Na cava na Veisorovaki i Jisu Karisito?

Na Veisorovaki sai koya na isoro a cabora o Jisu Karisito me rawa kina ni da vakadruka na ivalavala ca, na meca, kei na mate. Na nona isoro ni veivakaduavatataki o Jisu a yaco ena Were mai Kecisemani kei na kauveilatai mai Kalivari. A sauma o Koya na isau ni noda ivalavala ca, soli Koya me mate, ka vakaturicake tale. Na Veisorovaki sai koya na ivakaraitaki cecere duadua ni nodrau loloma na Tamada Vakalomalagi kei Jisu Karisito.

Mo vakarautaki iko vakayalo

Sa ka bibi duadua ena itukutuku makawa ni kawatamata na Veisorovaki. Na cava na isoro ni veivakaduavatataki nei Jisu Karisito? Na cava na ibalebale ni Veisorovaki vei iko?

Na cava era kila na goneyalewa me baleta na veika a yaco ena Were mai Kecisemani kei na kauveilatai? Na cava e rawa ni ra kila mai na ivolanikalou me vakatitobutaka na nodra ivakadinadina ni Veisorovaki i Jisu Karisito? Na cava e rawa ni ra vakavuvulitaka vakataki ira?

Na ivolanikalou kei na vosa cava soti ena vukei ira na goneyalewa me ra vakila na bibi ni Veisorovaki ka kila na isoro a cabora na iVakabula ena vukudra?

Maciu 26–27 (Mai Kecisemani ka vakakina ena kauveilatai, a sauma kina o Jisu Karisito na isau ni noda ivalavala ca ka colata ko Koya na noda mosi)

Maciu 28:1–10 (vakadruka o Jisu Karisito na mate ena Nona Tucaketale)

2 Nifaii 9:6–16 (Vakadruka o Jisu Karisito na ivalavala ca kei na mate ena Nona Veisorovaki)

Alama 7:11–13 (Sa colata o Jisu Karisito na noda mosi, tauvimate, malumalumu, kei na ivalavala ca)

Russell M. Nelson, “Vagoleya Mai na Mana nei Jisu Karisito ki na Noda BulaEnsignse Liahona, Me 2017, 39.

“Se Bula Na Karisto : Nodra Ivakadinadina Na Kuoramu Le Tinikarua” Ensign, Epe. 2000, 2–3 (raica talega Tudei ena Vakabauta, 87–89; Torocake Yadudua, 102)

Carole M. Stephens, “Na Dau ni Veivakabulai,” Nove. 2016, Ensign se Liaona 9-12

Linda K. Burton, “E Volai Tu Beka e Yaloda na Vakabauta ni Veisorovaki i Jisu Karisito?” Ensign se Liaona, Nove. 2012

“Veisorovaki i Jisu Karisito,” Tudei ena Vakabauta (2004), 170–176

Vidio: “An Apostle’s Easter Thoughts on Christ”, “Face to Face with President Eyring and Elder Holland: What is the Atonement of Jesus Christ, and how can I receive its blessings?”

Veivakavulici ena ivakarau ni Turaga

A vakayagataka na ivolanikalou na iVakabula me vakavuvulitaka kina na Nona veiqaravi vakalotu. E vakavuvulitaka vei ira na tamata me ra dau vakasamataka vei ira na ivolanikalou. Na cava e rawa ni o cakava mo vukei ira na goneyalewa me ra vakayagataka na ivolanikalou me ra kila kina na Veisorovaki i Jisu Karisito?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nanuma ga eso na nomu mo vakamacalataka kina na lesoni ni macawa oqo:

Sureti ira na goneyalewa me ra raitayaloyalotaka ni lako mai lotu e dua na nodra itokani mai na dua tale na vakabauta ka rogoca e dua ni cavuta na Veisorovaki i Jisu Karisito. Era na sauma vakacava kevaka e taroga na nodra itokani, “Na Cava na Veisorovaki i Jisu Karisito?”
Vakaraitaka e dua na iyaloyalo ka tu kina e dua na ka a yaco ena Veisorovaki (me vaka na Nona vakararawataki na iVakabula ena Were mai Kecisemani, Nona Vakamatei ena Kauveilatai, se na Nona Tucaketale), ka kerei ira na goneyalewa me ra wasea na veika era kila me baleta na ka oqo. Na cava beka era lomatarotarotaka tiko?

