Cava na vuna e gadrevi kina me dua na veivakalesui mai?

Ena nona veiqaravi vakalotu ena bula oqo, a tauyavutaka o Jisu Karisito na Nona Lotu kei na lewa ni matabete. Era a liutaka na parofita kei na iapositolo ka ra vakavuvulitaka na ivunau dina ka ciqoma na ivakatakila era volai tu ena ivolanikalou. Ni ra sa mate na iapositolo, sa kau tani kina mai vuravura na dodonu ni matabete, sa mudu na ivakatakila, ka ra yali se tawayaga na ivunau gadrevi. Mai vua na Parofita o Josefa Simici, sa vakalesui tale mai kina na Lotu a mai tauyavutaka o Jisu Karisito.

Mo vakarautaki iko vakayalo

Na revurevu cava soti ni Vukitani o sa raica e vuravura? Sa vakalougatataka beka vakacava na nomu matavuvale na Vakalesui mai ni kosipeli?

Na cava beka era gadreva mera kila na goneyalewa me baleta na Vukitani kei na Veivakalesui mai? E rawa ni vukei ira vakacava beka na nodra kila na Vukitani kei na Veivakalesui mai?

Ni o vakavakarau, vulica ena masumasu na ivolanikalou kei na ivurevure eso oqo .

Emosi 8:11–12; 2 Cesalonaika 2:3; 1 Nifai 13:24–29; Josefa Simici—Ai Tukutuku 1:5–6 (A yali na Lotu ena Vukitani)

Aisea 29:13–14; Cakacaka 3:20–21 (A dau tukuni taumada ena gauna makawa na Vukitani kei na Veivakalesui mai)

V&V 1:17–23, 30 (Sa vakalesuya mai o Jisu Karisito na Nona Lotu mai vua na Parofita o Josefa Simici)

“Vukitani,” “Vakalesui mai ni Kosipeli,” Tudei ena Vakabauta (2004), 199-200, 137–40

D. Todd Christofferson, “Na Vu ni Lotu,” Ensign se Liaona, Nove. 2015, 108–11

Robert D. Hales, “ Vakavakarau me baleta na Vakalesui Mai kei na iKarua ni Lako Mai: ‘Au na Taqomaki iKo Tikoga, ’” Ensign se Liaona, Nove. 2005, 88–92

Vidio: “A Search for Truth,” “The Message of the Restoration”

15:44

2:23

Veivakavulici ena ivakarau ni Turaga

A taroga na iVakabula na taro ka vakavuna na nodra vakanananu ka vakasama vakatitobu o ira era dau muri Koya. Era kila ni lomani ira o Koya, ka ra lomavinaka ni wasea na nodra vakasama kei na veika era nanuma. Ni o vakarorogo ena yalodina ka vakaraitaka na nomu kauwai ena nodra isaunitaro kei na vakasama na goneyalewa, o na vukei ira mera vakila na nona loloma na iVakabula.

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga na nomu vakaiiko mo vakamacalataka kina na lesoni ni macawa oqo:

Vola na ivakamacala eso ena vava ni volavola: “Vuki tani mai na ivakavuvuli dina ni kosipeli” ka “Vakalesuya tale e dua na ka ki na kena itutu se ituvaki makawa.” Vakarautaka e va na tiki ni pepa ena veimalanivosa se idusidusi vakaivolanikalou oqo: Vukitani, Vakalesui mai, Aisea 29:13, kei na Aisea 29:14. Solia vei ira na goneyalewa yadua e dua na tiki ni pepa, ka kerei koya me vakasotara vata kei na dua na ivakamacala ena vava ni volavola.
Kerei ira yadua na goneyalewa mera vola e dua na kena isau ni taro “Na cava na vuna e gadrevi kina me dua na veivakalesui mai?” Sokumuna na nodra isaunitaro, ka veivosakitaka vakalasi.

