Lako mai, Mo Muri Au
Ena rawa vakacava meu marama dauveiqaravi vinaka cake?

Ena rawa vakacava meu marama dauveiqaravi vinaka cake?

Mo Vakarautaki Iko Vakayalo

Me vaka na veika kecega, o Jisu Karisito sa noda ivakaraitaki uasivi duadua ni veiqaravi. Ena Nona veiqaravi, a tarai ira yani na tamata yadua, sotava na leqa vakayago kei na leqa vakayalo, ka vakaraitaka na loloma dina vei ira na tamata kecega. Ni da tisaipeli i Jisu Karisito, eda sa sureti me da veiqaravi me vakataki Koya, vakauasivi vei keda eda sa kerei me da marama dauveiqaravi ena vukudra. E rawa ni da lomani ira, vakatawai ira, ka vaqaqacotaki ira oqo me vakataki Karisito. E dui tu noda taledi ka rawa ni vukea noda veiqaravi. Ni da goneyalewa ena Lotu, sa dua noda itavi bibi ena kena rawati na “tawamate rawa kei na bula tawamudu ni tamata” (Mosese 1:39).

Na iVurevure Eso me Vukea na Nomu Vakavakarau

Na ivurevure eso oqo me vukea nomu vakavakarau ki na iwasewase ni “Vuli vata” ena soqoni.

Veitaro me Tugani ni bera ni Ko Veivakavulici

Na cava o sa cakava mo vakatotomuria kina na ivakaraitaki ni iVakabula ena nomu itavi vakamarama dauveiqaravi? Sa vakalougatataka vakacava nomu bula kei na nodra o ira o qarava na veiqaravi oqo? Na cava o rawa ni wasea vei ira na goneyalewa me baleta na veika o sa sotava?

Na cava beka era nanuma na goneyalewa baleta na marama dauveiqaravi? Na cava era sotava oti e rawa ni ra veiwasei kina vakaiira?

Na cava e rawa ni ra cakava na goneyalewa me ra vakavakarau ki na vuli? Me ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na ulutaga oqo.

Me Kilai: Ena vakarautaki ni lesoni oqo, sa rawa mo kerei ira na lewe ni kalasi era dauveiqaravi me ra sureti ira na nodra itokani dauveiqaravi me ra tiko ena soqoni ni kalasi oqo ka vakaitavi ena veivosaki baleta nodra yaco me marama dauveiqaravi vinaka cake.

Veivakavulici ena iVakarau ni iVakabula

Ena veigauna kece sara, sa dauivakaraitaki ka daunivakasala uasivi sara vei ira e dau vakavulici ira na iVakabula. Era na vuli vakacava ena nomu ivakaraitaki na goneyalewa—vakakina na nodra ivakaraitaki na marama tale eso—ena nodra segata mera vakayacora na nodra itavi vakamarama dauveiqaravi Vakarisito?

iTuvatuva ni Soqoni

1. Veivakasalataki Vata ka Wasea na Veika e Sotavi

Veiliutaki kina e dua ena mataveiliutaki ni kalasi; me rauta e 5–10 na miniti

Liutaka e dua na veivosaki me baleta na veika oqo:

  • Noda kalasi: O cei e yali tiko nikua? Na veisiko cava so eda gadreva me caka? O cei e dodonu me da sureta ki na itaviqaravi mai oqo? O cei e gadreva na noda veivuke kei na masu?

  • Noda itavi: Na ilesilesi cava so sa gadrevi me da cakava? Na ilesilesi cava soti eda sa vakayacora rawa? Eda a sureti ira vakacava na tani mera lako mai vei Karisito, ka da na sureti ira vakacava eso tale ena gauna oqo?

  • Noda bula: Vakananuma ki na kalasi na veivosaki ni soqoni sa oti. Na veika cava eda sa sotava ni da vakayacora na veika eda sa vulica? Na cava so eda sa sotava ena vica na macawa sa oti e sa vaqaqacotaka na noda ivakadinadina ni kosipeli?

Ke rawa, veivosakitaka taumada na veika oqo ena dua na bose ni mataveiliutaki ni kalasi.

2. Vulica Vata

Veiliutaki kina e dua na iliuliu se qasenivuli se lewe ni kalasi; me rauta e 25-35 na miniti

Ni o vulica oti na ivurevure eso e cake ka muria na veivakauqeti ni Yalo, e rawa mo digitaka e dua se sivia na itaviqaravi e ra me vukea nodra kila na lewe ni kalasi na ivunau.

