Dua na Yavu Dei

Mai vei Bisopi Dean M. Davies

iKarua ni Daunivakasala ena Matabisopi Vakatulewa

Meda sa ciqoma na veisureti ni iVakabula meda lako mai Vua. Meda sa tara cake noda bula ena dua na yavu dei ka taqomaki.

Ena 17 ni Okotova, 1989, ena noqu draiva tiko ivale ni suka na cakacaka, au sa volekata tiko yani e dua na cina ni tatakoso ni Makete kei na Beale Street e San Francisco, California. Ena gauna o ya au vakila ni sakure na motoka kau vakasamataka, “E sa rairai kacabote na taya.” Ni sa toso tiko ga na sakure ni motoka, au raica e dua na basi sa voleka sara ga mai vei au kau vakasamataka, “Sa coqai au na basi o ya!” Sa qai sasakurekure ga vakalevu na motoka, kau vakasamataka sara, “Sa rairai kacabote vava beka na taya!” Ia e sega ni kacabote na taya se na basi—oya a dua na uneune kaukauwa sara! Ena noqu sa kele ena cina damudamu, sa tawa tu na bati ni gaunisala ena ua lalai me vaka na biau ni wasawasa ka drodro sobu tiko mai ena Market Street. E sa suwaigelegele tiko e mataqu e dua na vale ni volavola cecere, ka ra sa tekivu qeqera sobu tiko mai na buloko ni dua na vale makawa ena yasaqu imawi ena kena sa toso tiko ga na sakure ni qele.

A yaco na uneune e Loma Prieta ena Vanua o San Francisco Bay ena 5:04 ena yakavi ni siga o ya ka 12,000 na tamata sa vakacacani na nodra itikotiko.

Na uneune sa vakavuna na vakacaca vakaitamera ena Vanua o San Francisco Bay, vakauasivi na kena laurai ena vanua luluqa e San Francisco kei Oakland. E San Francisco, na Tikina o Marina a “tara cake ena dua na qele bulu ka caka ena kena waki vata na nukunuku, benu, tikitiki ni vatu, … kei na so tale na ka e tu kina e dua na pasede levu ni wai ena qele. Eso na ka a vakatawani kina sa ikoya na tikitiki ni vatu ka benuci ena San Francisco Bay ni oti na uneune e San Francisco ena 1906.”¹

Rauta na 1915, a tara na veivale vakarumu ena qelebulu. Ena uneune ni 1989, a vuki na soso waiwaiya, nuku, kei na benu me vaka na wai, ka vakavuna na kedra kasura sobu na veivalevale. Era a sega ni tara tu na veivale ena dua na yavu dei.

A tara vaka ca sara e vuqa na bula oka kina na noqu na uneune o Loma Prieta. Niu vakananuma tiko na veika era yaco ena siga o ya au vakadeitaka tale ena noqu vakasama kei na yaloqu ni kena rawa ni vorati na cagilaba, uneune, kei na vakadomobula ni bula, sa dodonu meda tara cake ena dua na yavu dei.

O Ilamani na parofita ni Nifai a vakamatatataka ka sega ni cala na bibi ni kena tara cake na noda bula ena dua na yavu dei, ka sa i Jisu Karisito sara ga na kena yavu: “Ia oi kemudrau na luvequ, mo drau nanuma mo drau tara na nomudrau yavu ena uluvatu ni noda i Vakabula, sa ikoya na Karisito na Luve ni Kalou; ia ni sa vakaliwava mai na tevoro na nona cagi kaukauwa kei na nona moto ena covulaca, ka sa yaviti kemudrau ena nona uca cevata kei na nona cagi laba, ena sega ni rawai kemudrau se dreti kemudrau sobu ki na ikeli ni rarawa kei na yaluma tawamudu, ni sa dei sara na uluvatu drau sa tara kina; ia kevaka sa tara cake na tamata ena yavu oqo, ena sega ni bale rawa.” (Ilamani 5:12).

Ena kedra vakatorocaketaki na veivaletabu ni gauna oqo, sa qarauni sara ga vakavinaka na kena droinitaki, tara ni vale, kei na vakayagataki ni yaya ni tara vale. Vakayacori na kena vakatovolei vakavinaka sara na qele kei na kena ituvaki ena vanua ena tarai kina na valetabu. E vakatovolei vakavinaka sara na qele kei na matanicagi, ena vanua me tara kina e dua valetabu. Ena vulici na matanicagi, na uca, kei na veisau ena draki ni vanua o ya me rawa ki na valetabu sa vakacavari me vorata sega wale ga ni cagi laba kei draki ni dua na vanua, ia na valetabu sa droinitaki ka vakatikori oqo me na vorata rawa na uneune sega ni namaki, covulaca, ualuvu, kei na veimataqali ivakarau ni draki tale eso e rawa ni yaco. Ena vuqa na valetabu, e bulu vakatitobu sara ga ena loma ni qele na duru simede se sitila me iyaqa ni yavu ni valetabu.