Vulica vata

Na veitaviqaravi yadua e ra e rawa ni vukei ira na goneyalewa mera kila na cava na vuna e gadrevi kina na Vakalesui mai ni Kosipeli. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na goneyalewa me ra vakasaqaqara ena vosa nei Elder D. Todd Christofferson “Na Vu ni Lotu,” ka vaqara na vakasama eso me baleta na Veivakalesui mai kei na itavi ni Lotu ena gauna edaidai. E rawa talega mo sureta e vica na goneyalewa me ra vakarautaki ira mai me ra wasea na vuna era vakavinavinakataka kina na Lotu vakalesui mai. Ena veivakadonui nei bisopi, e rawa talega mo sureta mai e dua se qai papitaiso vou ki na nomu kalasi me wasea na nona ivakadinadina me baleta na Lotu kei na kosipeli vakalesui mai.
Vola na vosa Vukitani kei na Veivakalesui mai ena vava ni volavola. Tarogi ira na goneyalewa se cava na ibalebale ni veivosa oqo (raica na Tudei ena Vakabauta,199-200, 137–41). Vola na ivolanikalou e tuvai tu ena ituvatuva oqo, se so tale e rawa ni da raica ena vava ni volavola. Sureti ira na goneyalewa mera wilika yadua ka vakatulewa se na cava e okati ki na Vukitani se Vakalesui mai. Tarogi ira na goneyalewa se na duatani vakacava beka na nodra bula kevaka a sega ni vakalesui mai na kosipeli.
Wasea veimama na kalasi ka kerea e dua na iwase mera vakavuvulitaka na Vukitani kei na kena ikarua me vakavuvulitaka na Veivakalesui mai. Solia vei ira na gauna mera vakavakarau kina ena nodra vakayagataka na Tudei ena Vakabauta kei na ivolanikalou e vakaturi tiko ena ituvatuva oqo. O na vinakata beka mo cakava na ilesilesi eso oqo ena vica na siga ni bera na kalasi.
Vakaraitaka na iyaloyalo ni veika a yaco ena Veivakalesui mai (me baleta eso na kena ivakaraitaki, raica na Gospel Art Book, 90–95). Kerei ira na goneyalewa mera wilika na “Vakalesuimai ni Kosipeli: Vakayacori ni Veivakalesui Mai,” kunei ena Tudei ena Vakabauta (tabana e 137–39), ka vakasotara vata na iyaloyalo kei na veika e yaco. Sureti ira yadua mera wasea me baleta e dua na ka a yaco kei na cava e vakalesui mai kina. Eda sa vakalougatataki beka vakacava ena vuku ni kena sa vakalesui mai na veika oqo?
Solia vei ira yadua na goneyalewa na yaca ni dua na tamata e cavuti ena vosa nei Elder Robert D. Hales “Vakavakarau me baleta na Vakalesui Mai kei na iKarua ni Lako Mai: ‘Au na Taqomaki iKo Tikoga’” (me vakataki William Tyndale, Johannes Gutenberg, kei Martin Luther). Kerei ira na goneyalewa mera wilika se sarava na vosa ka raica se cava a cakava na tamata oqo me vakarautaka kina na vuravura me baleta na Veivakalesui mai. Sureti ira mera wasea na veika era raica. Sa vakamawe beka vakacava ena nodra bula na goneyalewa ena gauna nikua na solibula era a vakayacora na tamata oqo?
Wilika vata vakalasi na Josefa Simici—Ai Tukutuku 1:5–6. Kerei ira na goneyalewa mera cavuta eso na ivunau lasu se vakatikina era sa vakabauta tu nikua na tamata (me vaka oqo, ni sega ni vakayago na Kalou, mera papitaiso na gonelalai, ni da sega ni gadreva ena gauna oqo na parofita, kei na so tale). Kerei ira mera wasea se na rawa ni vukei ira vakacava na dina ni Veivakalesui mai me kua kina na veilecayaki.

Kerei ira na goneyalewa mera wasea na veika era sa vulica nikua. Era sa kila deivaki beka na kena gadrevi me Vakalesui mai na kosipeli? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“E rawa ni o vakaraitaka ni o vakarorogo tiko ena nomu vakaraitaka e dua na ivakaraitaki ni kauwai. E rawa ni o raici koya e vosa tiko ka sega ena iyaragi ni nomu lesoni se so tale na ka ena rumu. E rawa ni o vakauqeti koya e vosa tiko me vakacavara na nona vosa ka me kua ni vakataotaki. E rawa ni o levea na silima na gaunidali ena ivakasala se vakatulewa” (Veituberi, Me iLutua ni Noda Bula [1999], 66).

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Cakava e dua na ituvatuva ni veivakalougatataki era sa ciqoma ni sa vakalesui mai na kosipeli ka wasea na nodra ituvatuva vata kei na nodra matavuvale.
Vola ena nodra ivolaniveisiga na veika era na cakava mera vukea kina na nodra matavuvale, ena gauna oqo kei na veisiga ni mataka, ka ciqoma na veivakalougatataki ni kosipeli vakalesui mai.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica mai na lesoni oqo.