Me Rawa na Vakacegu mai Vale

Mai vei Elder Richard G. Scott

Ena Kuoramu ni iApositolo Le Tinikarua

E dua na veivakalougatataki levu e rawa ni da wasea ki vuravura sa ikoya na kaukauwa ni matavuvale ka vakaliuci kina na Karisito, na vanua e vunautaki kina na kosipeli, maroroi kina na veiyalayalati ka sinai tu ena loloma.

Levu na rorogo e rogoci tu ena vuravura eda bula tiko kina ka ra kaya ni dodonu meda bula ena vakariri. Ena levu tikoga na ka me vakayacori ka levu me rawati. Ia, e yaloda mai loma e tiko kina na gagadre me dua na vanu ni vakaruru, me kune kina na bula vakacegu kei na soko maravu, na vanua eda na rawa ni tekivu vou tale kina, vakasoqoni vata tale, ka vakabulabulataki tale meda vakarau kina veiqaravi.

Na vanua vinaka duadua ni vakacegu qori sa ikoya na noda veivalevale, na vanua eda sa navuca oti tu kina me kena iliuliu o Jisu Karisito.

Eso na vuvale e tiko na tamadra ka tu vua na matabete, kei na watina ena nona veitokoni ena yalodina me rau veiliutaki ena buladodonu. E so na vuvale e duatani tu na kena ituvaki. Kevaka me mani vakacava sara na kena ituvaki, ena rawa ga ni ko yavutaka na nomu matavuvale vei Jisu Karisito, ni sa ikoya na ivurevure ni vakacegu ena bula oqo.

Vakadeitaka ni vakatulewa kece o na cakava, se vakayalo se vakayago ena vakatau mai na ka ena gadreva vei iko na iVakabula mo na cakava. Ni sa tu o koya ena loma donu ni bula ni nomu matavuvale, sa na kune kina na vakacegu kei na maravu ni draki. Ena tiko na yalo ni veivakadeitaki ena matavuvale, ka ra na vakila o ira kece era na vakaitikotiko kina.

Ena sega walega ni itavi ni tubutubu me vakavotukanataka na ivakasala oqo, ka dina ga ni o ya na nodra itavi. Mera na veivuke talega na gone ena kena bucini na bula va-Karisito ena loma ni matavuvale. Sa ka bibi vei ira na itubutubu mera vakavulici ira na gone mera kila na kena revurevu ni nodra ivakarau vei ira era tiko ena loma ni vuvale. O ira na gone era dau tarogi ena vuku ni nodra ivalavala, se vinaka se ca, era na tubucake mera tamata yalodina ena nona matanitu na Kalou.

Au nuitaka ni ko ni na kila na yavu ni ivakavuvuli ka yavutaki kina na nomuni matavuvale vua na iVakabula. Na ivakasala vakaparofita me baleta na masu yadua kei na masu vakamatavuvale ena veisiga, vakakina na wili ivolanikalou, kei na lotu vakamatavuvale e veimacaa, ena dodonu me qaravi tiko, sa ivakadei ni dua na matavuvale e vakaliuci kina na bula va-Karisito. Ni sega na veika oqo sa na dredre me sotavi na vakacegu kei na maravu mai na dredre vakavuravura.

Talairawarawa kina veivakavulici vaka-parofita ka na gadreva na Karisito mo muria. Kakua ni lomalomaruataka na nomu veisiga ni mataka ena nomu muri takoso ka sega ni vakamuria vinaka na ivakavuvuli ni kosipeli. Nanuma ni veika lelevu e tekivu mai na veika lalai. Qarauna ni vakawelewele ena vakavu leqa. E ka bibi cake, ka rawarawa, ka caka wasoma, na ivakarau vinaka, ena kauta mai na veivakalougatataki.

Kemuni na gone ena Lalai, kemuni na goneyalewa kei na cauravou ena parokaramu ni itabagone, kei kemuni na daukaulotu o ni kaulotu tiko, ko ni cakava tiko e so na ka au a sega ni rawa ni cakava ena gauna au a se gone kina vakataki kemuni. Ena bula taumada ko ni a vakadinadinataka na nomuni qaqa, talairawarawa, ka bula kilikili. Mai ke ya ko ni cakacaka vakaukauwa mo ni rawata na taledi ka vakarautaki kemuni mo ni mai bula vakayago ena qaqa, yalodina, vakarokoroko kei na rawa-ka.

Se sega ni dede na nomuni yaco mai kina bula vakayago kei na veika totoka o ni kauta mai vakakina na kena na sega ni yalani rawa na kena icavacava. Ia, e tiko ga na veika rerevaki ena veivanua o ni bula tiko kina. Na veika o ni rawata kei na kaukauwa e tiko vei kemuni ena rawa ni vakalailaitaki se vakacacani kevaka mo ni na laiva mo ni rawai ena veivakatovolei e wavoliti kemuni tu. Ia, mo ni nanuma tiko ni o Setani e sega sara ga ni tautauvata kei na iVakabula. Sa kilai tu na icavacava nei Setani. E kila vinaka ni o koya sa vakadrukai oti tu, ia ena vinakata me kauta yani e dua na wiliwili levu sara ena nona kaukauwa. Ena saga o koya me vakacacana na nomu vinaka kei na kaukauwa ena nona na yanaraka na nomu malumalumu. Mo tiko ena nona yasana na Turaga, ka rawa ni o na qaqa tu ga e veigauna.