Vulica vata

Na itaviqaravi yadua e ra e rawa ni vukei ira na goneyalewa me ra vulica me baleta na Veisorovaki i Jisu Karisito. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na goneyalewa me ra railesuva tale na vosa nei Peresitedi Russell M. Nelson “Vagoleya Mai na Mana nei Jisu Karisito ki na Noda Bula” ka qai vaqara na tikini ivolanikalou era oka kina na veika e vakayacora na iVakabula. Na cava eda sa vulica baleta na sakaramede mai na serenilotu oqo? Na ivakasala cava e solia o Peresitedi Nelson me vukei keda me baleta na kena kau mai ki na noda bula na kawakawa ni iVakabula? Sureti ira na goneyalewa me ra vakasamataka eso na sala era rawa ni ciqoma kina na veibolei a cakava o Peresitedi Nelson vei ira na itabagone qasecake ena Lotu. Sureti ira na goneyalewa me ra yalayala kina veika era sa digitaka me ra cakava. Tuva me dua tale na gauna mai liu me ra na wasea na veika era sotava ena nodra vulica me baleta na iVakabula.
Kerei ira na goneyalewa me ra vakasotara vata e dua na ka e yaco ena iotioti ni vica na auwa ni nona bula na iVakabula kei na idusidusi eso ni ivolanikalou ena Maciu 26–28. Na cava era vulica rawa na goneyalewa me baleta na iVakabula kei na Nona Veisorovaki mai na veika a yaco oqo? Sureta e vica na lewe ni kalasi me ra wasea na nodra nanuma me baleta na iVakabula.
Sureti ira yadua na goneyalewa me ra wilika e dua na ivakavuvuli ni Veisorovaki mai na vosa nei Linda K. Burton “E Volai Tu Beka e Yaloda na Vakabauta ni Veisorovaki i Jisu Karisito?” Kerei koya me raica e dua ena kalasi a wilika na ivakavuvuli vata oya, ka sureti ira me ra veivosakitaka na veika era sa vulica ka wasea e dua na kena ivakaraitaki mai na nodra bula se nodra bula o ira na tamata era veikilai ka vakaraitaka na ivakavuvuli. Kerea e dua mai na veisa yadua me ra wasea vei ira na vo ni kalasi na veika erau sa veivosakitaka.
Tarogi ira na goneyalewa na cava era vulica me baleta na iVakabula kei na Veisorovaki mai na iotioti ni Nona malanivosa ena kauveilatai (raica na Luke 23:34, 39–43, 46; Joni 19:26–30).
Sureti ira na goneyalewa me ra wilika na 2 Nifai 9:6–26 se sarava e dua se sivia na iyaloyalo ni vidio ena idusidusi oqo ka vakarogoca na veika era sa vulica me baleta na kena gadrevi na Veisorovaki i Jisu Karisito. Solia na gauna vei iratou e vica na goneyalewa me ratou wasea na tikina eratou digitaka kei na veika eratou vakavulica. Vakauqeti iratou me ratou vola e dua na ivola vua e dua e sega ni vakabauta na Kalou ka vakayagataka na veitikina oqo me vakamacalataki kina na vuna e bibi kina na Veisorovaki kei na vuna eda gadreva kina e dua na iVakabula. Kerei ira me ra veiwaseitaka na nodra ivola.
Kerei ira na goneyalewa me ra tuva ena papanivolavola eso na veivakatovolei, na bolebole, se na tauvimate era dau sotava na tamata. Sureti ira me ra wilika na Alama 7:11–13kei na vei tikina digitaki mai na vosa nei Sister Carole M. Stephen Na Dau ni Veivakabulai.” Na cava era vulica na goneyalewa me baleta na Veisorovaki mai na ivurevure eso oqo? Eda na rawata vakacava na kaukauwa ni Veisorovaki me vukei keda ena gauna ni veivakatovolei (raica na Mosaia 24:12–14) Kerei ira na goneyalewa me ra vakasamataka na sala eso e rawa ni ra wasea kina na veika era sa vulica me baleta na Veisorovaki me veivuke ena veivakatovolei era sa tuva tu ena papanivolavola.

Kerei ira na goneyalewa me ra wasea na veika era sa vulica nikua. Era sa kila vakavinaka cake beka na Veisorovaki? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vola ena nodra ivolaniveisiga na veika era kila kei na veika era nanuma me baleta na Veisorovaki. Ena loma ni macawa, e rawa ni ra vakasamataka na sala e vakalougatataka kina na nodra bula na Veisorovaki ka vola na nodra nanuma ena nodra ivolaniveisiga.
Wasea na veika era vulica kei na dua na lewe ni matavuvale se itokani.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina me ra vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.