Na cava na ivakarau ni Turaga ena nodra vukei na dravudravua kei na vakaleqai?

Ena gauna a tadu mai kina ki vuravura o Jisu Karisito, a vakayagataka vakalevu na Nona ilesilesi vakalotu ena Nona vukei ira na dravudravua kei ira na vakaleqai. Mai na Nona Lotu, sa vakarautaka tu kina na Turaga e dua na sala vei keda meda vukei ira era vakaleqai tu. Sa kerei keda kina o Koya meda dau lomasoli ena kena ivakarau eda sa ciqoma mai Vua. “E duidui sara na ivakarau ni Nona vukei ira na vakaleqai na Turaga mai na ivakarau ni vuravura. E kaya kina na Turaga, ‘[Na nodra vukei na dravudravua] me na vakayagataki ena sala sa dodonu vei au.’ [Vunau kei na Veiyalayalati 104:16; raica talega na tikina e 15 .] E sega walega ni kauwai o Koya ena noda gagadre nikua; sa kauwai talega o Koya ki na noda tubu cake tawamudu. Ena vuku ni ka oqo, sa dau okati tu kina ena sala oqo ni Turaga na bula rawati keda kei na noda qaravi ira na noda neiba me ikuri ni noda vukei ira tiko na dravudravua” (Dieter F. Uchtdorf, “ Veivukei ena Sala ni Turaga,” Ensign se Liahona, Nove. 2011, 54).

Mo vakarautaki iko vakayalo

O sa saga vakacava mo muria na ivakaraitaki ni iVakabula mo qaravi ira kina eso tale? Na cava o rawa ni wasea vei ira na cauravou me baleta na veika o sa sotava?

Na ivakavuvuli cava ni sala ni veivukei ni Turaga era gadreva na cauravou mera kila deivaki? Ena veivakauqeti vakacava na kena kilai deivaki na ivakavuvuli oqo mera veiqaravi vaka matabete?

Na ivolanikalou kei na ivurevure cava tale eso ena vukei ira na cauravou mera kila deivaki na sala e dau veivuke kina na Turaga vei ira na dravudravua kei na vakaleqai?

Aisea 58:6–11; Malakai 3:8–10; Maciu 25:35–40; V&V 82:18–19 (Na sala mera vukei kina na dravudravua)

Jemesa 1:27; Mosaia 18:27–28; V&V 42:29–30 (Na bibi ni nodra qaravi na dravudravua kei na vakaloloma)

Alama 34:27–28; Momani 8:35–37: V&V 56:16–18; 70:14 (Na ivakasala ni Turaga kivei ira ka sega ni dau qaravi ira na dravudravua)

V&V 104:15–18 (Qaravi ira na dravudravua ena ivakarau ni Turaga)

Patrick Kearon, “Nai Vakaruru Mai na Cava,”Ensign se Liaona, Me 2016, 111–14

Linda K. Burton, “Au a Vulagi,” Ensign se Liaona, Me 2016, 13–15

Jeffery R. Holland, ”Eda sa Sega Li ni Dravudravua Kecega?“ Ensign se Liaona, Nove. 2014, 40-42.

“ Sasaga ni Lewenilotu ni Nodra Vukei na Dravudravua kei na Vakaleqai ka Veiqaravi, ” iVoladusidusi 2: Veiliutaki ena Lotu (2010), 6.1.2

“Veiqaravi,” Me iSakisaki ni iTabagone (2011), 32–33

Vidio: “Sharing the Light of Christ,”, “I Was a Stranger: Love One Another,” “When We Were Strangers,”, “Nai Vakaruru Mai na Cava”

5:12

3:25

3:3

5:15

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vulika

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira na cauravou mera wasea na veika era se qai sotava oti ga ka vakavotuya vei ira e dua na ka era a vulica ena lesoni ni macawa sa oti.
Sureti bisopi me gole mai ki na soqoni ni kuoramu ka vakamacalataka vei ira na cauravou na kena dau vakayagataki na ilavo tabu ni Lotu, oka kina na isolisoli ni lolo, cau baleta na kawatamata raraba, kei na isolisoli ki na iLavo Vure ni Vuli (raica na iVoladusidusi 1: Peresitedi ni iTeki kei na Bisopi[2010], 14.4). Kerei koya me vakamacalataka na sala a vukei ira kina na vakaleqai tu mera bula rawati ira.