Ko ni bula tiko ena dua na vuravura ka sa toso totolo dina na kena tekinolaji. Ena dredre kina noqu itabatamata me keimami salavata kei na veika sa yaco tiko. Vakatau ena ivakavakayagataki ni tekinolaji, na veika vovou oqo ena rawa ni veivakalougatataki se veivakalolomataki. Ni kilai ka vakayagataki vakadodonu na tekinolaji, ena sega ni ganita meda lomaleqa kina ia e dodonu ga me vakatorocaketaka ga na sala ni veitaratara vakayalo.

Me kena ivakaraitaki, e lewe levu vei keda eda sa yadua tu na iyaya vakalivaliva ka rawa ni tawani ga e noda taga. Ena tu ga vei keda ena veigauna kece; eda na railesuva tiko vakawasoma ena veisiga. Ka ni rarawa ni veiyaya oqo ena vakavu ivalavala ca ka na vakaotia walega na noda gauna. Ia, kevaka me vakayagataki vakavuku, na tekinolaji oqo ena rawa ni veitaqomaki sara mai na veika e veivakacacani.

O cei ena rawa ni vakasamataka ena vica na yabaki sa oti ni veivola kece ni lotu kei na itukutuku ni koniferedi raraba ena rawa ni tawani tu ga e noda taga? Ena sega ni taqomaki iko kevaka me tiko ena nomu taga, ia, na kena vulici, vakasamataki, ka vakarorogo kina ena vakanomodi ena rawa ni ko na vukei mai na Yalotabu.

Vakavukutaka na nomu ciqoma na tekinolaji. Vola toka kina na tiki ni ivolanikalou bibi me rawa ni ko na dau railesuva tiko vakawasoma. Kevaka me so vei kemuni na itabagone ena raica lesu tiko vakawasoma me vaka na nona dau vakau itukutuku ena ‘tex’ ko sa na rawa ni kila vinaka e so na tiki ni ivolanikalou ka wiligusutaka. Na veitikina oqori sa na ivurevure ni veivakauqeti ka veituberi ni Yalo Tabu ena veigauna e gadrevi kina.

Na noda cakava na ka e rawa ni da cakava meda sureta kina na veivakauqeti ni YaloTabu kina noda bula sa na ka bibi sara kevaka meda na gadreva me koto e na loma donu ni noda bula ni matavuvale na iVakabula. Ni da vakayacora na ka oqori eda sa na vakauqeti tiko meda vaqaqacotaki cake.

Na vakacegu levu ena yaco mai ni ko sa talairawarawa mo qaravi ira era tu vakavolivoliti iko. Lewe levu sara era nanuma ni veika lalai e tu vei ira, era sa vakayagataka sara ga na ka e tu vei ira mera vukei ira kina o ira era tu e ke ya. Na kocokoco sa ikoya na wakatu ni veika ca. Na iwali ni veika ca oqori e vakatakarakarataka na iVakabula. E vakaraitaka o Koya na noda vakatabakiduataka na noda bula ena igu ni veiqaravi tawa nanumi koya ga vakaikoya vei ira na tani.

Au sa vulica rawa e dua na ka dina ka sa dau tokaruataki vakawasoma ena noqu bula, kau sa wilika tu me vaka e dua na noqu roka ni bula. E vakamacalataka ni talairawarawa kei na veiqaravi erau veiwekani voleka sara kei na kaukauwa ni Kalou. Ni da sa talairawarawa kina ivunau ni Turaga ka qaravi ira na luvena ena yalodina, na kena revurevu ga sa ikoya na kaukauwa mai vua na Kalou—na kaukauwa meda cakava na ka ena sega ni rawa meda cakava ena noda kaukauwa ga vakai keda. Na ka eda kila, na noda taledi, na noda kaukauwa, sa na vakalevutaki baleta ni da sa ciqoma na veivakaukauawataki mai vua na Turaga. Na nona kaukuawa sa i koya na vakayavutaka na nona vakacegu ena loma ni matavuvale.

Ni sa vakaliuci ena nomu matavuvale na iVakabula, sa na yaco me ivakaruru sega walega vei ira na nomu matavuvale, ia vei ira talega na itokani era sotava tiko na bula dredre. Era na dreti lesu yani ena malumu ni draki ni bula era vakila. Kidavaki ira na itokani vakaoqori kina nomu matavuvale. Era na sereki cake me va-Karisito na kedra ituvaki. Vakaitokanitaki ira na nodra itokani na luvemu. Mo ivakaraitaki vinaka sara vei ira.

