Na cava a yaco ena noqu bula taumada?

Ni bera na noda sucu, eda a bula vata tu kei na Tamada Vakalomalagi, ni da sa Luvena vakayalo. Ena Matabose mai Lomalagi, e a vakaraitaka kivei keda na Nona ituvatuva na Tamada, ka sa digitaki kina o Jisu Karisito me noda iVakabula. A saga o Setani me veisautaka na ituvatuva, ena kena kau laivi na noda galala, ka mani cemuri kina o koya kei ira na nona ilawalawa. Eda sa ciqoma na yavu ni Tamada ka digitaka meda na muri Jisu Karisito.

Mo vakarautaki iko vakayalo

Vakasamataka na digidigi dodonu ko sa vakayacora oti ena nomu bula. Sa vukei iko vakacava na nomu digidigi vakadodonu? Ena laki tara vakacava na nomu icavacava tawamudu? Ena vukea vakacava na nomu digidigi vakadodonu na ka o sa kila me baleta na bula taumada?

Vakasamataki ira na goneyalewa ena nomu kalasi. Na digidigi vakacava era sa digidigi tiko kina? Ena vukea vakacava na nodra digidigi vakadodonu ena bula oqo na veika era sa kila me baleta na bula taumada?

Ni ko vakavakarau tiko, masulaka na veitiki ni ivolanikalou ka koto oqo e ra. Na cava o nanuma ni na yaga sara kivei ira na goneyalewa o vakavulica tiko?

iVakatakila 12:7–9, 11 (Ena bula taumada, eda a vakamalumalumutaki Setani ena noda ivakadinadina me baleti Jisu Karisito)

V&V 138:55–56; Eparaama 3:22–26 (O ira na yalo ka ra sa vinaka sara era a digitaki mera mai cakava na cakacaka ni Kalou ena bula oqo)

Mosese 4:1–4 (A saga o Setani me voroka na galala ni tamata ka sa mani cemuri tani)

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129.

“Yavu ni Veivakabulai,” Tudei ena Vakabauta (2004), 210–211

Veivakavulici ena ivakarau ni Turaga

Tukuna na iVakabula, “Sa sega ni noqu na noqu ivakavuvuli, sa nona ga ka talai au mai” (Joni 7:16). E vakavulica o Koya na ivunau ka vulica mai Vua na Tamana. Ko na vakadeitaka vakacava ni ko sa vakavulica tiko na ivakavuvuli dina?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se na nomu nanuma ga mo vakamacalataka kina na lesoni ni macawa oqo:

• Vola ena papa ni volavola, “Na cava e a yaco ena noda bula taumada?” Sureti ira na goneyalewa mera vola na levu ga ni ka era nanuma rawa me saumi kina na veika era sa vulica tiko me baleta na bula taumada.

• Kerei ira na goneyalewa mera nanuma ka wasea na digidigi dodonu era sa cakava oti, kei na sala cava e sa vakalougatataki ira kina na digidigi oqori. Qai tarogi ira se na digidigi cava era a cakava ni se bera ni ra sucu. Sa tara vakacava na nodra bula na digidigi oqori?

Vulica vata

Raica eso tale na vakasama ni vuli kei na veivakavulici.

Na veitaviqaravi yadua ka koto qo e ra ena vukei ira na goneyalewa mera vulica na bula taumada. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

• Sureti ira na goneyalewa mera vulica ena kalasi, se vakailawalawa se yadudua na ivolanikalou ena ituvatuva oqo. Sureti ira mera wasea na ka era sa vulica me baleta na bula taumada, kei na vuna e bibi kina vei ira na ivakavuvuli oqo. Wasea talega na nomu vakasama me baleta na ka o sa kila.

• Kerei ira na goneyalewa mera wilika na imatai ni tolu na parakaravu e “Na Matavuvale: Ai Vakaro ki Vuravura Raraba,” ka vakilakila na veika era sa vulica me baleta na nodra bula taumada. Sureti ira mera wilika na kena iwase ka vakatokai “A Unique Feminine Identity” mai vei Peresitedi Dieter F. Uchtdorf “The Influence of Righteous Women,” ka kerei ira mera wasea na veika era sa raica ena nodra itutu vakaluvena yalewa na Kalou.

• Sureti ira na goneyalewa mera wilika na kena iwase ka vakatokai “Na Bula Taumada” ena Tudei Ena Vakabauta (tabana e 210–211) ka vola na taro ena rawa ni saumi mai na kena wiliki na itukutuku e tiko kina. Mera veisau taro ka vaqara na kena isau. Sureti ira mera wasea na veika era sa kunea rawa.

• Sureti ira na goneyalewa mera cakava yadudua se vakailawalawa na veika era sotava ena Individual Worth 1 mai na Torocake Yadudua. Solia na gauna vei ira na goneyalewa ena kalasi mera droinitaka na veika dina era sa vulica me baleta na nodra sa luvena yalewa na Kalou. Mera na qai vakaraitaka vei ira na kalasi na nodra droini.

Kerei ira na goneyalewa mera wasea na veika era sa vulica nikua. Sa matata beka vei ira na bula taumada? Na cava era sa bau vakila se vakanananu kina? E tiko tale beka eso na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Qarauna mo kakua ni taroga na taro ena vakavuna na veileti se na vakalevulevui ni ka e sega na kena yavu . Kua ni dau taroga na taro e vakavuna na vakatitiqa se na veivosakitaki ni ka ena sega ni rawa ni yaco kina na veivakauqeti. Nanuma tiko ni nomu taro me kauti ira vata mai na lewe ni kalasi mera duavata ena vakabauta kei na loloma” (Veituberi, Me iLutua ni Noda Bula [1999], 80).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

• Vakavulica vei ira na tacidra gone se vua e dua na nodra itokani ka sega ni kila tu na bula taumada.

• Vakasamataka na taro oqo: Ena tara vakacava na noqu digidigi ena bula oqo na noqu kila na veika me baleta na bula taumada? Vakatura mera vola na goneyalewa na isau ni taro ena nodra ivolaniveisiga.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.