E rawa vakacava meu sureti ira tale eso mera lako mai vei Karisito?

Sa nodra itavi na lewe ni Lotu yadua mera vukei ira na tamata mera lako mai vei Karisito ka ciqoma na veivakalougatataki ni Nona kosipeli vakalesui mai. Na noda ivakadinadina ni kosipeli kei na noda ivakaraitaki vinaka ena rawa ni vakauqeti ira na noda itokani kei ira na tiko tikivi keda mera gadreva ni vulica vakalevu na veika e baleta na iVakabula kei na Nona kosipeli.

Mo vakarautaki iko vakayalo

Na cava o sa sotava ni ko sureti ira tale eso mera lako mai vei Karisito? Na cava eso na sala mana o sa raica mo tukuna kina na kosipeli vei ira na tamata?

Na madigi cava era rawa ni veisureti kina na goneyalewa mera lako mai na tamata kivei Karisito? Na cava soti era sa sotava e rawa ni ra veiwasei kina vakaiira?

Na ivolanikalou kei na ivurevure cava tale eso e rawa ni vakauqeti ira na goneyalewa mera sureti ira tale kina eso mera lako mai vei Karisito?

1 Timoci 4:12 (Mo dua na ivakaraitaki ni vakabauta)

1 Pita 3:15 (Mo dau tu vakarau ni sauma na nodra vakatataro na tamata me baleta na noda vakabauta)

Mosaia 18:9 (Sa lomada dina meda tu ka vakadinadinataka na Kalou)

V&V 28:16; 100:3–8 (Kevaka meda dolava na gusuda, ena vakasinaiti ena veika meda na kaya)

V&V 84:85 (Kevaka meda na maroroya na vosa, ena soli vei keda na veika e dodonu meda kaya)

Neil L. Andersen, “E Dua na iVakadinadina Bula ni Kalou,” Ensign se Liaona, Nove. 2016, 35–38

Dallin H. Oaks, “Wasea na Kosipeli Vakalesui Mai,” Ensign se Liaona, Nove. 2016, 57–60

DavidA. Bednar, “Lako Mai ka Raica,” Ensign se Liaona, Nove. 2014, 107–10

“Cakacaka ni Kaulotu,” ena wase 5 ni Vunautaka na Noqu Kosipeli (2004), 92

Vidio: “Because I Have Been Given Much”, “Face to Face with President Eyring and Elder Holland: How can I share the gospel without offending others?”

Veivakavulici ena ivakarau ni iVakabula

E veisureti na iVakabula kivei ira era muri Koya mera soli ivakadinadina. O na vukei ira vakacava na goneyalewa mera yalovakacegu ni ra dau vakadinadinataka na nodra vakabauta kivei ira era tiko wavoliti ira?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se na nomu nanuma eso mo vakamacalataka kina na lesoni ni macawa oqo:

Me cavuqaqataka na kalasi na itoko ni Goneyalewa. Tarogi ira na goneyalewa era na sauma vakacava ke na taroga e dua na itokani ni dua tale na matalotu, “Na cava na ibalebale ni nomu kaya, ‘Keimami na tu ka vakadinadinataka na Kalou’?”
Sureti ira na goneyalewa mera vakaraitaka na kedra iyaloyalo na daukaulotu tudei mai na nodra matavuvale (se raica na iVola ni iYaloyalo Vakosipeli, 109–10). Kerei ira mera vola na itovo vinaka se ivakarau ni bula e gadreva e dua me na daukaulotu kina. O cei vei ira oqo mera rawata na goneyalewa ena gauna oqo? Vukei ira mera kila deivaki ni sega ni gadrevi mera kacivi mera daukaulotu tudei me qai rawa kina ni ra wasea na kosipeli.

Vulica vata

Na veitavi yadua e ra sa rawa ni vukei ira na goneyalewa mera vulica na iwalewale ni nodra sureti eso tale mera gole mai kivei Karisito. Muria na veivakauqeti ni Yalotabu, ena nomu digitaka e dua se sivia ka na ganita na nomu kalasi:

O ira na goneyalewa o vakavulica tiko era na rere na wasea na kosipeli baleta era nanuma ni ra na sega ni taleitaki mai vei ira na tani. Ena vukei ira me ra sarava na vidio na “Face to Face with President Eyring and Elder Holland: How can I share the gospel without offending others?” [“Veiraici ena Matavotu kei Peresitedi Eyring kei Elder Holland: Ena rawa vakacava meu vukei ira na noqu leweni matavuvale era luluqa tu?”] Na cava era vulica mai vei Peresitedi Eyring kei Elder Holland ka na rawa ni ra vorata kina na vei ka era rerevaka me baleta na kena wasei na kosipeli?
Ni railesuva vakalasi na veika eso ena ituvatuva e rua e rawa ni da cakava me da wasea na kosipeli ena vosa nei Elder Dallin H. Oaks “Wasea na Kosipeli Vakalesui Mai.” Vukei ira na goneyalewa me ra vakasamataka na veigauna eso e rawa ni ra vakayagataka kina e dua se sivia na vakatutu nei Elder Oaks. Kena ivakaraitaki, e rawa ni ra vakatekivuna e dua na veivosaki vakosipeli kei na dua era sega ni veikilai vata ni ra wawa basi tiko ena ikelekele ni basi. E rawa ni ra marautaka na goneyalewa me ra matanataka eso na gauna vaqori.
Kauta mai e dua na ibulibuli dredre ka biuta na tikina taucoko ena dua na ibinibini. Kerea e dua na goneyalewa me tekivu biuta vata na ibulibuli ni ra wilika na vo ni kalasi na ivakatautauvata nei Elder Neil L. Andersen me baleta na ibulibuli ena nona vosa “E Dua na iVakadinadina Bula ni Kalou.” E tautauvata vakacava kei na cakacaka ni kena wasei na kosipeli na iwalewale ni kena biuvata na ibulibuli? Sureti ira na tamata kecega me ra cakacaka vata ena ibulibuli ni o veivosakitaka na sala eso o ni rawa ni cakacaka vata kina vakalasi me baleta na cakacaka ni kaulotu. Me tiki ni veivosaki, e rawa ni o dusia vakatabakidua na iwasewase ni vosa nei Elder Andersen kena ulutaga “Dua na Veisureti Vei Ira na iTabagone.” Ena vukei ira vakacava na goneyalewa na ivakasala kei na bolebole nei Elder Andersen ni ra tuvatuva ka me ra wasea na kosipeli?
Ena nona veivakadonui na bisopi, sureta e dua na lewe ni tabanalevu (kevaka e rawa, me dua vei ira na goneyalewa) ka saumaki mai ki na Lotu me wasea na veika sa sotava ena nona mai vakatakilai ki na kosipeli. A veivakayarayarataki vakacava na nodra ivakaraitaki na Yalododonu Edaidai kivua na itokani ka vakavuna me vakadikeva kina na kosipeli? Na ivakasala cava ena solia vei ira na goneyalewa mera laki sureti ira kina eso tale mera lako mai vei Karisito? Sureti ira na goneyalewa mera taroga na taro cavaga e tiko vei ira. (Me kena ikuri, e rawa ni o vakaraitaka na vidio “Because I Have Been Given Much” ka veivosakitaka na veivakauqeti e rawa ni da rawata ena noda vukei ira na noda itokani me ra ciqoma na kosipeli.)
Vola ena vava ni volavola na idusidusi eso ni volanikalou mai na lesoni oqo. Kerei ira yadudua na goneyalewa mera digitaka e dua na ivolanikalou, vulica, ka droinitaka e dua na iyaloyalo e tukuna tiko na ka e vakavulica na ivolanikalou. Kerei ira na goneyalewa mera wasea na itukutuku ni nodra ivolanikalou, ka yavutaki ena nodra iyaloyalo. Mo qai sureti ira yadua na goneyalewa me wilika na nona ivolanikalou ki na kalasi ka wasea na veika sa tuvana tiko me na laki bulataka.
Ni bera na kalasi, sureta na goneyalewa yadua me kauta mai e dua na iyaya se yaloyalo e matataka e dua na sala e sa vakalougatataka kina na nona bula na kosipeli. Donuya na kalasi, wilika vata na italanoa me baleti rau na luvei Elder David A Bednar tagane ena nona vosa “Lako Mai ka Raica.” Cava na vuna e sa rui guta kina o tacina gone me vadretitaka na ligai nona itokani? Sureti ira na goneyalewa mera wasea na iyaya se yaloyalo eso era kauta mai ka vakamacalataka na veivakalougatataki eso era matataka na iyaya oqo. Vakayaloqaqataki ira mera vakasamataki ira na tamata era kila ka se bera ni ciqoma na veivakalougatataki oqo, ka sureti ira mera tuvatuvaka ni wasea na kosipeli vata kei ira.

Kerei ira na goneyalewa me ra wasea na veika era sa vulica nikua. Era sa kila deivaki beka na sala mera sureti ira kina na tamata mera lako mai vei Karisito? Na cava era sa bau vakila se vakanananu kina? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Masulaka na veimadigi mera wasea kina na kosipeli ka me veivosakitaki ena kalasi e tarava na veika era sa sotava.
Mera kauta voli tu kei ira na kadi veisoliyaki ki koronivuli ka vakasaqara na madigi mera vakayagataka kina ena kena wasei na kosipeli.
Vulica na wase 3 ni Vunautaka na Noqu Kosipeli ka vakavakarau ni vosa vei ira tale eso me baleta na kosipeli vakalesui mai.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica mai na lesoni oqo.