Cava na vuna era bibi kina na veiyalayalati ki na noqu bula?

Eda sa cakava na veiyalayalati ena gauna eda ciqoma kina na cakacaka vakalotu me vakataka na papitaiso, vakatikori ki na matabete, kei na cakacaka vakalotu ni valetabu. Na veiyalayalati sai koya na nodrau veidinadinati tabu na Kalou kei ira na Luvena. Sa mai lavaka kina na Kalou na ivakarau eso, ka sa yalataka o Koya me vakalougatataki keda ena gauna eda talairawarawa kina ki na ivakarau oqo. Ena gauna eda vakayacora ka maroroya kina na veiyalayalati, eda sa na vakadonui meda ciqoma na veivakalougatataki sa yalataka tu na Kalou. Ena gauna eda digitaka kina meda kakua ni maroroya na veiyalayalati, eda na sega ni rawa ni ciqoma na veivakalougatataki. Na noda veiyalayalati ena dusimaka na digidigi eda na cakava ka na vukei keda meda vorata rawa na veitemaki.

Mo vakarautaki iko vakayalo

E vakayarayarataka vakacava na nomu bula na veiyalayalati? Na veivakalougatataki cava o sa bau ciqoma ni ko sa veiyalayalati ka vakakina ena nomu bulataka tiko?

Ko na vukei ira vakacava na goneyalewa mera kila deivaki na veiyalayalati era sa cakava kei na kena era na cakava mai muri? Ena uqeti ira vakacava na goneyalewa na nodra kila na veiyalayalati ka saga mera taracake na nodra buladodonu?

Vulica ena yalomasumasu na ivolanikalou kei na ivurevure eso oqo ni ko vakavakarau. Na cava o vakila ni vakauqeti iko mo wasea vei ira na goneyalewa?

Lako Yani 19:5; V&V 35:24; 90:24 (Veivakalougatataki ena yaco mai ni da maroroya na veiyalayalati)

Mosaia 5; Alama 53:10–18; 56:5–8 (iVakaraitaki ni tamata era veiyalayalati ka maroroya tiko na iVola i Momani)

V&V 82:10 (Na Turaga sa yalayala ni da talairawarawa)

Henry B. Eyring, “Luvena Yalewa ni Veiyalayalati,” Ensign se Liaona, Me 2014, 125--l28.

Rosemary M. Wixom, “Bulataki ni Veiyalayalati ena Maroroi Keda, Vakarautaki Keda, ka Vakaukauwataki Keda,” Ensign se Liaona, Me 2014, 116--118

Jean A. Stevens,, “Luvena Yalewa ni Veiyalayalati na Kalou,” Ensign se Liaona, Nove. 2014, 114--17

“Veiyalayalati,” Tudei ena Vakabauta (2004), 197

Vidio: “Walk in His Light” “Press Forward”

Veivakavulici ena iVakarau ni iVakabula

A vakarautaki koya na iVakabula me veivakavulici ena nona dau tiko duadua voli ena masumasu kei na lolo. Ni tiko duadua, e dau vaqara o Koya na veituberi nei Tamana (raica na 3 Nifai 19:19 –23). Muria na veivakauqeti ni Yalo Tabu ena nomu vakavakarau ni vakavulici ira na goneyalewa me baleta na cakacaka vakalotu kei na veiyalayalati.

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se digitaka ga na nomu mo vakamacalataka kina na lesoni ni macawa oqo:

Kerei ira na goneyalewa mera vola na veiyalayalati se yalayala era sa cakava kei na Kalou. Sa tatara vakacava ki na nodra bula na veiyalayalati oqo? Vakauqeti ira mera vakasamataka tiko ena veigauna na taro oqo ena nodra vulica tiko na veiyalayalati ena lesoni oqo.
Sureti ira na goneyalewa mera tukuna na ibalebale ni vosa veiyalayalati (kevaka era gadreva na veivuke, dusimaki ira ki na ivakamacala ni veiyalayalati ena Tudei ena Vakabauta). E tautauvata vakacava ka cava na kena duidui na veiyalayalati mai na veidinadinati, konitaraki, se na yalayala?