Vulica vata

Na itaviqaravi yadua e ra ena vukei ira na cauravou mera vulica na sala ni Turaga ena nodra vukei na dravudravua kei na vakaleqai. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Ena nona vosa “Nai Vakaruru Mai na Cava,” E kaya kina o Elder Patrick Kearon, “E rauta ni 60 na milioni vakacaca na isenivalu e tiko e vuravura nikua. … E veivakidacalataki ni da vakasamataka na iwiliwili oqo ka vakasamataka na ka ena kauta mai ki na bula vakayadua.” Me ra vukei na cauravou mera kila tiko na nodra vakacacani na isenivalu kei na sala era na veivuke kina, vakaraitaka vei ira e dua se rua na vidio ena ituvatuva oqo. Na cava era nanuma baleta na veika dredre era sotava tiko na isenivalu? Sa rawa mo sureti ira na lewe ni kuoramu vakailawalawa lalai me ra raica na vosa nei Elder Kearon se vosa nei Sister Linda “Au a Vulagi,” ka vakaraica na veika era na vukei ira kina na isenivalu. Vukei ira na cauravou me ra tuvanaka ka cakava na veika sa vakaturi tiko oqo.
Sureti ira na lewe ni kuoramu me ra wilika vata na “Veiqaravi” na wase e tiko ena Me iSakisaki ni iTabagone ka veivosakitaka na vuna e vinakati keda kina na Turaga meda veiqaravi yani. Sa rawa talega mo kerea e dua na lewe ni kuoramu me vulica na “Qaravi Ira na Tani” na wase e tiko ena ivola iTavi Vua na Kalou (draunipepa 26–27, 50–51, se 74–75) ka vakavakarau mai me mai liutaka e dua na veivosaki me baleta na vulici ni itaviqaravi ena wase oqo. Solia e dua na gauna vei ira na cauravou ena soqoni ni kuoramu me ra cakava na nodra dui ituvatuva vata kei na dua na ituvatuva ni kuoramu me ra laki qarava e dua e tiko vakaleqai. Ena dua na soqoni ni kuoramu e tarava, kerei ira me ra wasea na veika era sa sotava tiko ni ra sa vakayacora tiko na veika era a tuvanaka.
Wasei ira na cauravou mera veisasa. Lesia e dua na lewe ni ito me wilika na ivolanikalou me baleta na bibi ni nodra qaravi na dravudravua kei na vakaloloma, ka lesia na kena kadua me wilika na ivolanikalou e veivakasalataki kivei ira era sega ni dau qaravi ira na dravudravua kei na vakaloloma (me baleta na kena vakasama, raica na ivolanikalou eso ka vakatututaki ena idusidusi oqo). Sureti ira na cauravou mera vulica na nodra tiki ni ivolanikalou ka wasea vei nona itokani na veika era sa vulica. Tarogi ira na cava e bibi kina vua na Tamada Vakalomalagi mera vukei na dravudravua kei na vakaleqai. Sureti ira na cauravou mera veivosakitaka na sala era rawa ni vukei ira kina na vakaleqai tu ena nodra matavuvale, tabanalevu, kei na itikotiko raraba.
Solia vei ira yadua na lewe ni kuoramu na ilavelave ni vosa nei Elder Jeffery R. Holland ”Eda sa Sega Li ni Dravudravua Kecega?“ Kerei ira na cauravou mera digitaka e dua na tiki ni volanikalou ena vosa nei Elder Holland me baleta na nodra vukei na dravudravua kei na vakaleqai. Sureti ira yadua na cauravou mera wasea na tiki ni volanikalou era digitaka kei na kena ibalebale vei koya. Me ra qai taleva vakuoramu na ivakasala nei Elder Holland: ”au sega mada ni kila na sala cava sara mada e dodonu mo ni cakava nomuni itavi vei ira era sega ni rawa mera vukei ira vakaiira. Ia au kila ni sa kila tiko na Kalou, ka na dusimaki iko ena cakacaka ni loloma vakatisaipeli.“ Solia vei ira na lewe ni kuoramu eso na gauna mera vakasamataka eso na sala e vinakati ira kina na Kalou mera vukei na dravudravua kei na vakaleqai. Sureti ira mera wasea ena kalasi na nodra nanuma.
Vakaraitaka na vidio“Sharing the Light of Christ” se dua na vidio ni Lotu me baleta na vukei ni kawatamata raraba, ka kerei ira na cauravou mera wasea na veika era qoroya ena ivakaraitaki oqo. Sureti ira mera wasea na veika era sotava ni ra vukei ira na tamata kei na veika era rawa ni cakava mera vukei ira era vakaleqai.

5:12
Kerei ira na lewe ni kuoramu mera vola eso na leqa vakayago ka vakayalo e rairai sotava tiko e dua. Vola ena vava ni volavola, “Na cava na ivakarau ni Turaga ena qaravi ni dravudravua kei na vakaloloma?” Wasea vei ira na cauravou na itukutuku nei Peresitedi Dieter F. Uchtdorf ena itekivu ni ituvatuva oqo, ka kerei ira na cauravou mera vakarogoca na isau ni taro era tiko ena vava ni volavola. Sureti ira mera wasea na veika era sa raica. Eda na rawa ni vukei ira vakacava na dravudravua kei na vakaloloma me yaco mera bula rawati ira vakalevu cake?

Kerei ira na cauravou me ra wasea na veika era sa vulica nikua. Na cava era sa bau vakila se vakanananu kina? Era sa kila deivaki li na cava sa ibalebale ni nodra qaravi na vakaloloma ena ivakarau ni Turaga? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me Veivuke ena Veivakavulici

“Ni sa tarogi e dua na taro, raica mada ke o rawa ni sureta mai e dua me sauma ka me kua ni sauma o qasenivuli. Me kena ivakaraitaki oqo, o rawa ni kaya, ‘Oqori e dua na taro vinaka. Na cava o ni vakasamataka na vo ni kalasi?’ se “E rawa ni dua e veivuke mai me baleta na taro oqo?” (Na Veituberi, Me iLutua ni Noda Bula (1999), 73).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Cavuta na nona ivakadinadina me baleta na nona itavi ni matabete, o ya me qarava ka laveti ira cake na luve ni Kalou.
Sureti ira na lewe ni kuoramu mera ciqoma na veisureti oqo mai vei Peresitedi Thomas S. Monson: “Meda qai masuta na veivakauqeti me da kila na nodra gagadre o ira era tu wavoliti keda, oti meda qai toro yani ka veivuke” (“Me sa Tiko Ga kei Kemuni na Kalou,” Ensign se Liaona, Nove. 2012, 110).