E rawa vakacava meu tiko e vuravura ka sega ni vakavuravura?

“Ena veika a dau veivolekati kina ena dua na gauna na ivakatagedegede ni Lotu kei na veivakatagedegede ena itikotiko, ena gauna oqo sa dua na maliwa levu e koto kina, ka sa rabailevu cake tiko ga” (Thomas S. Monson, “Kaukauwa ni Matabete,” Ensign se Liaona, Me 2011, 66). Na Turaga e vinakati keda meda dina tiko ga ena Nona ivakatagedegede ka sega ni vakayagataka na ivalavala ca vakavuravura. Ena gauna vata tale ga, e namaki keda o Koya meda veivakayarayarataki vinaka kivei ira era vakavolivoliti keda.

Mo vakarautaki iko vakayalo

Na cava soti na itagede vakavuravura ka ra sega ni vakayagataki vata kei na itagede ni Lotu? Na gauna cava beka o sa digitaka mo matataka kina na veika dodonu? Na nomu ivalavala e sa bau tara vakacava na nomu bula kei na nodra bula eso tale?

E tovolea vakacava o vuravura me vakayarayarataka na sala era raica kina na goneyalewa na itagede ni Turaga? E rawa vakacava mo vukei ira na goneyalewa ena nodra vakavakarau me ra vorata na veivakatovolei? E rawa vakacava me ra rawata na kaukauwa kei na yalodei me ra tu vakataki ira?

Na tiki ni ivolanikalou kei na ivurevure cava tale eso ena vukei ira na goneyalewa me ra vakila ni nodra ivakaraitaki e rawa me vukei ira eso tale me ra tudei ena dina ki na itagede ni Turaga?

2 Tui 6:14–17 (O ira na tamata i Ilaisa era kila ni sa sega ni tu taudua o koya)

Maciu 5:14–16 (E dodonu meda waqaca na noda cina)

Joni 15:19; 1 Nifai 8:24–28 (O ira era muri Karisito e wasoma nodra vosa vakacacataki ka sevaki mai na vuravura)

1 Nifai 15:23–25; Alama 34:39; Ilamani 5:12; V&V 10:5; V&V 27:15–18; 87:8 (Noda tiko rawa e vuravura ka sega ni vakavuravura)

Neil L. Andersen, “Vakadrukai Vuravura,” Ensign se Liaona, Me 2017, 58–62

Mark A. Bragg, “Io ena Tubu Cake tiko ga na nona Rarama me Yacova na Siga Uasivi ko ya.,” Ensign se Liaona, Me 2017, 36–38

Neill F. Marriott, “Wasea Nomu Rarama,” Ensign se Liaona, Nove. 2014, 117–20

“iTukutuku kivei Ira na iTabagone mai na Mataveiliutaki Taumada,” Me iSakisaki ni iTabagone (2011), ii–iii

Vidio: “Bloom Where You’re Planted” “Dare to Stand Alone,” “The Lost Purse,”“195 Dresses”

4:36

4:20

2:41

5:11

Veivakavulici ena ivakarau ni iVakabula

Na iVakabula a sureti Pita me vakadinadinataka ena nona tarogi koya ena dua na taro, “Ia dou sa kaya se ko cei koi au?” Ena nona sauma, a tara na lomana na Yalotabu ka vaqaqacotaka na nona ivakadinadina. Na taro cava soti ena sureti ira na goneyalewa ena nomu kalasi me ra vakadinadinataka ka vakatara na Yalotabu me vaqaqacotaka na nodra ivakadinadina?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Tarogi ira na goneyalewa kevaka era sa bau rogoca vakadua na malanivosa “E dodonu meda tiko e vuravura ka sega ni vakavuravura.” Na cava na ibalebale ni ka oqo vei ira? Na cava soti era sa sotava ka sala vata kei na ivakavuvuli oqo? Sureti ira me ra wasea na veisala a tiko kina e vuravura na iVakabula ia a sega ni vakavuravura. Ena gauna cava a sotava kina o Koya na veivakatovolei ka vorata rawa? Vakauqeti ira me ra wasea na ivolanikalou ka vakaraitaka na nona vorata vakacava na veivakatovolei o Jisu Karisito? E vakauqeti ira vakacava na goneyalewa na Nona ivakaraitaki?
Vakaraitaka e dua na vidio e vakaturi ena ituvatuva oqo ka sureti ira na goneyalewa me ra vakananuma na taro eso oqo ni ra sarava tiko na vidio: Me da bula tiko vakacava e vuravura ka sega ni vakavuravura? Solia vei ira na gauna me ra veivosakitaka na nodra isaunitaro ka wasea na veika era sa sotava ka semati ki na vidio.