Vulica vata

Na itaviqaravi ka ra koto qo e ra ena vukei ira na goneyalewa mera kila na vuna eda ciqoma kina na cakacaka vakalotu ka ia na veiyalayalati. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Vakaraitaka e dua na iyaloyalo ni tamata i Amoni ni ra sa buluta tiko na nodra iyaragi. Kerea e dua na goneyalewa me tukuna vakalekaleka na kedra italanoa na tamata i Amoni kei na veiyalayalati era a cakava (raica na Alama 53:10–18; 56:5–8). Na cava era digitaka kina na tamata mera maroroya na nodra veiyalayalati ka dina ga ni sa tu e matadra na veika rerevaki? Sa qai tarai ira vakacava na kedra meca na nodra ivakaraitaki? E tarai ira vakacava na luvedra? Sureti ira na goneyalewa mera laki vola ena papa ni volavola na yaca ni dua na tamata ka sa vakavulici koya ena ivakaraitaki ni kena maroroi na veiyalayalati. Kerei koya me wasea ki na kalasi na ka e sa vulica mai vua na tamata oqori.
Sureti ira na goneyalewa mera wilika na ivolanikalou (me vaka na kena e volai tu ena ituvatuva oqo) ka laki vola ena papa ni volavola na veivakalougatataki e yalataki tu ena tiki ni ivolanikalou kivei ira era cakava ka maroroya na veiyalayalati tabu. Tarogi ira na goneyalewa se sa vakavotukana vakacava na veivakalougatataki ena nodra bula (vakauqeti ira mera wasea na kena ivakaraitaki). Vakadinadinataka na veivakalougatataki o sa sotava ena nomu maroroya na veiyalayalati.
Sureti ira na goneyalewa mera talevalesu na vosa nei Peresitedi Henry B. Eyring “Luvena Yalewa ni Veiyalayalati” se na vosa nei Sisita Jean A. Stevens “Luvena Yalewa ni Veiyalayalati na Kalou.” Kerei ira mera vakasaqara na ivakaraitaki ni marama kei na goneyalewa ni veiyalayalati ena vosa ka vola ena papa ni volavola na ivakarau era maroroya kina na marama yadua na nona veiyalayalati. Na cava era sa vulica na goneyalewa mai vei ira na marama oqo? O cei tale beka na ivakaraitaki ni yalewa ni veiyalayalati e sa vakauqeta na nodra bula?
Me sarava na kalasi na vidio “Walk in His Light.” Sureti ira na goneyalewa mera vola ni ra sarasara tiko, na ivakaraitaki ni kena vakayacori ka maroroi na veiyalayalati. Ni oti na vidio, sureti ira mera vakasaqara na vosa nei Sisita Rosemary M. Wixom “Na Bulataki ni Veiyalayalati ena Maroroi Keda, Vakarautaki Keda, ka Vakaukauwataki Keda” me raici kina na veivakalougatataki sa yaco mai ena veiyalayalati era sa vola. Kerei ira na goneyalewa mera wasea na veika era sa raica ka veivosakitaka na veituvaki ni bula e rawa ni ra sotava ka vaqaqacotaki se taqomaki mai na nodra veiyalayalati.
Sureti ira na goneyalewa mera raitayaloyalotaka ni ra sa vukea tiko e dua na nodra itokani mai na dua tale na matalotu me kila na veiyalayalati. Sureti ira mera vulica na “Veiyalayalati” ena Tudei ena Vakabauta se na tiki ni ivolanikalou e volai tu eke ka vakarautaka na ka me ra tukuna vei ira na nodra itokani me baleta na veiyalayalati. Sureti ira mera dramataka ni ra sa veivakavulici tiko vakaiira. Kerei ira mera okata ena nodra ivakamacala na vuna e bibi kina vei ira na nodra veiyalayalati.

Kerei ira na goneyalewa mera wasea na veika era sa vulica nikua. Sa qai vinaka cake beka na nodra kila na veiyalayalati? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, sa rawa ni ra:

Vakadikeva na nodra bula ena macawa ka tarava ka vola na veivakalougatataki e yaco ni ra sa talairawarawa ki na nodra veiyalayalati. Vakauqeti ira mera wasea na nodra vakasama kei na nodra nanuma ena veikalasi mai muri.
Wiligusutaka na V&V 82:10 ka vola ena nodra ivolaniveisiga na ka e vakavulica na ivolanikalou o ya me baleta na cakacaka vakalotu kei na veiyalayalati kei na cava era na cakava mera vakavakarau kina ki na veiyalayalati era na vakayacora ena nodra veisiga ni mataka.