Na cava na ibalebale me da bula rawati keda?

Ena gauna eda sa bula rawati keda kina, eda na vakayagataka na veivakalougatataki kei na gugumatua sa solia vei keda na Kalou meda vukei keda kina kei na noda matavuvale ka kunea na iwali ni noda leqa. Ni da sa bula rawati keda, eda sa na rawa ni veiqaravi ka vukei ira vakalevu cake na tamata. E gadrevi keda na Turaga meda bula rawati keda vakayalo ka vakayago talega.

Mo vakarautaki iko vakayalo

Na cava na ibalebale ni ka oqo vei iko? O sa vakalougatataki vakacava kei na nomu matavuvale ni dou bula rawati kemudou?

Na cava e gadrevi kina me ra vulica na cauravou mera bula rawati ira? Na veivakauqeti cava e rawa ni tarova mera bula rawati ira kina? Ena vukei ira vakacava na nodra bula rawati ira tiko mera vorata rawa kina na veigauna dredre? Ena vakalougataka vakacava na nodra matavuvale mai muri?

Ni ko vulica na ivolanikalou oqo kei na ivurevure tale eso, mo vakasaqara na veidusimaki ni Yalotabu mo kila na sala mo vakavulica kina vei ira na cauravou na kena bibi mera bula rawati ira.

Maciu 25:1–13 (Na vosa vakatautauvata ni tini na goneyalewa)

Luke 2:52 (E tubu cake o Jisu ena vuku, ena yagona, ka sa taleitaki Koya na Kalou kei ira na tamata)

1 Timoci 5:8 (Na tamata yadua me qaravi koya vakaikoya)

V&V 83:2, 4 (O ira na tagane me qaravi ira na watidra; o ira na itubutubu mera qaravi ira na luvedra)

Henry B. Eyring, “ Na Vakavakarau Vakayalo: Tekivu Kusarawa ka Tudei,” Ensign se Liaona, Nove. 2005, 37–40

“Na Matavuvale: Ai Vakaro ki Vuravura Raraba,,” Ensign se Liaona, Nove. 2010, 129

“Rawati Koya Vakaikoya,”Tudei ena Vakabauta(2004), 129–30

“Bula Rawati Koya,” iVoladusidusi 2: Veiqaravi ena Lotu (2010), 6.1.1

Robert D. Hales, “Sotavi na Bolebole ni Vuravura Nikua,” Ensign se Liaona, Nove. 2015, 44–47

Vidio: “Becoming Provident Providers”, “Life’s Drama”

Veivakavulici ena ivakarau ni iVakabula

A veivakabauti vei ira na Nona tisaipeli na iVakabula, vakarautaki ira, ka solia vei ira na itavi me ra veivakavulici, veivakalougatataki, ka qaravi ira na tani. Sa Nona inaki me vukea na nodratou saumaki mai ena nodratou veiqaravi vei ira na tamata. Vukei ira na cauravou mera raica ni nodra talairawarawa kei na veiqaravi ena vukei ira mera vakavakarau mera bula rawati ira.

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira mera wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Sureti ira na cauravou mera wasea, vakavulica, ka vakadinadinataka na veika era sotava ni ra vakayacora na veika era sa vulica ena lesoni ni veimacawa sa oti.
Vola na “bula rawati koya” ena vava ni volavola, ka tarogi ira na cauravou na nodra nanuma baleta na bula rawati koya. Solia e dua na gauna mera vakasamataka na ka mera tukuna. Me wilika na kuoramu, na “ Rawati Koya Vakaikoya” ena draunipepa 129–131 ena Tudei ena Vakabauta. Na cava era rawa ni kuria ki na ibalebale ni rawati koya vakaikoya, vakayavutaki ena veika era sa wilika rawa? Tarogi ira na cauravou na veika cava era na cakava oqo mera vakarau bula rawati ira vakataki ira ga kei na gauna era sa na vakawati ka tama kina.

Vulica vata

Na itaviqaravi yadua e ra ena vukei ira na lewe ni kuoramu mera vulica mera bula rawati ira. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

