Na sala cava e gadreva na Tamada Vakalomalagi meu vakayagataka kina na noqu isolisoli vakayalo?

Na isolisoli vakayalo era sa veivakalougatataki se rawa-ka e soli mai ena kaukauwa ni Yalo Tabu. Me vaka ni da sa luvena na Tamada Vakalomalagi, sa tu vei keda taucoko na isolisoli vakayalo. Sa solia vei keda na Kalou na isolisoli oqo meda na qaravi ira kina na tamata ka tara cake kina na Nona matanitu. Sa vakaroti keda o Koya meda vakasaqara yani vagumatua ka vakatorocaketaka na noda isolisoli vakayalo.

Mo vakarautaki iko vakayalo

Na isolisoli vakayalo cava e tiko vei iko? Era sa vakalougatataki iko vakacava kei ira na tamata? E sa vakalougatataki iko vakacava na nodra isolisoli vakayalo eso tale na tamata? O sa kila vakacava na nomu isolisoli vakayalo?

Na cava e bibi kina vei ira na goneyalewa mera kila tiko na nodra isolisoli vakayalo? Ena vukei ira kina vakacava oqo mera vakavakarau ki na nodra itavi, itikotiko, kei na matavuvale ena veisiga ni mataka?

Na ivolanikalou cava kei na ivurevure tale eso ena vukei ira na goneyalewa mera kila vakavinaka na isolisoli vakayalo kei na sala e vinakata na Tamada Vakalomalagi mera vakayagataki kina?

1 Korinica 12:3–27; Moronai 10:8–18; V&V 46:13–25 (iVakaraitaki ni isolisoli vakayalo)

V&V 46:8–10 (Na cava e soli kina vei keda na isolisoli vakayalo)

V&V 46:11–12 (E soli ki na tamata kecega na isolisoli vakayalo)

Yavu ni Vakabauta 1:7 (Eda vakabauta na isolisoli vakayalo)

Henry B. Eyring, “ Vukei Ira Mera Dau Ta iCake,” Ensign se Liaona,, Nove. 2012, 60–67

“ iSolisoli Vakayalo,” Tudei ena Vakabauta (2004), 26–28

“Na iSolisoli ni Yalo Tabu,” Ai Vakavuvuli Talei (2009), 121–24

Video: “Extraordinary Gift” “With All Your Heart”

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Vola oqo ena vava ni volavola: Na cava beka na isolisoli vakayalo? Meu na kila vakacava na noqu isolisoli vakayalo? Na sala cava e gadreva na Tamada Vakalomalagi meu vakayagataka kina na noqu isolisoli vakayalo? Sureti ira na goneyalewa me ra vakatututaka na kena isau ni veitaro oqo. Sureti ira mera vakasaqara na ikuri ni veivakararamataki ena gauna ni lesoni.
Kauta mai ki na kalasi e dua na ioloolo iloloma ka me tiko e loma e dua na tiki ni pepa e volai toka kina na “Vunau kei na Veiyalayalati 46:8.” Sureti ira na goneyalewa mera raitayaloyalotaka se cava mada e tiko e loma ni ioloolo. Kerea e dua vei ira me cereka na ioloolo ka wilika na ivolanikalou. Na cava beka na “isolisoli vinaka”? Vakayaloqaqataki ira na goneyalewa mera vakasamataka na taro oqo ena gauna ni lesoni.

