kei na parofita e dua na dauveituberi ni vakaciriciri ena bilibili. Sureti ira na lewe ni kuoramu me ra vakasamataka ka wasea na ivakatautauvata tale eso e rawa ni vakayagataki me ra vakavulici kina na tani ena bibi ni nodra vakamuri na parofita kei na iapositolo.
Wasea ki na kalasi na itukutuku oqo mai na vosa nei Sister Carol F. McConkie “Bula Me Vaka na Nodra Vosa na Parofita”: “Ena itovo vakavuravura, na muria na parofita ena rairai sega ni ka cecere, cala vakapolitiki, se sega ni tokoni raraba. Ia na muria na parofita sa dina tu ga” (Ensign se Liaona, Nove. 2014, 78). Na cava eso na iulubale era dau tukuna na tamata me vuni nodra sega ni muria na parofita? Sureti ira na lewe ni kuoramu me ra vakasaqara ena vo ni vosa nei Sister McConkie me baleta na veika e rawa ni ra tukuna vua e dua e tovolea me vakayalolailaitaki ira mai na nodra muria na parofita. Kerei ira mera wasea na veika era sa raica.
Sureti ira na lewe ni kuoramu mera raitayaloyalotaka mada ni a taroga vei ira e dua na itokani mai na dua tale na matalotu, “Na cava me dua tiko kina na nomuni parofita?” “E vakacava tu na nomu parofita?” se “Na cava beka sa tukuna vei iko na parofita?” Era na sauma vakacava na cauravou?
Vakaraitaka na vidio “Watchmen on the Tower” se wilika vata na tiki ni vosa nei Elder David A. Bednar “Kacivi me ra Tukuna Yani na Yacaqu” se vosa nei Elder Ronald A. Rasband “Tu Vata Kei Ira na iLiuliu ni Lotu.” Sureti ira na cauravou mera wasea na veika era sa vulica me baleta na bibi ni nodra vakamuria na parofita. Raica vata kei ira na ulutaga ni vosa nei Peresitedi Thomas S. Monson ena koniferedi raraba se qai oti toka ga oqo ka veivosakitaka na veika sa vakaroti keda kina na parofita me baleta na gauna oqo.

Kerei ira na cauravou me ra wasea na veika era sa vulica nikua. Era sa kila vakavinaka tiko beka na cava e bibi kina na vakarorogo kivei ka vakamuri ira na parofita bula? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona nanuma me baleta na madigi ni nona kila ka vakamuri ira na parofita bula.
Kerei ira na lewe ni kuoramu mera wasea na gauna era a vakamuria kina na parofita kei na kena sa mai vakauqeti kina na nodra bula.