Na cava na Saioni?

Sa vakarota vei keda na Turaga meda “vunautaka yani me vakadeitaki na inaki kei Saioni” (V&V 6:6). Na ibalebale kei Saioni sai ira na tamata ni Turaga e sa duavata na yalodra kei na nodra vakasama, ka ra bula vata tiko ena ivalavala dodonu. Sa rawa ni da tauyavutaki Saioni ena taraicake ni duavata kei na kaukauwa vakayalo ena noda itikotiko, tabanalevu se tabana, kei na itikotiko raraba.

Mo vakarautaki iko vakayalo

O dau sasagataka vakacava mo bulataka na ivakavuvuli kei Saioni ena nomu bula kei na matavuvale? Na gauna cava mada o sa bau vakila kina na yalo ni duavata ena dua na tabanalevu se ena nomu matavuvale?

Era sa duavata tiko beka vakamataveitacini na goneyalewa? Na cava era rawa ni cakava mera tauyavutaki Saioni kina? Na ivakatatao cava era rawa ni sotava?

Vulica ena masumasu na ivolanikalou kei na ivurevure eso oqo. Na cava o vakila ena vukei ira na goneyalewa ena nodra vulica na sala mera tauyavutaka kina na inaki kei Saioni?

Mosaia 18:21; V&V 38:26–27 (E dodonu meda vakasaqara na duavata)

1 Nifai 13:37; V&V 6:6 (Vakasaqara mo kauti Saioni cake mai)

4 Nifai 1:1–18 (Era a bula vata na Nifai kei na Leimani ena dua na bula vaka-Saioni)

V&V 97:21; Mosese 7:18 (Na cava o Saioni?)

Benjamín De Hoyos, “Me iVakarau ki na Veimatanitu na Noda Rarama,” Ensign se Liaona, Me 2017, 124–26

Jeffrey R. Holland, “Sere e Lagati ka Sega ni Lagati,” Ensign se Liahona, Me 2014, 49–51

D. Todd Christofferson, “Lako Mai ki Saioni,” Ensign se Liaona, Nove. 2008, 37–40

Bonnie L. Oscarson, “Veitacini Marama: Isa, Eda Gadreva Me Da Veiyagani Vakataki Keda,” Ensign se Liaona, Me 2014, 119–121

“Saioni,” Tudei ena Vakabauta (2004), 189–90

“Marama e Saioni,”Sere ni Lotu, naba 192

Veivakavulici ena ivakarau ni iVakabula

Ena veigauna kece, sa dau ivakaraitaki ka dauveivakauqeti vei iratou na Nona tisaipeli na iVakabula. A vakavulica vei ira mera bula voli ena sala e bula tiko kina o Koya. Ena vakayacoka vakacava na nomu ivakaraitaki ni loloma kei na duavata mera gadreva kina na goneyalewa na sasaga yani ki Saioni?

Vidio: “We Act”

Sarava eso tale

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se na nomu nanuma eso mo vakamacalataka kina na lesoni ni macawa oqo:

• Vola ena vava ni volavola na “Saioni,” ka kerei ira na goneyalewa mera vola na vosa eso ni ra vakasamataki Saioni tiko. Sureti ira mera wilika na draunipepa 109 ena Tudei ena Vakabauta me ikuri ni kena ibalebale. Na cava na noda itavi na marama ena kena taraicake o Saioni?

• Me lagati vata na imatai ni qaqa ni “Marama e Saioni” (Serenilotu, naba 192). Kerei ira na goneyalewa mera vakasaqara na vosa kei na malanivosa eso ena serenilotu e vakavulica na veika e baleti Saioni. Vakayaloqaqataki ira na goneyalewa mera wasea na veika era vakabauta ni sa nodra itavi ena kena tauyavutaki e dua na itikotiko, tabanalevu, se itikotiko raraba sa vaka-Saioni.

Vulica vata

Raica eso tale na veivakasama ni vuli kei na veivakavulici.

Na itaviqaravi yadua e ra ena vukei ira na goneyalewa mera kila deivaki na cava o Saioni. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

• Na cava e vakavulica o Elder Jeffrey R. Holland ena nona vosa “Na Sere e Lagati kei na Sere e sega ni Lagati” e baleta na kena vaka e dua na matasere ena lotu? Me vukei ira na goneyalewa me ra kila vinaka na vosa vakaibalebale nei Elder Holland, sureta e dua se sivia na tamata era sa lagasere oti ena dua na matasere me ra wasea na nodra nanuma me baleta na kena sa vukei ira me ra kila vinaka na gagadre e tiko me baleta na rabailevu ni duidui ena veika e gadrevi ena matanitu ni Kalou. Ena rawa vakacava me da tarai Saioni cake ena noda vakatara eso na “rumu” ena kuoramu, ilawalawa ni Goneyalewa, se ena tabanalevu vei ira na tamata era vakila ni ra sega ni toka donu kei keda? Na ivakasala cava e solia o Elder Holland ena rawa ni vukei keda meda cakava na veika oqo? 

