Meu na vakarau vakacava meu tauyavutaka kina e dua na itikotiko sa va-Karisito?

Na kena tarai cake na matanitu ni Kalou e tekivu ena kena tarai cake e dua na itikotiko kei na matavuvale ivalavala dodonu. Na matavuvale sa ikoya na tabana bibi duadua ni Lotu. Sa dodonu vei keda na lewe ni Lotu, meda tauyavutaka e dua na itikotiko sa dau tiko kina na Yalotabu. Na itikotiko sa va-Karisito sa veivakarautaki me isasabai mai na ivalavala ca, ivakaruru mai na veika vakavuravura, ka yaco kina na loloma e gugumatua ka dina. Se vakacava beka na levu se lailai ni noda itikotiko, sa rawa me dua na “vale ni masumasu, vale ni lolo, ka vale ni vakabauta, vale ni vuli, vale ni vakarokoroko, ka vale ni caka dodonu, io na vale ni Kalou” ( V&V 88:119).

Mo vakarautaki iko vakayalo

Na cava o na cakava me yaco na nomu itikotiko me isasabai ni ivalavala ca ka ivakaruru mai na vuravura oqo? Na cava mo na cakava mo vakavulici ira kina na luvemu kei na matavuvale ena kosipeli?

Mo raica na itikotiko era tiko kina na goneyalewa. Na cava era sa sotava tiko ena gauna oqo ena vukei ira mera susuga cake na nodra dui matavuvale ivalavala dodonu?

Na ivolanikalou kei na vosa cava ena vukei ira na goneyalewa mera vakarau tauyavutaka e dua na vuvale sa va-Karisito?

Isikeli 16:44 (Na bibi ni nona ivakaraitaki e dua na tina)

Same 127:3; 2 Nifai 25:26; Mosaia 4:14–15; V&V 68:25–28; 88:119; 93:40 ( Era sa vakaroti na itubutubu mera vakavulica ka susugi ira cake na luvedra)

Alama 53:20–21; 56:47–48 (Era a vakavulici na cauravou yaloqaqa mai vei ira na tinadra)

“Na Matavuvale: Ai Vakaro ki Vuravura Raraba,,” Ensign se Liaona, Nove. 2010, 129

Henry B. Eyring, “Kivei Ira na Makubuqu,” Ensign se Liaona, Nove. 2013

Richard G. Scott, “Me Rawa na Vakacegu mai Vale,” Ensign se Liaona, Me 2013

L. Tom Perry, “Meda Sa iTubutubu Vinaka,” Ensign se Liaona, Nove. 2012, 26–28

“Na Vuvale,” Me iSakisaki ni iTabagone (2011), 14–15

Vidio: “Motherhood: An Eternal Partnership with God”

3:47

Vidio:“A House of Order, a House of God”

1:38

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Sureti ira na goneyalewa mera vakamacalataka na nodra nanuma baleta e dua na itikotiko sa va-Karisito. Na cava beka era na raica kina? Na cava era a vakila mai kina? Kerei ira mera sauma mai na taro oqo “Meu na vakavakarau vakacava meu tauyavutaka e dua na itikotiko sa va-Karisito?”
Tarogi ira na goneyalewa na nodra nanuma ni sa itavi ni tina ena kena tarai cake na matanitu ni Kalou. Sureti ira mera vakasamataki ira na tinadra kei ira talega na tina eso era kila ka wasea na itovo talei sa tu vei ira era gadreva tu na goneyalewa mera vakatotomuria (me vakataka na ivakaraitaki ni itovo talei, raica naNa Vosa Vakaibalebale 31:10–31).

Vulica vata

Na itaviqaravi yadua e ra ena vukei ira na goneyalewa mera kila vakavinaka na sala me tauyavutaki kina e dua na itikotiko sa va-Karisito. Mai na veivakauqeti ni Yalotabu, digitaka e dua se sivia ka na vinaka ki na nomu kalasi:

Wasea vakatolu na kalasi, ka lesia na iwasewase yadua me wilika e dua vei ira na ivolanikalou oqo: Mosaia 4:14–15, Alama 53:20–21, 56:47–48. Sureti ira na goneyalewa me ra cakava e dua na ituvatuva ena vava ni volavola ni ivakavuvuli ena tikina eso oqo ka na vukea me ra tauyavutaka e dua na vuvale sa va-Karisito. Vakaraitaka e dua se ruarua na vidio ka tuvai tu ena ituvatuva oqo. Ni ra sarasara tiko vakatura mera vakasamataka na goneyalewa ni ra sa tina ni gone. Ni oti e dua na vidio, kerei ira na goneyalewa mera veivosakitaka na iusutu ni itukutuku kei na ikuri ni ivakavuvuli era sa vulica ena vukei ira mera tauyavutaka na vuvale sa va-Karisito. Sa rawa me vakuri na ivakavuvuli oqo ki na kena sa volai tiko ena vava ni volavola. Sureti ira mera wasea na ivakaraitaki ni ivakavuvuli oqo mai na nodra dui matavuvale se matavuvale tale eso.
Kerei ira na goneyalewa me ra tuva ena vava ni volavola na nodra ivakasala vinaka duadua me baleti rau e rau sa vakarau vakamau. Wasewasea na vosa nei Peresitedi Henry B. Eyring “Kivei Ira na Makubuqu” ka solia vei ira na goneyalewa na iwasewase eso ni vosa me ra wilika. Kerei ira me ra vakuria na veika eso era kunea ena vosa nei Peresitedi Eyring ki na ituvatuva ena vava ni volavola ka veivosakitaka na veika e rawa ni ra cakava ena gauna oqo me ra vakarau kina me ra tauyavutaka e dua na vuvale va-Karisito.
Me wilika na kalasi na lima na ka era rawa ni cakava na itubutubu me buli kina na ivakarau qaqaco vakamatavuvale e vakamacalataki tiko ena vosa nei Elder Tom Perry “Meda sa iTubutubu Vinaka.” Kerei ira yadua na goneyalewa mera digitaka e dua na vakatutu nei Elder Perry ka wasea e dua na ivakaraitaki e raica ena matavuvale eso ni ra vakayacora na vakatutu oqo ni qai vakayacora o koya ena vukea kina me tauyavutaka e dua na matavuvale sa va-Karisito. Kerei ira na goneyalewa mera wilika na iotioti ni vitu na parakaravu ni vosa oqo ka wasea na inaki ni sa ka bibi na kena tauyavutaki e dua na itovo tudei kaukauwa ni matavuvale. Na cava era rawa ni cakava na goneyalewa ena gauna oqo mera tauyavutaka kina e dua na itovo tudei kaukauwa ena nodra itikotiko.
Na cava era ka bibi kina na ivakarau? Na ivakarau cava sa solia vei keda na Tamada Vakalomalagi meda tauyavutaka kina e dua na itikotiko sa va-Karisito? (raica na “Na Matavuvale: Ai Vakaro ki Vuravura Raraba,” ka 7 ni parakaravu). Na cava era rawa ni cakava na goneyalewa ena gauna oqo mera vakarau tara cake kina e dua na itikotiko kei na matavuvale ena ivakarau vakaoqo? Tarogi ira na goneyalewa na cava era na kaya vua e dua e sega tu ni salavata na nodratou bula ni matavuvale vata kei na ivakarau mai vua na Tamada Vakalomalagi. Sureti ira mera wilika na iotioti ni parakaravu ni “Matavuvale” ena Me iSakisaki ni iTabagone baleta na vakasama eso.
Wasea vakailawalawa na kalasi, ka wasea na vosa nei Elder Richard G. Scott “Me Rawa na Vakacegu mai Vale” kivei ira na ilawalawa. Kerei ira na ilawalawa oqo mera wilika na nodra iwasewase ni vosa, ka mera vakasaqara na ivakamacala se ituvaki ni dua na itikotiko sa va-Karisito. Sureti ira mera wasea na veika era sa kunea ena nodra droinitaka na iyaloyalo ni dua na itikotiko sa va-Karisito. Na cava era rawa ni cakava na goneyalewa ena gauna oqo mera vukea kina na nodra itikotiko me va-Karisito vakalevu cake? Era na vakarau vakacava mera tauyavutaka na vuvale sa va-Karisito ena siga ni mataka?

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila vakavinaka beka na sala mera tauyavutaka kina e dua na itikotiko me va-Karisito? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vukei ira nodra itubutubu ena veivakauqeti vinaka ena nodra itikotiko ena gauna oqo.
Raici ira na tina vinaka era kila, vuli mai vei ira, ka muria na nodra ivakaraitaki.

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.