Vulica vata

Na veitaviqaravi yadua e ra ena vukei ira na goneyalewa me ra kila nodra rawa ni tiko e vuravura ka sega ni vakavuravura. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Ena papa ni volavola toqa kina oqo “Vakadruka na vuravura e … ” kei na “Vakadruka na vuravura ena rawata mai … ” Kerea vei ira na goneyalewa me ra vulica na vosa nei Elder Neil L. Andersen “Vakadruka na Vuravura” ka vaqara e vuqa na sala me vakaoti kina na veiyatu vosa oqo. Me veivosakitaki na veika era sa kunea. Sureta e dua na goneyalewa ni bera na gauna me vakarautaki koya mai me mai wasea na italanoa me baleti Elder Bruce D. Porter ena vosa nei Elder Andersen (se saravi Elder Andersen ena nona talanoataka na italanoa oqo ena vidio ena nona vosa). Na cava era na cakava beka o ira na tani ena dredre vata oqo? E vakadruka vakacava na vuravura o Elder Porter?
E dua na sala me da vukei ira na goneyalewa me ra kila na vaqara na rarama ena vuravura butobuto oqo, sai koya na kena kau mai e tolu na cinalivaliva ena gauna ni kalasi. Wasea vaka tolu na kalasi ka lesia na iwasewase yadua me ra wilika e dua na iwase ni vosa nei Elder Mark A. Bragg “Io ena Tubu Cake tiko ga na nona Rarama me Yacova na Siga Uasivi ko ya.” Ni oti nodra vulica na vosa oqo, bokoca na cina ka solia e dua na cinalivaliva kina tolu na iwasewase. Gauna era wasea kina na ka era vulica, era rawa ni waqaca na nodra cinalivaliva ka biuta ena lomadonu ni rumu. E vukei keda vakacava na rarama ni cina oqo ena butobuto ni vuravura?
Kerei ira na goneyalewa me ra vola ena papa na veivanua eso era nanuma ni sa vanua tabu. Wilika na Vunau kei na Veiyalayalati 87:8 ka tarogi ira vata na goneyalewa na cava era nanuma, meda tu ena veivanua tabu. Sureti ira me ra vakasamataka vakatitobu na taro oqo sarava e dua na vidio ka vakarautaki ena ituvatuva oqo. Na ikuri ni veivakararamataki cava era sa rawata mai na nodra tu ena veivanua tabu? Na cava era rawa ni ra cakava me vanua tabu vakalevu cake na nodra matavuvale, nodra koronivuli, se na nodra itikotiko raraba?
Sureti ira na goneyalewa me ra wilika na ivolanikalou e volai tu ena ituvatuva oqo (vakayadudua se me vakalasi) ka veivosakitaka se cava era vulica me baleta na vorati ni veitemaki. Era na bulataka vakacava na itagede ni Turaga ni temaki ira tiko o vuravura me ra cakava na kena veibasai se ni ra vosa ni veiwalitaki ena cecere ni nodra itagede? Na cava era vakila ena nodra bulataka na itagede ni Turaga ka vorata na veivakatovolei? Na veika cava soti e sotavi e rawa me ra wasea?
Sureti ira yadua na goneyalewa me ra digitaka e dua na itagede ena Me iSakisaki ni iTabagone se dua na yavu ni lewa ena Torocake Yadudua. Kerei koya me vulica nona itagede se yavunilewa qai wasea vata kei na kalasi na kena ivakalekaleka kei na kena bulataki e sa vukea nona tiko e vuravura ka sega ni vakavuravura.
Kerea e dua na goneyalewa me vakavakarau mai me wasea na veika e vakavuvulitaka o Sisita Neill F. Marriott ena nona vosa me baleta na veivakauqeti ni valetabu ena vanua era tiko kina “Wasea Nomu Rarama.” Sureti ira na goneyalewa me ra vakasaqaqara ena vosa nei Sisita Marriott me baleta na iyatuvosa e vakauqeti ira me ra rarama vei ira na tani ena dua na vuravura ka sa toso cake tikoga na kena butobuto. Solia vei ira e dua na madigi me ra wilika i cake nodra iyatuvosa ka wasea na vuna e vakaibalebale kina vei ira. E rawa ni o ni lewa vata me tuvai e dua na Muavata me ra cakava kina na goneyalewa e dua na posita ka vakaraitaki kina na iyatuvosa era digitaka.

Kerei ira na goneyalewa me ra wasea na veika era sa vulica nikua. Era kila beka me ra tiko vakacava e vuravura ka sega ni vakavuravura? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Cakacaka ena Digidigi kei na Vakatulewa Vakataki Au veika sotavi ena yavunilewa 2 se 3 ena Torocake Yadudua.
Sarava se wasea na vidio e volai tu ena lesoni oqo vata kei na dua na lewe ni matavuvale se itokani ka wasea na veika era vakila me baleti ira.

Kevaka e ganita, sureti ira na goneyalewa me ra wasea na veika era vakila ni uqeti ira me ra cakava ni oti nodra vakayacora na lesoni oqo.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.