Me vakataki ira na daudroini kei ira na dau tara vale ni noda gauna, na Tamada mai Lomalagi kei na Luvena dauloloma ka yalovinaka e rau sa vakarautaka tu na ituvatuva, iyaya, kei na ivurevure tale eso meda vakayagataka me rawa ni da tara ka vakabaitaka na noda bula me tudeitaki ka sega ni yavalati rawa. Na ituvatuva sa ikoya na yavu ni veivakabulai, na ituvatuva levu ni marau. E vakadavora tu vei keda na ituvatuva oqo e dua na iyaloyalo matata kei na kila mai na ivakatekivu kei na ivakataotioti, kei na ikalawa e ganiti, okati kina na cakacaka vakalotu, ka yaga vei ira vakayadua na luvei Tamada me rawa kina ni ra lesu tale ki na Nona iserau ka tiko vata kei Koya me tawamudu.

Na vakabauta, veivutuni, papitaiso, na isolisoli ni Yalo Tabu, kei na vosota vakadede era tiki ni “ituvatuva navuci” ni bula. Era vukea na kena tauyavutaki na ivakavuvuli yaga e veiganiti ka na iyaqa ni noda bula ki na Veisorovaki i Karisito. Oqori ena vakaituvakitaka ka waqa ni yavu dei ni bula ni dua na tamata. Ia, me vaka ga ni tu na kena gacagaca matailalai na ituvatuva ni valetabu ka solia na idusidusi matailalai me baleta na kena tauyavutaki ka cokoti vata na veitikina yaga, na masu, wiliki ni ivolanikalou, vakayagataki ni sakaramede, kei na ciqomi ni cakacaka vakalotu yaga ni matabete sa yaco kina na “gacagaca matailalai” me vukea na cokoti vata ka duavata na ituvaki ni bula.

E sa rui bibi na raici ni kedra vakayagataki ena kedra ivakarau dodonu na gacagaca matailalai oqo. Me kena ivakaraitaki, ena caka simede, me donu na levu ni nuku, qereqere, simede, kei na wai e vakayagataki me rawa kina ni kaukauwa ena kena iyalayala e cake. Ni veicalati na kena levu se yali eso na iwase ni so na ka oqo ena vakamalumalumutaka na simede ka sega ni rawa me vakayacora na kena itavi bibi.

Me vaka na kena ivakarau, kevaka eda sega ni vakarautaka donu ena noda bula ni veisiga ena masu yadudua kei na kena tugani na ivolanikalou, veivakaukauwataki vakamacawa mai na vakayagataki ni sakaramede, kei na vakaitavi e veigauna ena cakacaka vakalotu ni matabete me vaka na cakacaka vakalotu ni valetabu, o keda tale ga eda na rawa ni vakamalumalumutaki ena keda ituvaki kaukauwa vakayalo.

Ena dua na ivola nei Paula vei ira na kai Efeso, a tukuni kina vaqo ka rawa ni da vakayagataka ena kena gadrevi me donu na ivakarau vakakina na vakatorocaketaki ni duavata ni noda ivakarau kei na yaloda: “O koya sa sema vata kina na vale taucoko, a sa tubu cake kina me valetabu ni sa tu vata kei na Turaga” (Efeso 2:21).

Na masumasu sa ikoya e dua na yavu cecere ka itekitekivu bibi ni ivakavuvuli ni noda vakabauta kei na ivakarau. Mai na masumasu e rawa kina vei keda meda vakaraitaka na noda vakavinavinaka, loloma, kei na yalodina vua na Kalou. Mai na masumasu eda sa rawa ni vakamalumalumutaki keda ki na Nona Lewa ka ciqoma na kaukauwa meda talairawarawa ki na Nona ivakavuvuli. Na masumasu sa ikoya na sala eda rawa ni muria meda vakasaqara kina na Nona veivakayarayarataki ki na noda bula, ena ivakatakila sara mada ga.

A vakatavulica o Alama, “Mo vakarorogotaka vua na Turaga na nomu sala kece ga; ia ena vakadodonutaka na nomu ilakolako ko Koya; mo soli iko vua na Turaga ni ko sa davo sobu ena bogi ka na vakatawai iko ko Koya; ia ni ko sa yadra ena mataka, mo vakavinavinakataka vua na Kalou; raica kevaka ko sa kitaka na veika oqo, ko na laveti cake ena siga mai muri” (Alama 37:37).

Na noda wasea noda vakasama, na veika eda vakila, kei na noda gagadre vata kei na Kalou ena masumasu ena yalodina mai na vu ni yaloda taucoko e dodonu me yaco kivei keda vakayadua me vaka na bibi kei na kena ivakarau ni noda dau cegu ka kana.

