Na veiyalayalati cava au a cakava ena papitaiso?

Ena noda a papitaiso, eda sa cakava e dua na veiyalayalati kei na Kalou. Eda yalataka meda na taura na yaca i Jisu Karisito, meda na dau nanumi Koya, talairawarawa kina nona ivunau, ka qaravi koya me tawamudu. Eda vakavouya na veiyalayalati oqo ena veigauna kece eda kania kina na sakaramede.

Mo vakarautaki iko vakayalo

Na cava o se nanuma tiko baleta na nomu papitaiso? Sa vukei iko vakacava ena nomu bula na veiyalayalati ni papitaiso?

Ko na vukei ira vakacava na goneyalewa mera kila vakavinaka cake na yalayala ni papitaiso? Ko na vukei ira vakacava mera vaqaqacotaka na nodra yalodina ki na veiyalayalati?

Na tiki ni ivolanikalou kei na ivurevure cava tale e so e rawa ni vukei ira na goneyalewa mera nanuma ka maroroya na nodra yalayala ni papitaiso?

Joni 3:5; 2 Nifai 31:4–13, 17 (Ena gadrevi na papitaiso ena veivakabulai tawamudu)

Mosaia 18:8–10; V&V 20:37 ( Na yalayala eda cakava ni da papitaiso)

Hugo Montoya, “Vakatovolei ka Temaki—ia Eda Vukei,” Ensign se Liaona, Nove. 2015, 53–55

Robert D. Hales, “Na Veiyalayalati ni Papitaiso: Na Tiko ena Matanitu kei na nomu Lewena na Matanitu,” Ensign, Nove. 2000, 6–9; se Liaona, Janu. 2001, 6–9

Carole M. Stephens, “Sa Kena iNaki Meda Reki Vakalevu,” Ensign se Liaona, Nove. 2013

“ Nomu Veiyalayalati ni Papitaiso,” “ Na Veivakalougatataki Yalataki ni Papitaiso,” Tudei ena Vakabauta (2004), 99–101

Vidio: “Same Jersey,” “Opportunities to Do Good”

Veivakavulici ena ivakarau ni Turaga

E kunea na iVakabula na sala me vukei ira e dau vakavulica me ra vulica ka tubucake—ena sala e ganiti ira. E vukei ira mera raica na lesoni ni kosipeli ena veika era dui sotava. Na cava e rawa ni o cakava mo vukei ira na goneyalewa ko vakavulici ira tiko mera kila se na vukea vakacava na nodra bula ena veisiga na nodra yalayala ni papitaiso?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se digitaka ga na nomu mo vakamacalataka kina na lesoni ni macawa oqo:

Tukuna vei ira na goneyalewa mera raitayaloyalotaka ni ra sa vukea tiko e dua na tacidra tagane se yalewa me na vakarautaki me papitaiso. Era na vukei ira vakacava mera kila na yalayala era na vakayacora ena gauna ni papitaiso? (raica na Tudei ena Vakabauta,tabana e 99–102).
Vakaraitaka e dua naiyaloyalo ni papitaiso (me vaka na Gospel Art Book, 103–4). Wasea na italanoa ni siga ni nomu papitaiso, kei na italanoa ni veika o a vakila. Sureti ira na goneyalewa mera wasea na veika era a vakila ena siga era a papitaiso kina. Tarogi ira se veiyalayalati cava era a vakayacora ena siga o ya. Sureti ira mera vola na nodra isaunitaro ena vava ni volavola ka qai vakuria ena kena sa toso tiko na lesoni, ni ra sa vulica tiko na veika me baleta na nodra veiyalayalati ni papitaiso.

Vulica vata

Na itaviqaravi ka koto qo e ra ena vukei ira na goneyalewa mera kila na yalayala era cakava ena papitaiso. Mai na veivakauqeti ni Yalotabu, digitaka e dua se sivia ka na ganita vinaka duadua na nomu kalasi:

Sureti ira na goneyalewa mera wilika na Mosaia 18:8–10. Na cava era vulica ena sala eda yalataka meda qaravi ira kina eso tale ena gauna eda papitaiso kina? Me vukei ira na cauravou ena nodra vulica na sala ni noda veivukevukei ena colati ni noda icolacola, wasei ira vakailawalawa ka lesia na ilawalawa yadua mera vulica e dua na tiki ni vosa nei Elder Hugo Montoya “Vakatovolei ka Temaki—ia Eda Vukei.” Sureti ira na ilawalawa yadua mera wasea ki na kalasi na veika era sa vakarautaka. Na ilawalawa yadua sa rawa mera cakava e dua na posita ni ka era sa vulica, wasea na veika era sotava yadua ena gauna e veiganiti, se wasea eso na italanoa ena ivolanikalou ka na vukea na vakavulici ni ivakavuvuli vata oya.
Wasea vakatolu na kalasi, ka solia yadua vei iratou e dua vei iratou na tolu na iwasewase ni “Na Nomu Veiyalayalati ni Papitaiso” ena Tudei ena Vakabauta. Sureti ira na iwasewase yadua mera navuca e dua na sala mera vakavulica kina na ka era sa vulica (kena ivakaraitaki, vakayagataka na droini, vola serekali, se dua na qito). Solia vei ira na gauna mera veivakavulici kina vakaiira. Na cava era vakila kina na goneyalewa ni bibi mera maroroya na veiyalayalati oqo?
Sureta e so na goneyalewa mera wilika na Mosaia 18:8–10 kei na so tale mera wilika na V&V 20:79. Tarogi ira mera vaqara na veika era yalataka ena gauna era sa papitaiso kina. Solia yadua na tiki ni pepa vei ira yadua ka tukuna vei ira mera vola na digidigi dredre era sotava qai biuta vata ena dua na koniteina. Sureti ira na goneyalewa mera na qai tomika tiko e yadua na tiki ni pepa mai na koniteina, mera wilika na ka e volai tu kina ka qai wasea e so na vakasama se era na cakava vakacava mera nanuma tiko kina na nodra yalayala ni papitaiso ena nodra sotava tiko na dredre oqori.
Vakaraitaka e dua na iyaloyalo ni nona papitaiso na iVakabula (raica na Gospel Art Book,35), ka kerea e dua na lewe ni kalasi me wilika na 2 Nifai 31:4–10. Sureti ira na goneyalewa mera vakaraitaka se maroroya vakacava na iVakabula na nona yalayala vei Tamada Vakalomalagi (rawa ni ra raica na iyaloyalo ena Gospel Art Book, 36–48, baleta e so na vakasama). Kerei ira mera wasea e so na ka era sa sotava ka ra tovolea kina mera muria na ivakaraitaki ni iVakabula.
Sureti ira na goneyalewa mera wilika e tolu na parakaravu ni vosa nei Elder Robert D. Hales “The Covenant of Baptism: To Be in the Kingdom and of the Kingdom,” me tekivu ena “At baptism we make a covenant with our Heavenly Father.” Kerei ira mera vakaraica na yalayala eda a cakava ena gauna ni papitaiso, qai sureti ira mera vola ena vava ni volavola na veika era sa kunea. Me na veisautaka vakacava na noda bula na papitaiso? Sa veisautaka vakacava na nodra bula na goneyalewa?
Sureti ira na goneyalewa mera wilika na “Nomu Veiyalayalati ni Papitaiso” ena Tudei ena Vakabauta ka vakaraica na yalayala eda cakava ena gauna eda papitaiso kina. Sureti ira na goneyalewa mera sarava e dua na vidio ka vakatututaki tiko ena idusidusi oqo se mera wilika na italanoa ena itekivu ni vosa nei Carole M. Stephens “Sa Kena iNaki Meda Reki Vakalevu.” Kerei ira mera vakaraica na ivakaraitaki ni tamata ka ra doka na nodra veiyalayalati ni papitaiso. Solia vei ira na goneyalewa na gauna mera wasea na ka era sa vulica. Na cava era vakila na goneyalewa ni dodonu mera cakava mera na taqomaka kina na nodra yalayala ni papitaiso ena veigauna kece kei na veivanua kece?

Kerei ira na goneyalewa me ra wasea na veika era sa vulica nikua. Era sa qai kila vakavinaka cake li na nodra yalayala ni papitaiso? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Masulaka na nomu vakadikeva na nodra bula, de so na ka mera sa kakua ni cakava kei na so na ka mera sa tekivu cakava me rawa ni tarai cake na nodra vakabauta na nodra yalayala ni papitaiso. Mera sa na qai tekivu yalataka vakaiira mera sa na tekivu cakava sara ga.
Mera cakacaka yadudua se vakalasi ena veika sotavi ena yavunilewa ni Vakabauta 4 se veika sotavi ena yavunilewa ni Kila-ka 4 ena Torocake Yadudua.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.