Vulica vata

Na itaviqaravi kece e koto oqo e ra ena vukei ira na goneyalewa mera vulica na veisolisoli ni Yalotabu. Mai na veivakauqeti ni Yalotabu, digitaka e dua se sivia ka na vinaka duadua ki na nomu kalasi:

Vola ena vava ni volavola e tolu na taro oqo: Na cava e soli kina vei keda na isolisoli vakayalo? O cei e soli vua na isolisoli vakayalo? (raica na V&V 46: 9). Na cava eso na ivakaraitaki ni isolisoli vakayalo? Lesia na goneyalewa yadua e dua vei ira na ivolanikalou ena ituvatuva oqo ena vukea me saumi kina na taro oqo. Kerei koya me vulica na ivolanikalou ka wasea na kena isau sa raica rawa. O cei vei ira na isolisoli oqo e tiko vei ira na goneyalewa? Na isolisoli cava era vinakata me tiko vei ira? (Kevaka e dua vei ira na goneyalewa sa ciqoma oti na nona veivakalougatataki vakapeteriaki, vakatura mera qai wilika e muri na nodra veivakalougatataki mera raica kina na isolisoli vakayalo cava sa soli tu vei ira.) Sureti ira na goneyalewa mera wasea na sala era nanuma ena vukei ira ena gauna oqo na isolisoli vakayalo kei na nodra itavi kei na ilesilesi ena veisiga ni mataka.
Sureti ira na goneyalewa mera wilika na isolisoli vakayalo ena 1 Korinica 12:8–10; Moronai 10:9–16; se Vunau kei na Veiyalayalati 46:13–25 ka raica e dua na isolisoli era gadreva mera vulica vakalevu cake. Solia na gauna mera vulica na isolisoli era sa digitaka ena nodra vakayagataka na ivurevure me vakataka “Na iSolisoli ni Yalo Tabu” ena Ai Vakavuvuli Talei (draunipepa 121–24), “iSolisoli Vakayalo” ena Tudei ena Vakabauta (draunipepa 26–28). Kerei ira mera wasea na veika era sa raica. Ena rawa ni veivuke vakacava na isolisoli oqo me tarai cake kina na matanitu ni Kalou?
Kerei ira na goneyalewa mera vola na isolisoli ni Yalotabu era kila tu (kevaka era gadreva na veivuke, vagolei ira ki na ivolanikalou e vakaturi tiko ena ituvatuva oqo). Kerei ira na goneyalewa mera wasea na ivakaraitaki era raica ni ra vakayagataka na tamata e dua vei ira na isolisoli oqo mera vakalougatataka kina na nodra bula na tamata eso. Na cava tale eso na “isolisoli lalai ” era rawa ni vakasamataka na goneyalewa? Wasea na ivakaraitaki eso ni isolisoli vakayalo o sa raica vei ira yadua na goneyalewa ena kalasi.
Sureti ira na goneyalewa mera raicalesu na isolisoli vakayalo ena draunipepa 26–28 ena Tudei ena Vakabauta ka digitaka e dua se sivia e gadreva mena vakatorocaketaka. Kerei koya me vakamacalataka na vuna e digitaka kina na isolisoli o ya. Eda na vakatorocaketaka vakacava na isolisoli vakayalo? Sureti ira mera wasea na veika era sa vulica.
Vakaraitaka e dua na vidio ena ituvatuva qo ka sureti ira na goneyalewa me ra vakasamataka ka wasea e dua na taledi se isolisoli era raica vei ira yadua na lewe ni kalasi (raica me wasei na veika vinaka e tu vei ira na goneyalewa yadua). Sureti ira mera wilika na Maciu 25:14–30, se sureta e dua na lewe ni kalasi me tokaruataka na vosa vakatautauvata ni taledi. E semati vakacava na vosa vakatautauvata oqo ki na isolisoli sa solia vei keda na Kalou? Na ivakarau cava e rawa ni da vakayagataka kina na noda taledi me da veiqaravi vei ira na tani ka vakayacora vakavinaka na noda itavi? Sureti ira na goneyalewa mera vola na nodra vakanananu, ka kerea e lewe vica vei ira mera wasea na veika era vola vata kei na kalasi.

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila vakavinaka cake beka na isolisoli vakayalo? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Masu vagumatua mera kila vakavinaka na nodra dui isolisoli vakayalo ka vakasaqara mera vakayagataka ena vukudra na tamata.
Vakacavara na Yavunilewa ni Keda Yaga Yadua 7 mai na Torocake Yadudua.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.