Na vakasaqarai ni ivolanikalou ena veisiga yadua ena vakaukauwataka tale ga na noda vakabauta kei na noda ivakarau. Me vaka ga noda gadreva na kakana me vakabulabulataka na yagoda, ena vakasinaiti ka vakaukauwataki mai na yaloda kei na keda ituvaki ena tugani ni vosa i Karisito ka ra tu ena nodra ivola na parofita. A vakatavulica vaqo o Nifai, “Mo dou tugana ki lomamudou na vosa i Karisito; raica na vosa i Karisito sa tukuna vei kemudou na veika kece mo dou kitaka” (2 Nifai 32:3).

Sa totoka na kena wiliki tiko na ivolanikalou, ia na kena wiliki tiko ga e sega ni rawati kina na taucoko ni raba kei na titobu ni ivakavuvuli ni iVakabula. Na kena vakasaqarai, tugani, ka vakayacori na vosa i Karisito me vaka e vakatavulici ena ivolanikalou ena kauta mai na yalomatua kei na kila ka e sivia sara mai na noda kila vakayago. Oqo ena vakaukauwataka na noda itavi ena kena vakarautaki keda vakayalo meda vakayacora ena kena e uasivi duadua na veituvaki kece sara.

E dua na ikalawa bibi duadua e rawa meda taura me vakaukauwataka noda bula ka vakadeitaka na isema ki na yavu ni i Vakabula sa ikoya na kilikili ni kena vakayagataki na sakaramede ena veimacawa. Na cakacaka vakalotu ni sakaramede e vakarautaka na gauna donu ki na lewe ni Lotu yadua na madigi me vakasamataka vakatitobu taumada na nona bula, me vakasamataka na cakacaka se me sa kakua ni caka ka gadrevi me veivutunitaki, ka qai vakayagataka na madrai kei na wai me ivakatakilakila vakamareqeti ni kena ivakananumi tabu na yago kei na dra i Jisu Karisito, ka sa ivakadinadina ni Nona Veisorovaki. Kevaka eda vakaivotavota ena yalodina kei na yalomalumalumu, eda vakavouya na veiyalayalati tawamudu, ka vakasavasavataki ka vakatabui, ka ciqoma na yalayala ni na dau tiko vata ga kei keda na Nona Yalotabu, ka sega ni mudu. Na Yalotabu e cakacaka me vaka e dua na misini ni qereqere, e dua na isema ka sega walega ni veivakatabui ia e kauta mai na veika kece sara ki na noda vakanananu ka na dau vakadinadinataki Jisu Karisito tiko ga. Na kilikili ni kena vakayagataki na sakaramede e vakaukauwataka na keda isema vakayadudua ki na vatu ivakadei, io vei Jisu Karisito.

Ena Nona ilesilesi a veivakatavulici na iVakabula ena loloma kei na vakamatatataki ni ivunau, ivakavuvuli, kei na veicakacaka yaga ka na taqomaka noda bula ka vakaukauwataka noda ivakarau. Ena itinitini ni Vunau ena Ulunivanua, a kaya o Koya:

“Ia ko koya yadua sa rogoca na noqu vosa oqo ka cakava, au na vakatautauvatataka kei na tamata vuku, [sa] tara na nona vale ena dela ni vatu—

“A sa tau mai na uca, ka coka na dobui, ka liwa mai na cagi ka tabaka na vale ko ya; a sa sega ni bale ni sa tauyavutaki ena vatu.

“Ia ko koya yadua sa rogoca na noqu vosa ka sega ni cakava, ena vakatautauvatataki kei na tamata lialia, [sa] tara na nona vale ena dela ni nuku—

“A sa tau mai na uca, ka coka na dobui, ka liwa na cagi ka tabaka na vale ko ya; a sa bale kina, ia sa ka levu na kena bale” (3 Nifai 14:24–27; raica talega Maciu 7:24–27).

Kemuni na taciqu kei na ganequ, e sega ni dua vei keda ena nakita me tara na noda vale, vanua ni cakacaka, se na veivale vakatabui ni sokalou ena nuku se tikitiki ni vatu ka sega na ituvatuva kei na iyaya e veiganiti. Meda sa ciqoma na veisureti ni iVakabula meda lako mai Vua. Meda sa tara cake noda bula ena dua na yavu dei ka taqomaki.

Au vakadinadinataka ena yalomalua ni mai na noda vakaiyaqataka na noda bula vei Jisu Karisito kei na Nona Veisorovaki kei na noda vakamuria vakavinaka na Nona ituvatuva me baleta na noda marau, okati kina na masumasu ena veisiga, vulici ni ivolanikalou ena veisiga, kei na vakayagataki ni sakaramede ena veimacawa, eda na vakaukauwataki, eda na sotava na tubu dina vakayadua kei na dua na saumaki sega ni vakaiyalayala, eda na vakavakarau vakavinaka cake sara meda vorata na cagilaba kei na veika rerevaki ni bula, eda na sotava na reki kei na mamarau a yalataki, ka na tu vei keda na yalodei ni a tara cake na noda bula ena dua na yavu dei—-e dua na yavu ka na sega ni rawa vakadua me guce. Ena yaca tabu i Jisu Karisito, emeni.