Cava na vuna e bibi kina na vakarorogo kei na nodra vakamuri na parofita bula?

Eda sa tokoni ira na lewe ni Mataveiliutaki Taumada kei na Kuoramu ni iApositolo Le Tinikarua mera sa parofita, daurairai, ka dauvakatakila. Na nodra ivakavuvuli sa tukuna tiko na lewa ni Turaga. Era solia vei keda na ivakasala, veivakaroti, kei na veidusimaki mai vua na Turaga me baleta na noda gauna oqo. Eda sa vakalougatataki ena veitaqomaki, vakacegu, ka vakaukauwataki vakayalo ni da vakarorogo ka vakamuria na nodra ivakasala.

Mo vakarautaki iko vakayalo

Na ivakasala cava era sa solia na parofita bula o sa bulataka tiko vakaiiko? O sa vakalougatataki vakacava ena nomu muria na ivakasala o ya?

Na cava e bibi kina vei ira na goneyalewa ena nomu kalasi me tiko na nodra ivakadinadina me baleti ira na parofita bula? O na vukei ira vakacava mera raica ni sa dua dina na madigi cecere na nodra dusimaki ira tiko na parofita bula ena gauna oqo?

Vulica ena masumasu na ivolanikalou kei na ivurevure oqo. Na cava soti o sa vakauqeti kina mo wasea vei ira na goneyalewa?

Emosi 3:7; V&V 1:4, 37–38; Mosese 6:26–38 (E vosa tiko vei keda na Turaga mai vei ira na Nona parofita)

V&V 21:1, 4–7 (Sa yalataka tu na Turaga na veivakalougatataki cecere kivei ira era muria na parofita.

Ronald A. Rasband, “Tu Vata Kei Ira na iLiuliu ni Lotu,” Ensign se Liaona, Me 2016, 46–49

David A. Bednar, “Kacivi me ra Tukuna Yani na Yacaqu,” Ensign se Liaona, Nove. 2015, 128–31

M. Russell Ballard, “Tikoga ena Lomani Boto ka Tautauri Toka!” Ensign se Liaona, Nove. 2014, 89-92.

Carol F. McConkie, “Bula me Vaka na Nodra Vosa na Parofita,” Ensign se Liaona, Nove. 2014, 77-79

“iTukutuku mai na Mataveiliutaki Taumada,” Me iSakisaki ni iTabagone (2011), ii–iii.

“Parofita,” Tudei ena Vakabauta (2004), 103–104

Vidio: “We Need Living Prophets”

Veivakavulici ena ivakarau ni iVakabula

E dau taro na iVakabula vei ira e dau vakavulica ka solia na madigi mera taroga na nodra taro. Na taro cava o rawa ni taroga ena vukei ira na goneyalewa mera vakasamataka ka vakananumi ira vakatitobu na parofita bula? Ko na vakaraitaka vakacava ni ko sa kauwai ki na nodra isau ni taro?

Veisemati ni iTaviqaravi ni iTabagone

iVakatakilakila

Tuva e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica ena lesoni oqo.

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki mai ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se na nomu nanuma eso mo vakamacalataka kina na lesoni ni macawa oqo:

Tarogi ira na goneyalewa se na cava era na kaya ke dua na itokani ni dua tale na matalotu e taroga vei ira na ivakasala cava e sa solia vei ira na itabagone na nodra parofita. Me wilika na kalasi na imatai ni parakaravu ni “iTukutuku mai na Mataveiliutaki Taumada” ena Me iSakisaki ni iTabagone. Tarogi ira na goneyalewa na vuna era nanuma kina ni sa ka bibi na vakarorogo kei na vakamuri ira na parofita bula.
Sureti ira na goneyalewa mera vakasamataka ka wasea e dua na italanoa mai na iVola i Momani e vakaraitaka tiko na kena gadrevi na vakarorogo kei na vakamuri ni parofita bula. Eso na ivakaraitaki e rawa ni oka kina na kena italanoa o Liai, Tui Penijamini, Apinatai, se o Samuela na Leimani. Na cava era sa vulica mai na italanoa oqo? Na cava soti era sa sotava oti na goneyalewa e rawa ni ra wasea ena gauna era a vakamuria kina na ivakasala ni parofita?