Vica na yabaki sa oti ni mai cava na veisiko kina itikotiko ni kaulotu, qai tukuna vei au o Jeanene, e dua na daukaulotu e a sotava. Tarogi koya o Jeanene baleta na nona matavuvale. E kidroa o koya ni kaya mai ni sega tu na nona matavuvale. E a kaya ni a soli koya o tinana kina matanitu me susugi koya cake ena gauna ga a sucu kina. E a tubucake ena nona veidewayaki mai na dua na vanua ni susu gone kina dua tale. E kalougata ni a sotava na kosipeli ena nona a se gone. E dua na matavuvale dauloloma e a sotavi koya ena dua na gauna ka tuberi koya cake me yacova na nona sa laki kaulotu sara.

E muri e a qai taroga o Jeanene na watina na peresitedi ni kaulotu baleta na daukaulotu o ya. E a vulica ni se qai oti ga e vica na vula na nona mai tiko voli na daukaulotu o ya ena vale nai Paresitedi ni kaulotu me vaka ni a tauvi mate mai. Ena gauna o ya e mai donumaka sara e dua na lotu vakamatavuvale. Ni bera ni lesu tale kina buturara ni lai kaulotu, e a qai kerei peresitedi ni kaulotu kevaka e rawa ni mai tiko me rua se tolu na siga ena vale nei kaulotu ena gauna sa mai cava kina na nona kaulotu. E gadreva me raica na kena qaravi e dua na matavuvale ka vakaliuci kina na bula va-Karisito. E a gadreva me na vakamuria na bula ni nona matavuvale me vaka sara ga o ya.

Vakamuria na ka vata sara ga o ya me vaka mai vale. Dodoliga yani vei ira era vesuki tu vakayalo. Mo itokani yalodina sara. Na mataqali vakaitokani vaka o ya ena tautauvata kei na ibulu ni qara ka vanalamuta tu na noda bula ka vakadredretaka na rawati ni bula vakacegu. Me kakua ni ivakaso ni ka me rawa ka me sosomitaka na veika sa mai yali, ia me wili vaka iyau ena marautaki ka veiwaseitaki. Kidavaki ira mai kina nomu vale o ira era na gadreva mera vaqaqacotaki ena dua na ka me tauvata na ka e a yaco oya.

Au veivakasalataki vei ira ka ra lomani ira tiko e so na lewe ni matavuvale era sega tiko ni digidigi vinaka. O ya ena rawa ni bolei keda ena noda yalomalua ka vosota vakadede. E dodonu meda na vakararavi vua na Turaga ena nona ituvatuva ni na rogoca na noda masu ka na vakavatukana na noda veivakaukauwataki. Meda cakava ga na veika kece sara e rawa ni da cakava, meda veimasulaki, ka vakabauta dina sara na Kalou ni na vakavu ka ena itavi eda qarava tiko. Meda na bulataka na vakabauta, ka nanuma tiko ni so na ka meda na qai laiva vua na Turaga me vakatulewa kina. E sureti keda meda vakotora na noda icolacola e yavana. Ena vakabauta eda na kila kina ni o koya e lako sese tiko ena sega ni guilecavi, ia sa na maroroi ena veimaroroi ni iVakabula dauloloma.

Raica matua na ka vinaka e tiko vei ira na tani ka sega na veika ca. Ena so na gauna na ca ena ganita me dikevi sara vakavinaka me rawa ni vakasavasavataki, ia meda tara cake ga na veika vivinaka e so.

Ni ko sa vakila ni sa vo walega e dua na isema mamare sara ni vakanuinui, qori e sega ni isema mamare ia sa isema vavaku sara ga ni veisemati me vaqaqacotaki kina na bula me na rawa ni vueti cake kina. Ena kauta yani na veivakacegui mo na rawa ni vakacegui kina. Sasagata mo bula kilikili ka dau vakararavi tudei vua na Turaga.

Meda kakua ni taqaya kevaka meda sega ni rawata taucoko na veika e veivakasalataki mai kina na Turaga. O Koya e a vosa talega baleta na vagauna ni ka kecega eda na sotava. Ena noda dau masu ni vaqara veituberi, o Koya ena kauti keda ena dua na ituvatuva me yavalati kina na noda bula. Eda na rawa ni vuli, tubucake, ka na vakai Koya vakalailai tiko mai ena veigauna.

Au vakadinadiinataka ni da bula ena talairawarawa, ka yavutaki ena kosipeli i Jisu Karisito, ena vakarautaka na vakacegu levu duadua ena loma ni noda veimatavuvale. Era na tiko ga na bolebole lelevu se na mosi ni yalo, ia ena loma ni veilecayaki oqori, ena rawa ni da na sotava na vakacegu kei na bulamarau. Au vakadinadinataka ni Veisorovaki i Jisu Karisito sa ivurevure levu ni vakacegu o ya ena yaca i Jisu Karisito, emeni.