Na cava e vinakata kina na Turaga meu bulabula vinaka?

Na bula vinaka sa dua na tiki bibi ni noda bula rawati keda. Ni da maroroya na noda bula eda na rawa ni rawa-ka vakalou ka qaravi ira vagumatua cake na tamata.Na ivakarau ni noda maroroya na yagoda ena vakayaco-ka ki na noda bula vakayalo kei na noda rawa ni ciqoma na veidusimaki mai vua na Yalo Tabu. Ni gadrevi meda bulabula vinaka, e dodonu meda talairawarawa ki na Vosa ni Vuku, meda kania na kakana bulabula, vakaukauwa yago ena kena gauna, ka moce vakavinaka.

Mo vakarautaki iko vakayalo

Na isema cava e ratou umani tiko kina na bulabula ni yagomu kei na vakasama kei na yalomu? A rawa vakacava mo qarava na Turaga vagumatua cake ena nomu bulabula vinaka tiko? Na veivakalougatataki cava tale sa yaco vei iko ena nomu saga mo bulabula vinaka tiko?

Na veitemaki cava era sa sotava tiko na cauravou e rawa ni vakacacana na bulabula vinaka ni yagodra kei na vakasama? O na vukei ira vakacava mera raica na veivakalougatataki ni kena bulataki na lawa ni Turaga baleta na tiko bulabula? Ena vakayaco-ka vakacava na bulataki ni lawa oqo ena nodra veiqaravi ni matabete?

Ni ko vulica na ivolanikalou kei na ivurevure tale eso baleta na Vosa ni Vuku, vakasaqara na veika ena vukei ira na cauravou mera vakila na bibi ni nodra maroroya vinaka na nodra vakasama kei na yagodra kei na vuna e gadreva kina na Turaga mera vakayacora vakakina.

Taniela 1:3–20 (E ratou a vakalougatataki o Taniela kei iratou na nona itokani ena nodratou talairawarawa ki na lawa vaka-Iperiu baleta na kakana eso)

V&V 88:124 (Sa vakasalataki keda na Turaga me baleta na cakacaka kei na noda ivakarau ni moce)

V&V 89 (Sa vakatakila mai na Turaga na Vosa ni Vuku kei na veivakalougatataki ni noda talairawarawa kina)

Thomas S. Monson, “Vakavuvuli kei na Yalayala,” Ensign se Liaona, Nove. 2016, 78-79

M. Russell Ballard, “Raica na Nona iNaki Qaseqase na Vu ni Ca,” Ensign se Liaona, Nove. 2010, 108–10; raica talega na vidio “You Will Be Freed, ”

“Tiko Bulabula ni Yago kei na Vakasama,” Me iSakisaki ni iTabagone(2011), 25–27

“Na Vosa ni Vuku,” Tudei ena Vakabauta (2004), 94–96

Vidio: “God Gave Them Knowledge”, “Leave the Party”

Veivakavulici ena ivakarau ni iVakabula

Ena gauna ni Nona cakacaka vakalotu e vuravura, a sureti ira kina na Nona tisaipeli na iVakabula mera cakacaka ena vakabauta ka bulataka na dina a vakavulica o Koya. Ena Nona veivakavulici taucoko, a vakatabakiduataka na nodra vukei o ira era muri Koya tiko mera bulataka na kosipeli ena yalodra taucoko. Me rawati oqo, a vakarautaka o Koya na veimadigi eso mera vuli mai ena veivakaukauwataki e sotavi. Ni ko vakasalataki ira na cauravou, sureti ira mera wasea na veika era sotava ni ra bulataka tiko na Vosa ni Vuku.

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira me ra wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Vola ena vava ni volavola na iulutaga ni lesoni ni macawa sa oti, ka sureti ira na cauravou mera wasea e dua na ka era nanuma.
Vola ena vava ni volavola, “Na cava e vinakata kina na Turaga meda bulabula vinaka?” Sureti ira na cauravou mera wasea na kena isau ka vakasaqara na ikuri ni kena isau ena gauna ni lesoni.

Vulica vata

Na itaviqaravi yadua e ra ena vukei ira na lewe ni kuoramu me ra kila vakavinaka kina na lawa ni Turaga baleta na tiko bulabula. Mai na veivakauqeti ni Yalotabu, mo digitaka e dua se sivia ka na ganita vinaka na nomu kuoramu:

Na veivakalougatataki e na veika e sotavi ni vakamuri na iVunau ni Vosa ni Vuku e rawa ni vakauqeti ira na cauravou me ra gumatua e na yalayala ni bulataki ni lawa oqo. E rawa ni o wasea na italanoa ena nomu bula se dua na ka e sotavi se mai na vosa nei Peresitedi Thomas S. Monson “Principles and Promises.” E rawa tale ga ni o vakaraitaka na vidio ni “Leave the Party.” Na lewe ni Kuoramu e rawa ni ra wasea na veika e sotavi mai na nodra bula se mai na nodra bula na lewe ni nodra matavuvale.
Sureti ira na cauravou mera cega na draunipepa 31–32 ni nodra ivola iTavi Vua na Kalou ka mera vakacavara vaka-kuoramu na ikalawa 1 kei na 2. Vakauqeti ira na kuoramu mera tuvanaka e dua na veivakatorocaketaki ni kuoramu, me ikuri ni nodra veivakatorocaketaki yadudua, ka na vukei ira mera bulabula vinaka tikoga. Sureta e dua na cauravou sa vakacavara na nona veivakatorocaketaki me vakaraitaka na kena sa vakayaco-ka tiko vei iratou na nodratou bulataka na ituvatuva. Vakaraitaka vei ira na cauravou ni vica na macawa tu mai, o na kerei ira mera na mai wasea na veika era sa sotava tiko ni ra vakacavara na ituvatuva era sa cakava.
Ke rawa, kauta mai ki na soqoni ni kuoramu e dua na baca ni siwa se dai, vakaraitaka e dua na kena iyaloyalo, se vakaraitaka na vidio “You Will Be Freed.” Mera qai vakamacalataka na cauravou na kena dau veirawai na baca ni siwa kei na dai vei ira na ika. Na cava eso na sala e veidabui se lawakitaki ira kina na cauravou o Setani mera voroka na Vosa ni Vuku? Wasea na kuoramu ki na rua na ilawalawa. Me wilika na imatai ni ilawalawa na Vunau kei na Veiyalayalati 89:5–15 ka me ratou raica na veika e sega ni vakadonuya na Turaga se vinakata vei keda meda vakayagataka vakavuku. Me wilika na ikarua ni ilawalawa na tikina e 10–20 ka me ratou raica na veika sa lesia na Turaga mera vakayagataka na tamata. Vakaraitaka se vakamatatataka na vosa se malanivosa e duatani (raica “Na Vosa ni Vuku” ena Tudei ena Vakabauta, 94– 96). Mera na wasea na cauravou na veika era rawa ni cakava mera drotani rawa mai na ituvaki eso era rawa ni lawakitaki se temaki kina.
Vola ena vava ni volavola e rua na ulutaga: “Veivakalougatataki Vakayalo” kei na “Veivakalougatataki Vakayago.” Sureti ira na cauravou mera wilika na V&V 89:18–21, ka vakasaqara na veivakalougatataki ka mera vola ena kena ulutaga donu ena vava ni volavola. Era sa kila vakavinaka vakacava na cauravou na veivakalougatataki oqo ki na nodra bula? Na veivakalougatataki cava e volai tiko era sa sotava oti na cauravou? (Kevaka e gadrevi mera kila vakavinaka na iyalayala oqo, mera qai rai ga ki na ivakamacala nei Peresitedi Boyd K. Packer ena nona vosa “ The Word of Wisdom: The Principle and the Promises”).
Vakaraitaka na vidio “God Gave Them Knowledge,” ka kerei ira na cauravou mera raica na sala eso e ratou a vakalougatataki kina o Taniela kei na nona itokani ni ratou talairawarawa ki na nodra lawa ni tiko bulabula. (Sa rawa mo tarova tu vakawawa na vidio ka me veivosakitaki na veika oqo ena nodra sa raica rawa na cauravou.) Mo na taro vakaoqo: O sa vakalougatataki vakacava ena nomu talairawarawa ki na Vosa ni Vuku? Ena vukei iko vakacava na nomu talairawarawa ki na Vosa ni Vuku mo vakayacora rawa kina na nomu itavi ni matabete? Na cava eso na bolebole era sotava tiko na itabagone nikua ena nodra saga tiko mera bulataka na Vosa ni Vuku? Na cava e rawa ni ra cakava mera walia na bolebole oqo? Cavuta na nomu ivakadinadina me baleta na bibi ni talairawarawa ki na Vosa ni Vuku me rawa ni tudei tikoga na Yalotabu ena nomu bula.
Sureti ira na cauravou mera wilika na “Bula Vakayago kei na Bula Vakayalo” ena Me iSakisaki ni iTabagone Kerea eso na cauravou mera vola ena vava ni volavola eso na vosa ni ivakasala era sa raica, ka kerei ira na kena vo mera vola na veivakalougatataki sa yalataki tu vei ira era muria na ivakasala oqo. Kerei ira mera veivosakitaka na kena dau vakayavalati na yalodra mai na veika era cakava ki yagodra. Era na vakayagataka vakacava na veika e volai tu ena vava ni volavola mera vakamacalataka kina na nodra ivakatagedegede kivei ira na itokani ena veimatalotu tale eso?

Kerei ira na cauravou mera wasea na veika era sa vulica nikua. Na cava era sa bau vakila se nanuma? Era sa kila vakavinaka tiko beka na vuna e vinakata kina na Turaga mera bulabula vinaka tiko? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Sureti ira na cauravou mera vola na veivakalougatataki eso era raica rawa ena macawa oqo ni ra bulataka tiko na Vosa ni Vuku.
Bolei ira na cauravou mera cakava e dua na nodra veivakatorocaketaki ena nodra ivola ni iTavi Vua na Kalou me vukei ira mera bulabula vinaka (raica na draunipepa 31–34) ka wasea na veika era sotava ena gauna era cakava tiko kina na veivakatorocaketaki oqo.