Vulica vata

Na itaviqaravi yadua e ra ena vukei ira na goneyalewa mera kila vakavinaka na bibi ni nodra vakamuri ira na parofita bula. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Lesia ki na goneyalewa yadua e dua na ivolanikalou e vakaturi tiko ena ituvatuva oqo ka kerei koya me vakasaqara na vuna eda gadreva kina e dua na parofita kei na veivakalougatataki e yaco mai ena noda vakamuria na parofita. Sureti ira na goneyalewa mera wasea na nodra nanuma. Wasea na ka o sotava ni ko vakamuria na ivakasala ni parofita, ka vakadinadinataka na veika o sa vulica mai na nomu cakava oqo. Sureti ira na goneyalewa mera wasea na veika era dui sotava.
Wilika na tiki ni vosa nei Elder Ballard e vakatauvatana tiko kina o koya na parofita bula ki na dua na idusidusi ni veivakaleleci ena uciwai, ka vola na veika e tautauvata kina na idusidusi ni veivakaleleci ki na dua na parofita. Sureta na kalasi mera vakasamataka ka wasea eso tale na ka vakatautauvata era rawa ni vakayagataka mera vakavulica kina eso me baleta na bibi ni nodra vakamuri na parofita kei na iapositolo.
Vakaraitaka na kedra itaba na Mataveiliutaki Taumada kei na Kuoramu ni iApositolo Le Tinikarua (me vakataka na ilavelave ni koniferedi ena Ensign se Liaona ). Cavuta na nomu ivakadinadina ni o ira kece na turaga oqo era sa parofita, daurairai, ka dauvakatakila. Sureti ira na goneyalewa mera vola ena vava ni volavola na ivakasala era solia mai na parofita bula (kauta mai ena ilavelave ni Ensign se Liaona ni koniferedi raraba se qai oti toka ga oqo mera nanuma kina). Sa vakalougatataka vakacava na nodra bula kei na bula ni nodra matavuvale na vakamuri ni ivakasala oqo?
Solia e dua na kadi lailai vei ira yadua na goneyalewa. Sureti ira na goneyalewa mera wilika e dua na vosa buta katakata nei Peresitedi Monson ka mera raica e dua na itukutuku era gadreva mera vola ena kadi ka mera qai kauta ki vale ka ukutaka ena nodra rumu se biuta toka ena nodra ivolanikalou. Kerei ira mera wasea na nodra itukutuku oqo ka vakamacalataka na vuna era digitaka kina.
Vakaraitaka na vidio “We Need Living Prophets” se wilika vata na tiki eso ni vosa nei Elder David A. Bednar “Kacivi Mera Tukuna Yani na Yacaqu.” Sa rawa talega mo wilika na wase “Parofita” ena Tudei ena Vakabauta. Sureti ira na goneyalewa mera raica na cava e bibi kina na vakarorogo ka vakamuri ira na parofita bula. Kerei ira mera wasea na veika era sa raica. Sureti ira na goneyalewa mera wasea na nodra ivakadinadina baleti ira na parofita.
Wasea vei ira na kalasi na malanivosa oqo mai na vosa nei Sisita Carol F. McConkie “Bula Me vaka na Nodra Vosa na Parofita”: “Ena itovo vakavuravura, na muria na parofita ena rairai sega ni ka cecere, cala vakapolitiki, se sega ni tokoni raraba. Ia na muria na parofita sa dina tu ga.” (Ensign se Liaona, Nove. 2014, 78). Na cava eso na iulubale era dau tukuna na tamata me vuni nodra sega ni muria na parofita? Sureta na lewe ni kalasi mera vakasaqara ena vo ni vosa nei Sister McConkie se vosa nei Elder Ronald A. Rasband “Tu Vata Kei Ira na iLiuliu ni Lotu” baleta na veika era rawa ni kaya vua e dua e via vakayalolailaitaki ira mera muria na parofita. Kerei ira me ra wasea na veika era sa raica.

Kerei ira na goneyalewa mera wasea na veika era sa vulica nikua. Era sa kila deivaki beka na nodra gadrevi vakabibi na parofita bula? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Kerea e vica vei ira mera wasea na veika era sa vakauqeti kina mera cakava.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica mai na lesoni oqo.