Na cava na yavu ni veivakabulai?

Sa vakarautaka tu na Tamada Vakalomalagi e dua na yavu me rawa ni da na veiucui vata kei Koya. Na yavu e oka kina na Veibuli, na Lutu, na Veisorovaki i Jisu Karisito, na lawa, cakacaka tabu vakalotu, kei na ivunau taucoko sara ni kosipeli. Na yavu oqo ena rawa kina meda vakataucokotaki ena vuku ni Veisorovaki, vakasinaiti ena marau, ka laki bula vata tale kei na Kalou.

Mo vakarautaki iko vakayalo

Sa vukea vakacava na nomu kila na yavu ni Tamada Vakalomalagi na nomu digidigi kei na ka o sa kila me baleta na bula. Na iwase cava ni yavu ni veivakabulai o na gadreva mo kila vakalevu cake?

Ena vukea vakacava na nodra digidigi vakamatau na goneyalewa na kilai ni yavu ni veivakabulai?

Wilika ena yalomasumasu na ivolanikalou kei na ivurevure eso oqo. Na cava ena vukei ira na goneyalewa mera kila vakavinaka na yavu ni veivakabulai?

1 Korinica 15:20–22 (Ena mate kece na tamata)

Iperiu 12:9 (Na Kalou e Tama ni yaloda)

iVakatakila 20:12–13; 2 Nifai 9:10–11; Alama 5:15–21 (Na tamata kece ena tucake tale ka na tu ena mata ni Kalou me lewai)

2 Nifai 2:22–25 (Na Lutu nei Atama e kauta mai na bula vakayago)

Alama 34:32–33 (Na bula oqo sa gauna ni veivutuni)

Alama 40:11–14 (Na ituvaki ni tamata ena gauna sa mate kina)

Alama 42:5–15 (Vakavulica o Alama vei na luvena o Korianitoni na yavu ni veivakabulai)

V&V 76:30–113 (iVakamacala ni matanitu ni lagilagi)

Weatherford T. Clayton, “Na iTuvatuva Lagilagi nei Tamada,” Ensign se Liaona, Me 2017, 26–29

Thomas S. Monson, “Na Sala Vinaka Sara ni Bula Marau,” Ensign se Liaona, Nove. 2016, 80-81

“Yavu ni Veivakabulai,” Tudei ena Vakabauta (2004), 210–211

Vidio: “Men’s Hearts Shall Fail Them”

3:24

Vidio: “The Plan of Salvation”

10:35

Veivakavulici ena ivakarau ni Turaga

Na iVakabula a taroga na taro e vakavuna vei ira era rogoci Koya mera vakasamataka vakatitobu. E dau via kila saraga o Koya na isaunitaro era dau kaya. Ko na taroga vakacava na taro me baleta na kosipeli mena vakavuna mera vakasamataka kina vakatitobu na goneyalewa?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se na nomu nanuma ga mo vakamacalataka kina na lesoni ni macawa oqo:

Vola ena vava ni volavola, “Na cava na yavu ni veivakabulai? Tarogi ira na goneyalewa se sala cava soti e rawa ni ra sauma kina na taro oqo. Vakauqeti ira mera vakasamataka tikoga na nodra isau ni taro ni ra vulica na yavu ni veivakabulai ena lesoni nikua.
Kauta mai e tolu na iyaloyalo se dua na ka me vakatakarakarataka na Veibuli, na Lutu, kei na Veisorovaki (me kena ivakaraitaki, qele me baleta na veibuli, dua na apolo me baleta na Lutu kei na dua na bilo ni sakaramede me baleta na Veisorovaki). Kerei ira na goneyalewa mera wasea na ka era sa vulica me baleta na veika a yaco kei na vuna e bibi kina.