Wasei ira na cauravou ki na ilawalawa eso ka lesia ki na ilawalawa yadua e dua na vakasama oqo ni bula rawati koya: vuli, veika vakailavo, isema vakaveiwekani, kei na igu vakayalo. Sureta na ilawalawa yadua me ra railesuva na iwasewase eso mai na vosa nei Elder Robert D. Hales “Sotavi na Bolebole ni Vuravura Nikua” ka tukuni kina me baleta na ulutaga eso oqo. Kerei ira na cauravou mera digitaka e dua na ka era na cakava me yaco mera bula rawati ira vinaka cake kina ena dua na tikina oqo.
Vola ena veitiki ni pepa eso na ulutaga oqo ka baleta tiko na bula rawati koya: Tiko Bulabula, Vuli, Cakacaka, iLololo e Vale, iLavo, kei na Kaukauwa Vakayalo. Mera na laki taura na cauravou yadua e dua na ulutaga oqo e taleitaka, ka sureti koya me wilika na veika ni ulutaga oqo ena iwasewase 6.1.1 ni iVoladusidusi 2 (draunipepa 38–39). Kerei ira yadua na cauravou mera vakavulica vakalekaleka na kalasi ena veika sa vulica o koya baleta na nona ulutaga, ena kena semati tiko ki na bula rawati koya, kei na cava sa na cakava ena gauna oqo me vakarautaki koya me laki bula rawati koya ena veivanua oqo. Ena rawa vakacava ki na nodra sasaga na cauravou itabagone ena gauna oqo mera vakalougatataka kina na nodra matavuvale ni ra sa na vakawati ka tama ni gone?
Ni bera ni tekivu na soqoni ni kuoramu, sureta e dua se vica na lewe ni kuoramu mera vakavakarau mai mera vakavulica na sala a vakarautaka kina o Kavetani Moronai na nona mataivalu me valuti ira na Leimani (raica na Alama 46–49). Na veika me vakasamataki e rawa ni oka kina na vakavakarau vakayago (raica na Alama 43:18–21, 37–39; 48:8–9), vata kei na vakavakarau vakayalo (raica na Alama 46:11–21, 48:7, 11–13). Na veisau cava a yaco ena vuku ni vakavakarau oqo ena nodra sa taqomaka rawa kina na Nifai na nodra bula, bula galala, kei na matavuvale? Na cava e vakatavulica na ivakaraitaki oqo vei ira na cauravou me baleta na bula rawati ira? Na cava era rawa ni cakava na cauravou ena gauna oqo mera vakarautaki ira ki na bolebole era rawa ni sotava?
Vola na vosa “Vakararavi” ena yasana imawi ena vava ni volavola kei na vosa “Bula rawati iko” ena yasana imatau. Kerei ira na cauravou me ra vakamacalataka na ibalebale ni rua na vosa oqo (kevaka era gadreva na veivuke, vagolei ira ki na draunipepa 184--85 ni Tudei ena Vakabauta). Kerea me ra vola na sala eso era tiko vakararavi kina kei na sala era bula rawati ira kina. Na cava e vinakata kina na Turaga meda bula rawati keda tiko? Vakaraitaka na vidio “Becoming Provident Providers” (se sureti ira na cauravou me ra wilika na italanoa e tiko ena vosa nei Elder Robert D. Hales “ Becoming Provident Providers Temporally and Spiritually”). Kerei ira na cauravou me ra raica na veika e vakavulica o Elder Hales baleta na sala me ra bula rawati ira kina, ka vola na nodra isau ni taro ena vava ni volavola. Tarogi ira na cauravou na ivakarau kei na iwalewale cava e dodonu me ra sa tauyavutaka tiko ena gauna oqo me rawa ni ra qarava kina na nodra matavuvale mai muri. Na ivakarau cava e dodonu me ra dau levea? Me tiki ni veitalanoa oqo, e rawa ni o vakaraitaka na vidio “Life’s Drama” se sureti ira na cauravou me ra wilika nai ka tolu ni parakaravu ena vosa nei Elder Hales.
Wasei ira vakayarurua se vakailawalawa lalai na cauravou. Lesia ki na ilawalawa yadua e dua na ivolanikalou me baleta tiko na bula rawati koya, me vakataka era tiko ena ituvatuva oqo. Sureti ira na cauravou mera wilika na nodra ivolanikalou ka cakava e dua na Posita (Momanadi) baleta na bula rawati koya. Sa rawa mo vakaraitaka e dua na ivakaraitaki ni Posita (Momanadi) mai na New Era se Liaona. Solia na madigi vei ira na cauravou mera wasea ki na kuoramu na nodra Momanadi.
Tarogi ira na cauravou na cava era na cakava vata kei ira na nodra matavuvale mera vakavakarau ki na dua na tavuki ni draki (me vakataka na uneune se cagilaba). Me wilika na kalasi, na imatai ni tolu na parakaravu ni vosa nei Peresitedi Henry B. Eyring “Na Vakavakarau Vakayalo: Tekivu Kusarawa ka Tudei.” Na cava eso na “tavuki ni draki vakayalo” se veivakatovolei eda na rawa ni sotava? Na cava e rawa ni da cakava meda vakavakarau kina vakayalo baleta na veivakatovolei oqo? Solia kivei ira yadua na cauravou na vo ni vosa nei Peresitedi Eyring, ka kerei ira mera vakasaqara na isau ni taro oqo. Sureti ira me ra wasea na veika era kunea.

Kerei ira na cauravou me ra wasea na veika era sa vulica nikua. Na cava era sa bau vakila se nanuma? Era sa kila vakavinaka beka na bula rawati ira ka na rawa mera vakamacalataka vua e dua? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea ki na kuoramu na nona ivakadinadina me baleta na bibi me bula rawati koya kei na veika sa vakauqeti kina me cakava ni sa yaga vua na lesoni.
Bolei ira na cauravou lewe ni kuoramu mera cakacaka ena veivakauqeti era vakila ena soqoni ni kuoramu mera bula rawati ira.