E rawa ni vukei au vakacava na veivakalougatataki vakapeteriaki?

Na veivakalougatataki vakapeteriaki sai koya na ivakatakila kivei keda yadua me baleta na noda bula. Ena vukei keda meda kila na veika eda na rawata kei na veivakalougatataki eda na rawa ni ciqoma kevaka eda sa yalodina tiko. Ena rawa ni umani tiko kina na yalayala eso, veivakasalataki, se veivakaroti me dusimaka na noda bula. Ena vukei keda talega meda kila ni sa kilai keda na Tamada Vakalomalagi ka kauwaitaki keda tiko vakayadua.

Mo vakarautaki iko vakayalo

Kevaka o sa ciqoma na nomu veivakalougatataki vakapeteriaki, e sa dusimaka tiko vakacava na nomu bula? E sa vukei iko vakacava ena gauna dredre? E sa vakauqeti iko vakacava?

Na sala cava ena rawa me idusidusi kina na veivakalougatataki vakapeteriaki ki na nodra bula na goneyalewa o vakavulici ira tiko? Na cava e bibi kina vei ira mera kila na veisemati mai ni nodra kawa ena mataqali i Isireli? O na vukei ira vakacava mera vakavakarau ni ciqoma na nodra veivakalougatataki vakapeteriaki?

Ni ko vakavakarau, vulica ena masumasu na ivolanikalou kei na ivurevure oqo. Na cava o raica ena veivuke vakalevu kivei ira na goneyalewa o vakavulici ira tiko?

Alama 16:16–17; 3 Nifai 17:2–3 (E dodonu meda vakarautaka na yaloda meda ciqoma na ivakasala mai vua na Turaga)

3 Nifai 20:25–27 (Na mataqali i Isireli e vakalougatataka na matavuvale kei vuravura)

V&V 82:10; 130:20–21 (Na veivakalougatataki e lavaki kina na talairawarawa)

Henry B. Eyring, “ Vukei Ira Mera Dau Ta iCake,” Ensign se Liaona,, Nove. 2012, 60–67

Julie B. Beck, “ Sa Tu Vei Kemuni na Dodonu Vakakawa Vakamarama,” Ensign se Liaona, Me 2006, 106–8

Carlos A. Godoy, “Sa Tiko na iTuvatuva ni Turaga Baleti Keda!” Ensign se Liaona, Nove. 2014, 96-98.

“ Veivakalougatataki Vakapeteriaki,” Tudei ena Vakabauta (2004), 185–86

Vidio: “Face to Face with President Eyring and Elder Holland: How can I get comfort from my patriarchal blessing?”

Veivakavulici ena ivakarau ni iVakabula

Na iVakabula e kilai ira na goneyalewa ena nomu kalasi, ka kila tu o Koya na ka era na rawata. E raica o Koya na sala cecere mera vukei yadua kina mera vuli ka tubu. Ko na vakavulica vakacava na loloma ni iVakabula kivei ira na goneyalewa ni ko vakamacalataka tiko na veivakalougatataki vakapeteriaki?

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki mai ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se na nomu nanuma eso mo vakamacalataka kina na lesoni ni macawa oqo:

• Kevaka e sa tiko na nomu veivakalougatataki vakapeteriaki, vakaraitaka vei ira na goneyalewa na kena irairai (ka kakua ni wasea na kena itukutuku). Wasea vei ira na kena sa vakalougatataka na nomu bula.

• Vola ena vava ni volavola, “E rawa ni vukei au vakacava na veivakalougatataki vakapeteriaki?” Kerei ira na goneyalewa mera tukuna mai na isau ni taro oqo. Mo raicalesu na taro oqo ena gauna taucoko ni lesoni. Me tiki ni nomuni veivosaki, sa rawa mo ni wasea na italanoa nei Elder Carlos A. Godoy me baleta na kena a vukei koya na nona veivakalougatataki vakapeteriaki me baleta na nona vakatulewa bibi ena nona bula (raica na “Sa Tiko na iTuvatuva ni Turaga Baleti Keda!” Ensign se Liaona, Nove. 2014, 96-98

Vulica vata

Raica eso tale na vakasama ni vuli kei na veivakavulici .

