Na cava beka au rawa ni cakava meu vukei ira kina na lewe ni Lotu vou?

Ki na vuqa na tamata, ena rawa ni dua na ibolebole levu mera mai lewena na Lotu. Ena rawa ni oka kina na nodra biuti ira nodra itokani makawa ka veisau ki na dua na ivakarau vou ni bula. O ira yadua na lewe ni Lotu vou era na gadreva na itokani, e dua na itavi, ka susugi cake ena “ivakavuvuli ni Kalou” ( Moronai 6:4). Sa rawa meda vukei ira na lewenilotu vou ena noda vakaitokanitaki ira, veiqaravi vata kei ira, ka wasea vei ira na noda ivakadinadina.

Mo vakarautaki iko vakayalo

Na cava o sa cakava mo vukea na nodra vaqaqacotaki na lewe ni lotu vou? Na cava era cakava eso mera vukei iko ni ko sa papitaiso oti?

E dua beka na goneyalewa ena nomu kalasi e lewe ni lotu vou? Era sa vakamatautaki beka ena ivalavala ni lewe ni Lotu? Era sa vukei ira tiko beka vakacava na goneyalewa?

Na ivolanikalou kei na ivurevure cava eso ena vakauqeti ira na goneyalewa mera vaqaqacotaki ira na lewe ni Lotu vou?

Luke 22:32; Roma 15:1–2; Moronai 6:4–5; V&V 81:5; 108:7 (Vaqaqacotaki ira na wekada Yalododonu)

Joni 21:15–17 (Vakani ira na noqu sipi)

Neill F. Marriott, “Na Cava Meda Cakava?” Ensign se Liaona, Me 2016, 10–12

Neil L. Andersen, “O Koya sa Vinakati Ira, sa Vinakati Au,” Ensign se Liaona, Me 2016, 49–52

Dieter F. Uchtdorf, “Sai Kemudou na Ligaqu,” Ensign se Liaona, Me 2010, 68–75

Vidio: “Missionary Work and Retention: Georgia Elias” “Help New Members Take a Name to the Temple”

Veivakavulici ena ivakarau ni iVakabula

Ni dau vakavulici ira Nona tisaipeli na iVakabula, e dau sauma na nodra vakatataro ka vakarogoca na veika era sotava. E taleitaka vakaidina sara ni ra dau sauma mai na Nona taro, ka dau rekitaka na ivakaraitaki ni nodra vakabauta. Na cava o rawa ni cakava mo vakaraitaka kina na nomu lomana ka taleitaki ira na goneyalewa ena nomu kalasi?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Wilika se wasea na italanoa ena itekivu ni vosa nei Peresitedi Dieter F. Uctdorf “Sai Kemudou na Ligaqu.” Kerei ira na goneyalewa mera wasea na sala cava era nanuma ni ra rawa ni ligana na iVakabula vei ira na tamata eso. Wasea vei ira na goneyalewa na parakaravu ena itekivu ni ituvatuva oqo, ka taroga vei ira na gone yalewa na cava era rawa ni cakava mera sa ligana na iVakabula vua e dua na lewe ni Lotu vou.
Sureti ira na goneyalewa mera vakamacalataka na mataqali yalo e dau yaco mai ena veika vou e sotavi, me vakataka na imatai ni siga ena dua na kalasi, lewena e dua na kalavo se timi, se tekivu ena dua na cakacaka vou. Kerei ira mera veivosakitaka na kena yaco na yalo vakaoqo vei ira na lewe ni Lotu vou. Sureti ira mera wasea na veika era sotava, ni ra lewenilotu vou se veimaliwai kei ira na lewenilotu vou.

Vulica vata

Na itaviqaravi yadua e ra ena rawa ni vukei ira na goneyalewa mera vulica na sala mera vaqaqacotaki ira kina na lewe ni Lotu vou. Mai na veivakauqeti ni Yalotabu, digitaka e dua se sivia ka na ganita na nomu kalasi:

Sureti ira na goneyalewa me ra raitayalotaka se vakasamataka mada e dua na lewe ni Lotu e dau dodoliga yani vei ira na saumaki vou mai, a rairai duatani mai na nodra ivakarau ni bula ni vakatauvatani kei lewenilotu oqo. E rawa me ra vola na goneyalewa ena vava ni volavola na veika e rawa ni cakava se sega o lewe ni Lotu oqo me vakila o koya sa saumaki vou mai ni sa lomani. Elder Neil L. Andersen ena “O Koya sa Vinakati Ira, sa Vinakati Au” e tukuni kina e vica na kedra italanoa eso era a dodoliga yani kivei ira na lewenilotu vou, kei na vosa nei Sisita Neill F. Marriott “Na Cava Meda Cakava?” e tukuni kina na nona a lomani mai na bubu vakacabecabe nei watina. Na cava era rawa ni vulica na goneyalewa mai na vica na italanoa oqo me ikuri ni nodra lisi?
Vakaraitaka e dua na iyaloyalo ni iVakabula ni taura tiko e dua na luve ni sipi (raica na iVola ni iYaloyalo Vakosipeli, 64). Vola ena vava ni volavola na “Vakani ira na noqu sipi.” Taroga vei ira na goneyalewa se cava era kila me baleta na itukutuku oqo. Sureti ira mera vakarorogo ki na ikuri ni veivakararamataki ni ko wilika ki na kalasi Joni 21:15–17. Ena itukutuku oqo o cei o ira na “sipi” kei na “lami.”? Era sa vakatauvatani vakacava na lewe ni Lotu vou me ra lami? Na cava na ibalebale ni vakania na lami ni iVakabula? Sureti ira na goneyalewa mera wasea na veika era sotava ena nodra vaqaqacotaki ira na lewe ni lotu vou. Na veika digitaki cava era rawa ni cakava mera vukei ira kina na lewenilotu vou ena veisiga ni mataka?
Sureti ira na goneyalewa mera sarava na vidio “Missionary Work and Retention: Georgia Elias” ka vakasaqara na veika vou era cakava na tabanalevu nei Georgia me vukei kina me kaukauwa tiko ena kosipeli ni oti na nona papitaiso. Na veika cava tale era vulica mai vei Georgia ka rawa ni vukei ira mera vaqaqacotaki ira kina na lewenilotu vou? Sureti ira na goneyalewa mera dau nanumi ira na lewenilotu vou ena tabanalevu. Na cava beka era lomatarotarotaka tiko? Era na vukei ira vakacava na goneyalewa? Me tiki ni veivosaki oqo, sa rawa mo vakaraitaka ka veivosakitaka na vidio“Help New Members Take a Name to the Temple.”
Vola ena vava ni volavola na tiki ni ivolanikalou (me vakataka na kena era tiko ena ituvatuva oqo) me baleta na noda itavi ni nodra vaqaqacotaki na wekada Yalododonu. Kerei ira yadua na goneyalewa mera wilika na tiki ni ivolanikalou, ka vakasamataka na kena rawa ni vakayagataki vei ira na lewe ni Lotu vou. Kerei koya me vola vakalekaleka ena vava ni volavola na nona tikina ka wasea e dua na ivakaraitaki ni ivakavuvuli e vakavulici tiko kina. Tarogi ira na goneyalewa na vuna e bibi kina mera vaqaqacotaki na lewe ni Lotu vou.
Vukei ira na goneyalewa mera vakasamataka na taro mera taroga vua e dua se qai lewena vou mai na Lotu. Ena veivakadonui nei bisopi, sureta ki na kalasi e dua se rua na saumaki vou mai. Kerea me rau wasea na italanoa ni nodrau saumaki mai kei na veika rau sa sotava tiko vaka-lewe ni Lotu vou. Sureti ira na goneyalewa mera taro ka veivosakitaka na sala e rawa ni ra vukei ira na lewe ni lotu vou mera vakaitaukeitaki ira ki na Lotu.
Sureti ira na goneyalewa mera wilika na “iTokani” ena Me iSakisaki ni iTabagone ka vakasaqara na isau ni taro oqo “Na cava na ibalebale ni itokani dina?” Kerei ira mera wasea na veika era sa raica rawa ka wasea na veika era sa sotava mai vua e dua na itokani dina. Na cava e rui bibi kina vei keda meda itokani vinaka kivei ira na lewe ni Lotu vou? Sureti ira na goneyalewa mera vola na yacadra na lewe ni lotu era kila ka veivosakitaka na sala mera vakayacora kina na ivakasala e tiko ena Me iSakisaki ni iTabagone me ra vakaitokanitaki ira kina.

Kerei ira na goneyalewa me ra wasea na veika era sa vulica nikua. Era sa kila vakavinaka beka na sala mera vaqaqacotaki ira kina na lewe ni Lotu vou? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me na tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Sureta e dua na lewenilotu vou ki na dua na itaviqaravi ni Muavata se dua tale na soqo ni tabanalevu.
Wasea na nodra ivakadinadina vua e dua na lewenilotu vou.

Wasea vei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.