Vulica vata

Na itaviqaravi kece e koto qo e ra ena vukei ira na goneyalewa mera vulica na yavu ni veivakabulai. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Kerea e dua na goneyalewa me vakarau mai me wasea na italanoa mai na vosa nei Peresitedi Thomas S. Monson “Na Sala Vinaka Sara ni Bula Marau.” Ena sauma vakacava na goneyalewa na taro me baleta na yavu ni veivakabulai ke a veitalanoa tiko kei na dua na itokani mai na dua tale na vakabauta: Eda lako mai vei? Na cava eda mai tiko kina eke? Eda na lako kivei ni sa cava na bula oqo? Sureti ira me ra vakayagataka na vosa nei Elder Weatherford T. Clayton “Na iTuvatuva Lagilagi nei Tamada” kei na ivolanikalou me ra vakarautaka kina na isau ni dua vei ira na taro. Na cava e bibi kina meda na kila tiko na isau ni veitaro oqo?
Ni se vo toka e vica na siga, kerea e so na goneyalewa mera vakarau tiko mai mera na mai vakavulica e so na iwase ni yavu ni veivakabulai (me vaka na bula taumada, bula vakayago oqo, vuravura ni yalo, kei na so tale) ena vakayagataki ni Vunautaka na Noqu Kosipeli se Tudei ena Vakabauta. Droinitaka e dua na irairai ni yavu ni veivakabulai ena vava ni volavola (kena ivakaraitaki, raica na Vunautaka na Noqu Kosipeli,54), ka qai sureti ira na goneyalewa mera vakavulica na nodra dui ulutaga. Tarogi ira na goneyalewa se cava e duidui kina ena nodra bula na kena kilai na yavu ni veivakabulai.
Lesia yadua vei ira na goneyalewa na veitiki ni ivolanikalou e tiko ena ituvatuva oqo. Kerei ira mera wilika na nodra tikina ka qai vakilakila se tiki ni yavu ni veivakabulai cava e tukuna tiko na tikina era sa wilika. Sureti ira mera wasea na ka era sa vulica mai na tikina era sa wilika. Ena tara vakaevei na noda dau raici keda, raici ira na tani kei na veika e vakavolivoliti keda, na kilai ni yavu?
Wilika ena kalasi na Alama 12:30 kei na Alama 42:13–15. Sureti ira na goneyalewa mera vakaraica na itomo ni vosa ka vakamacalataka tiko na yavu ni veivakabulai. Na cava era vakavulica na itomo ni vosa oqo me baleta na yavu? Vakaraitaka na vidio “Men’s Hearts Shall Fail Them,” ka qai tarogi ira na goneyalewa mera vakaraica se a vukei Elder Russell M. Nelson vakacava na veika e sa kila tu me baleta na yavu ni veivakabulai. Sureti ira na goneyalewa mera wasea na sala e sa vukei ira kina na veika era sa kila tu me baleta na yavu ni veivakabulai.

3:24
Sureti ira na goneyalewa mera wilika na Alama 42:5–15, ka vakaraica na itomo ni vosa e vakayagataka o Alama me vakamacalataka kina na yavu ni Kalou me baleti ira na luvena. Ni ra sa raica rawa na itomo ni vosa, mera na laki vola sara ena vava ni volavola. Na cava e vakavulica vei keda na itomo ni vosa oqori me baleta na yavu ni Tamada Vakalomalagi?
Vakadeitaka ni o ira kece na tiko ena kalasi era sa yadua tiko na ilavelave ni Tudei ena Vakabauta, ka lesia yadua na goneyalewa ki na naba 1 kei na 3. Kerei ira era tiko ena naba 1 mera vulica mai ena Tudei ena Vakabauta na veika me baleta na bula taumada (tabana e 210–211); kerei ira na naba 2 mera vulica na bula vakayago (tabana e 116); ka kerei ira na naba 3 mera vulica na bula ni sa yaco oti na mate (tabana e 116–17). Mera cakacaka vakailawalawa, mai na naba era dui taura, mera vakarautaka e dua na ituvatuva lekaleka sara mai na ka era sa vulica, ka mai vakamacalataka kivei ira na vo ni lewe ni kalasi. Sureti ira na goneyalewa mera vakasamataka mada se na vakacava tu na ituvaki ni nodra bula, kevaka me a sega ni tu vei ira na kila oqo me baleta na yavu ni veivakabulai.

Kerei ira na goneyalewa mera wasea na veika era sa vulica nikua. Sa vinaka cake beka na ka era sa kila me baleta na yavu ni veivakabulai? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Wasea na nodra vakavinavinaka me baleta na yavu ni veivakabulai.
Vakavulica e so na ka era sa vulica me baleta na yavu ni veivakabulai kivua e dua na itokani se lewe ni matavuvale. Ni ra veivakavulici voli, sa rawa ni vakayagataki e dua na ilavelave era sa vakarautaka tu me baleta na yavu ni veivakabulai.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.