Na itaviqaravi yadua e ra ena vukei ira na goneyalewa mera vulica na veika e baleta na veivakalougatataki vakapeteriaki. Mai na veivakauqeti ni Yalotabu, digitaka e dua se sivia ka na ganita na nomu kalasi:

• Sureta e dua se rua na goneyalewa me wasea na veika e sa sotava ena nona ciqoma na veivakalougatataki vakapeteriaki (se wasea na nomu o iko). Sa vukei ira beka vakacava na veivakalougatataki vakapeteriaki? (Tokaruataka vei ira na goneyalewa ni sa ka tabu na usutu ni itukutuku ni veivakalougatataki vakapeteriaki ka me kakua ni wasei.) Kotiva vakatikina lalai e dua na ilavelave ni itukutuku “About Patriarchal Blessings” me baleta na taro kei na kena isau yadua. Sureti ira na goneyalewa mera taura yadua yani e dua na tikina ka wasea ki na kalasi na taro kei na kena isau. Na cava tale eso na nodra vakatataro na goneyalewa?

• Ena veivakadonui nei bisopi, sureti peteriaki ni iteki me mai vosa vei ira na goneyalewa baleta na veivakalougatataki vakapeteriaki. Vakauqeti ira na goneyalewa mera taro mai. Me kena ikuri, sa rawa mo vakaraitaka na vidio oqo “Face to Face with President Eyring and Elder Holland: How can I get comfort from my patriarchal blessing?”

• Kerei ira na goneyalewa mera vola na taro eso e baleta na veivakalougatataki vakapeteriaki. Me raica vata na kalasi na kena isau ena Tudei ena Vakabauta,draunipepa 185–86.

• Me wilika vata na kalasi na wase eso ni nona vosa o Julie B. Beck “Sa Tu Vei Kemuni na Dodonu Vakakawa Vakamarama” kei na ivakamacala nei Peresitedi Henry B. Eyring me baleta na nona veivakalougatataki vakapeteriaki ena “Vukei Ira Mera Dau Ta iCake.” Ni wiliki oti na wase yadua, sureti ira na goneyalewa mera vola e dua na ivakaleka ni itukutuku ni veika era sa vulica me baleta na veivakalougatataki vakapeteriaki.

• Sureti ira na goneyalewa mera wilika na ivolanikalou era sa vakaturi tiko ena ituvatuva oqo ka mera wasea na veika era vakila ni vakavulica tiko na ivolanikalou me baleta na veivakalougatataki vakapeteriaki.

Kerei ira na goneyalewa mera wasea na veika era sa vulica nikua. Era sa kila deivaki tiko beka na veivakalougatataki vakapeteriaki? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Ni dua sa taro, solia na gauna mera sauma mai o ira tale eso ka me kua mada ni ko sauma. Me vakataka, ni o rawa ni kaya, “Oqori e taro vinaka. Na cava na nomuni nanuma oi kemuni na kena vo?’ se ‘E rawa ni dua e veivuke ki na taro oqo?” ( Veituberi, Me iLutua ni Noda Bula [1999], 77).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa mera vakasamataka na sala mera bulataka kina na veika era sa vulica nikua. Kena ivakaraitaki:

• Sa rawa mera vakacavara na nodra Veika e sotavi ena yavunilewa 2 ni Keda Yaga Yadua mai na Torocake Yadudua.

• Kevaka era sa ciqoma oti na nodra veivakalougatataki vakapeteriaki, sa rawa mera vulica ka nanuma tiko na ivakasala, ivakaro, isolisoli vakayalo, kei na veivakalougatataki era tiko kina.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.