iTavi Vua na Kalou

Na cava e bibi kina me rawati na vuli ka tauyavutaka e dua na kila-ka vakacakacaka?

Na vuli sa dua na tiki bibi ni ituvatuva nei Tamada Vakalomalagi me vukei keda meda vakataki Koya vakalevu cake. Na vuli e vakarautaka na veika meda kila vakavinaka kei na kila-ka mena vukei keda meda tauyavutaka na bula rawati keda, qarava na noda matavuvale mai muri, ka meda dauveiqaravi cecere sara ena Lotu vakakina ena vuravura.

Mo vakarautaki iko vakayalo

Sa vukei iko vakacava na nomu vuli mo vakavakarau ki na veika mo na bula sotava? Na kila-ka cava, vuli, kei na kila vakacakacaka sa yaga vakalevu vei iko kei na nomu matavuvale? Na veika cava tale o se vinakata tiko mo vulica?

Na cava na nodra rai na cauravou baleta na vuli kei na kila? Ena vakalougatataki ira vakacava na vuli ena gauna oqo kei na nodra itavi ni veisiga ni mataka?

Vulica ena masumasu na veiivolanikalou kei na veiivurevure oqo. Na cava ena vukei ira na cauravou mera kila vakavinaka kina na yavu ni veivakabulai?

2 Nifai 9:29 (Na kila-ka sa ka vinaka kevaka meda vakarorogo ki na ivakasala ni Kalou)

V&V 88:76–80 (Meda na vulica ka vakavulica na veika sa vakayalo ka vakayago)

V&V 88:118 (Mo dou kila-ka ena vuli kei na vakabauta)

V&V 90:15 (E dodonu meda vakavukui keda ena ivola vinaka kecega, ivosavosa, ivakarau kei na tamata)

V&V 130:18–19 (Na vuku eda rawata ena bula oqo ena tucake vata tale kei keda)

D. Todd Christofferson, “Kemuni na Taciqu, E Tu na Cakacaka Meda Cakava,” Ensign se Liaona, Nove. 2012, 47–50

“ Vuli, ”Qarava Vinaka na Noqu iTavi Vua na Kalou (2010), 55–59

“ Vuli,” Me iSakisaki ni iTabagone(2011), 9–10

Veivakavulici ena ivakarau ni iVakabula

Na Turaga e lomani ira e vakavulica. A kunea na ivakarau kilai tani me vukei ira mera vuli ka tubu. Na sala cecere cava o rawa ni kunea me ra vukei kina na cauravou yadua mera kila vakavinaka na bibi ni vuli?

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Sureti ira na cauravou mera wasea e dua na ka era sotava ena nodra sa vakayacora tiko na veika era a vulica ena veilesoni sa oti (me kena ivakaraitaki, sa rawa mera wasea na veika era sa cakava tiko mera cakava rawa na ituvatuva era a vakayacora ena nodra ivola ni iTavi vua na Kalou).
Sureti ira na cauravou mera raitayalotaka mada ni tukuna vei ira e dua na itokani ni sa sega ni via vuli. Ena vakayaloqaqataki koya vakacava o ira na cauravou me na tomana tiko ga na nona vuli? Kerei ira mera vola na nodra nanuma ena dua na tiki ni pepa. Soqona mai na tiki ni pepa, ka wilika ka veivosakitaka vata na nodra nanuma kei na kalasi.Ni sa vakarau cava na kalasi, solia na madigi vei ira na cauravou mera tomana ki na nodra nanuma o ya vakayavutaki ena veika era sa vulica ena lesoni.

Vulica vata

Na inaki ni lesoni oqo me vukei ira na cauravou mera tuvanaka mera rawata na nodra vuli se tauyavutaka na kila-ka vakacakacaka mera vakavakarau mera qarava na nodra matavuvale mai muri. Me tiki ni lesoni oqo, e dodonu mera tekivutaka na lewe ni kuoramu e dua na veivakatorocaketaki ena iwasewase “Vuli Ka” ena nodra ivola iTavi Vua na Kalou. Ni bera na soqoni ni kuoramu, sureti ira na cauravou me ra kauta mai na nodra ivola ni iTavi Vua na Kalou ki lotu. Ena veisoqoni ni kuoramu mai muri, sureti ira me ra mai wasea na veika era sa sotava tiko ena nodra qarava na nodra veivakatorocaketaki.