  • Na cava beka na ibalebale ni vosa veiqaravi vei ira na goneyalewa o vakavulica? Me kilai, sa rawa mo vola ena papa ni volavola na Veiqaravi ka sureti ira na goneyalewa me ra vola wavokita na vosa era veiwekanitaka vata kei na veiqaravi. Sa rawa me ra vakasaqara na vosa se malanivosa me ikuri ni veika era sa vola mai na ivolanikalou vakaoqo: Maciu 25:34–40; Luke 10:25–37; 2 Nifai 25:26; Mosaia 18:8–9; 3 Nifai 18:25; kei na Vunau kei na Veiyalayalati 81:5. Na cava era sa vulica mai na veitikina oqo me baleta na veiqaravi? Sa rawa mo kerei ira na goneyalewa me ra wasea na ivakaraitaki eso ni veiqaravi era sa raica. Na cava era rawa ni cakava na goneyalewa mera vukea nodra toro voleka vei Karisito na tamata?

  • Kerei ira na goneyalewa me ra veisa yarua ka wilika na 3 Nifai 17, ka vaqara na veika era vulica mai vua na iVakabula ka rawa ni vukei ira ena itavi vakamarama dauveiqaravi Qai sureti ira na veisa me ra wasea na veika era sa vulica. Me vaka beka oqo, a veiqaravi “yadudua vakacava” na iVakabula? Na gagadre cava soti a veiqaravi kina o Koya?

  • Ena macawa ni se bera na kalasi, sureti ira na goneyalewa me ra sikova na ministering.lds.org ka vaqara e dua na ka ena uqeti ira me ra Vakarisito vakalevu cake ena nodra itavi vakamarama dauveiqaravi ka vakarau mai me ra wasea na veika era sa kunea. Na cava era sa sotava na goneyalewa ka rawa ni ra wasea ena nodra sa raica na veivakalougatataki era vakayacora na marama dauveiqaravi ena nodra bula eso?

  • Kerei ira na goneyalewa me ra wilika na Mosaia18:8–9 ka veivosakitaka na veika e vakavulica baleta noda itavi ni veiqaravi vei ira era tu wavoliti keda. Vakasamataka mo sureta na bisopi se dua ena mataveiliutaki ni iSoqosoqo ni Veivukei me tukuna vei ira ena kalasi na ivakarau me da muria kina na ivakaraitaki nei Karisito ena nodra qaravi na lewe ni tabanalevu. E rawa vei ira na goneyalewa me ra vakananuma rawa tiko e so na taro mera taroga vei ira na iliuliu oqo me baleta na veiqaravi. Sureti ira na goneyalewa me ra navuca me vakavinakataki nodra sasaga ni veiqaravi vei ira ena tabanalevu.

  • Kerei ira yadua na goneyalewa me ra wilika e dua na italanoa mai na itukutuku nei Elder Jeffrey R. Holland ena “Tiko Vata kei Ira ka Vakaukauwataki Ira” se na itukutuku nei Sisita Jean B. Bingham ena “Veiqaravi me Vakataka na iVakabula.” Kerei ira yadudua na goneyalewa me ra mai tu ena mata ni kalasi, tukuna tale na italanoa ena nona vosa ga vakaikoya, ka wasea na ka e vakatavulica baleta na ivakarau ena rawa kina me marama dauveiqaravi vinaka cake. Na cava tale beka e uqeti ira na goneyalewa ena itukutuku oqo?

  • Wasea vakarua na kalasi, ka kerea na ilawalawa ruarua me cakava e dua na ituvatuva ni ivakarau e rawa ni vinaka cake kina na nodra itavi vakamarama dauveiqaravi. Ni oti e vica na miniti, sureta e dua na ilawalawa me vakuria nodratou ituvatuva mai na itukutuku nei Peresitedi Russell M. Nelson ena “Veiqaravi ena Kaukauwa kei na Lewa ni Kalou.” Sureta na ilawalawa kadua me ra vakuria ki na nodra ituvatuva eso na vakasama mai na itukutuku nei Sister Bonnie L. Oscarson ena “Era Cakacaka na Goneyalewa.” Kerea vei ira ena ilawalawa me ra wasea nodra ituvatuva, ka vakayaloqaqataka na goneyalewa yadudua me ra digitaka e dua na ka mai na ituvatuva era na cakava.

3. Tuva mo Cakacaka

Veiliutaki kina e dua na lewe ni mataveiliutaki ni kalasi; me rauta e 5–10 na miniti

  • Kerei ira na goneyalewa me ra veivosakitaka e dua na ka era a vakila se vakauqeti kina ena gauna ni soqoni. Na cava a vakaibalebale vei ira? E dua beka na ka era rawa ni cakava vakataki ira se vakalasi me cakacakataki kina na ka era sa vulica?

  • Solia e vica na miniti vei ira na goneyalewa mera vola na ka era na cakava ena macawa veitaravi me cakacakataki na veika era sa uqeti kina. Sureti ira me ra wasea na nodra vakasama.

  • Vakananuma vei ira na goneyalewa ni na nodra na madigi me ra wasea na ka era sa sotava ena itekivu ni soqoni ka tarava.