Na cava e ivakavuvuli bibi kina ni kosipeli na cakacaka?

Sa vakaroti keda na Turaga meda kakua ni vakawelewele. Na vakatorocaketaki ni noda gadreva ka rawa ni cakacaka ena vukei keda meda cau ki na vuravura oqo eda bula tiko kina. Ena yaco meda kila vakalevu cake ni da sa tamata yaga. Eda na vakalougatataki kina kei na noda matavuvale, ena gauna oqo kei na veisiga ni mataka.

Mo vakarautaki iko vakayalo

Na cava e dua na ka o sa cakacakataka tiko mo rawata? Sa vakalougatataki iko vakacava kei na nomu matavuvale na cakacaka, ena veika vakayago ka vakayalo?

Ena gauna cava era sa marautaka kina na cauravou ni ra cakacaka vakaukauwa? O na vukei ira vakacava mera kila rawa na veivakalougatataki vakalevu ni cakacaka kei na tauyavutaki ni dua na gagadre ni cakacaka?

Vulica ena masumasu na ivolanikalou oqo kei na ivurevure tale eso. Na cava a vakauqeti iko mo cakacaka?

Vakatekivu 3:19 (E dodonu meda cakacaka meda qaravi keda rawa kina)

Maciu 25:14–30 (Vosa vakatautauvata ni taledi)

Kalatia 6:3–5; 1 Cesalonaika 4:11; Mosaia 10:4–5 (Eda sa vakaroti meda cakacaka)

Alama 38:12; V&V 58:27; 60:13; 75:29; 107:99–100 (Mo kakua ni vucesa se vakawelewele)

Dieter F. Uchtdorf, “Rua na iVakavuvuli Baleta na Draki ni Bula Kecega,” Ensign se Liaona, Nove. 2009, 55–58

H. David Burton, “The Blessing of Work,” Liahona, Tise. 2009, 36–40

“Cakacaka ka Bula Rawati Koya,” Me iSakisaki ni iTabagone (2011), 40–41

Vidio: “A Work in Progress”

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Vola ena vava ni volavola e rua na taro mai na lesoni sa oti ka kerei ira na cauravou mera sauma mai.
Kerea e dua na cauravou me talanoataka e dua na ka a cakacakataka vagumatua me taura se rawata. Na solibula cava a gadrevi me cakava? Na cava a vakila ni sa rawata na nona inaki? Na cava a vulica mai na veika sa sotava?

Vulica vata

Na itaviqaravi yadua e ra ena vukei ira na lewe ni kuoramu me ra kila vakavinaka kina na yaga ni cakacaka. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

Vola na taro “Na cava beka au sa vulica?” “Na cava beka e bibi kina?” kei na “Cava beka au rawa ni cakava?” ena vava ni volavola. Solia e dua na ilavelave ni Me iSakisaki ni iTabagone kivei ira yadua na cauravou ka lesi ira yadua mera wilika e dua na parakaravu ena iwasewase “Cakacaka ka Bula Rawati Koya Sureti koya me vulica na parakaravu oqo ka vakavakarau me mai sauma e tolu na taro e tiko ena vava ni volavola. Wasea e dua na ka o a sotava ena nomu bula ka vakavulica vei iko na bibi ni cakacaka.
Lesi ira yadua na cauravou mera wilika e dua vei ira na ivolanikalou ka vakaturi tiko ena ituvatuva oqo. Kerei koya me lako mai cake ka wasea (a) na veika sa vulica mai na ivolanikalou oqo, (b) na cava e bibi kina, kei na (c) ivakaraitaki e sa raica o koya e vakaraitaka tiko na veika sa vakavulica na ivolanikalou.
Na kuoramu me wilika vata na Maciu 25:14–30. Vakatura mera makataka na parakaravu e tukuna tiko na cakacaka kei na icavacava ni cakacaka ka wirina na malanivosa e tukuna tiko na vucesa kei na icavacava ni tawa cakacaka. Sureti ira na cauravou mera wasea na veika era sa raica kei na gauna era a cakacakataka vakaukauwa kina e dua na ka. Na cava beka na icavacava ni nodra sasaga?
Wilika na iwasewase “Na iMatai ni iVakavuvuli: Cakacaka” mai na vosa nei Dieter F. Uchtdorf “Rua na iVakavuvuli Baleta na Draki ni Bula Kecega.” Kerei ira na cauravou mera digitaka e dua na malanivosa mai na vosa oqo e ka vinaka mera nanuma tiko se wilika ena veisiga me vakauqeti ira ena nodra sasaga ni cakacaka. Vakaraitaka na vidio “A Work in Progress” ka kerei ira na cauravou mera vakasaqara na ivakaraitaki a vakavulica tiko o Peresitedi Uchtdorf. Na cava e rawa ni ra vulica me baleta na cakacaka mai na ivakaraitaki nei Tyler? Era na vakayacora rawa vakacava na veika a cakava mera rawata kina na nodra lalawa?

Kerei ira na cauravou mera wasea na veika era sa vulica nikua. Na cava era sa bau vakila se nanuma? Era sa kila vakavinaka tiko beka na vuna e bibi kina na cakacaka? E tiko tale beka eso na nodra vakatataro? Ena yaga beka me na tauri vakalevu na gauna ena iulutaga oqo?

Me Veivuke ena Veivakavulici

“Dau taroga na taro e gadrevi kina vei ira na lewenikalasi mera kunea mai na kena isau mai na ivolanikalou kei na nodra ivakavuvuli na parofita edaidai” ( Veituberi, Me iLutua Ni Noda Bula [1999], 70).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na veika sa vakauqeti kina me cakava vakayavutaki ena veika a vulica nikua.
Wasea ki na kuoramu na gagadre e tiko ena tabanalevu sa raica rawa o bisopi ka tuvai e dua na itaviqaravi ni kuoramu me sotavi na gagadre o ya.