Sureti ira na cauravou mera vakasaqara na Vunau kei na Veiyalayalati 88:77–80, 118, kei na “ Vuli ” ena MeiSakisaki ni iTabagone. Mera raica na (a) veika sa vinakata vei ira na Turaga mera vulica, (b) na vuna e vinakata kina o Koya mera vuli, kei na (c) sala e vinakata kina o Koya mera raica kina na vuli (raica na iTavi Vua na Kalou,55). Sureti ira na cauravou mera cega na draunipepa 56–58 ni iTavi Vua na Kalou ka bulia e dua na cakacaka ka na vukei ira mera vakayacora na veika era sa vulica me baleta na vuli. Me tuvanaka vata na kuoramu, na itaviqaravi ni Muavata ena vukei ira kina na cauravou mera kila vakavinaka na bibi ni kena rawati na vuli.
Lesia ki na lewe yadua ni kuoramu me wilika e dua na ivolanikalou era tiko ena ituvatuva oqo ka vakasaqara na veika e vakavulica tiko na ivolanikalou oqo me baleta na kena rawati na kila-ka kei na vuli. Sureti ira yadua na cauravou mera wasea na veika era sa vulica ki vua e dua tale na lewe ni kuoramu. Kerei ira yadua na cauravou mera vola ena vava ni volavola na nodra cakacaka era sa vakasamataka tiko mera sasagataka. Na veika cava era sa vulica mai na ivolanikalou e rawa ni vukei ira ni ra vakavakarau ki na veicakacaka oqo?
Me wilika vata na kuoramu, “ Na Matavuvale: Ai Vakaro ki Vuravura Raraba,” ka vakasaqara na vosa kei na malanivosa e vakamacalataka na nodra itavi na tagane vakawati kei na tama (e rawa ni kune na ivakaro raraba oqo ena draunipepa 107 ena iTavi Vua na Kalou ). Kerei ira mera vola ena vava ni volavola na nodra isau ni taro oqo: (a) E rau veiwekani vakacava na rawati ni vuli kei na vakayacora rawa na itavi vaka-tagane vakawati kei na tama? (b) Ena vakayaco-ka vakacava ki na nomu tuvanaka mo cakacaka ena nomu kila vakavinaka na itavi oqo? (c) Na cava o rawa ni cakava ena gauna oqo mo vakarautaki iko mo cakacaka? Sureti ira na cauravou mera rai ki na iTavi Vua na Kalou, draunipepa 56–58, ka bulia e dua na cakacaka ka na vukea mera vakasaqara na madigi eso ni cakacaka sa namaki tiko. Me tuvanaka na kuoramu, na itaviqaravi ni Muavata ena rawa ni vukei ira na cauravou mera vakasaqara na cakacaka mera digitaka.
Ena veivakadonui nei bisopi, sureti ira na tamadra eso na lewe ni kuoramu mera mai wasea na sala era a rawata kina na nodra vuli se vulica na kila-ka vakacakacaka mera qarava kina na nodra matavuvale. Na solibula cava era a cakava? Na cava era a cakava mera gugumatua cake kina? Na cava beka na ka era a diva mera a vakavinakataka cake?
Sureti ira yadua na cauravou mera wilika e dua na iwasewase e taleitaka mai na itukutuku nei Peresitedi Gordon B. Hinckley “Seek Learning” se wilika na parakaravu 6–8 ni nona vosa o Elder D. Todd Christofferson “Kemuni na Taciqu, E Tu na Cakacaka Meda Qarava.” Kerei ira na cauravou mera wasea ki na kuoramu na veika era sa vulica baleta na bibi ni vuli. Ena vakayaco-ka vakacava ki na nodra veimadigi ni mataka na nodra vakatulewa ena gauna oqo baleta na vuli?

Kerei ira na cauravou mera wasea na veika era sa vulica nikua. Na cava era sa bau vakila se nanuma? Era sa kila vakavinaka beka na bibi ni vuli? E tiko tale beka eso na nodra vakatataro? Ena yaga beka me na tauri vakalevu na gauna ena iulutaga oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Sureti ira na cauravou mera vola na veika era rawa ni cakava mera gugumatua cake e koronivuli ka tekivu cakava oqori ena loma ni macawa.
Bolei ira na cauravou mera tekivu maroroi ilavo me baleta na nodra kaulotu kei na vuli ena siga ni mataka.
Sureti ira na lewe ni kuoramu mera vulica na ivolanikalou me baleta na vuli e tiko ena ituvatuva oqo ena nodra gauna yadua ni vuli ivolanikalou ka wasea na veika era sa vulica rawa ena soqoni ni kuoramu ka tarava.