• E taroga na veitaro oqo o Elder Benjamin De Hoyos ena nona vosa “Me iVakarau ki na Veimatanitu na Noda Rarama”: “Na cava eso na ka bibi me caka ena gauna vakasakiti oqo meda tarai Sioni cake ka vakasokumuni Isireli?” Me vukei ira na goneyalewa ena nodra vakasaqara na isaunitaro, e rawa ni ra wilika na iotioti ni 11 na parakaravu ni vosa nei Elder De Hoyos. E rawa ni vakavinakataki cake vakacava na noda tarai Saioni ena tolu na sala e wasea o koya? 

• Me na wilika na kalasi na V&V 38:27 kei na Mosese 7:18. Na cava na kena ibalebale meda yalovata ka vakasama vata? Na cava e tiki bibi kina ena taraicake kei Saioni na duavata? Wasea vei ira na goneyalewa e dua na vosa ni koniferedi ena idusidusi oqo, ka kerei ira mera vakaraica na ivakavuvuli eso ena rawa ni vukei keda meda rawata vakalevu cake na duavata ena noda matavuvale ka vakakina ena kalasi ni Goneyalewa. Sureti ira na goneyalewa mera vola ena vava ni volavola na ivakavuvuli era sa raica rawa. Na cava eso na ivakatatao e dau tarovi ira na goneyalewa mera dau duavata? Era na vorata rawa vakacava na ivakatatao oqo? Vakayaloqaqataki ira na goneyalewa mera lalawaka vakaiira yadua mera vakayacora e dua vei ira na ivakavuvuli oqo me vakalevutaki kina na duavata ena nodra matavuvale. Cakacaka vata me tuvanaki na lalawaka vakaoqo me yaco vakalevu cake kina na duavata ena kalasi.

• Me wilika na kalasi na imatai ni lima na parakaravu ni vosa nei Elder D. Todd Christofferson “Lako Mai ki Saioni,” ka vakasaqara na isau ni taro oqo “Na cava na kena ibalebale meda dro tani mai Papiloni ka lako yani ki Saioni?” Wasea tolu na ilawalawa ni kalasi, ka lesia ki na ilawalawa yadua mera wilika na iwasewase ni vosa oqo “Duavata,” “Bula Vakalou,” se “Vukei Ira na Dravudravua.” Sureti ira mera veivosakitaka vakailawalawa na veika e rawa ni ra cakava mera vakayacora kina na ivakavuvuli oqo ni kena taraicake o Saioni ena nodra itikotiko ena gauna oqo vakakina mai muri. Kerei ira mera wasea ki na vo ni kalasi na veika era a veivosakitaka.

• Wasea vakarua na kalasi. Kerea e dua na ilawalawa me wilika ka veitalanoataka na Mosaia 18:21 kei na Vunau kei na Veiyalayalati 97:21, ka kerea na ilawalawa tale ka dua me wilika ka veitalanoataka na Vunau kei na Veiyalayalati 38:27 kei na Mosese 7:18. Sureta na ilawalawa me ra tuva e dua na lesoni e rawa ni ra vakayagataka me vakavulici ki na vo ni kalasi na veika era vulica mai na ivolanikalou (kevaka era gadreva na veivuke, wasea kei ira na “Vakayagataka na iTalanoa kei na iVakaraitaki me Vakavulici na iVakavuvuli ni Kosipeli” ena tabana 22 ni Veivakavulici ena iVakarau ni iVakabula). Kerei ira me ra veiwaseitaka na nodra vakasama. Na cava era sa vulica mai na veivolanikalou oqo ena rawa ni vukea na kena tarai cake o Saioni ena nodra matavuvale, nodra kalasi, kei na nodra tabanalevu se tabana?

• Sureti ira na goneyalewa mera wilika na 4 Nifai 1:1–18 ka vola ena vava ni volavola na vosa se malanivosa eso e vakamacalataka tiko na itikotiko vaka-Saioni era a tauyavutaka na Nifai kei na Leimani ni oti na nona tadu mai na Karisito. Sureti ira mera tuva talega na veika bibi eso era rawa ni cakava vakaiira yadua se vakalasi mera bulataka kina na ivakavuvuli oqo ka vakayaloqaqataki ira na tamata mera cakava vakakina.

Kerei ira na goneyalewa me ra wasea na veika era sa vulica nikua. Na cava era sa bau vakila se nanuma? Era sa kila deivaki li na cava o Saioni? E tiko beka eso tale na nodra vakatataro? Ena veivuke beka me na tauri vakalevu cake na gauna ena ivunau oqo?

Me Veivuke ena Veivakavulici

“Me da kakua ni dau solia na vu ni tukutuku vei ira na iliuliu ni Lotu ni bera ni o vakadeitaka na vuna se na dina ni tukutuku. Ena gauna eda dau wilika kina na ivolanikalou, meda dau qarauna vinaka na kena vakayagataki me vakatautauvatani kei na kena ibalebale se na lewena” (Veituberi, Me iLutua ni Noda Bula [1999], 60).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Vukea yani e dua e sega ni kauwai mai ki na ilawalawa ni veitokani.

• Vaqaqacotaka na veimaliwai kei na dua na lewe ni matavuvale se itokani (raica na Bula va-Kalou ena veika sotavi ena Torocake Yadudua).

Wasea vata kei ira na goneyalewa na veika era na vulica tiko ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.